លោកនាយករដ្ឋមន្ត្រី ហ៊ុន សែន ព្រមានមន្ត្រីបក្សប្រឆាំងដែលមកចុះចូលជាមួយគណបក្សកាន់អំណាចត្រូវស្មោះត្រង់ ហើយបើហ៊ានក្បត់លោកគឺមិនរួចខ្លួនឡើយ។ មន្ត្រីសង្គមស៊ីវិលលើកឡើងថា សារព្រមានរបស់លោក ហ៊ុន សែន បែបនេះ ហាក់បង្ហាញថា លោក ហ៊ុន សែន ប្រើប្រាស់ប្រព័ន្ធតុលាការជាអាវុធដើម្បីបម្រើប្រយោជន៍នយោបាយរបស់ខ្លួន។
លោក ហ៊ុន សែន នៅតែមិនទាន់ជឿជាក់ថា សកម្មជន និងមន្ត្រីបក្សប្រឆាំង ដែលមកចុះចូលជាមួយលោក មានចិត្តស្មោះចំពោះលោកនៅឡើយទេ។ លោក ហ៊ុន សែន ឱ្យដឹងថា លោកមិនព្រមលើកលែងទោសទាំងស្រុងឱ្យអ្នកចុះចូលនោះទេ ហើយចំពោះសំណុំរឿងនៅសេសសល់ គឺគ្រាន់តែតម្កល់ទុកមិនចាត់ការប៉ុណ្ណោះ។ មេដឹកនាំក្រាញអំណាចរូបនេះ ព្រមានថា បើអ្នកដែលចុះចូលទាំងនោះមិនស្មោះត្រង់ជាមួយ ពួកគេប្រឈមនឹងការវិធានការផ្លូវច្បាប់គ្រប់ពេល ដែលជាការសើរើលើបទល្មើសចាស់ ឬសំណុំរឿងដែលមិនទាន់បានលើកលែងទោសនោះ។
លោក ហ៊ុន សែន៖«បើអ្នកឯងគ្រាន់តែបោកប្រាស់ខ្ញុំ ក៏អ្នកឯងអត់រួចដែរ ក្នុងចំណោមសំណុំរឿងប្រាំលើកលែងបានតែមួយសល់បួនទៀត ហើយឥឡូវលើកលែងហើយ យើងដកដីកាចាប់ខ្លួន ហើយទុកសំណុំរឿងមួយកន្លែង ធ្វើមិនដឹងមិនលឺ ប៉ុន្តែបើអ្នកឯងហ៊ានក្បត់ជាមួយការសន្យាជាមួយខ្ញុំ ហើយពេលហ្នឹងអ្នកឯងអត់នៅក្រៅប្រទេសទៀតទេ អ្នកឯងចូលមកក្នុងស្រុកហើយ អ៊ីចឹងទេ អ្នកឯងក៏ចេញទៅក្រៅវិញអត់រួចដែរ»។
លោក ហ៊ុន សែន ព្រមានអ្នកចុះចូលជាមួយលោកដូច្នេះ ក្នុងពេលជួបជាមួយកម្មកររោងចក្រនៅខេត្តពោធិ៍សាត់ ថ្ងៃទី៣០ ខែមិថុនា។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា កត់សម្គាល់ថា ការព្រមានរបស់លោក ហ៊ុន សែន ដែលថា ចាត់វិធានការផ្លូវច្បាប់លើអ្នកក្បត់នឹងលោក តែបើអ្នកចុះចូលជាមួយលោកគឺរួចទោសបែបនេះ ហាក់ជាការបង្ហាញថា ជាគណបក្សកាន់អំណាចប្រើប្រាស់ប្រព័ន្ធតុលាការដើម្បីបម្រើនយោបាយរបស់ខ្លួន។ មន្ត្រីសង្គមស៊ីវិល រូបនេះ បន្តទៀតថា អ្នកដែលចុះចូលជាមួយគណបក្ស ដោយសម្លឹងឃើញផលប្រយោជន៍ ឬដោយការភ័យខ្លាចទាំងនោះ មិនមែនធនធានល្អឡើយ ឬអាចទុកចិត្តបានឡើយ ហើយអ្នកទាំងនោះនៅថ្ងៃណាមួយនឹងរត់ចោលលោក ហ៊ុន សែន វិញ នៅពេលលោក ហ៊ុន សែន លែងផ្ដល់ផលប្រយោជន៍ដល់ពួកគេ។
លោក រស់ សុដ្ឋា៖«ពួកហ្នឹងក៏អត់សូវរឹងមាំដែរ នៅពេលគណបក្សណាមួយដែលមានអំណាច អាចផ្ដល់លាភសក្ការៈឱ្យគាត់ ក៏គាត់ទៅទៀតដែរ មានពីរក្រុមណា ក្រុមមួយក្រុមដែលមានភក្ដីជាមួយគណបក្សខ្លួន ប៉ុន្តែ ឥឡូវចុះចូលដើម្បីយកតែសុខយករួចខ្លួនសិនទៅណា ហើយមួយទៀត គេហៅថា ក្រុមស្វែងរកលាភកន្លែងណាអត់លាភរត់ចោល»។
ទោះបីយ៉ាងណាអ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធ ថា គណបក្សកាន់អំណាចមិនមែនយកប្រព័ន្ធតុលាការបម្រើប្រយោជន៍នយោបាយរបស់ខ្លួននោះទេ ប៉ុន្តែប្រសិនបើសកម្មជនបក្សប្រឆាំងដែលចុះចូលជាមួយគណបក្សកាន់អំណាចចង់រួចផុតការចោទប្រកាន់តាមផ្លូវតុលាការគឺត្រូវឈប់ធ្វើសកម្មភាពប្រឆាំងនិងត្រូវផ្ដាច់ខ្លួនពីលោក សម រង្ស៊ី។
ទោះយ៉ាងណា រដូវបោះឆ្នោតនេះ គណបក្សកាន់អំណាច បន្តធ្វើទុក្ខបុកម្នេញលើសកម្មជនប្រឆាំងនៅស្មោះស្ម័គ្រជាមួយលោក សម រង្ស៊ី ទន្ទឹមគ្នានេះដែរ គណបក្សប្រជាជនកម្ពុជា ក៏កំពុងប្រមូលទិញសកម្មជនបក្សប្រឆាំង ឬអ្នកឱ្យធ្លាប់សរសេរគាំទ្រគណបក្សសង្គ្រោះជាតិ ដោយមានការផ្ដល់តួនាទី និងការលើកលែងទោសជាដើម។ បើទោះជាយ៉ាងណា កន្លងមកចំពោះអ្នកនយោបាយដែលចុះចូលជាមួយគណបក្សកាន់អំណាច គឺលោក ហ៊ុន សែន ប្រើប្រាស់តែក្នុងរដូវកាលបោះឆ្នោត ប៉ុណ្ណោះ ក្រោយមកអ្នកទាំងក៏បាត់មុខពីឆាកនយោបាយ និងបាត់បង់តួនាទីក្នុងជួររដ្ឋាភិបាល ឬអ្នកខ្លះមានតែឋានៈតែគ្មានកន្លែងធ្វើការជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។