ប្រទេសជប៉ុន បានចុះហត្ថលេខាសម្រេចផ្ដល់ហិរញ្ញប្បទាន សរុបជាទឹកប្រាក់ជាង ៩០លានដុល្លារអាមេរិក ដល់របបលោក ហ៊ុន សែន ក្នុងនោះរួមមាន ទឹកប្រាក់ជាង ៤,៦ លានដុល្លារជាជំនួយឥតសំណង សម្រាប់អនុវត្តគម្រោងកម្មវិធីអភិវឌ្ឍន៍សេដ្ឋកិច្ច និងសង្គមនៅកម្ពុជា និងទឹកប្រាក់ជិត ៨៦លានដុល្លារផ្សេង ជាទឹកប្រាក់កម្ចីឥណទានសម្បទាន សម្រាប់អនុវត្តគម្រោង ពង្រីកប្រព័ន្ធខ្សែបញ្ជូន និងចែកចាយអគ្គិសនីនៅរាជធានីភ្នំពេញ ជំហានទី២។
ការចុះហត្ថលេខានេះ ធ្វើឡើងនៅក្នុងដំណើរទស្សនកិច្ចរយៈពេល១ថ្ងៃ របស់រដ្ឋមន្ត្រីការបរទេសជប៉ុន លោក តារ៉ូ កូណូ (Taro Kono) មកកាន់កម្ពុជា នៅថ្ងៃទី៨ មេសា នេះ ដោយលោកបានជួបជាមួយលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសកម្ពុជា លោក ប្រាក់ សុខុន។
លោក ហ៊ុន សែន សរសេរនៅលើទំព័រហ្វេសប៊ុក (Facebook) របស់លោកឲ្យដឹងថា ក្នុងជំនួបនោះ លោក តារ៉ូ កូណូ បានប្រាប់លោកថា គោលបំណងរបស់ជប៉ុន គឺធ្វើយ៉ាងណាជួយមកដល់កម្ពុជា ឲ្យក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
លើសពីនេះទៀត ភាគីជប៉ុន ក៏បានសម្ដែងចំណាប់អារម្មណ៍ ក្នុងការជួយដល់ប្រទេសកម្ពុជា លើវិស័យមួយចំនួនដូចជា វិស័យដឹកជញ្ជូន ឬឡូជីស្ទីក រួមមានការគ្រប់គ្រងកំពង់ផែ តំបន់សេដ្ឋកិច្ចពិសេស និងការអភិវឌ្ឍន៍ធនធានមនុស្សជាដើម។ ភាគីជប៉ុន ក៏បានអញ្ជើញលោក ហ៊ុន សែន ឲ្យទៅចូលរួមចំកិច្ចប្រជុំកំពូលជប៉ុន-មេគង្គ ដែលនឹងប្រព្រឹត្តិទៅនៅប្រទេសជប៉ុន នៅរដូវស្លឹកឈើជ្រុះខាងមុខនេះ។
ជាការឆ្លើយតប លោក ហ៊ុន សែន បានគាំទ្រចំពោះ កិច្ចប្រជុំកំពូលជប៉ុន-មេគង្គនេះ ដែលលោកចាត់ទុកថា មានសារសំខាន់ ជាពិសេសសម្រាប់ការតភ្ជាប់ទំនាក់ទំនងស្របគ្នានឹងការធ្វើសមាហរណកម្មអាស៊ាន។
លោក ហ៊ុន សែន មិនបានបញ្ជាក់ឲ្យដឹងទេ ថាតើភាគីជប៉ុន បានលើកឡើងពីបញ្ហាដែលខ្លួនចង់ឲ្យមានកិច្ចចរចាបញ្ចប់ជម្លោះនយោបាយរវាងអ្នកនយោបាយខ្មែរ និងខ្មែរ ដែរឬក៏យ៉ាងណានោះ នៅក្នុងជំនួបនេះ។ លោក ហ៊ុន សែន គ្រាន់តែឆ្លៀតសរសេរសារឌឺដងនៅលើទំព័រហ្វេសប៊ុករបស់លោក នៅមុនជំនួបនេះថា ទន្ទឹមនឹងប្រទេសជប៉ុនជាមិត្ត កំពុងមកផ្ដល់ជំនួយដល់កម្ពុជា ក្រុមជនខិលខូច មួយចំនួន អាចបំពុលព័ត៌មានទៅជារឿងមិនល្អ ដូចដែលពួកគេធ្លាប់ធ្វើ។ លោកសរសេរបន្តថា ជប៉ុន មិនធ្វើអ្វីប៉ះពាល់ដល់សន្តិភាព និងការរីកចម្រើនរបស់កម្ពុជាឡើយ។ យ៉ាងណាក៏ដោយ ឧបករណ៍ឃោសនារបស់លោក ហ៊ុន សែន បានស្រង់ប្រសាសន៍ លោក អ៊ាង សុផល្លែត ជំនួយការផ្ទាល់លោក ហ៊ុន សែន ដែលលោកបានបញ្ជាក់ថា ជប៉ុន មិនបានលើកឡើងអំពីបញ្ហានយោបាយជាមួយលោក ហ៊ុន សែន ឡើយ។
ទស្សនកិច្ចរបស់រដ្ឋមន្ត្រីការបរទេសជប៉ុន នាពេលនេះ ធ្វើឡើងនៅរយៈពេលតែប៉ុន្មានសប្ដាហ៍ ក្រោយដំណើរទស្សនកិច្ចរបស់ទីប្រឹក្សានាយករដ្ឋមន្ត្រីជប៉ុន ទទួលបន្ទុកកិច្ចការសន្តិសុខជាតិ លោក Kentaro Sonoura កាលពីចុងខែមីនា កន្លងទៅ ដែលកាលណោះ លោកធ្លាប់បានស្នើឲ្យមានការចរចាគ្នារវាងរបបលោក ហ៊ុន សែន និងគណបក្សសង្គ្រោះជាតិ តែសំណើនេះ ត្រូវបានបរាជ័យទៅវិញ ដោយសារតែលោក ហ៊ុន សែន បានប្រកាសទាត់ចោលសំណើនេះយ៉ាងដាច់អហង្ការ។ ការប្រកាសបន្តផ្ដល់ជំនួយជាបន្តបន្ទាប់របស់ជប៉ុននៅពេលនេះ គឺផ្ទុយគ្នាស្រឡះពីអ្វីដែលសហគមន៍អន្តរជាតិ កំពុងព្រួយបារម្ភ ចំពោះវិបត្តិនយោបាយ និងការរម្លាយប្រជាធិបតេយ្យនៅកម្ពុជា។ ទាំងសហភាពអឺរ៉ុប និងទាំងសហរដ្ឋអាមេរិក សុទ្ធតែបានប្រកាសផ្អាកការផ្ដល់ជំនួយនានាមកកម្ពុជា ទាំងជំនួយវិស័យយោធា អភិវឌ្ឍន៍ និងដំណើរការបោះឆ្នោត ព្រមទាំងការប្រកាសដាក់ទណ្ឌកម្មមិនអនុញ្ញាតឲ្យមន្ត្រីរបបលោក ហ៊ុន សែន និងក្រុមគ្រួសាររបស់ពួកគេ អាចធ្វើដំណើរចេញចូលទៅកាន់ប្រទេសទាំងនេះបាន។ បច្ចុប្បន្ន ក្រុមប្រទេសទាំងនេះ កំពុងពិចារណាដាក់ទណ្ឌកម្មសេដ្ឋកិច្ចមកលើរបបលោក ហ៊ុន សែន ប្រសិនបើគ្មានដំណោះស្រាយនយោបាយណាមួយនោះ៕