មន្ត្រីបក្សភ្លើងទៀនខេត្តកណ្ដាលថា ការលុបឈ្មោះខ្លួនចេញពីក្របខ័ណ្ឌរដ្ឋ ជារឿងនយោបាយ
2023.04.30
លេខាបក្សភ្លើងទៀនខេត្តកណ្ដាលលោក ផុន សុភា (កាន់មេក្រូថ្លែងសារ)។
រូប៖ ពលរដ្ឋផ្ដល់ឱ្យ
អភិបាលខេត្តកណ្ដាលបានលុបឈ្មោះមន្ត្រីគណបក្សភ្លើងទៀនម្នាក់ ចេញពីក្របខ័ណ្ឌមន្ត្រីរាជការស៊ីវិល។ មន្ត្រីគណបក្សភ្លើងទៀនដែលត្រូវបានលុបឈ្មោះពីក្របខ័ណ្ឌអះអាងថា លោកមិនបានដឹងខ្លួនមុនទាល់តែសោះ ស្រាប់តែសុខៗ ត្រូវបានគេហៅឱ្យទៅយកលិខិតលុបឈ្មោះចេញពីក្របខ័ណ្ឌ ទាំងមិនបានធ្វើខុសពីលក្ខន្តិកៈមន្ត្រីរាជការឡើយ។
លេខាបក្សភ្លើងទៀនខេត្តកណ្ដាលលោក ផុន សុភា ចាត់ទុកការលុបឈ្មោះរបស់លោកចេញពីក្របខ័ណ្ឌមន្ត្រីរាជការស៊ីវិល ពីសំណាក់អភិបាលខេត្តកណ្ដាលលោក គង់ សោភ័ណ្ឌ ថា ជារឿងនយោបាយ និងជាការប្រើប្រាស់អំណាចផ្ដាច់ការគ្មានច្បាប់ទម្លាប់ ខណៈនីតិវិធីគ្រប់គ្រងមន្ត្រីរាជការ មុនការលុបឈ្មោះមន្ត្រីណាមួយចេញពីក្របខ័ណ្ឌ ត្រូវឆ្លងកាត់ការហៅទៅសួរនាំដើម្បីព្រមានផ្ទាល់មាត់ជាមុន ហើយប្រសិនបើមិនកែប្រែ ត្រូវព្រមានជាលាយលក្ខណ៍អក្សរ និងចុងក្រោយ ត្រូវបង្កើតគណៈកម្មការវិន័យដើម្បីសួរដេញដោល។
ប៉ុន្តែលោក ផុន សុភា ប្រាប់អាស៊ីសេរីនៅថ្ងៃទី២៩ មេសាថា លោកត្រូវបានអភិបាលខេត្តកណ្ដាលលុបឈ្មោះចេញពីក្របខ័ណ្ឌមន្ត្រីរាជការស៊ីវិលស្ងាត់ៗ ទាំងដែលលោកមិនបានធ្វើខុស និងមិនបានឆ្លងកាត់ការហៅទៅសួរនាំផ្ទាល់មាត់ ឬព្រមានជាលាយលក្ខណ៍អក្សរអ្វីឡើយ។ លោកបន្តថា កាលពីរសៀលថ្ងៃសុក្រ ទី២៨ មេសា លោកត្រូវបានគេហៅឱ្យទៅយកលិខិតលុបឈ្មោះចេញ ហើយមន្ត្រីសាលាខេត្តកណ្ដាល មិនបានបញ្ជាក់ពីមូលហេតុច្បាស់លាស់ឡើយ ដោយគ្រាន់តែប្រាប់ថា ធ្វើឡើងតាមបញ្ជាពីថ្នាក់លើ។
លោក ផុន សុភា៖ «ហើយនេះអត់មានអីសោះ ខ្ញុំធ្វើការសុខៗ ស្រាប់តែមានដីកាបណ្ដេញចេញតែម្ដង គឺវាខុសនីតិវិធីទាំងស្រុង ខុសទាំងច្បាប់ទៀត។ ឧទាហរណ៍ ឧបមាថា ខ្ញុំមានកំហុសទៅចុះ ក៏ត្រូវមាននីតិវិធីធ្វើចំពោះខ្ញុំដែរ តែនេះ ខ្ញុំមិនខុសហើយ ធ្វើខុសនីតិវិធីទៀត គឺនៅសុខៗ ដីកាចេញមកតែម្ដង គឺវាមិនដឹងយកស្អីមកនិយាយ យកអីមកធ្វើ»។
លិខិតលុបឈ្មោះមន្ត្រីរាជការស៊ីវិលដោយអភិបាលខេត្តកណ្ដាលលោក គង់ សោភ័ណ្ឌ ចុះថ្ងៃទី២០មេសាបញ្ជាក់ថា ការលុបឈ្មោះលោក ផុន សុភា មន្ត្រីបម្រើការងារនៅការិយាល័យកសាងសមត្ថភាព នៃទីចាត់ការគ្រប់គ្រងធនធានមនុស្ស សាលាខេត្តកណ្ដាល ចេញពីក្របខ័ណ្ឌមន្ត្រីរដ្ឋបាលថ្នាក់ក្រោមជាតិ ដោយសារមូលហេតុសាមីខ្លួនបានប្រព្រឹត្តផ្ទុយពីមាត្រាទី៣៧ នៃច្បាប់ស្ដីពីសហលក្ខន្តិកៈមន្ត្រីរាជការស៊ីវិល។
ទោះជាយ៉ាងណាក៏ដោយ លោក ផុន សុភា លើកឡើងថា កន្លងមក មន្ត្រីសាលាខេត្តកណ្ដាល តែងព្យាយាមបញ្ចុះបញ្ចូលឱ្យចូលរួមជាមួយគណបក្សកាន់អំណាច ព្រោះអាចទទួលបានលាភសក្ការៈ និងឡើងបុណ្យស័ក្ដិ ហើយបានព្រមានថា ប្រសិនបើនៅបន្តគាំទ្របក្សប្រឆាំង មានតែជួបផលលំបាកប៉ុណ្ណោះ។ លោកបន្តថា លោកនឹងមិនផ្លាស់ប្ដូរគោលជំហរ ដើម្បីទទួលបានក្របខ័ណ្ឌ ឬលាភសក្ការៈអ្វីឡើយ ព្រោះលោកមិនចង់វិលទៅធ្វើការជាមួយក្រុមអ្នកអសីលធម៌ គ្មានឧត្ដមគតិ និងប្រើអំណាចផ្ដាច់ការដើម្បីបម្រើប្រយោជន៍បុគ្គលនោះទេ។ ម្យ៉ាងវិញទៀត លោកថា លោកស្ម័គ្រចិត្តបំពេញការងារណាដែលស្របតាមឧត្ដមគតិរបស់ខ្លួន និងខំប្រឹងធ្វើការងារនោះអស់លទ្ធភាព និងសមត្ថភាព សម្រាប់ប្រយោជន៍ជាតិ និងប្រជាជន។
លោក ផុន សុភា៖ «ចំពោះក្របខ័ណ្ឌ ចំពោះអ្វីដែលខ្ញុំខិតខំប្រឹងប្រែងពាក់កណ្ដាលជីវិត បានសញ្ញាប័ត្រ ខិតខំប្រឡងអីមក ខ្ញុំចាត់ទុកថា ជាមេរៀនបទពិសោធន៍របស់ខ្ញុំទៅចុះ។ ប៉ុន្តែអ្វីសំខាន់គ្រោះថ្នាក់សម្រាប់ជាតិ គឺភាពអយុត្តិធម៌សម្រាប់ប្រជាពលរដ្ឋ និងមន្ត្រីរាជការផ្សេងទៀត។ មិនដឹងថា ប្រជាពលរដ្ឋនិងមន្ត្រីរាជការផ្សេងទៀត ទទួលរងគ្រោះ ដោយភាពអយុត្តិធម៌ប៉ុន្មានទៀតទេ។ អ៊ីចឹងហើយ! ខ្ញុំមានតែខិតខំប្រឹងប្រែងនូវឧត្ដមគតិរបស់ខ្ញុំ ដើម្បីធ្វើយ៉ាងណា កែប្រែអាភាពអយុត្តិធម៌នៅក្នុងសង្គមឱ្យបាន»។
ជុំវិញបញ្ហានេះ វិទ្យុអាស៊ីសេរី មិនអាចសុំការឆ្លើយបំភ្លឺពីអភិបាលខេត្តកណ្ដាលលោក គង់ សោភ័ណ្ឌ អភិបាលរងខេត្តកណ្ដាល លោក ហាក់ សុខមករា និងប្រធានរដ្ឋបាលសាលាខេត្តកណ្ដាលលោក ជី ស៊ីវត្ថា បានទេ។
ប៉ុន្តែអ្នកនាំពាក្យគណបក្សប្រជាជនកម្ពុជាលោក សុខ ឥសាន លើកឡើងថា រដ្ឋាភិបាលមិនបានដាក់សម្ពាធឱ្យតាមក្រសួងស្ថាប័នរដ្ឋ រើសអើងមន្ត្រីរាជការដែលមាននិន្នាការផ្សេងឡើយ។
លោក សុខ ឥសាន៖ «តាំងពីដើមមក គណបក្សប្រជាជនកម្ពុជា ដែលជាគណបក្សទេវតា មិនដែលប្រកាន់ ឬរើសអើងទៅលើមន្ត្រីរាជការណាទេ លើកលែងតែមន្ត្រីរាជការនោះ មានកំហុសតាមផ្លូវច្បាប់។ អាហ្នឹង! បើមានបញ្ហាអ៊ីចឹង គេត្រូវដាក់វិន័យ ហើយវិន័យ វាមានកម្រិតស្រាល កម្រិតមធ្យម និងកម្រិតធ្ងន់»។
ទោះមានការបកស្រាយពីមន្ត្រីគណបក្សកាន់អំណាចបែបនេះក្ដី ប៉ុន្តែរដ្ឋាភិបាលលោក ហ៊ុន សែន ត្រូវបានអង្គការសិទ្ធិមនុស្សអន្តរជាតិនិងជាតិមើលឃើញថា កំពុងបង្កើនការធ្វើទុក្ខបុកម្នេញគ្រប់រូបភាពលើក្រុមថ្នាក់ដឹកនាំ និងមន្ត្រីគណបក្សភ្លើងទៀន ដូចជាការចាប់ចងដាក់ពន្ធនាគារទាំងអយុត្តិធម៌ និងការលួចវាយដំដោយដំបង និងបំពង់ដែកពីសំណាក់ក្រុមជនមិនស្គាល់មុខ ស្របពេលការបោះឆ្នោតជាតិក្នុងខែកក្កដា កាន់តែកៀកមកដល់។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គឹមអេង លើកឡើងថា ច្បាប់ស្ដីពីលក្ខន្តិកៈមន្ត្រីរាជការស៊ីវិល ហាមឃាត់ដាច់ខាតមន្ត្រីរាជការទៅពាក់ព័ន្ធនឹងគណបក្សនយោបាយ ប៉ុន្តែច្បាប់រៀបចំការបោះឆ្នោត អនុញ្ញាតឱ្យមន្ត្រីរាជការ អាចធ្វើសកម្មភាពនយោបាយបាននៅក្រៅម៉ោងធ្វើការ។ លោកបន្តថា ប្រសិនបើមានការអនុវត្តច្បាប់លើបុគ្គល និងក្រុមណាមួយ ដោយមិនបានអនុវត្តជាទូទៅ នោះវាជាការរើសអើងដោយសាររឿងនយោបាយ។
លោក យង់ គឹមអេង៖ «បើមានការអនុវត្តច្បាប់ចំពោះតែមន្ត្រីណាម្នាក់ មិនបានអនុវត្តច្បាប់ហ្នឹងជាទូទៅ អាហ្នឹង អាចធ្វើឱ្យមានការលើកឡើង ឬក៏ការចោទប្រកាន់ពីការរើសអើងខាងនយោបាយ»។
លោក ផុន សុភា បានចូលធ្វើជាមន្ត្រីរាជការនៅឆ្នាំ២០០៩ បន្ទាប់ពីប្រឡងជាប់ក្របខ័ណ្ឌនៅក្រសួងការងារ បណ្ដុះបណ្ដាល និងវិជ្ជាជីវៈ និងក្រោយពីរៀនចប់នៅសាលាភូមិន្ទរដ្ឋបាល លោកក៏បានជ្រើសរើសទៅធ្វើការងារនៅក្រសួងមហាផ្ទៃ ដោយត្រូវបានបញ្ជូនទៅធ្វើការនៅសាលាខេត្តកំពង់ធំ ហើយនៅឆ្នាំ២០១៦ លោកក៏បានផ្លាស់មកបម្រើការងារនៅក្នុងសាលាខេត្តកណ្ដាល។ លោក សុភា បញ្ជាក់ថា លោកបានក្លាយជាយុវជនគាំទ្រគណបក្សសង្គ្រោះជាតិយូរឆ្នាំមកហើយ រួមមានការចូលរួមតវ៉ា ការធ្វើជាអ្នកស្ម័គ្រឃ្លាំមើលមិនឱ្យជនបរទេសចូលបោះឆ្នោត និងការជួយការងារគណបក្សជាច្រើនទៀត រហូតលោកត្រូវបានបញ្ចូលឈ្មោះទៅក្នុងរចនាសម្ព័ន្ធគណបក្ស និងធ្លាប់បានជាប់ឆ្នោតជាមេឃុំមកពីគណបក្សសង្គ្រោះជាតិនៅទីក្រុងតាខ្មៅក្នុងឆ្នាំ២០១៧។
កាលអំឡុងឆ្នាំ២០២២ ក៏មានមន្ត្រីគណបក្សភ្លើងទៀនយ៉ាងហោចណាស់ក៏៣នាក់ ត្រូវបានលុបឈ្មោះចេញពីក្របខ័ណ្ឌមន្ត្រីរាជការដែរ ក្នុងនោះ មានលោក កែវ សុមុនី មន្ត្រីបម្រើការនៅនាយកដ្ឋានសុខភាពផ្លូវចិត្តនិងការបំពានគ្រឿងញៀន នៃក្រសួងសុខាភិបាល លោក អេង ស្រួយ គ្រូបង្រៀននៅអង្គភាពក្រុមប្រឹក្សាអភិវឌ្ឍគ្រូនគរបាលជាតិនៃបណ្ឌិត្យសភានគរបាលកម្ពុជា និងលោក ខឹម មុនីកុសល មន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តប៉ៃលិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
អត្ថបទពេញនិយម
នយោបាយ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- សាលាដំបូងរាជធានីភ្នំពេញ ផ្ដន្ទាទោសមន្ត្រីគណបក្សកម្លាំងជាតិ លោក គា វិសាល ឲ្យជាប់ពន្ធនាគារ ២ឆ្នាំកន្លះ
- គណបក្សកម្លាំងជាតិ ថាការបន្តចាប់ខ្លួនមន្ត្រីជាន់ខ្ពស់របស់គណបក្សនេះ ធ្វើឲ្យប៉ះពាល់ដំណើរការប្រជាធិបតេយ្យ
- នាវាចម្បាំងចិន ២គ្រឿងផ្តល់ឲ្យកម្ពុជា បង្កក្ដីបារម្ភអំពីវត្តមាននាវាចិនអចិន្ត្រៃយ៍នៅឈូងសមុទ្ទថៃ