អភិបាលរង​ខេត្ត​កណ្ដាល​កោះហៅ​សមាជិក​គណបក្ស​ភ្លើងទៀន​បង្ខំ​ផ្ដិត​មេដៃ​ថ្កោលទោស​លោក សម រង្ស៊ី រឿង​ប្រមាថ​ព្រះមហាក្សត្រ

ដោយ ទីន ហ្សាការីយ៉ា
2022.10.29
Share on WhatsApp
Share on WhatsApp
អភិបាលរង​ខេត្ត​កណ្ដាល​កោះហៅ​សមាជិក​គណបក្ស​ភ្លើងទៀន​បង្ខំ​ផ្ដិត​មេដៃ​ថ្កោលទោស​លោក សម រង្ស៊ី រឿង​ប្រមាថ​ព្រះមហាក្សត្រ អភិបាលរង​ខេត្ត​កណ្ដាល​លោក ប្រាក់ សារ៉ាត់ ក្នុង​កិច្ច​ប្រជុំ​កាលពីថ្ងៃទី៥ ខែមេសា ឆ្នាំ២០២២។
រូប៖ រដ្ឋបាលខេត្ត​កណ្ដាល

អភិបាលរង​ខេត្ត​កណ្ដាល និង​អាជ្ញាធរ​ស្រុក​កណ្ដាលស្ទឹង​កោះហៅ​ជំទប់​ទី​២​របស់​គណបក្ស​ភ្លើងទៀន​ចំនួន​៩​នាក់ បង្ខំ​ឲ្យ​ពួកគាត់​ផ្ដិតមេដៃ​លើ​ញត្តិ​ថ្កោលទោស​លោក សម រង្ស៊ី រឿង​ប្រមាថ​ព្រះមហាក្សត្រ​។ សង្គម​ស៊ីវិល​ថា ព្រះមហាក្សត្រ មិនអាច​ឲ្យ​បុគ្គល​ណា​ម្នាក់​ប្រមាថ​ព្រះអង្គ​បានទេ តាមច្បាប់​រដ្ឋធម្មនុញ្ញ តែ​មន្ត្រីរាជការ​ក៏​មិនអាច​បង្ខំ​បុគ្គល​ម្នាក់​ទៅ​ថ្កោលទោស​បុគ្គល​ម្នាក់ទៀត​ដែរ។

អភិបាលរង​ខេត្ត​កណ្ដាល​លោក ប្រាក់ សារ៉ាត់ និង​មន្ត្រី​សាលាស្រុក​កណ្ដាលស្ទឹង បាន​កោះហៅ​ជំទប់​ទី​២​ទាំងអស់​៩​នាក់​នៃ​ស្រុក​កណ្ដាលស្ទឹង មកពី​គណបក្ស​ភ្លើងទៀន មក​ដាក់​សម្ពាធ​ឲ្យ​ពួកគាត់​ផ្ដិតមេដៃ​លើ​ញត្តិ ដែល​មាន​ខ្លឹមសារ​ថ្កោលទោស​លោក សម រង្ស៊ី រឿង​ប្រមាថ​ព្រះមហាក្សត្រ​។ ទោះជា​យ៉ាងណា​ជំទប់​ទី​២ គណបក្ស​ភ្លើងទៀន ប្ដេជ្ញា​មិន​ផ្ដិតមេដៃ​លើ​ញត្តិ​ថ្កោលទោស​នោះ​ទេ ដោយ​ពួកគាត់ លើក​ហេតុផល​ថា បាន​គាំទ្រ​លើ​លិខិត​ដែល​ចេញ​ដោយ​គណបក្ស​ភ្លើងទៀន​រួចហើយ។

ជំទប់​ទី​២ ឃុំ​ព្រែកស្លែង ស្រុក​កណ្ដាលស្ទឹង ខេត្ត​កណ្ដាល មកពី​គណបក្ស​ភ្លើងទៀន អ្នកស្រី អឿង សារី ប្រាប់​វិទ្យុ​អាស៊ីសេរី នៅ​ថ្ងៃទី​២៩ ខែតុលា ថា អ្នកស្រី​មាន​សិទ្ធិ​ធ្វើតាម​បំណង​របស់​ខ្លួន ហើយ​មិនអាច​ឲ្យ​គេ​មក​បង្ខំ​ឲ្យ​ផ្ដិតមេដៃ ឬក៏​ចុះហត្ថលេខា​លើ​ញត្តិ​ថ្កោលទោស​បុគ្គល​ណា​នោះ​ទេ​។ អ្នកស្រី​បន្ត​ថា ពេល​ដែល​មន្ត្រី​ថ្នាក់លើ​ដាក់​គំនាប​មក​លើ​អ្នកស្រី​ឲ្យ​ធ្វើ​នូវ​រឿង​ដែល​អ្នកស្រី​មិន​ចង់​ធ្វើ គឺជា​ការរំលោភ​សិទ្ធិ​របស់​អ្នកស្រី ហើយ​បំពាន​មក​លើ​សិទ្ធិ​ពលរដ្ឋ​ទៀត ព្រោះ​ពលរដ្ឋ​បោះឆ្នោត​ប្រគល់​សិទ្ធិ​ឲ្យ​អ្នកស្រី​រួចហើយ​។ អ្នកស្រី​បន្ថែម​ថា បើ​សូម្បីតែ​សិទ្ធិ​របស់​អ្នកស្រី​ការពារ​មិនបាន​ផង តើ​អ្នកស្រី​ទៅ​ការពារ​សិទ្ធិ​របស់​ពលរដ្ឋ​ម្ដេច​បាន។

អ្នកស្រី អឿង សារី៖ «ក្នុងនាម​យើង​តំណាង​ពលរដ្ឋ​ដែល​បោះឆ្នោត​ឲ្យ បើ​គ្រាន់តែ​សិទ្ធិ​ខ្លួនឯង​ការពារ​ប៉ុណ្ណឹង​(​មិន​បាន​) តើ​យើង​ទៅ​ការពារ​អី​ជំនួស​ប្រជាពលរដ្ឋ​បាន​។ អ៊ីចឹង​ហើយ​សារ​នេះ​ខ្ញុំ​សូម​ចេញ ខ្ញុំ​សូម​ចែករំលែក​ទៅដល់​ប្រជាពលរដ្ឋ និង​ជូន​ទៅដល់​ប្រជាពលរដ្ឋ​ដែល​ជា​ម្ចាស់​ឆ្នោត​ថា ការ​ថ្កោលទោស​បុគ្គល​ណាក៏ដោយ គឺ​គេ​មានច្បាប់​កំណត់​រួចហើយ គេ​មានច្បាប់​ចែង​រួចហើយ អ្នកណា​ថ្កោលទោស​អ្នកណា​ចង់​ធ្វើ​អី​ជេរប្រមាថ​អី គឺ​គេ​មានច្បាប់​កំណត់​ហើយ គ្រាន់តែ​ដាក់​ទៅ​តុលាការ​ទៅ តុលាការ​គេ​ចាត់ចែង​ទៅលើ​បុគ្គល​ហ្នឹង​ទៅ​ហើយ​ហើយ​! មិនបាច់​ដាក់បន្ទុក​មក​ក្រុមប្រឹក្សា​ជំទប់»

ស្រដៀង​គ្នា​នេះ​ដែរ អនុប្រធាន​ក្រុមប្រឹក្សា​ខេត្ត​កណ្ដាល មកពី​គណបក្ស​ភ្លើងទៀន លោក លី ម៉េង​ឃាង ឲ្យ​ដឹង​ថា លោក​អភិបាលរង​ខេត្ត​កណ្ដាល​លោក ប្រាក់ សារ៉ាត់ បាន​គំរាមកំហែង​ជំទប់​ទី​២​ទាំងអស់​របស់​គណបក្ស​ភ្លើងទៀន​នៅ​ស្រុក​កណ្ដាលស្ទឹង ឲ្យ​ផ្ដិតមេដៃ​លើ​ញត្តិ​ថ្កោលទោស​។ លោក​បញ្ជាក់​ថា គណបក្ស​ភ្លើងទៀន​បាន​ចេញ​សេចក្ដីប្រកាស​ថ្កោលទោស​បុគ្គល​ដែល​បាន​ប្រមាថ​ព្រះមហាក្សត្រ​តាមច្បាប់​កម្ពុជា​រួចហើយ មិន​ចាំបាច់​ប្រមូល​ជំទប់​គ្រប់​ឃុំ​មក​ផ្ដិតមេដៃ​លើ​ញត្តិ​នោះ​ទៀត​ទេ​។ លោក​ថា សាលាស្រុក​កណ្ដាលស្ទឹង ធ្វើ​បែបនេះ គឺជា​ការ​គំរាមកំហែង​ធ្ងន់ធ្ងរ​លើ​សិទ្ធិ​របស់​ពួកគាត់ ផ្ទុយ​ពី​គោលការណ៍​ច្បាប់។

លោក លី ម៉េងឃាង៖ «ច្បាប់​រដ្ឋធម្មនុញ្ញ​បាន​ចែងថា សិទ្ធិ​សេរីភាព​របស់​បុគ្គល​ម្នាក់ៗ មិនអាច​អ្នកណា​រំលោភ​បាន ហើយ​មកដល់​ថ្ងៃនេះ​មាន​ទាំង​អភិបាលរង​ខេត្ត​ចុះ​មក​និយាយ ពិតមែន​មិន​គំរាមកំហែង​ចំ​តួ សម្ដី​ផ្អែម​ប៉ុន្តែ​ដូច​មានន័យថា បើ​មាន​ម៉េចៗ​ទៅនោះ លើៗ​រួចខ្លួន​អស់ ហើយ​អ្នក​ក្រោម​ជាប់​អស់ហើយ ច្បាស់​ជា​ជាប់​អ៊ីចឹង​ទៅ ចុះ​នេះ​មិន​គំរាមកំហែង​យ៉ាងធ្ងន់ធ្ងរ​ទេ»

វិទ្យុ​អាស៊ីសេរី មិនទាន់​អាច​ទាក់ទង​សុំ​ការ​អត្ថាធិប្បាយ​ជុំវិញ​បញ្ហា​នេះ ពី​អភិបាលរង​ខេត្ត​កណ្ដាល លោក ប្រាក់ សារ៉ាត់ បាន​ទេ នៅ​ថ្ងៃទី​២៩ ខែតុលា។

ចំណែក​អ្នកនាំពាក្យ​គណបក្ស​ប្រជាជន លោក សុខ ឥសាន លើកឡើង​ថា គណបក្ស​កាន់​អំណាច​មិនដែល​គាបសង្កត់​ពលរដ្ឋ​ឲ្យ​ថ្កោលទោស​បុគ្គល​ណាមួយ​នោះ​ទេ ប៉ុន្តែ​ពលរដ្ឋ​ដែល​រស់នៅ​ក្រោម​ដំបូល​កម្ពុជា​តែមួយ ត្រូវតែ​ចេញមុខ​ការពារ​ព្រះមហាក្សត្រ​របស់​ខ្លួន ដែល​ត្រូវ​គេ​ប្រមាថ។

លោក សុខ ឥសាន៖ «អត់​មាន​យើង​បង្គាប់បញ្ជា ឬ​បង្ខិតបង្ខំ​ទេ យើង​ដឹង​ហើយ​ថា​ព្រះមហាក្សត្រ​ជា​តំណាង​ឲ្យ​ជាតិ​ទាំងមូល អ៊ីចឹង​ទេ​រាល់​ការ​ប្រមាថកាតទាន ការ​មើល​ងាយ​ដល់​អង្គ​ព្រះមហាក្សត្រ គឺជា​ការប្រមាថ​ដល់​ជាតិ ម៉ាក់​ងើយ​ដល់​ជាតិ ហើយ​យើង​ទាំងអស់គ្នា​ហ្នឹង​សុទ្ធតែ​អ្នក​ក្រោម​ជាតិ​ហើយ នៅក្នុង​ជាតិ​ហើយ​។ អ៊ីចឹង​បើ​ប្រមាថ​ដល់​ព្រះមហាក្សត្រ​មានន័យថា​ប្រមាថ​ដល់​ជាតិ បើ​ប្រមាថ​ដល់​ជាតិ​ហើយ គឺ​ប្រមាថ​ចំពោះ​ប្រជាជន​នៅក្នុង​ប្រទេស​កម្ពុជា​ទាំងមូល»

ជុំវិញ​រឿង​នេះ​ដែរ ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក កើត សារ៉ាយ យល់​ថា ប្រជាពលរដ្ឋ​គ្រប់រូប​មាន​សិទ្ធិ​ជា​មូលដ្ឋាន​របស់​ខ្លួន មិនអាច​ឲ្យ​គេ​មក​បង្ខំ​ធ្វើ​រឿង​ដែល​ពួកគាត់​មិន​ចង់​ធ្វើ​នោះ​ទេ ជាពិសេស​ការដែល​ដាក់​គំនាប​ឲ្យ​ពលរដ្ឋ​ថ្កោលទោស​ជន​ណាមួយ ជា​ការ​រំលោភ​លើ​សិទ្ធិ​ពលរដ្ឋ​។ លោក​បន្ត​ថា ជម្លោះ​រវាង​ថ្នាក់ដឹកនាំ​កំពូល ហើយ​ទាញ​ព្រះមហាក្សត្រ​ឲ្យ​ពាក់ព័ន្ធ​នឹង​ជម្លោះ​នោះ​ដែរ អ្នក​ដែល​រងគ្រោះ​ពិតប្រាកដ​គឺជា​ប្រជាពលរដ្ឋ ហើយ​ធ្វើ​ឲ្យ​សង្គម​កម្ពុជា​កាន់តែ​ដុនដាប​។

លោក កើត សារ៉ាយ៖ «ហើយ​បើ​យើង​លេង​ទៅ​ហៅ​ឲ្យ​ផ្ដិតមេដៃ ឲ្យ​ធ្វើ​បែប​នេះ​បែប​នោះ នេះ​ជា​ការ​គំរាមកំហែង​មួយ​សុទ្ធសាធ ហើយ​វា​មិនដែល​ទេ​ក្នុងផ្ទះ​គេ ហើយ​យើង​ចូល​ទៅ​ផ្ទះ​គេ ដោយ​គ្មាន​ការអនុញ្ញាត​ពី​ម្ចាស់ផ្ទះ​គេ​។ យើង​កុំថាឡើយ​ទៅ​បង្ខំ​គេ​ឲ្យ​ផ្ដិតមេដៃ ឬក៏​ទៅ​គំរាមកំហែង​ហៅ​គេ​ឲ្យ​ផ្ដិតមេដៃ សូម្បីតែ​ចូល​ទៅ​របង​ផ្ទះ​គេ​ហ្នឹង​ត្រូវ​សុំ​អនុញ្ញាត​ពី​ម្ចាស់ផ្ទះ​គេ​ដែរ»

នេះ​ជា​ថ្ងៃទី​៣​ហើយ ដែល​អភិបាលរង​ខេត្ត​កណ្ដាល និង​សាលាស្រុក​កណ្ដាលស្ទឹង បាន​ហៅ​ជំទប់​ទី​២ បក្ស​ភ្លើងទៀន​ចំនួន ៩​នាក់ ដោយ​បង្ខំ​ឲ្យ​ពួកគាត់​ផ្ដិតមេដៃ​លើ​ញត្តិ​ថ្កោលទោស​លោក សម រង្ស៊ី​។ ក្នុង​ពេល​ប្រជុំ​នោះ ពួកគាត់ បាន​បដិសេធ​ផ្ដិតមេដៃ ហើយ​នាំគ្នា​ដើរ​ចេញពី​ទីប្រជុំ ហើយ​ពួកគាត់​ខកបំណង​ដែល​លោក​អភិបាលរង និង​សាលាស្រុក​យក​ពេលវេលា ដែល​ត្រូវ​បម្រើ​ពលរដ្ឋ​មក​បង្ខំ​ពួកគាត់​រឿង​ផ្ដិតមេដៃ​ទៅវិញ។

គណបក្ស​ភ្លើងទៀន ឱ្យដឹង​ថា ពេលនេះ​សមាជិក​ក្រុម​ប្រឹក្សាឃុំ​-​សង្កាត់ របស់​គណបក្ស​នេះ​ទូទាំង​ប្រទេស កំពុង​រង​ការ​គំរាមកំហែង និង​ការ​បង្ខិតបង្ខំ​ពី​ក្រុម​អាជ្ញាធរ​មូលដ្ឋាន បង្គាប់បញ្ជា​ឱ្យ​ពួកគេ​ចុះហត្ថលេខា​លើ​ញត្តិ ថ្កោលទោស​លោក សម រង្ស៊ី រឿង​ប្រមាថ​ព្រះមហាក្សត្រ ដែល​សកម្មភាព​នេះ ផ្ទុយ​ពី​ឆន្ទៈ​របស់​ក្រុមប្រឹក្សា​គណបក្ស​ភ្លើងទៀន​។ គណបក្ស​ភ្លើងទៀន ដែល​មាន​កៅអី​ក្រុម​ប្រឹក្សាឃុំ​-​សង្កាត់​ជាង​ពីរពាន់​អាសនៈ​នៅ​ទូទាំង​ប្រទេស កាលពី​ថ្ងៃទី​២៨ ខែ​តុលា បាន​ចេញ​លិខិត​អំពាវនាវ​ទៅ​ក្រុម​អាជ្ញាធរ​ឱ្យ​បញ្ឈប់​សកម្មភាព​គំរាមកំហែង និង​ការ​បង្ខិត​បង្ខំ​នេះ ព្រោះ​ជា​ទង្វើ​ប្រាសចាក​ពី​រដ្ឋធម្មនុញ្ញ រំលោភសិទ្ធិ​ពលរដ្ឋ សិទ្ធិ​នយោបាយ និង​សិទ្ធិ​សេរីភាព​នៃ​ការ​បញ្ចេញមតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។