លោក កឹម សុខា បញ្ជាក់​ជា​ថ្មី​ថា លោក​មិន​បាន​នាំ​បរទេស​ណា​មក​ឈ្លានពាន​ទឹក​ដី​ខ្មែរ និង​មិន​កាប់​សម្លាប់​ពលរដ្ឋ​​ទេ

ដោយ ម៉ៅ សុធានី
2022.09.23
Share on WhatsApp
Share on WhatsApp
លោក កឹម សុខា បញ្ជាក់​ជា​ថ្មី​ថា លោក​មិន​បាន​នាំ​បរទេស​ណា​មក​ឈ្លានពាន​ទឹក​ដី​ខ្មែរ និង​មិន​កាប់​សម្លាប់​ពលរដ្ឋ​​ទេ លោក កឹម សុខា ប្រធាន​បក្ស​សង្គ្រោះជាតិ លើក​ដៃ​សំពះ​អ្នក​គាំទ្រ​លោក ពេល​ចេញពីសវនាការ​សាលាដំបូងរាជធានី​ភ្នំពេញ កាល​ពី​ថ្ងៃ​ទី៧ ខែកញ្ញា ឆ្នាំ២០២២។
រូប៖ ហ្វេសប៊ុកលោក កឹម សុខា

ប្រធាន​បក្ស​ប្រឆាំង​លោក កឹម សុខា ដែល​កំពុង​រង​បទ​ចោទ​សំណុំ​រឿង​ក្បត់​ជាតិ ចេញ​មុខ​បញ្ជាក់​ជា​ថ្មី​ថា លោក​មិន​បាន​ឃុបឃិត​ជា​រដ្ឋ​បរទេស​ណា ឲ្យ​ឈ្លានពាន​ទឹកដី​កម្ពុជា​នោះ​ទេ។ លោក​ថា ការ​ចោទ​ប្រកាន់​លើ​រូបលោក ធ្វើ​ឲ្យ​មាន​ការ​រំខាន​ផ្លូវកាយ ផ្លូវចិត្ត និង​សិទ្ធិ​សេរីភាព​របស់​លោក។ ទោះយ៉ាងណា មន្ត្រី​បក្ស​កាន់​អំណាច​ថា អ្វី​ដែល​លោក កឹម សុខា លើក​ឡើង​ជា​ការ​ភូត​កុហក និង​មិន​ទទួល​ស្គាល់​ការ​ពិត។

ក្រុម​អ្នក​ឃ្លាំ​មើល លើក​ឡើង​ថា សារ​របស់​លោក កឹម សុខា ដែល​បញ្ជាក់​ពី​ភាព​ស្អាតស្អំ​របស់​ខ្លួន​ពេល​នេះ នឹង​ធ្វើ​ឲ្យ​អ្នក​គាំទ្រ​របស់​លោក បន្ត​គាំទ្រ​លោក កឹម សុខា។ ពួក​គេ​ជំរុញ​ទៅ លោក កឹម សុខា គួរ​មាន​ការ​ធ្វើ​សកម្មភាព​តាម​មូលដ្ឋាន  និង​ការ​បញ្ចេញ​មតិ​បណ្ដាញ​សង្គម ឲ្យ​កាន់​តែ​សកម្ម​ថែម​ទៀត ទើប​មេ​បក្ស​ប្រឆាំង​រូប​នេះ នៅតែ​រក្សា​ប្រជាប្រិយភាព​របស់​ខ្លួន។ ការ​លើក​ឡើង​ដូច្នេះ គឺ​ធ្វើឡើង​ក្រោយ​ពេល​លោក កឹម សុខា ចេញ​មុខ​បញ្ជាក់​ជា​ថ្មី​ថា លោក មិន​បាន​នាំ​បរទេស​ណា​មក​ឈ្លានពាន​ទឹកដី​ខ្មែរ មិន​បាន​បំផ្លាញ​ធនធាន​ទ្រព្យ​សម្បត្តិ​ជាតិ មិន​ប្រទូសរ៉ាយ និង​មិន​កាប់​សម្លាប់​ពលរដ្ឋ​ណា​ឡើយ។ លោក កឹម សុខា ក៏​អំពាវនាវ​ឲ្យ​រួម​គ្នា​ធ្វើ​អំពើ​ល្អ កុំ​បង្ក​ការ​ឈឺចាប់​ដល់​អ្នក​ដទៃ។

លោក កឹម សុខា កឹម សុខា លើក​ឡើង​ដូច្នេះ តាម​រយៈ​ទំព័រ​ហ្វេសប៊ុក​កាល​ពី​ថ្ងៃ​ទី២២ ខែកញ្ញា។

ទោះ​យ៉ាង​ណា អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន យល់​ថា អ្វី​ដែល​លោក កឹម សុខា លើក​ឡើង​មិន​ឆ្លុះ​បញ្ចាំង​ពី​ការ​ពិត​នោះ​ទេ។ លោក​បន្ត​ទៀត​ថា ការ​ដែល​លោក កឹម សុខា មិន​ទទួល​ស្គាល់​ការ​ពិត​ដូច្នេះ​ហើយ ទើប​រឿង​ក្ដី​លោក កឹម សុខា នៅបន្តអូសបន្លាយជាង៥ឆ្នាំមក​នេះ៖ «មិនមែន​ស្ថិត​លើ​ពាក្យ​ថា​ទេ កាល​មុន​នោះ​និយាយ ហើយ​និយាយ​ហើយ​ថត​ជា​វីដេអូ​ទៀត អត់​មាន​អ្នក​ណា​ក្លែងបន្លំ ឬ​មួយ​ធ្វើ​សិប្បនិម្មិត​បង្កើត​ពាក្យ​សម្ដី​គាត់ (លោក កឹម សុខា) ទេ ហើយ​ក្នុង​តុលាការ​កន្លង​ទៅ​គាត់​បាន​ទទួល​ស្គាល់​ពាក្យ​សម្ដី ដែល​គាត់​បាន​និយាយ»

កាល​ពី​សវនាការ​លើក​ទី៥៧ ថ្ងៃ​ទី២២ ខែកញ្ញា តុលាការ​បាន​ចោទ​សួរ​លោក កឹម សុខា ទាក់ទង​នឹង អង្គហេតុ​ថ្មី៣ រួមមាន៖ ការ​ធ្វើ​បដិវត្តន៍​ពណ៌​នៅ​ចិន​តៃវ៉ាន់ (Taiwan) យុទ្ធនាការ​ថ្ងៃចន្ទ​ពណ៌​ខ្មៅ និង​ការ​កាន់​ផ្កាឈូក។ ទោះ​យ៉ាង​ណា មេធាវី និង​អ្នក​ឃ្លាំមើល​រិះគន់​ថា អង្គការ​ទាំង ៣នេះ មិន​ជាប់​ពាក់ព័ន្ធ​នឹង​សំណុំរឿង​លោក កឹម សុខា នោះ​ទេ។

ផ្ទុយ​ពី​ការ​ចោទ​ប្រកាន់​របស់​មន្ត្រី​បក្ស​កាន់​អំណាច ប្រធាន​អង្គការ​សម្ព័ន្ធភាព​ការពារ​សិទ្ធិមនុស្ស​កម្ពុជា ហៅ​កាត់​ថា ច្រាក់ (CHRAC) លោក រស់ សុដ្ឋា សង្កេត​ឃើញ​ការ​ចោទ​ប្រកាន់​លោក កឹម សុខា មាន​ចិត្ត​នយោបាយ​ជាង​ការ​អនុវត្ត​ច្បាប់ ខណៈ​តុលាការ​នៅតែ​គ្មាន​ភស្តុតាង​គ្រប់គ្រាន់​ចោទ​ប្រកាន់​លោក កឹម សុខា នៅឡើយ។ មន្ត្រី​សង្គម​ស៊ីវិល​រូប​នេះ​យល់​ថា លោក កឹម សុខា ក្នុង​នាម​ជា​អ្នក​ដឹកនាំ​មួយ​រូប ក្រៅ​ពី​បង្ហាញ​ជំហរ​ជាតិនិយម លោក កឹម សុខា គួរ​តស៊ូ លះបង់ និង​មាន​យុទ្ធសាស្ត្រ​បន្ថែម​ទៀត ដើម្បី​រក​ច្រក​ចេញ​នៃ​វិបត្តិ​នយោបាយ​ពេល​នេះ៖ «ត្រូវ​មាន​ការ​តស៊ូ​ឲ្យ​បាន​ហ្មត់ចត់ ទៅ​តាមច្បាប់​ដែល​មាន មិន​អាច​អត់ធ្មត់ ឬ​ក៏​បណ្ដែតបណ្ដោយ​ពេល​វេលា​ព្រោះ​ពេលវេលា ខ្លី បើ​សិន​យើង​ចេះ​បណ្ដែត​បណ្ដោយៗ មិន​ដឹង​ពេល​ណា​មាន​ឱកាស​ជួយ​ប្រទេស​ជាតិ​ទេ»

លោក កឹម សុខា បាន​បាត់បង់​សិទ្ធិ​ធ្វើ​នយោបាយ និង​បាត់បង់​អ្វីៗ ស្ទើរ​គ្រប់យ៉ាង ជាង ៥ឆ្នាំ​មក​នេះ ព្រោះ​រដ្ឋាភិបាល​លោក ហ៊ុន សែន ចោទ​ប្រកាន់​ថា មេ​បក្ស​ប្រឆាំង​រូប​នេះ​ថា បាន​ឃុបឃិត​ជាមួយ​រដ្ឋ​បរទេស ដើម្បី​ផ្ដួល​រំលំ​រដ្ឋាភិបាល កាលពីឆ្នាំ២០១៧។

អ្នក​ជំនាញ​ផ្នែក​វិទ្យាសាស្ត្រ​នយោបាយ និង​កិច្ចការ​អន្តរជាតិ លោក ឯម សុវណ្ណារ៉ា យល់​ថា សារ​របស់​លោក កឹម សុខា ពេល​នេះ ជា​ការ​ព្យាយាម​បញ្ជាក់​ភាព​ស្អាតស្អំ​របស់​ខ្លួន ដើម្បី​ឲ្យ​សហគមន៍​ជាតិ និង​អន្តរជាតិ​បាន​ដឹង​បន្ថែម​ទៀត ដើម្បី​ជំរុញ​ទៅ​សហគមន៍​ជួយ​អន្តរាគមន៍​ឲ្យ​មាន​ការ​បញ្ចប់​ការ​ចោទ​ប្រកាន់​លើ​រូប​លោក។ ទោះយ៉ាងណាក្ដី លោក ឯម សុវណ្ណារ៉ា យល់​ថា អ្វី​ដែល​លោក កឹម សុខា លើក​ឡើង​ពេល​នេះ ទំនង​គ្មាន​ទម្ងន់​នោះ​ទេ ប៉ុន្តែ អាច​ទាញ​ប្រជាប្រិយ​ពី​អ្នក​គាំទ្រ​របស់​លោក​ដែរ៖ «បាទ​និយាយ​ទៅ​គាត់ (លោក កឹម សុខា) ត្រូវ​បង្ហាញ​ឲ្យ​បាន​ញឹកញាប់​បន្តិច ឬ​ក៏​ធ្វើ​ម៉េច​ឲ្យ​សហគមន៍​អន្តរជាតិ និង​មតិ​ជាតិ​មាន​គាំទ្រ ឈឺឆ្អាល​ច្រើន​ទើប​គាត់​អាច ឬ​ក៏​សារ​គាត់​មាន​តម្លៃ ឬ​ក៏​រក​ការ​គាំទ្រ​បាន បើ​គ្មាន​ការ​គាំទ្រ​ទេ គាត់​ធ្វើ​ម៉េច​ទៅ​ដាក់​បន្ទុក ឬ​ដាក់​ទម្ងន់​ទៅ​លើ​តុលាការ ឬ​ក៏​រដ្ឋាភិបាល ដែល​ជា​ដើម​បណ្ដឹង​ហ្នឹង»

កាល​ពី​ចុង​ខែសីហា​លោក​នាយក​រដ្ឋមន្ត្រី ហ៊ុន សែន បាន​ចោទ​ប្រកាន់​ថា លោក កឹម សុខា មាន​ជាប់​ពាក់ព័ន្ធ​ករណី​បាតុកម្ម​នៅ​ផ្លូវ វេង ស្រេង ឬ​បាតុកម្ម​នៅ​ស្ពាន​អាកាស​ស្ទឹង​មានជ័យ។ លោក​ទាមទារ​ឲ្យ​រក​អ្នក​ទទួល​ខុស​ត្រូវ អ្នក​ដែល​ធ្វើ​ឲ្យ​មាន​បាត់បង់​អាយុ​ជីវិត​ពលរដ្ឋ​ក្នុង​ពេល​នោះ។

ទោះយ៉ាងណា សហគមន៍​អន្តរជាតិ នៅ​ចាត់​ទុក​ការ​ចោទ​ប្រកាន់​លើ​លោក កឹម សុខា គ្មាន​មូលដ្ឋាន​ច្បាប់ ហើយ​ពួក​គេ​រំលឹក​ទៅ​រដ្ឋាភិបាល លោក ហ៊ុន សែន ជា​ញឹកញាប់​ថា កម្ពុជា​នឹង​ទទួល​បាន​អត្ថប្រយោជន៍​ពី​ការ​អនុញ្ញាត​ឲ្យ​លោក កឹម សុខា មាន​សិទ្ធិ​ធ្វើ​នយោបាយ​ឡើង​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។