សហគមន៍ខ្មែរកម្ពុជាក្រោម នឹងប្រារព្ធទិវាខួប៧៣ឆ្នាំ នៃថ្ងៃបាត់បង់ទឹកដីកម្ពុជាក្រោម ក្នុងថ្ងៃទី៣ខែកក្កដា ខាងមុខនេះ។ ការប្រារព្ធពិធីនេះ ដើម្បីរំឭកដល់ថ្ងៃឈឺចាប់ ដែលបារាំងផ្ទេរដែនដីកម្ពុជាក្រោម ឲ្យស្ថិតនៅក្រោមការត្រួតត្រារបស់វៀតណាមកុម្មុយនិស្តទាំងបំពាន ដោយពុំមានការយល់ព្រមពីខ្មែរណាម្នាក់ឡើយ។
អង្គការសមាគមខ្មែរកម្ពុជាក្រោម ដែលមានមូលដ្ឋាននៅកម្ពុជាបានសម្រេច លើកពេលប្រារព្ធទិវាបាត់បង់ទឹកដីខ្មែរកម្ពុជាក្រោមមកធ្វើនៅថ្ងៃទី៣ កក្កដា វិញ ដោយសារតែ ឆ្នាំនេះ ប្រទេសកម្ពុជាបោះឆ្នោតជ្រើសរើសក្រុមប្រឹក្សាឃុំសង្កាត់ ចំថ្ងៃជាន់គ្នានឹងទិវានៃការចងចាំនេះ។
ថ្ងៃទី៤ ខែមិថុនា កន្លងទៅនេះ ជាខួបគម្រប់៧៣ឆ្នាំ (៤មិថុនា១៩៤៩ ដល់ ៤មិថុនា២០២២) ជាថ្ងៃអាណានិគមបារាំង បានផ្ទេរទឹកដីខ្មែរកម្ពុជាក្រោម ឲ្យអាណានិគមវៀតណាមត្រួតត្រាបន្តរហូតសព្វថ្ងៃ គឺជាថ្ងៃដ៏ឈឺចាប់បំផុតក្នុងប្រវត្តិសាស្ត្រនៃប្រជាជាតិខ្មែរ។
អង្គការសមាគមខ្មែរកម្ពុជាក្រោមថា ការរំឭកខួប៧៣ឆ្នាំនេះ ដើម្បីសម្ដែងនូវកតញ្ញូ កតវេទីតាធម៌ និងគារវកិច្ច ចំពោះព្រះវីរសមណៈ ព្រះមហាវីរក្សត្រ វីរបុរស វីរនារី វីរយុទ្ធជន វីរយុទ្ធនារី ខ្មែរស្នេហាជាតិ ដែលបានពលីជីវិត ក្នុងបុព្វហេតុជាតិ សាសនា និងមាតុភូមិខ្មែរ ជាពិសេសមាតុភូមិខ្មែរកម្ពុជាក្រោម។ អង្គការ សមាគមខ្មែរកម្ពុជាក្រោម នឹងប្រារព្ធធ្វើពិធីបុណ្យរាប់បាត្រព្រះសង្ឃចំនួន ១៩៤៩អង្គ។
ពលរដ្ឋខ្មែរក្រោម ជាអតីតព្រះចៅអធិការវត្តរំដួលទួលសូរភី ជីក្អេងក្រោម ខេត្តមាត់ជ្រូក ដែលធ្លាប់ប្រឆាំងនឹងអាជ្ញាធរវៀតណាមមកទន្ទ្រានដីវត្ត លោក ចៅ សំអឿន ប្រាប់អាស៊ីសេរីនៅរសៀលថ្ងៃទី៣០ ខែមិថុនា ថា ពលរដ្ឋខ្មែរកម្ពុជាក្រោមតែងតែប្រារព្ធទិវារំឭកខួបថ្ងៃដែលបារាំងផ្ទេរដែនដីកម្ពុជាក្រោម ទៅឲ្យយួនកុម្មុយនិស្តកាន់កាប់រហូតមកដល់បច្ចុប្បន្ន ។ លោកបន្តថា ការដែលខ្មែរក្រោមរំឭកទិវានេះ គឺចង់ដាស់តឿនសតិស្មារតីកូនខ្មែរទាំងអស់ឲ្យចងចាំថាទឹកដីដូនតាមានត្រឹមណា ការលះបង់របស់បុព្វបុរសធំធេងកម្រិតណា ក្នុងការការពារអត្តសញ្ញាណ វប្បធម៌ អក្សរសាស្ត្រ ប្រពៃណី ទំនៀមទម្លាប់ ទុកឲ្យកូនចៅនៅដែនដីកម្ពុជាក្រោម រក្សាគង់វង្សមកដល់សព្វថ្ងៃ ។ លោកស្នើដល់រដ្ឋាភិបាលវៀតណាម កុំឲ្យធ្វើទុក្ខបុកម្នេញដល់ពលរដ្ឋខ្មែរក្រោមស្លូតត្រង់ និងសូមឲ្យមានការគោរពសិទ្ធិរបស់មនុស្សជាតិ ជាពិសេសខ្មែរក្រោមដែលជាម្ចាស់ស្រុក និងជាម្ចាស់ទឹក ម្ចាស់ដីនេះផង ។ ចំពោះការទាមទារទឹកដីកម្ពុជាក្រោម លោកមានជំនឿទៅលើសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក នឹងអាចទាមទារសិទ្ធិជាជនជាតិដើមបាន ដើម្បីឲ្យខ្មែរក្រោមអាចសម្រេចវាសនាដោយខ្លួនឯងបាន៖ «ទាមទារនឹងធ្វើការតស៊ូមតិដ៏កក្រើក ធ្វើឲ្យអាជ្ញាធរវៀតណាមហ្នឹង ក៏មានការបារម្ភ និងមានចំណុចខ្លះ ។ ក្នុងនោះតាមតំបន់ខ្លះកោះហៅអញ្ជើញ ក៏ដូចជានិមន្តព្រះសង្ឃទៅសួរនាំអំពីបញ្ហាការតស៊ូមតិនេះ ។ ដូច្នេះឃើញថាសកម្មភាពរបស់សហព័ន្ធ ក៏ដូចជាសមាគមនៅក្នុង និងក្រៅប្រទេសនេះ ឃើញថាដាស់តឿនក្រើនរំឭកឲ្យកូនខ្មែរ ដែលរស់នៅក្នុងប្រទេសនោះចងចាំនូវប្រវត្តិសាស្ត្រ ដែលទឹកដីរបស់យើង ត្រូវបាត់បង់ទៅលើអាណានិគមវៀតណាម ដែលត្រួតត្រាក្នុងពេលបច្ចុប្បន្ននេះបាទ»។
ស្រដៀងគ្នានេះដែរ និស្សិតឆ្នាំទី៤នៃសាកលវិទ្យាល័យពាណិជ្ជសាស្ត្រ លោក ចៅ ស៊ីផាន អាយុ ៣០ឆ្នាំ មកពីដែនដីកម្ពុជាក្រោម ប្រាប់ថា ខ្មែរក្រោមពុំអាចភ្លេចនូវទិវាដ៏ឈឺចាប់នេះបាន ហើយតែងប្រារព្ធធ្វើជារៀងរាល់ឆ្នាំ គឺចាស់ព្រឹទ្ធាចារ្យចង់បញ្ជ្រាបនូវថ្ងៃប្រវត្តិសាស្ត្រមួយនេះ ឲ្យកប់ចូលទៅជ្រៅក្នុងបេះដូងកុលបុត្រ កុលធីតាខ្មែរ ថាវៀតណាមបានលេបត្របាក់ទឹកដីខ្មែរ។ លោកបន្ថែមថា កូនខ្មែរទាំងអស់មិនត្រូវភ្លេចទង្វើឈ្លានពានរបស់វៀតណាមមកលើដីខ្មែរទេ ហើយលោកនៅតែចងចិត្តថា ថ្ងៃណាមួយកម្ពុជាក្រោមនឹងស្ថិតនៅក្រោមការមើលថែពីប្រទេសកម្ពុជាវិញ។ លោកផ្ដាំឲ្យយុវជន យុវនារីខិតខំសិក្សាយកចំណេះវិជ្ជាទៅតតាំងនឹងបច្ចាមិត្ត ដែលប៉ុនប៉ងរំលោភអធិបតេយ្យភាពកម្ពុជា៖ «តាមដែលខ្ញុំបានដឹងគឺ ទី១ ដើម្បីដាស់នូវចំណុចសំខាន់ក្នុងថ្ងៃនេះចូលទៅក្នុងខួរក្បាលកូនខ្មែរយើងទាំងអស់ឲ្យបានដឹងបានចងចាំ។ អ្វីដែលសំខាន់ គឺខ្ញុំចាប់អារម្មណ៍តែប៉ុណ្ណឹង គឺថាចង់ឲ្យកូនខ្មែរ ឲ្យទិដ្ឋភាពក្នុងថ្ងៃនេះ គឺនៅពេញក្នុងខួរក្បាលកូនខ្មែរ កូនចៅយើងជំនាន់ក្រោយ ។ ខ្ញុំ អ្វីដែលសំខាន់ គឺបេះដូងខ្ញុំ គឺលំអោនទៅនឹកឃើញតែចំណុចហ្នឹង គឺចង់ឲ្យកូនខ្មែរ គឺបានចងចាំ ។ ហើយក្នុងថ្ងៃហ្នឹង អ្វីដែលសំខាន់ គឺចង់បានការរួបរួមគ្នាមួយ»។
ទិវារំឭកខួប៧៣ឆ្នាំ នឹងប្រព្រឹត្តទៅក្នុងថ្ងៃទី៣ ខែកក្កដា ទីកន្លែងប្រារព្ធពិធី នៅទីស្នាក់ការសហគមន៍ខ្មែរកម្ពុជាក្រោម ផ្ទះលេខ៧២ ផ្លូវ៤២៦A ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ (នៅទល់មុខផ្សារឈូកមាស)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។