មន្ត្រីស្ថានទូតវៀតណាមប្រចាំកម្ពុជា នៅរសៀលថ្ងៃទី២១ កក្កដា កំពុងទាក់ទងមន្ត្រីក្រសួងការបរទេសវៀតណាម នៅទីក្រុងហាណូយ ថាតើត្រូវទទួលញត្តិពីក្រុមអ្នកតវ៉ាខាងភាគីកម្ពុជា ឬយ៉ាងណា។
ទន្ទឹមនឹងនេះ មន្ត្រីស្ថានទូតវៀតណាម មិនព្រមចេញមុខមកទទួលញត្តិពីអ្នកតវ៉ាទេ ហើយបានជំរុញឲ្យអ្នកតវ៉ាយកញត្តិនោះទៅដាក់នៅសាលាខណ្ឌចម្ការមន ជំនួសវិញ ក៏ប៉ុន្តែអ្នកតវ៉ាមិនព្រម ក៏បន្តតវ៉ានៅក្បែរស្ថានទូតនោះតទៅទៀត។
មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ អះអាងថ្ងៃទី២១ កក្កដា ថា មន្ត្រីសាលារាជធានីភ្នំពេញ នឹងអាចជួយសម្របសម្រួលមន្ត្រីស្ថានទូតវៀតណាម ឲ្យទៅទទួលញត្តិនោះតាមរយៈក្រសួងការបរទេសកម្ពុជាវិញ ដោយលោកបញ្ជាក់ថា ការបញ្ជូនញត្តិទៅដាក់នៅកម្រិតខណ្ឌដូច្នេះ គឺជារឿងមិនសមហេតុផល។
សហព័ន្ធនិស្សិតបញ្ញវន្ត និងព្រះសង្ឃខ្មែរក្រោម ទាមទារឲ្យវៀតណាម ទទួលស្គាល់ការពិតប្រវត្តិសាស្ត្រទឹកដីកម្ពុជាក្រោម និងសុំទោសប្រជាពលរដ្ឋខ្មែរជាសាធារណៈ ចំពោះការលើកឡើងដោយបំពានដែលថា ទឹកដីកម្ពុជាក្រោម ជារបស់វៀតណាម តាំងពីយូរមកហើយ ហើយបារាំងមិនបានកាត់ទឹកដីនេះទៅឲ្យវៀតណាមទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។