អ្នកវិភាគនយោបាយយល់ថា ក្នុងដំណាក់កាលកម្ពុជាកំពុងឈរនៅមាត់ជ្រោះ នៃសោកនាដកម្មដែលបង្កឡើងដោយការរាតត្បាតជំងឺកូវីដ-១៩ លោកនាយករដ្ឋមន្ត្រី ហ៊ុន សែន គួរតែដើរតួជាបុរសផ្សះផ្សាជាតិ ល្អជាជាងធ្វើជាបុរសផ្ដាច់ការ។
អ្នកវិភាគនយោបាយរស់នៅប្រទេសហ្វាំងឡង់ ដើម្បីគេចចេញពីការតាមចាប់ខ្លួនពីសំណាក់អាជ្ញាធររបបលោក ហ៊ុន សែន គឺលោក គឹម សុខ យល់ថា ប្រសិនលោក ហ៊ុន សែន ចង់ស្រោចស្រង់ស្ថានការណ៍ប្រទេសនៅពេលនេះ គឺមានតែការផ្សះផ្សាជាតិ និងការដោះស្រាយវិបត្តិនយោបាយដែលបែកបាក់គ្នានោះទេ ដែលអាចនាំឱ្យមានដំណោះស្រាយដល់វិបត្តិដែលពលរដ្ឋកំពុងរងគ្រោះ ពីការរាតត្បាតជំងឺកូវីដ-១៩។
លោក គឹម សុខ យល់ថា ស្របពេលដែលរបបដឹកនាំរបស់លោក ហ៊ុន សែន កំពុងជួបវិបត្តិគ្មានលុយដោះស្រាយបញ្ហា រឿងទាំង២នេះត្រូវដើរទន្ទឹមគ្នាទើបអាចដោះស្រាយតម្រូវការរបស់ពលរដ្ឋបាន ព្រោះតែវិបត្តិសេដ្ឋកិច្ចជាតិកំពុងដាំក្បាលចុះ ពលរដ្ឋជួបវិបត្តិខ្វះស្បៀងអាហារ វិបត្តិបំណុល បាត់បង់ប្រាក់ចំណូល និងការរាតត្បាតជំងឺកូវីដ-១៩៖ «ចេញពីកូវីដទៅវិបត្តិសេដ្ឋកិច្ច ពលរដ្ឋស្លាប់ដោយសារកូវីដផង គ្រោះថ្នាក់ដោយសារកូវីដផង ប្រជាពលរដ្ឋត្រូវអត់ឃ្លាន ស្លាប់ស្ទើរតែមិនហូរឈាមដោយសារអត់សេដ្ឋកិច្ចផង ស្លាប់ដោយសារថប់បារម្ភពីព្រោះគាត់ត្រូវជំពាក់បំណុលគេជុំទិសផង ដូច្នេះត្រូវតែដោះស្រាយបញ្ហាអស់ហ្នឹង គឺការប្រើលុយ ហើយវិធីរកលុយដូចខ្ញុំជម្រាបអ៊ីចឹង គឺការផ្សះផ្សាផ្ទៃក្នុងជាតិឡើងវិញ ទាំងអ្នកប្រឆាំង ទាំងរដ្ឋាភិបាល វាជាឱកាសល្អហើយកុំនៅប្រកាន់គ្នា ផ្សះផ្សាជាមួយគ្នាទៅ ហើយដោះស្រាយជាមួយគ្នា លុយអាចរកបានទេ នៅពេលដែលបញ្ហានានា ផ្ទៃក្នុងជាតិរបស់យើង អាចផ្សះផ្សាគ្នាបាន។ ខ្ញុំគិតថា ជប៉ុនក្ដី អឺរ៉ុបក្ដី សហរដ្ឋអាមេរិកក្ដី គេសប្បាយចិត្តហ្នឹងជួយក្នុងជំនួយមនុស្សធម៌ គេសប្បាយចិត្តនឹងផល់ជូនឱ្យកម្ពុជានូវទីផ្សារអនុគ្រោះបម្រុងសេដ្ឋកិច្ចបន្ទាប់ពីកូវីដ - ១៩ អ៊ីចឹងជួយទាំងសេដ្ឋកិច្ច ជួយទាំងជីវិតប្រជាពលរដ្ឋក្នុងស្ថានភាពបច្ចុប្បន្ន គេក៏នឹងជំរុញជួយករណីវ៉ាក់សាំងពីសហរដ្ឋអាមេរិកពីជប៉ុនជាដើម ដែលគេមានលុយបើទោះបីជាគេមិនផលិតក្នុងការជួយជ្រោមជ្រែងកម្ពុជា អាអ្វីដែលនៅមិនទាន់មានគឺសមានចិត្តរបស់លោកនាយករដ្ឋមន្ត្រី ហ៊ុន សែន»។
ការលើកឡើងបែបនេះ ធ្វើឡើងបន្ទាប់ពី អង្គការសុខភាពពិភពលោក (WHO) ព្រមានពីគ្រោះមហន្តរាយដ៏ធំដែលអាចនឹងកើតមានឡើង និងទទូចឱ្យពលរដ្ឋខ្មែរត្រូវនៅផ្ទះរៀងៗខ្លួន អំឡុងពិធីបុណ្យចូលឆ្នាំថ្មី ដើម្បីការពារគ្រួសារ សហគមន៍ និងប្រទេសជាតិទាំងមូល។
តំណាងអង្គការសុខភាពពិភពលោកប្រចាំកម្ពុជាវេជ្ជបណ្ឌិត លី អេលេន (Li Ailan) មានប្រសាសន៍ក្នុងសេចក្តីថ្លែងការណ៍បន្ទាន់មួយ នៅថ្ងៃទី១០ មេសា ថា កម្ពុជាឈរនៅមាត់ជ្រោះនៃសោកនាដកម្មដែលបង្កឡើងដោយការរាតត្បាតជំងឺកូវីដ-១៩។ អ្នកស្រីបន្តថា ទោះជាភាគីពាក់ព័ន្ធបានប្រឹងប្រែងអស់ពីសមត្ថភាពយ៉ាងណាក៏ដោយ ក៏ការគ្រប់គ្រងវីរុសនេះនៅតែប្រឈមនឹងការលំបាក។ អ្នកស្រីបន្ថែមថា បើមិនបញ្ឈប់ការផ្ទុះរាតត្បាតឥឡូវនេះទេ ប្រព័ន្ធសុខាភិបាលកម្ពុជា នឹងប្រឈមបន្ទុកយ៉ាងធ្ងន់ធ្ងរ ដែលអាចនឹងមានផលវិបាកជាមហន្តរាយដ៏ធំ។
អង្គការសុខភាពពិភពលោកចេញសារព្រមានធ្ងន់ៗ បែបនេះ ក្រោយពីកម្ពុជាបានផ្ទុះរាលដាលជំងឺកូវីដ-១៩ ទ្រង់ទ្រាយធំ ចេញពីព្រឹត្តិការណ៍សហគមន៍២០ កុម្ភៈ។ ចំនួនអ្នកឆ្លងក្នុងសហគមន៍បានកើនដល់ ៣.៥៤៩ ក្នុងនោះគ្រាន់តែរយៈពេលពីរថ្ងៃចុងក្រោយនេះ ក្រសួងសុខាភិបាលរកឃើញអ្នកឆ្លងថ្មីជាង១ ពាន់នាក់។ ចំណែកអ្នកស្លាប់ដោយសារកូវីដ-១៩ វិញ តួលេខបានកើនដល់ ២៦នាក់ហើយ គិតត្រឹមព្រឹកថ្ងៃទី១០ មេសា។
វិធានការទប់ស្កាត់ការរីករាលដាលជំងឺកូវីដ-១៩ នៅតែអនុវត្ត ឯវិធានការបង្ក្រាបអ្នកដែលនិយាយប៉ះពាល់រឿងវ៉ាក់សាំងចិន ក៏នៅតែបន្តធ្វើ។
តុលាការខេត្តកំពង់ស្ពឺ នៅថ្ងៃទី១០ ខែមេសា បានសម្រេចឃុំខ្លួនយុវជនម្នាក់បង្ហោះវីដេអូនៅលើបណ្ដាញសង្គម តិកតុក (TikTok) ដែលចោទថា ប្រឌិតរឿងពាក់ព័ន្ធវ៉ាក់សាំងប្រឆាំងជំងឺកូវីដ-១៩។ចៅក្រមស៊ើបសួរសាលាដំបូងខេត្តកំពង់ស្ពឺ លោក ថៃ គឹមនី ប្រាប់សារព័ត៌មានក្នុងស្រុកថា យុវជនឈ្មោះ ប៉ាន់ សុភី អាយុ២៨ឆ្នាំ រស់នៅភូមិភ្នំតូច ឃុំពោធិ៍ចំរើន ស្រុកបរសេដ្ឋ ខេត្តកំពង់ស្ពឺ រងការចោទប្រកាន់ពីបទ«រារាំងដល់ការអនុវត្តវិធានការ និងបទញុះញង់ឱ្យមានការរើសអើង»។
សមត្ថកិច្ចអះអាងថា យុវជនរូបនេះ បានថតវីដេអូបង្ហោះចែកចាយនៅលើបណ្ដាញសង្គម ប្រឌិតព័ត៌មានថា វ៉ាក់សាំងប្រឆាំងកូវីដ-១៩ របស់ចិន ដែលកំពុងចាក់ជូនប្រជាពលរដ្ឋនេះ គឺមានភាពមិនច្បាស់លាស់។ ការប្រឌិតព័ត៌មាននេះ គឺមានចេតនាញុះញង់ និងធ្វើឱ្យមានការយល់ច្រឡំពីសំណាក់ប្រជាពលរដ្ឋ។
ថ្លែងសារបង្ហោះលើបណ្ដាញសង្គមទាក់ទង និងស្ថានភាពរីករាលដាលជំងឺកូវីដ-១៩ លោក ហ៊ុន សែន ថ្លែងឌឺដងទៅអ្នកធ្វើការឃ្លាំមើលសិទ្ធិមនុស្សថា លោកនឹងចាត់វិធានការបង្ក្រាបអ្នកដែលបំពុលសង្គម និងបង្កឱ្យប៉ះពាល់ឱ្យមានចលាចលសង្គម ដើម្បីការពារពលរដ្ឋ១៦លាននាក់ ក្នុងពេលរដ្ឋាភិបាលរបស់លោកកំពុងទប់ស្កាត់ការរាតត្បាតជំងឺកូវីដ-១៩ ទោះបើចោទលោកថា គ្រប់គ្រងបែបផ្ដាច់ការក្ដី៖ «ហើយពួកអ្នកនិយាយពីសិទ្ធិមនុស្សខ្ញុំសូមនិយាយថា អ្នកឯងគិតពីសិទ្ធិមនុស្សនៃមនុស្សម្នាក់ដែលនិយាយបំភ្លៃ ដោយនិយាយញុះញង់ តែខ្ញុំគិតពីមនុស្សរាប់លាននាក់ដែលគេត្រូវការរស់ អ្នកឯងយកមួយណាយកទៅ។ ប្ដឹងខ្ញុំទៅតុលាការឧក្រិដ្ឋឡាអេ ក៏ប្ដឹងទៅ ទៅតុលាការឧក្រិដ្ឋកម្មអន្តរជាតិក៏ធ្វើទៅ ធ្វើតាមចិត្ត ។ បើខ្ញុំសម្រាប់ខ្មែររាប់លាននាក់រស់ ហើយសុខចិត្តចាប់ពួកអាបំពុលញាត់គុកអ្នកឯងថា ផ្ដាច់ការអូខេ ! ទទួលបានខ្ញុំសុខចិត្តមានឈ្មោះជាអ្នកផ្ដាច់ការ ប៉ុន្តែខ្ញុំមានគុណសម្បត្តិការពារជីវិតប្រជាជនខ្ញុំឱ្យរស់រានមានជីវិត។ អ្នកឯងយកមួយណា អ្នកឯងយកសិទ្ធិសេរីភាពបញ្ចេញមតិ រួចហើយងាប់ទៅវាខានបញ្ចេញមតិ ហើយបំផ្លាញដល់ប្រជាជនរាប់លាននាក់អ្នកឯងយកមួយណា ? សូមពួកសិទ្ធិមនុស្ស ពួកប្រជាធិបតេយ្យអ្នកឯងគិតឱ្យច្បាស់ទៅ»។
ក្នុងគ្រាដែលលោកនាយករដ្ឋមន្ត្រី ហ៊ុន សែន នៅតែប្រកាន់ជំហរថា លោកសុខចិត្តដើរតួជាបុរសផ្ដាច់ការ លោក គឹម សុខ ផ្ដល់យោបល់ថា ពេលវេលានេះលោក ហ៊ុន សែន គួរធ្វើជាបុរសផ្សះផ្សា ជាវីរបុរសឱ្យទាន់ស្ថានការណ៍ជាក់ស្ដែង ទើបមានកិត្តិយសឧត្ដុង្គឧត្ដមសម្រាប់ប្រទេសជាតិ ដើម្បីស្រោចស្រង់ជាតិដែលកំពុងដើរដល់មាត់ជ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។