ព្រះមហាក្សត្រ​យាង​ទៅប្រទេស​ចិន​ ដើម្បី​ពិនិត្យ​ព្រះរាជ​សុខភាព​

0:00 / 0:00

ព្រះមហាក្សត្រ ​ព្រះបាទ ​នរោត្តម សីហមុនី និង​​សម្ដេច​ម៉ែ យាង​ទៅ​ទីក្រុង​ប៉េ​កាំង ប្រទេ​ស​ចិន ​ចាប់​ពី​ថ្ងៃ​ទី១៦ ខែ​សីហា ​ ដើម្បី​ពិនិត្យ​និង​ព្យាបាល​ព្រះរាជ​សុខភាព។ ដំណើរ​យាង​ទៅ​ពិនិត្យ​ព្រះរាជ​សុខភាព​នេះ មិន​ទាន់​កំណត់​ពេល​នៃ​ការ​យាង​ត្រឡប់​មកវិញ​នៅ​ឡើយ។

ក្រុម​មេដឹកនាំ​​ក្រុង​ភ្នំពេញ​ជា​អ្នក​ថ្វាយ​ព្រះរាជ​ដំណើរ​របស់​ទ្រង់។ អំឡុពេល​​អវត្តមាន​របស់​អង្គ​ព្រះមហាក្ស​ត្រ​នេះ ប្រ​ធាន​ព្រឹទ្ធសភា​របប​ឯក​បក្សលោក សាយ ឈុំ ត្រូវ​ឡើង​ជា​​ប្រមុខ​រដ្ឋ​ស្ដីទី​កាន់​កិច្ច​ការ​ជំនួស​ព្រះអង្គ។

ព្រះបាទ ​នរោត្តម​ សីហមុនី​ ទ្រង់​យាង​ទៅ​ពិនិត្យ​ព្រះរាជ​សុខភាព​នៅ​ប្រទេស​ចិន​ជា​ទៀងទាត់ ​ក៏​ប៉ុន្តែ​គេ​សង្កេត​ឃើញ​ថាជួន​កាល​ទ្រង់​ក៏យាង​ទៅ​ប្រទេស​ចិន​មុនកាល​វិភាគ​ដែរ ​នៅ​ពេល​រដ្ឋាភិបាល​ធ្វើ​ច្បាប់​ណាមួយ​ដែល​ប្រាស់ចាក​ពី​ស្មារតី​នៃ​រដ្ឋធម្មនុញ្ញ។ ជា​ឧទាហរណ៍ កាល​ពី​ដើមខែមីនា ​​ឆ្នាំ២០២១​ ទ្រង់​បាន​យាង​ចេញ​ពី​កម្ពុជា និង​គង់​នៅ​ទីក្រុង​ប៉េកាំង​អស់​រយៈ​ពេល​ជាច្រើន​សប្តាហ៍​ ស្រប​ពេល​ដែល​របប​លោក ហ៊ុន សែន កំពុងបង្កើតច្បាប់ ​ស្តីពី​ វិធានការ​ទប់ស្កាត់ការឆ្លង​រីករាល​ដាល​នៃជំងឺកូវីដ-១៩ និង​ជំងឺឆ្លង​កាចសាហាវ​និង​ប្រកប​ដោយ​គ្រោះថ្នាក់​ផ្សេងៗទៀត​ ដែល​អ្នក​ឃ្លាំ​មើល ​វាយតម្លៃ​ថា ​ច្បាប់នេះ ​ផ្ទុយពីស្មារតីរដ្ឋធម្មនុញ្ញ និងរំលោភ​សិទ្ធិ​មនុស្ស​បន្ថែម​ទៀត​។ ហើយ​កាល​ពី​ពាក់កណ្តាល​ឆ្នាំ២០២០ ព្រះអង្គ ​ក៏ទ្រង់​យាងទៅ​ប្រទេស​ចិនដែរ​ ចំពេល​របបក្រុ​ង​ភ្នំពេញ​ចាប់​ផ្តើម​ធ្វើ​ច្បាប់​គ្រប់គ្រង​ប្រទេស​ក្នុងភាព​អាសន្នដែល​អ្នក​ឃ្លាំមើល​យល់ថាច្បាប់​នេះលោក​នាយករដ្ឋមន្ត្រី ហ៊ុន សែន ទុក​ប្រើប្រាស់​ក្នុងពេល​ផ្ទេរអំណាច​ឲ្យកូនប្រុស​របស់​លោក​នៅ​ពេល​ខាង​មុខ។

អ្នក​វិភាគ​នយោបាយ​​យល់​ថា ​ព្រះរាជ​ដំណើរ​របស់​ព្រះអង្គ​នៅ​ពេល​នោះ ​គឺ​ដោយសារ​ទ្រង់​មិន​សព្វ​ព្រះរាជ​ហឫទ័យ​ក្នុង​ការ​ឡាយ​ព្រះហស្ត​លេខា​លើ​ការបង្កើត​ច្បាប់​ទាំង​នេះ​ឡើយ​ ព្រោះ​ទ្រង់​ដឹងថា ​របបលោក ហ៊ុន សែន ​នឹង​យក​លេស​នេះ​ធ្វើ​ទុក្ខ​បុក​ម្នេញ​ថែម​ទៀតលើ​សកម្មជន​បក្ស​ប្រឆាំង ​មន្ត្រី​សង្គម​ស៊ីវិល ​និង​អ្នក​រិះគន់​ ដើម្បីរក្សា​​អំណាច​​ត​វង្ស​ត្រកូល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។