មេឃុំក្រយាជាប់ឆ្នោតមកពីគណបក្សភ្លើងទៀន ខេត្តកំពង់ធំ លោក យ៉ាប់ យូត បង្ហាញបទពិសោធន៍ជាប់ឆ្នោតជាមេឃុំ ៣អាណត្តិជាប់គ្នា កូតាពីគណបក្សប្រឆាំង។ មេឃុំរូបនេះ ចាត់ទុកភាពស្មោះត្រង់ គោរពស្រឡាញ់ពលរដ្ឋដោយស្មើភាពគ្នា មិនរើសអើ គឺជាគន្លឹះសំខាន់ ធ្វើឱ្យលោកទទួលបានសំឡេងឆ្នោតគាំទ្រច្រើនជាងគណបក្សកាន់អំណាច។
មេឃុំក្រយា ស្រុកប្រាសាទបល្ល័ង្គ អំពាវនាវដល់មេឃុំ/ចៅសង្កាត់ដែលទើបជាប់ឆ្នោតទូទាំងប្រទេស ពីគ្រប់គណបក្សនយោបាយថា ត្រូវមានភាពស្មោះត្រង់ មិនប្រកាន់បក្សពួកនិយម និងមិនប្រព្រឹត្តអំពើពុករលួយ ទើបការដោះស្រាយបញ្ហាប្រឈមមានប្រសិទ្ធភាព និងការអភិវឌ្ឍមូលដ្ឋានរីកចម្រើន។
មេឃុំជាប់ឆ្នោតមកពីគណបក្សភ្លើងទៀន លោក យ៉ាប់ យូត ឱ្យដឹងនៅថ្ងៃទី៨ មិថុនាថា ក្រោយពីជាប់ឆ្នោតជាមេឃុំ លោកនឹងធ្វើសមាជនៅពេលឆាប់ៗ នេះ ដើម្បីស្តាប់កង្វល់របស់ពលរដ្ឋ ហើយពិភាក្សារកដំណោះស្រាយ។ លោកសង្កេតឃើញថា កន្លងទៅគ្មានវត្តមានគណបក្សប្រឆាំង ធ្វើឱ្យការអភិវឌ្ឍមូលដ្ឋានខ្វះចន្លោះច្រើន ហើយការប្រើប្រាស់កញ្ចប់ថវិកាឃុំ អាចនឹងមានភាពមិនប្រក្រតីច្រើន។
លោករំពឹងថា ក្រោយពីមានគណបក្សនយោបាយជំទាស់ចូលរួម អាចនឹងកាត់បន្ថយអំពើពុករលួយ ហើយការអភិវឌ្ឍមូលដ្ឋាន នឹងរីកចម្រើន៖ «វាគ្មានអីដល់តម្លាភាពទេ ធ្វើអីមានតម្លាភាព ធ្វើតាមតម្រូវការរបស់ពលរដ្ឋ ពួកគាត់សំណូមពរ បញ្ហាអីមានអាទិភាពជាងគេ។ ប្រជាជនមានបញ្ហាអីយើងជួយដោះស្រាយអស់ពីលទ្ធភាព»។
មេឃុំវ័យ ៥២ ឆ្នាំរូបនេះ បន្ថែមថា ពលរដ្ឋរស់នៅឃុំនេះ ត្អូញត្អែររឿងផ្លូវលំតូចៗ ជាច្រើនភ្ជាប់ពីភូមិ មួយទៅភូមិមួយទៀត ពិបាកធ្វើដំណើរ ហើយបញ្ហានេះកើតមានជាច្រើនឆ្នាំមកហើយ មិនទាន់ឃើញ អាជ្ញាធរមូលដ្ឋានដោះស្រាយបាននៅឡើយទេ។ លោកថា បច្ចុប្បន្នក្នុងឃុំក្រយា មិនទាន់មាន មណ្ឌលសុខភាពនៅឡើយទេ ពលរដ្ឋត្រូវចំណាយពេលច្រើនទៅព្យាបាលជំងឺនៅឃុំផ្សេងទៀត ឆ្ងាយពីភូមិ ហេតុនេះ លោកនឹងពិភាក្សាដោះស្រាយរឿងនេះជាអាទិភាព។
ឃុំក្រយា ស្រុកប្រាសាទបល្ល័ង្គ ខេត្តកំពង់ធំ មានគណបក្សនយោបាយ៥ ចូលរួមប្រកួតប្រជែកការបោះឆ្នោត គឺគណបក្សប្រជាជនកម្ពុជា គណបក្សភ្លើងទៀន គណបក្សសញ្ជាតិកម្ពុជា គណបក្សហ៊្វុនស៊ិនប៉ិច និងគណបក្សខ្មែររួបរួមជាតិ។
លទ្ធផលបណ្ដោះអាសន្នរបស់ គ.ជ.ប បន្ទាប់ពីរាប់សន្លឹកឆ្នោត បង្ហាញថា គណបក្សភ្លើងទៀនទទួលបានសំឡេង ១.៣៦០សំឡេង ហើយគណបក្សប្រជាជនកម្ពុជាទទួលបាន ១.១១១សំឡេង ក្នុងចំណោម ៧អាសនៈ។
លោក យ៉ាប់ យូត ជាប់ឆ្នោតជាមេឃុំ ៣អាណត្តិជាប់ៗ គ្នា ពោលកាលពីឆ្នាំ២០១២ ក្នុងអាណត្តិទី៣ លោកជាប់ឆ្នោតជាមេឃុំ មកពីគណបក្ស សម រង្ស៊ី ហើយកាលពីឆ្នាំ២០១៧ ក្នុងអាណត្តិទី៤ លោកក៏ជាប់ឆ្នោតជាមេឃុំកូតាពីគណបក្សសង្គ្រោះជាតិ។
វិទ្យុអាស៊ីសេរី មិនទាន់អាចទាក់ទង សុំការបំភ្លឺរឿងនេះ ពីអតីតមេឃុំក្រយា លោក ឡាញ់ ធឿន បាននៅឡើយទេ នៅថ្ងៃទី៨ មិថុនា។
ឆ្លើយតបរឿងនេះ អ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីថា សមាសភាពអាជ្ញាធរមកពីគណបក្សប្រជាជន មិនដែលមានចិត្តចង្អៀតចង្អល់ជាមួយគណបក្សដទៃទៀតនោះទេ។ លោកជឿជាក់ថា ក្រុមប្រឹក្សាឃុំមានចម្រុះគណបក្ស នឹងសហការគ្នាល្អ បំពេញតួនាទីស្របតាមច្បាប់ស្ដីពីរដ្ឋបាលថ្នាក់ក្រោមជាតិ ដែលតម្រូវឱ្យយកមតិភាគច្រើន៖ «មានច្បាប់ស្ដីពីការគ្រប់គ្រងរដ្ឋបាលថ្នាក់ក្រោមជាតិ ហើយមានការត្រួតពិនិត្យពីក្រសួងមហាផ្ទៃទៀត អត់មានរឿងអត់សហការទេ ត្រូវតែសហការ។ សមាសភាពគណបក្សប្រជាជន មិនដែលមានចិត្តចង្អៀតចង្អល់ជាមួយបងប្អូនគណបក្សដទៃទេ»។
ជុំវិញរឿងនេះ មន្ត្រីនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា ផ្តល់ទស្សនៈថា អាជ្ញាធរឃុំមកពីគណបក្សនយោបាយចម្រុះ មិនត្រូវប្រកាន់និន្នាការនយោបាយនោះទេ រួមទាំងសមត្ថកិច្ចមូលដ្ឋានផងដែរ ដោយត្រូវសហការគ្នាដោះស្រាយបញ្ហាប្រឈម និងអភិវឌ្ឍន៍មូលដ្ឋានឱ្យល្អប្រសើរ។ លោកសង្កេតឃើញថា កន្លងទៅអាជ្ញាធរគណបក្សកាន់អំណាច តែងតែរើសអើងមេឃុំមកពីគណបក្សជំទាស់ ធ្វើឱ្យការដោះស្រាយបញ្ហារអាក់រអួល៖ «ទាំងសមាជិកគណបក្សកាន់អំណាច ជាប់និន្នាការនយោបាយបក្សហ្នឹង គាត់តែងតែមិនទម្លាក់ចោលនូវ និន្នាការបក្សរបស់ខ្លួន តែងមានការរើសអើង ពុំមានសហការគ្នាល្អទេ តែងតែមើលបំណាំគ្នា រកឱកាសចាប់កំហុស ហើយធ្វើការប្តឹងផ្តល់ និងបង្អាក់ នូវគម្រោងដែលបានលើកឡើងពីខាងគណបក្សជំទាស់ ឬពីគណបក្សផ្សេង។
លទ្ធផលបណ្ដោះអាសន្នប្រកាសដោយ គ.ជ.ប កាលពីព្រឹកថ្ងៃទី៦ ខែមិថុនា នៅខេត្តកំពង់ធំ គណបក្សភ្លើងទៀន ឈ្នះតំណែងជាមេឃុំ មានឃុំ៣ រួមមាន ឃុំចំណាលើនៅស្រុកស្ទោង ឃុំដូង និងឃុំក្រយា នៅស្រុកប្រាសាទបល្ល័ង្ក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។