អាជ្ញាធរមូលដ្ឋាននៅស្រុកចម្ការលើខេត្តកំពង់ចាម រារាំងសកម្មជនគណបក្សភ្លើងទៀនមិនឱ្យលើកស្លាកគណបក្សនៅតាមចិញ្ចើមផ្លូវសាធារណៈនៅព្រឹកថ្ងៃទី២១កុម្ភៈ។ សកម្មជនបក្សភ្លើងទៀន ចាត់ទុកសកម្មភាពរបស់អាជ្ញាធរបក្សកាន់អំណាចនេះថា ជាការអនុវត្តផ្ទុយពីការណែនាំរបស់ក្រសួងមហាផ្ទៃ និង បទបញ្ជារបស់លោកនាយករដ្ឋមន្ត្រីហ៊ុន សែន។
សកម្មជនគណបក្សភ្លើងទៀនស្រុកចម្ការលើ សោកស្ដាយ ដែលមេភូមិនិងអាជ្ញាធរឃុំបក្សកាន់អំណាច បានរារាំងនិងបញ្ជូនសមត្ថកិច្ចជាច្រើននាក់តាមឃ្លាំមើលពួកលោកលើកស្លាកគណបក្សជាបន្តបន្ទាប់។
ប្រធានក្រុមការងារគណបក្សភ្លើងទៀន ស្រុកចម្ការលើ លោក សយ ស៊ីថាត ប្រាប់វិទ្យុអាស៊ីសេរីនៅថ្ងៃទី២១ កុម្ភៈថា មេភូមិតាអុង ឈ្មោះ ហ៊ាង និងជំទប់ទី១ ឃុំតាអុង គឺលោក ទី គឹមឆឺយ បានរារាំង និងដើរអុកឡុករំខានដល់ពួកលោកមិនឱ្យលើកស្លាកគណបក្សនៅតាមដងផ្លូវក្នុងភូមិតាអុង នៅព្រឹកថ្ងៃទី២១ កុម្ភៈ។ លោកបញ្ជាក់ថា នៅពេលនោះជំទប់ទី១ បក្សកាន់អំណាចរូបនេះបានហាមឃាត់ពួកលោកមិនឱ្យលើកស្លាកគណបក្ស ក្រោមលេសថា ពួកលោកលើកស្លាកគណបក្សទទឹងផ្លូវ ប៉ុន្តែលោកបានបដិសេធចំពោះការចោទប្រកាន់នេះ។ លោកចាត់ទុកសកម្មជនរបស់អាជ្ញាធរបក្សកាន់អំណាចនេះថា ជាការបង្កការរំខាននិងអនុវត្តផ្ទុយពីការណែនាំរបស់ក្រសួងមហាផ្ទៃ និងបទបញ្ជារបស់លោក ហ៊ុន សែន៖ «ខ្ញុំលើកនៅតាមផ្លូវលំហ្នឹងគឺចូលទៅក្នុង នៅក្បែរផ្សារតាអុងហ្នឹង ហើយក៏មានស្លាកស្រាបៀក៏មានបង្គោលភ្លើង តែខ្ញុំលើកចូលទៅខាងក្នុងទៀត មិនមែនដាក់ទន្ទឹមនឹងបង្គោលភ្លើងទេ។ ខ្ញុំថាបើសិនជាការណាគេដកបង្គោលភ្លើងខ្ញុំក៏ដកដែរ ប៉ុន្តែជាចេតនារបស់គាត់គឺតែងមានលេសហេតុផលសព្វគ្រប់ហ្មង។ ក្រសួងមហាផ្ទៃដែលជាស្ថាប័នគ្រប់គ្រងលើមន្ត្រីសាលាឃុំទាំងអស់សូមឱ្យលោកជួយណែនាំពន្យល់លោកខាងក្រោមហ្នឹងឱ្យចេះច្បាប់ផង កុំឱ្យមកដើររារាំងតាមអំពើចិត្តអីចឹង ប្រទេសមានច្បាប់ » ។
លោកបន្ថែមថា ក្រៅអំពីមេភូមិនិងអាជ្ញាធរឃុំរារាំងពួកលោកមិនឱ្យលើកស្លាកគណបក្សនយោបាយហើយ ក៏មានប៉ូលិសស្រុកចំការលើចំនួន ៤នាក់បានស្លៀកពាក់ស៊ីវិល បានដើរថតរូបនិងតាមឃ្លាំមើលពួកលោករហូតដែរ។
ទាក់ទងនឹងបញ្ហានេះជំទប់ទី១ឃុំតាអុង លោក ទី គឹមឆឺយ ប្រាប់វិទ្យុអាស៊ីសេរីថា លោកមិនមានចេតនាទៅរារាំងដល់សកម្មជនបក្សភ្លើងទៀនមិនឱ្យស្លាកគណបក្សដូចការចោទប្រកាន់ឡើយ។ លោកបញ្ជាក់ថា លោកគ្រាន់តែប្រាប់មិនឱ្យសកម្មជនទាំងនោះលើកស្លាកគណបក្សកៀកផ្លូវសាធារណៈ ដែលធ្វើឱ្យប៉ះពាល់ដល់សណ្ដាប់ធ្នាប់។ម្យ៉ាងទៀតលោកថា អាជ្ញាធរមានគម្រោងពង្រីកផ្លូវនៅតំបន់នោះ ដែលឈូសឆាយពង្រីកផ្លូវអាចនឹងប៉ះពាល់លើស្លាកគណបក្សនាំឱ្យការប្ដឹងតវ៉ាគ្នានៅថ្ងៃខាងមុខ៖ «ខ្ញុំគ្រាន់តែប្រាប់ថា ឈឿន ឯងនៅតាអុងហ្នឹង ឈឿន ឯង ប្រហែលតែជាដឹងថា ផ្លូវហ្នឹង អាចឡើងទៅជាក្រាលកៅស៊ូ។ ប៉ុណ្ណឹងខ្ញុំអត់មានទៅថា មិនឱ្យលើកអី គឺអត់មាននិយាយទេ ស្រាប់តែពួកគាត់ហ្នឹងសុទ្ធតែខ្ញុំឯណាយកនីតិមាត់មកនិយាយ។ ខ្ញុំថា និយាយម៉េចឥឡូវលោកឯងមានសិទ្ធិខ្ញុំអត់ឃាត់ទេសិទ្ធិរបស់លោកឯង គណបក្សនយោបាយលោកឯង ប៉ុន្តែសិទ្ធិ ក៏មានកំណត់ក្នុងព្រំដែនច្បាប់ដែរ បើលោកឯងនិយាយអីចឹង។ ឥឡូវលោកឯងសាកលើកស្លាកគណបក្សលោកឯងដាក់កាត់ទទឹងផ្លូវមើល តើគេអនុញ្ញាតឬអត់ទេច្បាប់នោះ » ។
ក្នុងវីដេអូឃ្លិបដែលបង្ហោះនៅក្នុងបណ្ដាញសង្គមហ្វេសប៊ុកបង្ហាញអំពីសកម្មភាពរបស់ជំទប់ទី១ឃុំតាអុង លោក ទី គឹមឆឺយ បានប្រកែកតឹងសរសៃកជាមួយក្រុមសកម្មជនបក្សភ្លើងទៀន ដែលមានគ្នាប្រមាណ ២០នាក់កំពុងលើកស្លាកគណបក្សនៅខាងក្រោយបង្គោលអគ្គិសនី និងមានបដាឃោសនារបស់ក្រុមហ៊ុនទូរស័ព្ទនៅក្បែរនោះ។ នៅគ្រានោះអាជ្ញាធរឃុំរូបនេះបានចោទសកម្មជនទាំងនោះថា នាំគ្នាលើកស្លាកគណបក្សខុសពីលិខិតដែលពួកគេស្នើទៅអាជ្ញាធរឃុំ។ យ៉ាងណាក្រុមបក្សប្រឆាំងទាំងនោះមិនបានធ្វើតាមការរារាំងរបស់អាជ្ញាធរឃុំនោះទេ ដោយពួកគេបន្តលើកស្លាកគណបក្សរបស់ខ្លួនបានជោគជ័យ។
ជុំវិញរឿងនេះ នាយកប្រតិបត្តិអង្គការនិចហ្វិក (NICFEC) លោក សំ គន្ធាមី មានប្រសាសន៍ថា អាជ្ញាធរធ្វើបែបនេះជារឿងមិនត្រឹមត្រូវឡើយ ពីព្រោះជាការរារាំងដល់ការធ្វើសកម្មភាពនយោបាយរបស់គណបក្សភ្លើងទៀននេះ ផ្ទុយពីបទបញ្ជារបស់លោកនាយករដ្ឋមន្ត្រី ហ៊ុន សែន៖ «លើកហេតុផលបែបហ្នឹងមិនមានហេតុផលសមរម្យទេ សុខចិត្តសម្រួលឱ្យគេលើកទៅ ហើយនាយករដ្ឋមន្ត្រីអីទើបមានប្រសាសន៍ថ្មីៗ នេះតើរឿងអស់ហ្នឹង។ វាគឺជាការរារាំងមួយមិនឱ្យគេធ្វើសកម្មភាពនយោបាយ » ។
កាលពីថ្ងៃទី១៦ កុម្ភៈ លោក ហ៊ុន សែន បានបញ្ជាដល់អាជ្ញាធរគ្រប់លំដាប់ថ្នាក់ឱ្យបង្កលក្ខណៈងាយស្រួលដល់គណបក្សនយោបាយ ដែលបានចុះបញ្ជីនៅក្រសួងមហាផ្ទៃទាំងអស់ អាចជួបជុំគ្នា ឬលើកស្លាកគណបក្សដោយស្មើភាពគ្នា។ លោក បញ្ជាក់ថា ថ្វីត្បិតតែយុទ្ធនាការឃោសនាបោះឆ្នោតនៅពេលយូរទៀត តែគណបក្សនយោបាយ ត្រូវការជួបជុំគ្នា ការរៀបចំបេក្ខភាព ឬលើកស្លាក ដូច្នេះអាជ្ញាធរមិនត្រូវបង្កការលំបាក ឬរើសអើងឡើយ។
ទោះបីជាយ៉ាងណាក្ដី ប្រធានស្ដីទីគណបក្សភ្លើងទៀនលោក ថាច់ សេដ្ឋា លើកឡើងថា អាជ្ញាធរតាមមូលដ្ឋាននៅតែបន្តរើសអើង និងបង្កការលំបាកដល់គណបក្សភ្លើងទៀនដដែល និងកាន់តែខ្លាំងជាងមុនទៅទៀត ពិសេសនៅខេត្តត្បូងឃ្មុំ និងខេត្តសៀមរាប។ លោក ថាច់ សេដ្ឋា ជំរុញឲ្យរដ្ឋាភិបាលដាក់ទោសទណ្ឌ ចំពោះអាជ្ញាធរទាំងឡាយ ដែលបានបង្កការលំបាក និងរើសអើងសកម្មភាពគណបក្សនយោបាយដល់គណបក្សដទៃ៖
«ទោះបីជាមានបទបញ្ជាពីនាយករដ្ឋមន្ត្រី ក៏ដោយក៏យើងឃើញនៅមូលដ្ឋានហ្នឹង ក៏យើងឃើញថា អាជ្ញាធរ និងគណបក្សកាន់អំណាចដូចជា នៅខ្វល់ខ្វាយក្នុងការទប់ស្កាត់ដដែល។ ប៉ុន្តែក្រោយការតវ៉ាទៅយើងជម្នះយើងលើកស្លាកបាន »។
លោក ថាច់ សេដ្ឋា ថ្លែងថា គណបក្សភ្លើងទៀនមិនទាន់សម្រេចថា នឹងចូលរួមការបោះឆ្នោតនៅពេលខាងមុខនៅឡើយ ដោយគណបក្សកំពុងពង្រឹងកម្លាំងនៅតាមមូលដ្ឋាននៅទូទាំងប្រទេស។
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នេះ នឹងប្រព្រឹត្តទៅនៅថ្ងៃទី៥ ខែមិថុនាខាងមុខ។ការបោះឆ្នោតនេះមានគណបក្សនយោបាយជាង ៤០គណបក្ស ដែលបានចុះបញ្ជីនៅក្រសួងមហាផ្ទៃ និងប្រជាពលរដ្ឋជាង៩លាន២សែននាក់បានចុះឈ្មោះក្នុងបញ្ជីបោះឆ្នោត។ អគ្គលេខាធិការរង គ.ជ.ប លោក សោម សូរីដា ធ្លាប់ប្រាប់វិទ្យុអាស៊ីសេរីថា ការបោះឆ្នោតនៅពេលខាងមុខនេះ មានការិយាល័យបោះឆ្នោតសរុប ២៣.៦០២ការិយាល័យ និងមានអាសនៈសមាជិក ក្រុមប្រឹក្សាឃុំសង្កាត់ ១១.១២២អាសនៈ ក្នុងចំណោមឃុំសង្កាត់ ១.៦៥២ឃុំសង្កាត់នៅទូទាំងប្រទេស៕