អតីតឧបនាយករដ្ឋមន្ត្រីលោកព្រឹទ្ធាចារ្យ លឺ ឡាយស្រេង ដែលនិរទេសខ្លួននៅក្រៅប្រទេសជិត ២ឆ្នាំ ដើម្បីគេចពីការចាប់ខ្លួនក្រោយរបបក្រុងភ្នំពេញនោះ ឥលូវនេះលោកបានចូលប្រទេសកម្ពុជាវិញហើយនៅព្រឹកថ្ងៃទី៧ខែមេសានេះ។
លោក លឺ ឡាយស្រេង បានជាប់ប្ដឹង ពីបទប្រមាថព្រះមហាក្សត្រ និងបរិហារកេរ្តិ៍គណបក្សកាន់អំណាច តាមទូរស័ព្ទកាលពីឆ្នាំ២០១៧។
ការសម្រេចវិលចូលកម្ពុជាវិញនេះបន្ទាប់ពីលោក ហ៊ុន សែន ប្រកាសធានាពីសុវត្ថិភាពមិនឱ្យចាប់ឬធ្វើបាបនោះទេប៉ុន្តែលោកបង្គាប់ឱ្យលោកព្រឹទ្ធាចារ្យឈប់រិះគន់របបដឹកនាំរបស់លោកនិងត្រូវរស់នៅស្ងប់ស្ងាត់ឬទៅវត្តរក្សាសីលបើមិនចង់មានរឿងម្ដងទៀត។
បន្ទាប់ពីចូលដល់ទឹកដីកម្ពុជាភ្លាម លោកព្រឹទ្ធាចារ្យ លឺ ឡាយស្រេង បង្ហាញអារម្មណ៍រំភើបរីករាយនិងអះអាងថាមិនមានបញ្ហាអ្វីនោះទេ ។ លោកក៏បានសម្ដែងការអរគុណនិងជូនពរដល់សម្ដេចម៉ែ ព្រះមហាក្សត្រ រួមទាំងលោក ហ៊ុន សែន និងប្រជាពលរដ្ឋខ្មែរក្នុងឱកាសបុណ្យចូលឆ្នាំឱ្យជួបតែ សេចក្ដីសុខនិងសំណាងល្អ។
កាលពីខែតុលា ឆ្នាំ២០១៧ លោក លឺ ឡាយស្រេង បានបង្ខំចិត្តនិរទេសខ្លួននៅក្រៅប្រទេស បន្ទាប់ពីលោក ហ៊ុន សែន និងមន្ត្រីកំពូលៗរបស់លោកព្រួតគ្នាប្ដឹងលោកទៅតុលាការដោយចោទថា លោកប្រមាថព្រះមហាក្សត្រ និងបរិហារកេរ្តិ៍បក្សកាន់អំណាច និងគណបក្សហ៊្វុនស៊ិនប៉ិច។ ការប្តឹងនេះបន្ទាប់ពីគណនីហ្វេសប៊ុកឈ្មោះ `` សីហា `` ដែលស្និទ្ធនឹងរបបភ្នំពេញបានលួចបញ្ចេញសារសន្ទនាតាមទូរស័ព្ទរបស់លោក លឺ ឡាយស្រេង ជាមួយអតីតមន្ត្រីគណបក្សហ៊្វុនស៊ិនប៉ិចដូចគ្នា គឺអ្នកស្រី គី លម្អង។ សារសន្ទនាតាមទូរស័ព្ទនោះលោក លឺ ឡាយស្រេង និយាយថា ប្រសិនបើព្រះមហាក្សត្រទ្រង់មិនអាចអន្តរាគមន៍ដោះស្រាយវិបត្តិនយោបាយនេះបានទេ ទ្រង់គួរដាក់រាជ្យវិញទៅ និងនិយាយថា លោក ហ៊ុន សែន បានផ្ដល់លុយឱ្យគណបក្សហ៊្វុនស៊ិនប៉ិច ដើម្បីចូលរួមកម្ទេចបក្សប្រឆាំង។
សំណុំរឿងនេះត្រូវបានសាលាដំបូងរាជធានីភ្នំពេញផ្ដន្ទាទោសលោក លឺ ឡាយស្រេង កំបាំងមុខដោយបង្គាប់ឱ្យសងជំងឺចិត្តលោក ហ៊ុន សែន ចំនួន ៥០០លានរៀល (ប្រហែលជាង១សែនដុល្លារអាមេរិក) និងពិន័យ ៨លានរៀលផ្សេងទៀតចូលរដ្ឋ (ប្រហែល ២ពាន់ដុល្លារអាមេរិក)។
លោកព្រឹទ្ធាចារ្យ លឺ ឡាយស្រេង ដែលធ្លាប់ធ្វើជារដ្ឋមន្ត្រីក្រសួងព័ត៌មាន និងជារដ្ឋមន្ត្រីក្រសួងអភិវឌ្ឍជនបទពីគណបក្សរាជានិយមហ៊្វុនស៊ិនប៉ិចផងដែរនោះឱ្យដឹងថា លោកនឹងប្រើប្រាស់ជីវិត ចុងក្រោយរបស់លោក រស់នៅដោយស្ងប់ស្ងាត់នៅគេហដ្ឋានរបស់លោកស្ថិតនៅភ្នំស្រង់ ក្នុងស្រុកគង់ពិសី ខេត្តកំពង់ស្ពឺ ហើយនឹងបង្កើតមូលនិធិមួយដើម្បីជួយចិញ្ចឹមមនុស្សចាស់ជរាដែលគ្មានទីពឹងនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។