ប្រមុខរដ្ឋាភិបាលម៉ាឡេស៊ី (Malaysia) មកបំពេញទស្សនកិច្ចផ្លូវការនៅកម្ពុជារយៈពេល ២ថ្ងៃ គឺនៅថ្ងៃទី ២៣ និងទី២៤ កុម្ភៈ តបតាមការអញ្ជើញរបស់លោកនាយករដ្ឋមន្ត្រី ហ៊ុន សែន។ ដំណើរទស្សនកិច្ចនេះ គឺដើម្បីពង្រឹងទំនាក់ទំនងទ្វេភាគីរយៈពេល ៦៥ឆ្នាំនៃប្រទេសទាំងពីរ ក៏ប៉ុន្តែអ្នកជំនាញជឿថា ថ្នាក់ដឹកនាំប្រទេសទាំងពីរ ក៏នឹងពិភាក្សាគ្នាលើបញ្ហាតំបន់ ដូចជាវិបត្តិនៅប្រទេសភូមា ឬមីយ៉ាន់ម៉ា (Myanmar) និងជម្លោះដែនសមុទ្រចិនខាងត្បូងផងដែរ។
នាយករដ្ឋមន្ត្រីម៉ាឡេស៊ី លោក អ៊ីស្មាឯល សាប្រ៊ី យ៉ាកុប (Ismail Sabri Yaakob) បានមកដល់កម្ពុជាហើយ នៅរសៀលថ្ងៃទី២៣ កុម្ភៈ ហើយលោកនឹងជួបពិភាក្សាជាមួយថ្នាក់ដឹកនាំកម្ពុជា នៅថ្ងៃទី២៤ កុម្ភៈ។
ក្រសួងការបរទេសម៉ាឡេស៊ីឱ្យដឹងក្នុងសេចក្ដីប្រកាសព័ត៌មាននៅថ្ងៃទី២៣ កុម្ភៈថា លោក ស៊ីស្មាឯល សាប្រ៊ី យ៉ាកុប នឹងជួបពិភាក្សាជាមួយលោកនាយករដ្ឋមន្ត្រី ហ៊ុន សែន អំពីគំនិតផ្ដួចផ្ដើមមួយចំនួន ដើម្បីពង្រឹងបន្ថែមទៀតនូវទំនាក់ទំនងដ៏យូរអង្វែងរវាងម៉ាឡេស៊ី និងកម្ពុជា ក្នុងនោះមានជាអាទិ៍ កិច្ចសហប្រតិបត្តិការក្រោយវិបត្តិកូវីដ-១៩ កិច្ចសហប្រតិបត្តិការនៃក្របខ័ណ្ឌអាស៊ាន ព្រមទាំងបញ្ហាតំបន់ និងអន្តរជាតិសម្រាប់ផលប្រយោជន៍ទៅវិញទៅមក។ ក្រៅពីជួបជាមួយលោក ហ៊ុន សែន លោកក៏គ្រោងចូលគាល់ព្រះមហាក្សត្រ នរោត្តម សីហមុនី និងមានជំនួបដាច់ដោយឡែកជាមួយប្រធានព្រឹទ្ធសភា លោក សាយ ឈុំ និងប្រធានរដ្ឋសភា លោក ហេង សំរិន ផងដែរ។
នេះជាដំណើរទស្សនកិច្ចលើកដំបូងមកកាន់កម្ពុជារបស់លោក ស៊ីស្មាឯល សាប្រ៊ី យ៉ាកុប ក្រោយពីលោកបានក្លាយជានាយករដ្ឋមន្ត្រីម៉ាឡេស៊ីកាលពីចុងខែសីហា ឆ្នាំ២០២១។
ចំណែកខាងកម្ពុជាវិញ ក្រសួងការបរទេសឱ្យដឹងតាមសេចក្ដីប្រកាសព័ត៌មានកាលពីថ្ងៃទី២១ កុម្ភៈថា លោក ហ៊ុន សែន នឹងជួបពិភាក្សាជាមួយនាយករដ្ឋមន្ត្រីម៉ាឡេស៊ីអំពីទំនាក់ទំនង និងកិច្ចសហប្រតិបត្តិការទ្វេភាគី រួមមាន វិស័យពាណិជ្ជកម្ម និងការវិនិយោគ សេដ្ឋកិច្ច-សង្គម ការពារជាតិ និងសន្តិសុខ ព្រមទាំងការស្ដារសង្គម-សេដ្ឋកិច្ចឡើងវិញក្រោយវិបត្តិជំងឺកូវីដ-១៩។ ជាមួយគ្នានេះ នាយករដ្ឋមន្ត្រីប្រទេសទាំងពីរនឹងផ្លាស់ប្ដូរទស្សនៈគ្នាលើបញ្ហាតំបន់ និងអន្តរជាតិ ដែលជាផលប្រយោជន៍ និងក្ដីបារម្ភរួមគ្នាផងដែរ។ ក្រសួងបញ្ជាក់ទៀតថា ថ្នាក់ដឹកនាំប្រទេសទាំងពីរនឹងធ្វើសន្និសីទកាសែតរួមគ្នានៅចុងបញ្ចប់នៃជំនួបនេះ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេស លោក ជុំ សុន្ទរី ដើម្បីសាកសួរព័ត៌មាននេះបន្ថែមបានទេ នៅថ្ងៃទី ២៣កុម្ភៈ ដោយទូរស័ព្ទចូល តែពុំមានអ្នកទទួល។
ជុំវិញរឿងនេះ អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារ៉ា ជឿថា ក្រៅពីទំនាក់ទំនងទ្វេភាគី និងបញ្ហាសេដ្ឋកិច្ច-ពាណិជ្ជកម្ម ប្រមុខរដ្ឋាភិបាលកម្ពុជា និងម៉ាឡេស៊ីអាចនឹងជជែកគ្នាអំពីបញ្ហាតានតឹងក្នុងតំបន់មួយចំនួនទៀត ដូចជា វិបត្តិនៅប្រទេសភូមា និងជម្លោះសមុទ្រចិនខាងត្បូង ជាដើម។ ម្យ៉ាងវិញទៀត លោកយល់ថា ជំនួបរវាងថ្នាក់ដឹកនាំទាំងពីរក៏អាចជាការស្វែងយល់ពីគ្នាបន្ថែមទៀត ពីព្រោះថ្មីៗ នេះ មានការប៉ះទង្គិចគ្នាដោយពាក្យសម្ដីរវាងប្រមុខការទូតម៉ាឡេស៊ី និងប្រមុខរដ្ឋាភិបាលកម្ពុជា ដែលផ្ដើមចេញពីដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមា កាលពីដើមខែមករា ឆ្នាំ២០២២៖« កន្លងមក រដ្ឋមន្ត្រីការបរទេសម៉ាឡេស៊ីបានរិះគន់ច្រើនដែររឿងដំណើរទស្សនកិច្ចហ្នឹង។ អ៊ីចឹងក៏ជាកិច្ចការងារមួយ ក្រៅពីចំណងទាក់ទងទ្វេភាគីហ្នឹង គឺអាចពង្រីកការយល់ដឹង ការស្វែងយល់គ្នាដើម្បីរក្សានូវសមាជិកភាពអាស៊ានហ្នឹងឱ្យមូលមតិគ្នាបាន ដើម្បីធ្វើកិច្ចការនៅក្នុងក្របខ័ណ្ឌកម្ពុជាធ្វើជាប្រធានអាស៊ាន តើធ្វើជំហរបែបណា » ។
កាលពីខែមករា កន្លងទៅ រដ្ឋមន្ត្រីការបរទេសម៉ាឡេស៊ី លោក សៃហ្វូឌីន អាប់ឌុលឡាហ៍ (Saifuddin Abdullah) បានចេញមុខរិះគន់ដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមាថា ធ្វើឡើងដោយខ្វះការពិគ្រោះយោបល់ជាមួយបណ្ដារដ្ឋសមាជិកអាស៊ានផ្សេងទៀត។ ជាការឆ្លើយតប លោក ហ៊ុន សែន បានបរិហារប្រមុខការទូតម៉ាឡេស៊ីរូបនេះថា «ព្រហើន» និងមានសម្ដីមិនគប្បីចំពោះរូបលោកដែលជាប្រធានអាស៊ាន។
លោក សៃហ្វូឌីន អាប់ឌុលឡាហ៍ ក៏មានវត្តមានក្នុងដំណើរទស្សនកិច្ចផ្លូវការរបស់នាយករដ្ឋមន្ត្រីម៉ាឡេស៊ីមកកាន់កម្ពុជានាពេលនេះដែរ។
ទោះជាយ៉ាងណា ក្រសួងការបរទេសម៉ាឡេស៊ីបញ្ជាក់ក្នុងសេចក្ដីប្រកាសព័ត៌មានថា ដំណើរទស្សនកិច្ចដ៏មានសារៈសំខាន់របស់លោក ស៊ីស្មាឯល សាប្រ៊ី យ៉ាកុប មកកាន់កម្ពុជានាពេលនេះ ឆ្លុះបញ្ចាំងអំពីចំណងទាក់ទងដ៏ជ្រាលជ្រៅ និងរស់រវើករវាងម៉ាឡេស៊ី និងកម្ពុជា ទាំងលក្ខណៈទ្វេភាគី និងក្នុងក្របខ័ណ្ឌជាគ្រួសារអាស៊ាន។ ក្រោយបញ្ចប់ដំណើរទស្សនកិច្ចនៅកម្ពុជា នាយករដ្ឋមន្ត្រីម៉ាឡេស៊ីរូបនេះនឹងទៅបំពេញទស្សនកិច្ចផ្លូវការនៅប្រទេសថៃ ចាប់ពីថ្ងៃទី២៤ ដល់ទី២៦ ខែកុម្ភៈបន្តទៀត។
ម៉ាឡេស៊ី គឺជាអ្នកវិនិយោគធំជាងគេលំដាប់ទី៣ នៅកម្ពុជា បន្ទាប់ពីចិន និងកូរ៉េខាងត្បូង ដោយមានទុនវិនិយោគដោយផ្ទាល់ ឬអេហ្វឌីអាយ (FDI) សរុបជាង ៣ពាន់ ៥រយលានដុល្លារអាមេរិក (៣,៥៣ប៊ីលលានដុល្លារ) ចន្លោះពីឆ្នាំ១៩៩៤ ដល់ឆ្នាំ២០២០។ ការវិនិយោគសំខាន់ៗ របស់ម៉ាឡេស៊ីនៅកម្ពុជា រួមមាន វិស័យធនាគារ ទូរគមនាគមន៍ ការផលិតថាមពល និងវិស័យកម្សាន្តជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។