សាលាឧទ្ធរណ៍ភ្នំពេញ បដិសេធបណ្ដឹងសុំនៅក្រៅឃុំរបស់កូនប្រុសសកម្មជនបក្សប្រឆាំងម្នាក់ គឺយុវជន កាក់ សុវណ្ណច្ឆ័យ ដោយសំអាងថា ខ្លាចជនជាប់ឃុំ ទៅប្រព្រឹត្តិបទល្មើសផ្សេងទៀត នៅពេលបាននៅក្រៅឃុំបណ្ដោះអាសន្ន។ សាច់ញាតិ និងអ្នកការពារសិទ្ធិមនុស្ស ហៅការសម្រេចរបស់តុលាការជាន់ខ្ពស់មួយនេះថា ជារឿងអយុត្តិធម៌។
មេធាវីការពារក្ដី និងសាច់ញាតិរបស់ជនជាប់យល់ថា តុលាការឧទ្ធរណ៍ភ្នំពេញគួរតែដោះលែងយុវជន កាត់ សុវណ្ណឆ័យ ឱ្យបានសេរីភាព ពីព្រោះលោកមិនបានប្រព្រឹត្តខុសច្បាប់អ្វីឡើយ។ ក្នុងសវនាការលើបណ្ដឹងសុំនៅក្រៅឃុំបណ្ដោះអាសន្ន នៅព្រឹកថ្ងៃទី៣ សីហា ឆ្មាំពន្ធនាគារមិនបានដឹកក្មេងប្រុស កាក់ សុវណ្ណច្ឆ័យ មកចូលរួមទេ ដោយសារបារម្ភឆ្លងជំងឺកូវីដ១៩ (Covid-19)។ សវនាការនេះក៏មិនអនុញ្ញាតឲ្យម្ដាយរបស់ក្មេងប្រុស កាក់ សុវណ្ណច្ឆ័យ បានចូលរួមស្ដាប់ដោយផ្ទាល់ដែរ គឺមានតែមេធាវីជនជាប់ឃុំម្នាក់គត់។
មេធាវីការពារក្ដីឱ្យជនជាប់ឃុំ គឺលោក សំ សុគង់ ឲ្យដឹងនៅថ្ងៃទី៣ សីហាថា លោកបានទាញហេតុផលច្បាប់ និងស្ថានភាពជាក់ស្ដែង ទាំងការមានលំនៅឋានច្បាស់លាស់ តម្រូវការរៀនសូត្ររបស់កុមារ និងប្រវត្តិនៃជំងឺអូទីស្សឹម (Autism) របស់យុវជន កាក់ សុវណ្ណច្ឆ័យ ដើម្បីស្នើសុំឲ្យមានការដោះលែងកូនក្ដី។ ប៉ុន្តែប្រធានក្រុមប្រឹក្សាជំនុំជម្រះ គឺលោក ឌុច សុខសារិន មិនយល់ព្រម ហើយសម្រេចបន្តឃុំខ្លួនកូនក្ដីដដែល ដោយលើកហេតុផលថា ខ្លាចយុវជន កាក់ សុវណ្ណច្ឆ័យ ប្រព្រឹត្តិបទល្មើសផ្សេងទៀតនៅពេលនៅក្រៅឃុំ។ លោកមេធាវីយល់ថា ការសម្រេចក្ដីនេះ មិនផ្ដល់យុត្តិធម៌សម្រាប់កូនក្ដីរបស់លោកនោះទេ៖ « ខ្ញុំយល់ថាហេតុផលនេះ មិនទាន់មានលក្ខណៈសមហេតុផលទេ ហើយការពិភាក្សាជាមួយម្ដាយរបស់កុមារ កាក់ សុវណ្ណច្ឆ័យ ហ្នឹង គឺម្ដាយរបស់កុមារាហ្នឹង គាត់យល់ឃើញថាការសាលដីកាមិនទាន់បានផ្ដល់យុត្តិធម៌ឲ្យគាត់ទេ ហើយគាត់ស្នើសុំឲ្យមេធាវីការពារឲ្យកូនគាត់ហ្នឹង រៀបចំបណ្ដឹងសាទុក្ខ»។
ចំណែកម្ដាយរបស់យុវជន កាក់ សុវណ្ណច្ឆ័យ គឺលោកស្រី ព្រុំ ចាន់ថា ដែលរង់ចាំស្ដាប់លទ្ធផលសវនាការពីមេធាវី នៅខាងក្រៅសាលាឧទ្ធរណ៍ភ្នំពេញចាត់ទុកការសម្រេចនេះថា ជារឿងអយុត្តិធម៌មិនអាចទទួលយកបានឡើយ។ បន្ថែមពីនេះលោកស្រីក៏សោកស្ដាយចំពោះមន្ត្រីពន្ធនាគារដែលមិនបានដឹកកូនប្រុសរបស់គាត់មកឡើងសវនាការ៖ « កាត់ក្ដីដែលអយុត្តិធម៌សម្រាប់ក្រុមគ្រួសារពួកខ្ញុំ និងកូនប្រុសខ្ញុំអ៊ីចឹងវាអត់ត្រឹមត្រូវទេ អានេះគេហៅថាមិនដឹងក្រមសីលធម៌ទៅណាទេអាហ្នឹងណា។ រៀនមក យកអាការណ៍រៀនសូត្រហ្នឹងមកបំពានច្បាប់ទាំងស្រុងតែម្ដង»។
រយៈពេលជាងមួយខែ នៃការឃុំខ្លួន កាក់ សុវណ្ណច្ឆ័យ មកនេះ លោកស្រី ព្រុំ ចាន់ថា មិនដែលបានទទួលដំណឹងសុខទុក្ខកូនប្រុសនៅក្នុងពន្ធនាគារ "ម២" នោះទេ។ លោកស្រីបាត់ដំណឹងកូន ចាប់តាំងពីមន្ត្រីនគរបាលរាជធានីភ្នំពេញ ចាប់ខ្លួនកូនគាត់ពីក្នុងលំនៅឋានកាលពីយប់ថ្ងៃទី២៥ មិថុនារហូតមក។
ដើមហេតុនៃការចាប់ខ្លួន ក្មេងប្រុស កាក់ សុវណ្ណច្ឆ័យ គឺនគរបាលបានចោទជនជាប់រូបនេះថា ញុះញង់ នឹងជេរប្រមាថរដ្ឋាភិបាលក្នុងក្រុម (Group) ជជែកគ្នាមួយ នៃបណ្ដាញសង្គម (Telegram)។ លោកស្រី ព្រុំ ចាន់ថា អះអាងថា កូនរបស់លោកស្រីចាញ់បោកការបញ្ឆោតរបស់មនុស្សមួយក្រុមក្នុងបណ្ដាញសង្គមនោះ ដោយពួកគេនាំគ្នាជេរប្រមាថឪពុកម្ដាយរបស់យុវជន កាក់ សុវណ្ណច្ឆ័យ ថា ជាក្រុមក្បត់ជាតិ ទើបកូនរបស់គាត់ខឹងច្រឡោត ហើយជេរតបតវិញតែម្ដង។
ជុំវិញការសម្រេចក្ដីរបស់សាលាឧទ្ធរណ៍នេះ ប្រធានសមាគមសិទ្ធិមនុស្សអាដហុក លោក នី សុខា យល់ថាយុវជន កាក់ សុវណ្ណច្ឆ័យ មិនមានលទ្ធភាពប្រព្រឹត្តិបទល្មើសណាមួយ ដែលបង្កឲ្យកើតមានភាពវឹកវរធ្ងន់ធ្ងរដល់សង្គមនោះទេ។ អ្នកការពារសិទ្ធិមនុស្សរូបនេះ ជំរុញឲ្យចៅក្រមគ្រប់ជាន់ថ្នាក់ពិចារណាដោះលែងយុវជន កាក់ សុវណ្ណច្ឆ័យ ឲ្យមានសេរីភាពវិញ៖ « ក្រមព្រហ្មទណ្ឌគឺថាការឃុំខ្លួន វាទាល់តែនៅក្នុងលក្ខខណ្ឌចាំបាច់បំផុតដែលតុលាការត្រូវធ្វើការឃុំខ្លួនបណ្ដោះអាសន្ន។ ប៉ុន្តែយើងមើលឃើញជាក់ស្ដែងសម្រាប់សកម្មជនសង្គម សកម្មជនសិទ្ធិមនុស្ស សកម្មជនបរិស្ថាន សកម្មជននយោបាយអ្វី ភាគច្រើនគឺតុលាការគាត់យកជម្រើសការឃុំខ្លួនហ្នឹង ជាជម្រើសចម្បងទៅវិញ ដែលវាជារឿងមួយ ដែលវាជាការសម្រេចផ្ទុយពីស្មារតីនៃច្បាប់»។
កាលពីខែតុលា ឆ្នាំ២០២០ មន្ត្រីនគរបាលប៉ុស្តិ៍ចាក់អង្រែលើ ខណ្ឌមានជ័យ បានចាប់ឃុំខ្លួនយុវជននេះ ២យប់ ២ថ្ងៃម្ដងហើយ ដោយចោទថា យុវជនរូបនេះចូលក្នុងបរិវេណទីស្នាក់ការគណបក្សសង្គ្រោះជាតិ ដែលជាទីតាំងហាមឃាត់។ យុវជនរូបនេះអះអាងថា ក្នុងពេលឃុំខ្លួននោះ ប៉ូលិសបានវាយ និងដាល់ផ្ទៃមុខគាត់ច្រើនដៃ ទើបបង្គាប់ឲ្យគាត់ធ្វើកិច្ចសន្យាទទួលស្គាល់កំហុស ដើម្បីជាថ្នូរនឹងការដោះលែងឱ្យមានសេរីភាព។ ក្រោយមកនៅចុងខែមេសា ជនមិនស្គាល់មុខ ២នាក់ បានជិះម៉ូតូមួយគ្រឿងគប់យុវជនកាក់ សុវណ្ណច្ឆ័យ នឹងដុំឥដ្ឋត្រូវចំក្បាលខាងឆ្វេងបណ្ដាលឲ្យរបួសធ្ងន់ ហើយរហូតមកដល់ពេលនេះ សមត្ថកិច្ចមិនទាន់រកឃើញជនដៃដល់នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។