លទ្ធផលបណ្ដោះអាសន្នរបស់គណៈកម្មាធិការជាតិរៀបចំការបោះឆ្នោត (គ.ជ.ប) បង្ហាញថា ចំនួនពលរដ្ឋមានឈ្មោះទៅបោះឆ្នោតជាតិឆ្នាំ២០២៣ ខាងមុខនេះ អាចនឹងកើនឡើងដល់ជាង ៩លាន ៥សែននាក់ លើសពីបញ្ជីឈ្មោះក្នុងការបោះឆ្នោតឃុំ-សង្កាត់អាណត្តិទី៥ ខែមិថុនា ឆ្នាំ២០២២ កន្លងទៅ ដែលមានឈ្មោះអ្នកបោះឆ្នោតជាង ៩លាន២សែននាក់។
គិតត្រឹមថ្ងៃទី៧ ខែធ្នូ ប្រជាពលរដ្ឋទៅចុះឈ្មោះបោះឆ្នោតថ្មី មានជាង ៥៧ម៉ឺននាក់។ រីឯអ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានជាង ២៥ម៉ឺននាក់។
គ.ជ.ប បានបិទបញ្ចប់ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតនៅតាមឃុំ-សង្កាត់ រយៈពេល ៥០ថ្ងៃ ចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ដោយវាយតម្លៃអះអាងថា ដំណើរការនេះប្រព្រឹត្តទៅ «រលូនល្អ» និង «មានសណ្ដាប់ធ្នាប់» បើទោះបីជាមានបញ្ហាអាកាសធាតុ និងបញ្ហាប្រឈមមួយចំនួនក៏ដោយ។
អ្នកនាំពាក្យ គ.ជ.ប លោក ហង្ស ពុទ្ធា ពន្យល់នៅក្នុងកិច្ចប្រជុំផ្សព្វផ្សាយអំពីដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត កាលពីថ្ងៃទី៨ ខែធ្នូ ថា ប្រព័ន្ធរៀបចំបញ្ជីបោះឆ្នោតនៅកម្ពុជា គឺជាប្រព័ន្ធស្ម័គ្រចិត្ត ហើយការបោះឆ្នោតក៏ជាការស្ម័គ្រចិត្តដែរ។ លោកថា ដូច្នេះ ពលរដ្ឋមិនទៅចុះឈ្មោះ ឬមិនទៅបោះឆ្នោត គឺជាសិទ្ធិរបស់ពួកគាត់។ ដោយឡែកចំពោះការលុបឈ្មោះពីបញ្ជីបោះឆ្នោតដែលមានចំនួនជាង ២៥ម៉ឺននាក់វិញ លោកពន្យល់ថា ដោយសារតែមានអ្នកស្លាប់ អ្នកផ្លាស់ប្ដូរទីលំនៅចេញទៅឃុំ-សង្កាត់ផ្សេង និងអ្នកដែលត្រូវបានដកសិទ្ធិបោះឆ្នោតជាបណ្ដោះអាសន្ន។
គ.ជ.ប នឹងប្រកាសផ្តល់សុពលភាពលើបញ្ជីបោះឆ្នោតផ្លូវការ នៅថ្ងៃទី២១ ខែកុម្ភៈ ឆ្នាំ២០២៣ ខាងមុខ។ ការបោះឆ្នោតជាតិជ្រើសតាំងតំណាងរាស្ត្រអាណត្តិទី៧ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣។
គ.ជ.ប រងការរិះគន់ពីសហគមន៍ជាតិ និងអន្តរជាតិថា ជាស្ថាប័នពុំឯករាជ្យ មិនអព្យាក្រឹត្យ និងមាននិន្នាការគាំទ្រគណបក្សកាន់អំណាច ខណៈក្បាលម៉ាស៊ីន ថ្នាក់ដឹកនាំ និងមន្ត្រីជាន់ខ្ពស់នៃស្ថាប័នជាតិមួយនេះ ភាគច្រើនសុទ្ធតែត្រូវបានតែងតាំង និងជាមនុស្សរបស់គណបក្សប្រជាជនកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។