ភ្នាក់ងារសង្កេតការបោះឆ្នោតរបស់គណបក្សនយោបាយចំនួនជាង៧ម៉ឺន៨ពាន់នាក់( ៧៨. ៤៥៧) នឹងចូលរួមសង្កេតការបោះឆ្នោតក្រុមប្រឹក្សាឃុំ-សង្កាត់អាណត្តិទី៥។ គណៈកម្មាធិការជាតិរៀបចំការបោះឆ្នោតសម្រេចចុះបញ្ជីសេចក្ដីប្រកាសព័ត៌មានរបស់ គ.ជ.ប ពីលទ្ធផលបណ្ដោះអាសន្នចំនួនភ្នាក់ងារគណបក្សនយោបាយឱ្យដឹងថា គណបក្សនយោបាយទាំង១៧ ដែលបានដាក់បេក្ខជនចូលរួមការបោះឆ្នោតក្រុមប្រឹក្សា ឃុំ សង្កាត់ បានស្នើសុំចុះបញ្ជីភ្នាក់ងាររបស់ខ្លួន។
ក្នុងនោះគណបក្សប្រជាជនកម្ពុជាបានដាក់ភ្នាក់ងារសង្កេតការណ៍ច្រើនជាងគេ គឺមានចំនួនជាង៤ម៉ឺន៤ពាន់នាក់ (៤៤.១៣៣) បន្ទាប់មកគឺគណបក្សភ្លើងទៀន ដែលមានអ្នកសងេ្កតការណ៍សរុបជាង២ម៉ឺន៥ពាន់នាក់ (២៥.៨៤៥)។ ជាមួយគ្នានេះ មានគណបក្សចំនួន២ ដែលមានអ្នកសង្កេតការណ៍ជាង២ពាន់នាក់គឺគណបក្សហ្វ៊ុនស៊ិនប៉ិច (២.៥១៩) និងគណបក្សខ្មែររួបរួមជាតិ (២.៩២០) ស្របពេលដែលគណបក្សខ្មែរស្រឡាញ់ជាតិដាក់អ្នកសង្កេតការណ៍បានចំនួន ជាង១ពាន់៧រយនាក់ (១.៧៦៣)។
ក្នុងនោះដែរគណបក្សចំនួន៥បានដាក់អ្នកសង្កេតការណ៍របស់ខ្លួនចន្លោះពី១០០ ទៅជាង២រយនាក់។ ក្រៅពីនេះគណបក្សចំនួន៦ដែលដាក់អ្នកសង្កេតការណ៍ក្រោម១រយនាក់ ក្នុងនោះគណបក្សចំនួន៣បានដាក់អ្នកសង្កេតការណ៍ចន្លោះពី៤ ទៅ៩នាក់។
ចំនួនភ្នាក់ងារសង្កេតមើលដំណើរការបោះឆ្នោតមកពីគណបក្សនយោបាយនេះមានចំនួនថយចុះ បើប្រៀបធៀបនឹងការបោះឆ្នោតក្រុមប្រឹក្សាឃុំ សង្កាត់ អាណិត្តិទី៤ កាលពីឆ្នាំ២០១៧ ដែលកាលណោះមានចំនួនសរុប ជាង១សែន៥ពាន់នាក់ (១០៥.០៧៦) មកពីគណបក្សនយោបាយចំនួន១២ ដែលចូលរួមការបោះឆ្នោត។
ក្នុងនោះមកពីគណបក្សប្រជាជនកម្ពុជាចំនួន ជាង៤ម៉ឺន៤ពាន់នាក់ (៤៤.៦១៤) និងពីគណបក្សសង្រ្គោះជាតិចំនួនជាង៤ម៉ឺន៣ពាន់នាក់ (៤៣.៥៩៦)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។