បក្ស​ប្រឆាំង​ថា ទាល់តែ​ប្ដូរ​លោក ហ៊ុន សែន សិន ទើប​វប្បធម៌​នយោបាយ​ថ្មី​អាច​ដំណើរ​ការ​បាន

ដោយ ហេង រស្មី
2019-06-19
អ៊ីម៉ែល
មតិ
Share
បោះពុម្ព
លោក អេង ឆៃអ៊ាង អនុប្រធានគណបក្ស​សង្គ្រោះជាតិ ក្នុង​កិច្ច​ប្រជុំ​នៅ​សហរដ្ឋអាមេរិក ជាមួយ​ថ្នាក់ដឹកនាំ​បក្ស​នេះ កាល​ពី​ថ្ងៃទី១៦ ខែមីនា ឆ្នាំ​២០១៩។
លោក អេង ឆៃអ៊ាង អនុប្រធានគណបក្ស​សង្គ្រោះជាតិ ក្នុង​កិច្ច​ប្រជុំ​នៅ​សហរដ្ឋអាមេរិក ជាមួយ​ថ្នាក់ដឹកនាំ​បក្ស​នេះ កាល​ពី​ថ្ងៃទី១៦ ខែមីនា ឆ្នាំ​២០១៩។
RFA/Sorn Chanratha

គណបក្ស​សង្គ្រោះជាតិ​អះអាង​ថា គំនិត​ផ្ដួចផ្ដើម​ស្ដីពី​វប្បធម៌​នយោបាយ​ថ្មី នឹង​មិន​អាច​ដំណើរការ​ទៅមុខ​បាន​ឡើយ ដរាបណា​កម្ពុជា​មិន​ទាន់​មាន​ការ​ផ្លាស់ប្ដូរ​មេដឹកនាំ​បច្ចុប្បន្ន​ទេ​នោះ​។ ពេល​ថ្មីៗ​នេះ បញ្ញវន្ត​មួយ​ក្រុម​បាន​អះអាង​ថា ពួកគេ​កំពុង​រៀបចំ​សកម្មភាព​បណ្ដុះ​វប្បធម៌​នយោបាយ​ថ្មី ដើម្បី​បន្សាប​វប្បធម៌​នយោបាយ​ចាស់ ដែល​មាន​លក្ខណៈ​មិន​ស្អាតស្អំ និង​កំពុង​បង្ក​មហន្តរាយ​ដល់​សង្គមជាតិ​។ របប​លោក ហ៊ុន សែន មិន​ចាប់អារម្មណ៍​នឹង​រឿង​នេះ​ឡើយ ចំណែក​ពលរដ្ឋ​វិញ ចង់​ឱ្យ​ក្រុម​បញ្ញវន្ត​ជួយ​រក​ដំណោះស្រាយ​បញ្ហា​នយោបាយ ជា​ជាង​គិតគូរ​ពី​រឿង​នេះ។

អនុប្រធាន​គណបក្ស​សង្គ្រោះជាតិ លោក អេង ឆៃអ៊ាង ទទួល​ស្គាល់​ថា វប្បធម៌​នយោបាយ​ចាស់ ដែល​មាន​លក្ខណៈ​ហិង្សា​និយម និង​ឧបាយកល​ទុច្ចរិត ដូចជា ការ​កាប់​សម្លាប់ និង​ការ​ចាប់ចង​គ្នា ដូច​ពេល​បច្ចុប្បន្ន​នេះ មិនមែន​ជា​វប្បធម៌​នយោបាយ​ល្អ​ឡើយ។ ក៏ប៉ុន្តែ​លោក​ថា រឿងរ៉ាវ​ទាំងអស់​នេះ​កើត​ចេញ​ពី​ចរិត​នយោបាយ​របស់​មេដឹកនាំ​របប​ក្រុងភ្នំពេញ លោក ហ៊ុន សែន។

លោក​បន្ត​ថា អ្នកកាន់អំណាច​បច្ចុប្បន្ន​ជា​មនុស្ស​ចាស់ ដែល​ទទួល​ឥទ្ធិពល​ពី​របប​ខ្មែរក្រហម និង​លទ្ធិ​កុម្មុយនិស្ត ហើយ​ធ្លាប់​ទទួល​បាន​អំណាច​តាមរយៈ​ការ​បង្ហូរ​ឈាម​គ្នា ដូច្នេះ​ការ​រំពឹង​ថា អ្នកដឹកនាំ​សព្វថ្ងៃ​ផ្លាស់ប្ដូរ​ឥរិយាបថ​នយោបាយ​របស់​ខ្លួន មក​រក​ការ​ជជែក​ពិភាក្សា​គ្នា​ដោយ​សន្តិវិធី​នោះ គឺជា​រឿង​ដែល​ពិបាក​នឹង​ទៅ​រួច​។ លោក​បន្ថែម​ថា លោកនាយក​រដ្ឋមន្ត្រី ហ៊ុន សែន នៅតែ​មាន​គំនិត​រើសអើង និង​ចាត់​ទុក​អ្នក​មាន​គំនិត​ផ្ទុយ​ថា ជា​ខ្មាំងសត្រូវ​នៅឡើយ ដូច្នេះ​លោក​ជឿជាក់​ថា វប្បធម៌​នយោបាយ​ថ្មី​នេះ ទំនងជា​មិន​អាច​ធ្វើ​បាន​ឡើយ​ក្នុង​បរិបទ​បែបនេះ៖ «មនុស្ស​ស្ទើរតែ​ទាំងអស់ គេ​ចង់បាន​អ្វី​ដែល​ថ្មី​។ គេ​ចង់បាន​ការ​ជជែក​គ្នា និយាយ​គ្នា ប៉ុន្តែ​អ្នកកាន់អំណាច​ហ្នឹង​គេ​អត់​ចង់បាន ព្រោះ​កាលណា​និយាយ​គ្នា ជជែក​គ្នា​ដោយ​ស្មើភាព ប្រកួតប្រជែង​ដោយ​ស្មើភាព​គ្នា គេ​នឹង​ចាញ់​។ អ៊ីចឹង​ហើយ​បានជា​ការប្រកួតប្រជែង​នយោបាយ​នៅ​ស្រុក​ខ្មែរ​ហ្នឹង វា​ពោរពេញ​ដោយ​ល្បិច ហើយ​អ្នកបង្កើត​ល្បិច​ហ្នឹង គឺ​អ្នក​ដែល​កាន់អំណាច​ទេ។ អ្នក​ដែល​កាន់អំណាច អ្នក​ដែល​បង្កើត​ល្បិច​ហ្នឹង ដើម្បី​ធ្វើ​យ៉ាងម៉េច​យក​តែ​ឈ្នះ អ៊ីចឹង​បាន​ជា​មាន​ភាព​ចម្រូងចម្រាស​ផ្នែក​នយោបាយ​មកដល់​ថ្ងៃនេះ»

ប្រតិកម្ម​របស់​ថ្នាក់ដឹកនាំ​គណបក្ស​សង្គ្រោះជាតិ​នេះ គឺជា​ការ​ឆ្លើយ​តប​ទៅ​នឹង​គំនិត​ផ្ដួចផ្ដើម​របស់​បញ្ញវន្ត​មួយ​ក្រុម ដែល​ចង់​ឃើញ​កម្ពុជា​មានការ​ផ្លាស់ប្ដូរ​វប្បធម៌​នយោបាយ​ចាស់​គំរិល​ពី​ការ​ហែកហួរ​គ្នា ទៅជា​ការ​ឯកភាព​គ្នា​ដោះស្រាយ​បញ្ហា​ជាតិ​វិញ។

នាយក​ប្រតិបត្តិ​អង្គការ​តម្លាភាព​កម្ពុជា (TI Cambodia) លោក ព្រាប កុល ដែល​ជា​អ្នក​ផ្ដួចផ្ដើម​គំនិត​ចង់​ឱ្យ​មាន​វប្បធម៌​នយោបាយ​ថ្មី អះអាង​ប្រាប់​អាស៊ីសេរី​ថា អ្នកនយោបាយ​ខ្មែរ​បាន​ចោទប្រកាន់ មួលបង្កាច់ ជេរប្រមាថ និង​ប្រើ​ពាក្យ​សម្តី​បង្ក​ឱ្យ​មាន​ការ​ស្អប់ ដែល​វប្បធម៌​នយោបាយ​បែបនេះ កំពុង​រុញច្រាន​កម្ពុជា​ឱ្យ​ធ្លាក់​ទៅ​ក្នុង​គ្រោះថ្នាក់​។ លោក​ថា វប្បធម៌​នយោបាយ​បែបនេះ បន្សល់​ទុក្ខ​ពី​សម័យ​ខ្មែរក្រហម ឬ​សម័យ​មុន​នេះ​ទៅទៀត ហើយ​ដែល​បច្ចុប្បន្ន​នេះ​នៅ​ត្រូវ​បាន​ប្រើប្រាស់​ដោយ​គណបក្ស​កាន់អំណាច និង​គណបក្ស​ប្រឆាំង៖ «អ្នកនយោបាយ​ដែល​រងគ្រោះ​នោះ ហើយ​ដែល​ប្រឈម​នឹង​ការ​លំបាក​សព្វបែបសព្វយ៉ាង​នេះ ហើយ​ប្រជាពលរដ្ឋ​ដែល​គាត់​កំពុងតែ​ប្រឈម​នឹង​ការ​លំបាក​នេះ គឺជា​ឥទ្ធិពល​នៃ​វប្បធម៌​នយោបាយ​ចាស់ ដែល​គាត់​ជា​ជនរងគ្រោះ ហើយ​យើង​ចង់​បង្កើត​វប្បធម៌​នយោបាយ​ថ្មី​មួយ​ដែល​យើង​ចង់​ឱ្យ​អ្នក​ជំនាន់​ក្រោយ ទៅ​ថ្ងៃ​អនាគត​ទៅ កុំ​ឱ្យ​ខ្មែរ​យើង​មាន​ការ​រងគ្រោះ​ដោយ​អយុត្តិធម៌ ឬក៏​ជួប​បញ្ហា​ផ្សេងៗ​តទៅទៀត»

លោក ព្រាប កុល បញ្ជាក់​ថា វប្បធម៌​នយោបាយ​ថ្មី​នេះ​ឈរ​លើ​គោលការណ៍​សាមគ្គី​ជាតិ សុចរិត​ភាព ការ​អនុគ្រោះ ការ​ជជែក​គ្នា​លើ​គោលនយោបាយ ការ​គោរព​ច្បាប់ និង​គោលការណ៍​ប្រជាធិបតេយ្យ​ពិតប្រាកដ​។ លោក​អះអាង​ថា លោក និង​បញ្ញវន្ត​ដទៃ​ទៀត នឹង​មិន​បង្កើត​គណបក្ស​នយោបាយ ដើម្បី​សាប​ព្រួស​វប្បធម៌​នយោបាយ​ថ្មី​នេះ​ឡើយ​។ លោក​ថា ពួក​លោក​នឹង​ដើរ​តួនាទី​ជា​អ្នក​សម្របសម្រួល​ឱ្យ​មាន​ការពិគ្រោះ​យោបល់​ទូទាំង​ប្រទេស ដើម្បី​ទទួល​យក​មតិ និង​ការ​ចង់​បាន​របស់​ពលរដ្ឋ​អំពី​វប្បធម៌​នយោបាយ​ថ្មី​នេះ។

ទោះជា​យ៉ាងណា វប្បធម៌​នយោបាយ​ថ្មី​នេះ មិន​ទទួល​បាន​ការចាប់អារម្មណ៍​ពី​របប​លោក ហ៊ុន សែន ឡើយ។

អ្នកនាំពាក្យ​របប​ក្រុងភ្នំពេញ លោក ផៃ ស៊ីផាន ថ្លែង​ថា រដ្ឋធម្មនុញ្ញ​មាន​ចែង​ច្បាស់​អំពី​របប​នយោបាយ​របស់​កម្ពុជា​រួចស្រេច​ទៅ​ហើយ ហើយ​ការដឹកនាំ​ជាតិ​មួយ គឺ​ឈរ​លើ​គោលការណ៍​ច្បាប់​ជាធំ មិនមែន​ពឹង​លើ​អារម្មណ៍​ដឹកនាំ​ឡើយ៖ «ការ​ពង្រឹង​នីតិរដ្ឋ គឺ​យើង​ឈរ​លើ​ច្បាប់​។ យើង​មិន​ឈរ​លើ​មនោសញ្ចេតនា​របស់​បុគ្គល​ណាមួយ​ទេ​។ យើង​មាន​ប្រព័ន្ធ​នយោបាយ គោលការណ៍​នៃ​ការដឹកនាំ​ដែល​ផ្ដល់​អំណាច​ឱ្យ​មហាជន​ខ្មែរ មិនមែន​ផ្ដល់​អំណាច​ឱ្យ​មួយ​ក្រុម​ដែល​តាំង​ខ្លួន​ថា ជា​បញ្ញវន្ត​នោះ​ទេ»

គំនិត​ផ្ដួចផ្ដើម​ស្ដីពី​វប្បធម៌​នយោបាយ​ថ្មី​នេះ ត្រូវ​បាន​លើកឡើង​ចំ​ពេល​ដែល​ស្ថានការណ៍​នយោបាយ​នៅ​កម្ពុជា មិនទាន់​វិវឌ្ឍ​ទៅ​រក​ភាព​ប្រសើរ​ឡើង​នៅ​ឡើយ​ទេ​។ មកដល់ពេលនេះ របប​ក្រុងភ្នំពេញ​មិនបាន​បង្ហាញ ចេតនា​ពិតប្រាកដ​ក្នុង​ការ​ស្ថានការណ៍​សិទ្ធិមនុស្ស និង​ប្រជាធិបតេយ្យ​ឡើយ ទោះបីជា​មេដឹកនាំ​នៃ​របប​នេះ​បាន​ក្រសោប​យក​អំណាច​រដ្ឋ​ទាំងអស់​មកកាន់​កាប់​ផ្ដាច់មុខ​តែ​ម្នាក់​ឯង​រួចហើយ​ក៏ដោយ។

អនុប្រធាន​គណបក្ស​សង្គ្រោះជាតិ​លោក អេង ឆៃអ៊ាង ថ្លែង​ថា លោក ព្រាប កុល និង​បញ្ញវន្ត​ដទៃ​ទៀត មិន​គួរ​មានគំនិត​ថា គណបក្ស​សង្គ្រោះ​ជាតិ​ជា​អ្នកចូលរួម​សាបព្រោះ​វប្បធម៌​នយោបាយ​ហិង្សា​និយម និង​ធ្វើ​ឱ្យ​បែកបាក់​ជាតិ​នោះ​ឡើយ ព្រោះ​នេះ​ជា​រឿង​មិន​ត្រឹមត្រូវ។ លោក​ថា គណបក្ស​សង្គ្រោះ​ជាតិ​ប្រៀប​បាន​នឹង​ជនរងគ្រោះ​ដោយសារ​អំពើ​ប្លន់​យ៉ាង​ដូច្នេះ​ដែរ​។ នៅ​ពេល​ត្រូវ​ចោរប្លន់ ជនរងគ្រោះ​មានតែ​ស្រែក​រក​ជំនួយ គ្មាន​អ្វី​តបត​នឹង​ចោរ​ឡើយ ដូច្នេះ​គេ​គួរតែ​បន្ទោស​ចោរ ឬ​ជួយ​ចាប់​ចោរ មិនមែន​មក​ស្ដីបន្ទោស​ឱ្យ​ជនរងគ្រោះ​បែបនេះ​ទេ៖ «អ្វី​ដែល​គណបក្ស​សង្គ្រោះ​ជាតិ​ទទួល​បាន​ពី​ប្រជាពលរដ្ឋ តាំងពី​ឆ្នាំ​២០១៣ មកដល់​ឆ្នាំ​២០១៧ ត្រូវ​ពួក​ផ្ដាច់ការ ពួក ហ៊ុន សែន ប្លន់​យក​អស់រលីង​។ ចាប់​ឪពុក​គេ ចាប់​ម្ដាយ​គេ មេ​គេ​ដាក់គុក ហើយ​អ្នក​ផ្សេង​ចង​ចំណង​ដេរ​មាត់​គេ​មិន​និយាយ អ្នក​នៅ​ក្នុង​ស្រុក ហើយ​កូនចៅ​ខ្ចាត់ខ្ចាយ​។ យើង​ជា​អ្នករងគ្រោះ យើង​គ្រាន់តែ​ស្រែក​ទាមទារ​ចង់បាន​របស់​អ្វី​ដែល​ជា​របស់​យើង​មកវិញ ដែល​ប្រជាពលរដ្ឋ​ឱ្យ​ហ្នឹង​មកវិញ យើង​អ្នករងគ្រោះ​ទៅជា​អ្នក​ខុស អាហ្នឹង​ខ្ញុំ​មិន​ដឹង​យល់ថា​ម៉េច​ទេ អ្នក​និយាយ​ហ្នឹង​។ ព្រោះ​យើង​ត្រូវ​ឆ្លុះបញ្ចាំង​ការពិត​បែប​ហ្នឹង»

លោក​រំឭក​ថា គណបក្ស​សង្គ្រោះជាតិ ធ្លាប់​បាន​សាកល្បង​វប្បធម៌​សន្ទនា ដែល​ស្រដៀង​គ្នា​នឹង​វប្បធម៌​នយោបាយ​ថ្មី​នេះ​រួច​ទៅ​ហើយ ក៏ប៉ុន្តែ​ត្រូវ​បរាជ័យ​ដោយសារតែ​លោក ហ៊ុន សែន មាន​បង្កប់​ឧបាយកល​ទុច្ចរិត ដើម្បី​រក្សា​អំណាច​របស់​ខ្លួន។ លោក​សង្កត់ធ្ងន់​ថា គណបក្ស​សង្គ្រោះ​ជាតិ​មិន​យក​ខ្មែរ​ណា​ជាស​ត្រូវ​ឡើយ ហើយក៏​គ្មាន​គំនិត​គុំកួន ឬ​សក​សឹក​ក្រុម​មេដឹកនាំ​បច្ចុប្បន្ន​នេះ​ដែរ​។ លោក​បន្ថែម​ថា គណបក្ស​សង្គ្រោះ​ជាតិ​ស្វាគមន៍ និង​អបអរសាទរ ប្រសិនបើ​ក្រុម​លោក ព្រាប កុល អាច​ទៅ​បញ្ចុះបញ្ចូល​របប​លោក ហ៊ុន សែន ឱ្យ​បញ្ឈប់​វប្បធម៌​នយោបាយ​ចាស់​គំរឹល​នេះ​ចោល​បាន​។

ពលរដ្ឋ​មួយ​រូប​នៅ​ខេត្ត​តាកែវ​បញ្ចេញយោបល់​ថា វប្បធម៌​នយោបាយ​ថ្មី​នេះ ហាក់​ដូចជា​មិន​មាន​អ្វី​ថ្មី​ឡើយ ពោល​គឺ​គ្រាន់តែ​ច្បិច​យក​គោលការណ៍​ប្រជាធិបតេយ្យ​មក​ប្រើ និង​ហៅថា ជា​វប្បធម៌​នយោបាយ​ថ្មី​ប៉ុណ្ណោះ​។ ពលរដ្ឋ​ដដែល​បន្ត​ថា គំនិត​នេះ​មិនសូវ​ខុសគ្នា​ពី​អ្វី​ដែល​លោក កឹម សុខា ធ្លាប់​បាន​ធ្វើ​កាល​លោក​នៅ​ជា​ប្រធាន​មជ្ឈមណ្ឌល​សិទ្ធិមនុស្ស​កម្ពុជា (CCHR) នោះ​ទេ​។ លោក​ជឿជាក់​ថា ក្នុង​បរិបទ​នៃ​ការ​រឹតត្បិត​សិទ្ធិ​សេរីភាព​ដូច​បច្ចុប្បន្ន គំនិត​ផ្ដួចផ្ដើម​នេះ​នឹង​មិន​អាច​ធ្វើ​បាន​នោះ​ឡើយ ហើយ​បើ​អាច​ធ្វើ​បាន​មែន ទាល់​តែ​មាន​ភ្លើង​ខៀវ​ពី​របប​ក្រុងភ្នំពេញ ដើម្បី​ឱ្យ​ជួយ​លម្អ​សួន​ប្រជាធិបតេយ្យ​របស់​ខ្លួន៖ «អង្គការ​ទាំងអស់​ដែល​ចុះ​ធ្វើ​ហ្នឹង ហ៊ាន​ធានា​ថា ក្រោយពី​ពលរដ្ឋ​បញ្ចេញ​មតិ ទស្សនៈ យោបល់​ហើយ​ហ្នឹង យក​ទៅ​ដោះស្រាយ​ដោយ​វិធី​ណា ហើយ​ពួកគាត់​មាន​សុវត្ថិភាព​ដែរ ឬទេ​? នេះ​ជា​ទស្សនៈ​ដែល​ខ្ញុំ​ឆ្ងល់ រឿង​ទីមួយ​។ រឿង​ទី​ពីរ បើ​គាត់​ចង់​សាប​ព្រួស​ទាំងអស់​នេះ គួរតែ​គាត់​ប្រមូល​អ្នក​នយោបាយ​ទាំងពីរ​គណបក្ស​ហ្នឹង ឱ្យ​ដើរ​តាម​គោលការណ៍​លទ្ធិ​ប្រជាធិបតេយ្យ​ដែល​មាន​ស្រាប់​ជា​ខ្នាត​អន្តរជាតិ​ហ្នឹង​ទៅ គឺ​ល្អ​ហើយ»

ពលរដ្ឋ​រូប​នេះ​បន្ថែម​ថា អ្វី​ដែល​ក្រុម​បញ្ញវន្ត​គួរ​ធ្វើ​នោះ គឺ​ជួយ​រក​ដំណោះស្រាយ​នយោបាយ​រវាង​គណបក្ស​កាន់អំណាច និង​បក្ស​ប្រឆាំង ដែល​អូស​បន្លាយ​មក​ទល់​នឹង​ពេល​បច្ចុប្បន្ន។ លោក​ជឿជាក់​ថា បើ​អា​ចរក​ដំណោះស្រាយ​នយោបាយ​បាន ឬមួយ​ក៏​កម្ពុជា​មានការ​ផ្លាស់ប្ដូរ​មេដឹកនាំ វប្បធម៌​នយោបាយ​ថ្មី​របស់​ក្រុម​លោក ព្រាប កុល នេះ នឹង​អាច​ដំណើរការ​ទៅមុខ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

តាសាន

ពី LA

Want to change Hun Sen. Mr. Eng needs to fight against Hun Sen, but he is just a chicken like his bose, Sam Rainsy

Jun 20, 2019 12:31 PM

lam sony

លោក អេង ឆៃអ៊ាង 100%

Jun 20, 2019 04:19 AM

អ្នក​អាន​អនាមិក

សូម​ RFA គោរពតាមអំណាចតុលាការកំពូលរបស់កម្ពុជា ដែលជាអំណាចឯករាជ្យ នៃប្រទេសឯករាជ្យមួយផង.​ បច្ចុប្បន្នគ្មានឈ្មោះគណបក្សសង្គ្រោះជាតិទៀតទេ ដូច្នេះបើជាកាសែតដែលមានវិជ្ជាជីវៈត្រឹមត្រូវសូមសរសេរថា អតីតគណបក្សសង្គ្រោះជាតិ.​

Jun 19, 2019 06:41 PM

គេហទំព័រ​ទាំងមូល