ក្រុមអ្នកឃ្លាំមើលរិះគន់ថា គណៈកម្មាធិការជាតិរៀបចំការបោះឆ្នោត (គ.ជ.ប) ចំណាយលុយជាតិជិត ១លានដុល្លារទិញទឹកខ្មៅលាងមិនជ្រះ មកបម្រើការបោះឆ្នោត គឺជាការខ្ជះខ្ជាយលុយជាតិ ព្រោះការបោះឆ្នោតនោះ មិនបានឆ្លុះបញ្ចាំងពីឆន្ទៈពលរដ្ឋម្ចាស់ឆ្នោតឡើយ។ ទោះយ៉ាងណាមន្ត្រីបក្សកាន់អំណាច ឆ្លើយតបថា អ្នករិះគន់ការចំណាយប្រាក់លើការទិញទឹកខ្មៅនេះគឺមានចេតនាប្រឆាំងការបោះឆ្នោត។
អ្នកវិភាគនិងមន្ត្រីបក្សប្រឆាំងលើកឡើងថា ការបោះឆ្នោតដែលគេអាចដឹងមុនថា គណបក្សកាន់អំណាចនឹងឈ្នះការបោះឆ្នោត ព្រោះគ្មាន គណបក្សដែលជាគូប្រកួតប្រជែងចូលរួមនោះ គ.ជ.ប មិនគួរចំណាយថវិកាជាតិច្រើនឥតប្រយោជន៍ឡើយ។ ពួកគេថា រដ្ឋគួរទុកប្រាក់ជិត១លានដុល្លារ យកទៅដោះស្រាយបញ្ហារបស់ពលរដ្ឋ អាចផ្ដល់ប្រយោជន៍ដល់ពលរដ្ឋ។
អ្នកវិភាគនយោបាយ លោក គឹម សុខ យល់ថា ការចំណាយជិត ១លានដុល្លារ សម្រាប់ទិញទឹកខ្មៅលុបមិនជ្រះនេះ ជាការចំណាយលុយជាតិឥតប្រយោជន៍ ព្រោះការបោះឆ្នោតមិនឆ្លុះបញ្ចាំងពីឆន្ទៈរបស់ពលរដ្ឋ។ លោកបន្តថា ការចំណាយប្រាក់ដើម្បីរៀបចំការបោះឆ្នោត និងលុយជិត១លានដុល្លារនៅពេលនេះ យកទៅស្ដារទឹកលូដែលកំពុងលិចភ្នំពេញល្អជាងយកមកបម្រើការបោះឆ្នោត ដែលលោករិះគន់ថា ជាការបោះឆ្នោតក្លែងក្លាយ។
លោក គឹម សុខ៖ «ប្រជាពលរដ្ឋខ្លួនគាត់ផ្ទាល់ មហាជនត្រូវគេអុកឡុកគ្រប់បែបយ៉ាងដើម្បីតែផលប្រយោជន៍គណបក្សប្រជាជនកម្ពុជា គូប្រកួតប្រជែងនយោបាយធំៗ មានគណបក្សភ្លើងទៀន គណបក្សសង្គ្រោះជាតិ ត្រូវគេខ្ទប់មិនឱ្យចូលរួមប្រកួតស្មើមុខជាមួយគណបក្សប្រជាជនកម្ពុជាទេ ហើយចំណុចមួយទៀតដែលសំខាន់បំផុត អត់មានការចូលរួមពីសហគមន៍អន្តរជាតិ»។
ស្រដៀងគ្នានេះដែរ មន្ត្រីជាន់ខ្ពស់គណបក្សសង្គ្រោះជាតិប្រចាំខេត្តបាត់ដំបង ដែលកំពុងភៀសខ្លួននៅប្រទេសអូស្ត្រាលី (Australia) លោក ជា ជីវ យល់ថា រដ្ឋគួរទុកលុយជិតមួយលានដុល្លារនេះចែកជូនពលរដ្ឋល្អក្រីក្រជាការល្អជាងការយកទៅបម្រើការបោះឆ្នោត។ លោកបន្តថា ការបោះឆ្នោតនៅថ្ងៃទី២៣ ខែកក្កដា គ្រាន់តែជាការរៀបចំដើម្បីបង្គ្រប់កិច្ចប៉ុណ្ណោះព្រោះគណបក្សកាន់អំណាចនឹងបន្តឈ្នះការបោះឆ្នោតនេះដដែល។
លោក ជា ជីវ៖ «សូម្បីតែគណបក្សភ្លើងទៀន ដែលទើបតែទទួលបានការគាំទ្រ និងបោះឆ្នោតឆ្នាំ២០២២ កន្លងទៅហើយនៅឆ្នាំ២០២៣ ក៏ពុំឱ្យគាត់ចូលរួមការបោះឆ្នោតផងដែរ ដូច្នេះ ជឿជាក់ថា ការបោះឆ្នោតខាងមុខនេះ គ្រាន់តែជាការបោះឆ្នោតបង្គ្រប់កិច្ចហើយ និងបង្ហិនថវិកាជាតិតែប៉ុណ្ណោះ»។
ប្រតិកម្មរបស់អ្នកវិភាគ និងមន្ត្រីបក្សប្រឆាំង ធ្វើឡើងដូច្នេះ ក្រោយគណៈកម្មាធិការជាតិរៀបចំការបោះឆ្នោត បានចំណាយថវិកាជាតិជិត ១លានដុល្លារ(៩១៦.៧៦០) ដុល្លារ ទិញទឹកខ្មៅជ្រលក់ដៃសម្រាប់បម្រើការបោះឆ្នោត ចំនួន៥២.០០០ដប ពីប្រទេសឥណ្ឌា(India)។
ជុំវិញការលើកឡើងនេះ វិទ្យុអាស៊ីសេរីមិនអាចសុំការឆ្លើយតបពីអ្នកនាំពាក្យ គណៈកម្មាធិការជាតិរៀបចំការបោះឆ្នោតគ.ជ.ប លោក ហង្ស ពុទ្ធា បានទេ នៅថ្ងៃទី០៦ ខែកក្កដា។
ទោះយ៉ាងណា ប្រធាន គ.ជ.ប លោក ប្រាជ្ញ ច័ន្ទ ថ្លែងអះអាងក្នុងពិធីបង្ហាញ គុណភាពទឹកខ្មៅលុបមិនជ្រះនៅថ្ងៃទី០៦ ខែកក្កដា ថា ការប្រើទឹកខ្មៅនេះដើម្បីធានាថា ការបោះឆ្នោត ខាងមុខប្រកបដោយភាពត្រឹមត្រូវ ស្មើភាព និងយុត្តិធម៌ និងជាសញ្ញាបញ្ជាក់ថា ប្រជាពលរដ្ឋបោះឆ្នោតបានតែម្ដងប៉ុណ្ណោះ។
រីឯ អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា អ្នកដែលរិះគន់ ការចំណាយប្រាក់លើការទិញទឹកខ្មៅនេះគឺមានចេតនាប្រឆាំងមិនឱ្យមានការបោះឆ្នោត។ លោកបន្តទៀតថា បញ្ហាដែលគណបក្សភ្លើងទៀន មិនអាចចូលរួមការបោះឆ្នោត មកពីមេដឹកនាំគណបក្សនេះមិនបានបំពេញបែបបទត្រឹមត្រូវតាមលក្ខខណ្ឌរបស់គ.ជ.ប។
លោក សុខ ឥសាន៖ «អ្នកហ្នឹងមានចេតនា ចង់បំផ្លាញការបោះឆ្នោតដែលប្រព្រឹត្តទៅដោយសារសេរី ត្រឹមត្រូវ និងយុត្តិធម៌ ហើយនេះជាការអនុវត្តគោលការណ៍លទ្ធិប្រជាធិបតេយ្យនៅកម្ពុជា ពួកប្រឆាំងគេមិនដែលចង់ឱ្យមានគោលការណ៍លទ្ធិប្រជាធិបតេយ្យនៅកម្ពុជាទេ អ៊ីចឹងបានជាធ្វើអី គេជំទាស់រហូត គេវាយប្រហារមកលើដំណើរការចែងរបស់គ.ជ.ប ក៏ដូចរបស់រាជរដ្ឋាភិបាលរហូត»។
ស្រដៀងគ្នាទៅនឹងការបោះឆ្នោតជ្រើសរើសមេដឹកនាំប្រទេសកាលពីឆ្នាំ២០១៨ នៅឆ្នាំ២០២៣នេះ រដ្ឋាភិបាល លោក ហ៊ុន សែន បានប្រើប្រាស់ប្រព័ន្ធច្បាប់ និង គ.ជ.ប បិទមិនឱ្យគណបក្សប្រឆាំងដែលគូប្រកួតប្រជែងជាមួយគណបក្សកាន់អំណាចអាចចូលរួមការបោះឆ្នោតបានឡើយ។ ពេលនេះមេដឹកនាំគណបក្សប្រឆាំងកំពុងធ្វើយុទ្ធនាការឱ្យពលរដ្ឋគូសខ្វែងលើសន្លឹកចោលពេលទៅបោះឆ្នោត ដើម្បីបង្ហាញពីការមិនពេញចិត្តចំពោះការបោះឆ្នោតដែលគ្មានគណបក្សភ្លើងទៀនចូលរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។