កម្ពុជា-ចិន​​ប្តេជ្ញា​ពង្រឹង​​ទំនាក់ទំនង​​ទ្វេភាគី​​កាន់​តែ​​ស៊ីជម្រៅ​ថែមទៀត​​នៅ​ឯ​​កិច្ចប្រជុំ​រដ្ឋមន្ត្រី​ការបរទេស​​មេគង្គ-ឡានឆាងលើកទី៧នៅភូមា

រដ្ឋមន្ត្រី​ការបរទេស​កម្ពុជាលោក ប្រាក់ សុខុន និង​រដ្ឋមន្ត្រី​ការបរទេស​ចិនលោក វ៉ាង យី (Wang Yi) ប្តេជ្ញា​ធ្វើឱ្យ​ទំនាក់ទំនង​ទ្វេភាគី​រវាង​ប្រទេសទាំងពីរ​កាន់តែ​ស៊ីជម្រៅ​ថែមទៀត។ ការប្តេជាចិត្ត​នេះ ធ្វើឡើង​ក្នុង​ជំនួប​ទ្វេភាគី​មួយ​ក្នុងឱកាស​ដែល​រដ្ឋមន្ត្រី​ការបរទេស​ទាំងពីរ​ចូលរួម​កិច្ចប្រជុំ​រដ្ឋមន្ត្រី​ការបរទេស​នៃ​កិច្ចសហប្រតិបត្តិការ​មេគង្គ-ឡាងឆាង លើកទី៧ នៅទីក្រុងបាហ្កាន​(Bagan)​ ប្រទេស​មីយ៉ាន់ម៉ា​ (Myanmar)។

ក្រសួងការបរទេស​កម្ពុជា ឱ្យដឹង​តាមរយៈ​ទំព័រហ្វេសប៊ុក (Facebook) ផ្លូវការ​របស់​ក្រសួង កាលពី​ថ្ងៃទី៣ ខែកក្កដា ម្សិលម៉ិញថា លោក ប្រាក់ សុខុន និង​លោក វ៉ាង យី បាន​ជួបពិភាក្សា​ប្រកបដោយ​ផ្លែផ្កា​លើ​ប្រធានបទ​ផ្សេងៗ និង​បាន​បន្ត​ប្តេជ្ញាចិត្ត​ក្នុងការ​ធ្វើឱ្យ​ទំនាក់ទំនង​រវាង​ប្រទេស​ទាំងពីរ​កាន់តែ​ស៊ីជម្រៅ​ថែមទៀត ខណៈ​ទំនាក់ទំនង​រវាង​ប្រទេស​ទាំងពីរ​នាពេល​បច្ចុប្បន្ន​កំពុង​ស្ថិតនៅ​ចំណុច​ខ្ពស់បំផុត។ ក្រសួង​ការបរទេស​កម្ពុជា មិនបាន​បញ្ជាក់​លម្អិត​ទេ​ថាតើ​ការធ្វើឱ្យ​ទំនាក់ទំនង​កាន់តែ​ស៊ីជម្រៅ​ថែមទៀតនេះ ប្រទេសទាំងពីរ​នឹង​ផ្តោត​លើ​វិស័យណាខ្លះ ជាពិសេស​វិស័យយោធា ដែរឬទេ ស្របពេល​ដែល​កម្ពុជា​កំពុង​រងការចោទប្រកាន់​ពីសំណាក់​សហរដ្ឋអាមេរិក និង​សម្ព័ន្ធមិត្ត​ថា​កម្ពុជា​លួច​អនុញ្ញាត​ឱ្យ​ចិន​ប្រើប្រាស់​កំពង់ផែ​កងទ័ព​ជើងទឹករាម​ផ្តាច់មុខ និង​ថា​ចិនមាន​ផែនការ​ដាក់​មូលដ្ឋាន​ទ័ព​នៅទីនោះ។

កិច្ចប្រជុំ​រដ្ឋមន្ត្រី​ការបរទេស​នៃ​កិច្ចសហប្រតិបត្តិការ​មេគង្គ-ឡាងឆាង (MLC) លើកទី៧ រៀបចំ​ធ្វើឡើង​នៅក្នុង​ប្រទេសមីយ៉ាន់ម៉ា នៅថ្ងៃទី០៤ ខែកក្កដា ដោយរបបសឹក​ខុសច្បាប់ភូមា ដោយ​មាន​ការចូលរួម​ពី​រដ្ឋមន្ត្រី​ការបរទេស​តំបន់មេគង្គ​ដទៃទៀត ដូចជា ​ចិន (China) កម្ពុជា ឡាវ (Lao) ថៃ (Thailand) និង​វៀតណាម (Vietnam) ជាដើម។ កិច្ចប្រជុំនេះ ធ្វើឡើង​ភ្លាមៗ​ស្របពេល​ដែល​ប្រេសិត​ពិសេស​អាស៊ាន ​ស្តីពី ​បញ្ហា​មីយ៉ាន់ម៉ា និង​ជា​រដ្ឋមន្ត្រី​ការបរទេស​កម្ពុជាលោក ប្រាក់ សុខុន កំពុង​បំពេញ​ទស្សនកិច្ច​ការងារ​ជាលើក​ទីពីរ​ដើម្បី​ដោះស្រាយ​បញ្ហា​វិបត្តិនយោបាយ​នៅភូមា។

លោក ប្រាក់ សុខុន នៅតែ​មិនត្រូវ​បាន​របបសឹក​ខុសច្បាប់​ភូមា អនុញ្ញាត​ឱ្យ​ជួបមេដឹកនាំ​ស្របច្បាប់​ភូមា អ្នកស្រី អ៊ុង សានស៊ូជី (Aung San Suu Kyi) និង​ជា​តំណាង​នៃ​រដ្ឋាភិបាល​បង្រួបបង្រួមជាតិ​ភូមា​(NUG)​ ឡើយ។ នេះជាលើកទីមួយ​ហើយ ដែល​រដ្ឋមន្ត្រី​ការបរទេស​មកពី​ប្រទេស​ដទៃ​ក្នុង​តំបន់​មេគង្គ ជាពិសេស​រដ្ឋមន្ត្រី​ការបរទេស​ចិន ទៅបំពេញ​ទស្សនកិច្ច​នៅក្នុងប្រទេស​នេះ ដែល​ក្រុមប្រទេស​លោកសេរី​មិនរាប់រក ក្រោយពី​របបសឹក​ភូមា​បាន​ធ្វើរដ្ឋប្រហារ​ទម្លាក់​មេដឹកនាំ​ស្របច្បាប់​ចេញ​ពីតំណែង​កាលពី​ដើមខែកុម្ភៈ ឆ្នាំ២០២១​កន្លងទៅ។ ក្រុមប្រទេស​លោកខាងលិចជាពិសេស​សហរដ្ឋ​អាមេរិក​ (USA)​កាណាដា​​ (Canada) ​អង់គ្លេស​(UK)​ និង​​សហភាព​អឺរ៉ុប (EU) ព្រមទាំង​​ប្រទេស​ដទៃទៀត​ក្នុងតំបន់ ដូចជា ​សិង្ហបុរី (Singapore) ជាដើម បាន​ដាក់ទណ្ឌកម្ម​ជាបន្តបន្ទាប់​មកលើ​ក្រុមមេដឹកនាំ​យោធា​នៃ​របប​សឹក​ភូមា។ លោកនាយករដ្ឋមន្ត្រី ហ៊ុន សែន គឺជា​មេដឹកនាំ​តែមួយ​គត់​នៅលើ​ពិភពលោក​ដែលបាន​ទៅបំពេញ​ទស្សនកិច្ច​នៅក្នុង​ប្រទេសនេះ​មុនគេ ក្រោយ​ការធ្វើ​រដ្ឋប្រហារ​របស់​ពួកយោធាភូមា។ កម្ពុជា​​ក្នុងនាម​ជាប្រធាន​ប្តូរវេន​អាស៊ាន​ឆ្នាំ២០២២ កំពុង​រងការរិះគន់ថា ព្យាយាម​ទទួលស្គាល់​របបសឹកភូមា​ខុសច្បាប់ និង​ធ្វើឱ្យ​របបនេះ​អាចបន្តអំណាច​ខុសច្បាប់​បាន​យូរអង្វែង​តទៅទៀត ដូចតាម​ការចង់​បាន​​របស់​ប្រទេស​កុម្មុយនិស្ត​ចិន ដែល​ជាសម្ព័ន្ធមិត្ត​របស់ក្រុមយោធា​ភូមា។

តំណាង​រដ្ឋាភិបាល​បង្រួបបង្រួម​ជាតិ​ភូមា បាន​រិះគន់​ការរៀបចំ​កិច្ចប្រជុំ​រដ្ឋមន្ត្រី​ការបរទេស​មេគង្គ-ឡានឆាង​លើកទី៧ នៅទីក្រុងបាហ្កាន​នៃ​ប្រទេសភូមា​ជាមួយ​ក្រុមរបបសឹកភូមា​នេះថា ជាការរំលោភ​ឆន្ទៈ​របស់​ប្រជាជន​ភូមា និង​ថាធ្វើឡើង​ផ្ទុយពី​កិច្ចព្រមព្រៀង​ឯកច្ឆ័ន្ធ ៥ចំណុច របស់​អាស៊ាន។

ក្រសួង​ការបរទេស​កម្ពុជា ឱ្យ​ដឹង​កាលពី​ថ្ងៃទី១ ខែកក្កដា ថាកិច្ចប្រជុំ​រដ្ឋមន្ត្រី​ការបរទេស​នៃ​កិច្ចសហប្រតិបត្តិការ​មេគង្គ-ឡានឆាង លើកទី៧ នេះ ធ្វើឡើង​ក្រោមមូលបទ «សាមគ្គីភាព​ដើម្បី​សន្តិភាព និង​វិបុលភាព»។ ក្រុមរដ្ឋមន្ត្រី​ការបរទេស​នៃ​កិច្ចសហប្រតិបត្តិការ​នេះ នឹង​វាយតម្លៃ​លើ​វឌ្ឍនភាព​នៃ​ការអនុវត្ត​ផែនការ​សកម្មភាព​ប្រាំឆ្នាំ ពីឆ្នាំ២០១៨ ដល់ឆ្នាំ២០២២ កំណត់ទិសដៅ​អនាគត និង​ពង្រឹងបន្ថែម​ទៀត​នូវ​ចំណងមិត្តភាព និង​ការគាំទ្រ​គ្នា​ទៅវិញ​ទៅមក​រវាង​បណ្តា​ប្រទេស​មេគង្គ ជាមួយ​ប្រទេសចិន។

កិច្ចសហប្រតិបត្តិការ​មេគង្គ-ឡានឆាង ត្រូវបាន​បង្កើតឡើង​ជាលើកដំបូង​កាលពី​ចុងឆ្នាំ២០១៥ ដោយ​ប្រទេសចិន សម្រាប់ជា​យន្តការ​ដោះស្រាយ​វិបត្តិទឹក​ទន្លេមេគង្គ​ជាមួយ​ប្រទេសនៅតាម​ខ្សែទឹកខាងក្រោម។ ប្រទេសចិន​រងការរិះគន់​ថា បាន​សាងសង់​ទំនប់​វារីអគ្គិសនី​ដ៏សម្បើម​នៅតាម​ខ្សែទឹកខាងលើ​នៃ​ទន្លេមេគង្គ និង​ព្យាយាម​ស្តុកទឹកទុក​ធ្វើឱ្យ​រំហូរទឹកទន្លេ​នៃ​ខ្សែទឹកខាងក្រោម​រីងរាក់​ខុសប្រក្រតី ព្រមទាំងប៉ះពាល់​ដល់​ជីវចម្រុះ​ទាំងមូល​នៅតំបន់​ទន្លេមេគង្គ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។