មន្ត្រីគណបក្សភ្លើងទៀននៅខេត្តបាត់ដំបងដែលអាជ្ញាធរទើបដោះលែងចេញពីពន្ធនាគារ នៅតែប្រកាន់ជំហរ និងឆន្ទៈមោះមុត ដើម្បីចូលរួមលើកស្ទួយប្រជាធិបតេយ្យ និងនីតិរដ្ឋនៅកម្ពុជា។ មន្ត្រីសង្គមស៊ីវិល គាំទ្រការបន្តសកម្មភាពនយោបាយរបស់លោក ឡី សុខុន និងនៅតែចាត់ទុកថា ការឃុំខ្លួនលោកជារឿងអយុត្តិធម៌។
តុលាការខេត្តបាត់ដំបងបានដោះលែងមន្ត្រីគណបក្សភ្លើងទៀននៅស្រុកឯកភ្នំ លោក ឡី សុខុន ឲ្យមានសេរីភាពវិញហើយ នៅថ្ងៃទី៩ ធ្នូ ក្រោយឃុំខ្លួនលោកគ្រប់ចំនួនកំណត់ រយៈពេល៦ខែ។ ទោះបីធ្លាប់ជាប់ពន្ធនាគារក្ដី លោក ឡី សុខុន នៅតែអះអាងថា លោកមានឆន្ទៈបន្តសកម្មភាពនយោបាយដដែល។
ប្រធានប្រតិបត្តិគណបក្សភ្លើងទៀនស្រុកឯកភ្នំ ខេត្តបាត់ដំបង លោក ឡី សុខុន ប្រាប់វិទ្យុអាស៊ីសេរីនៅថ្ងៃទី៩ ធ្នូ ថា ការចោទប្រកាន់ និងឃុំខ្លួនលោកនៅក្នុងពន្ធនាគារអស់រយៈពេលកន្លះឆ្នាំមកនេះ ជារឿងអយុត្តិធម៌។ ប៉ុន្តែលោកថា ភាពអយុត្តិធម៌នេះបានជំរុញទឹកចិត្ត និងឆន្ទៈលោកឱ្យកាន់តែខ្លាំងក្លាជាងមុនក្នុងការបន្តជីវភាពនយោបាយ ដើម្បីចូលរួមចំណែកលើកស្ទួយនីតិរដ្ឋ និងលទ្ធិប្រជាធិបតេយ្យនៅកម្ពុជា៖
«ខ្ញុំបន្តជីវិតនយោបាយខ្ញុំខ្លាំងជាងមុនទៀត។ ចង់ជម្រាបជូនថាការឃុំខ្លួនខ្ញុំមិនអាចធ្វើឱ្យខ្ញុំរាថយ ធ្វើឱ្យខ្ញុំបាក់ស្មារតី ធ្វើឱ្យខ្ញុំខ្លាចដល់ថ្នាក់ឈប់ធ្វើនយោបាយនៅទេ។ (តែ) ធ្វើឱ្យខ្ញុំកាន់តែស្អប់ ធ្វើឱ្យខ្ញុំកាន់តែក្លាហាន ធ្វើឱ្យខ្ញុំកាន់តែតស៊ូដើម្បីយកសេរីភាពជូនប្រជាពលរដ្ឋ ក៏ដូចជាប្រជាធិបតេយ្យមកឱ្យបងប្អូនយើង ក៏ដូចជាប្រទេសជាតិយើងឱ្យពេញបរិបូរណ៍ដូចកាលពីឆ្នាំ ៩៣-៩៤»។
អាជ្ញាធរបានចាប់ខ្លួនលោក ឡី សុខុន កាលពីថ្ងៃទី៨ មិថុនា ក្រោមបទចោទ រំលោភលើលំនៅឋាន បន្ទាប់ពីលោកថតវីដេអូក្រុមមន្ត្រីបក្សកាន់អំណាចអង្គុយកត់ឈ្មោះពលរដ្ឋនៅថ្ងៃបោះឆ្នោតក្រុមប្រឹក្សាឃុំ-សង្កាត់ ក្នុងភូមិកំពង់សំបួរ ស្រុកឯកភ្នំ។ តុលាការខេត្តបាត់ដំបង កាលពីថ្ងៃទី១៧ វិច្ឆិកា បានសម្រេចផ្ដន្ទាទោសរយៈពេល៦ខែ ខណៈលោកជាប់ឃុំឃាំងបណ្ដោះអាសន្នអស់រយៈពេលជាង៥ខែរួចទៅហើយ។ តុលាការបានសម្រេចចេញដីកាបង្គាប់ឱ្យដោះលែងលោកជាស្ថាពរនៅថ្ងៃទី៩ ធ្នូ ក្រោយឃុំលោកគ្រប់ចំនួនកំណត់ ដោយបញ្ជាក់ថាលោកបានគោរពបទបញ្ជា និងវិន័យផ្ទៃក្នុងរបស់ពន្ធនាគារបានល្អ។
ទោះជាយ៉ាងណា អ្នកសម្របសម្រួលផ្នែកឃ្លាំមើលសិទ្ធិមនុស្សនៃអង្គការលីកាដូប្រចាំខេត្តបាត់ដំបង លោក អ៊ិន គង់ជិត នៅតែចាត់ទុកថាការឃុំខ្លួនលោក ឡី សុខុន កន្លងទៅនោះ គឺជារឿងអយុត្តិធម៌ និងជាការធ្វើទុក្ខបុកម្នេញផ្នែកនយោបាយ។ មន្ត្រីសិទ្ធិមនុស្សរូបនេះគាំទ្រចំពោះការបន្តជីវភាពនយោបាយរបស់លោក ឡី សុខុន ដោយគ្មានការភ័យខ្លាច ឬបាក់ស្បាត ក្រោយរួចផុតពីការឃុំឃាំង៖
«យន្តការមិនបានដោះស្រាយរកយុត្តិធម៌សម្រាប់រូបគាត់ ប៉ុន្តែបែរជាដាក់ទោសទណ្ឌទៅលើគាត់ដែលជាមនុស្សសុចរិត ដែលគាត់ជាអ្នកស្វែងរកកំហុសនានា និងអំពើល្មើសនានានៅក្នុងអំឡុងពេលនៃការបោះឆ្នោត»។
អង្គការសង្គមស៊ីវិល និងអ្នកច្បាប់បានចាត់ទុកការចោទប្រកាន់ និងឃុំខ្លួនលោកឡី សុខុន រយៈពេល ៦ខែកន្លងមកនេះថា ជាការសងសឹកផ្នែកនយោបាយជាជាងការអនុវត្តច្បាប់ដោយត្រឹមត្រូវ។ អង្គការសិទ្ធិមនុស្ស និងអ្នកច្បាប់វាយតម្លៃទៀតថា ការចោទប្រកាន់ គំរាមកំហែង និងចាប់អ្នកនយោបាយបក្សប្រឆាំងដាក់ពន្ធនាគារជាបន្តបន្ទាប់ តាមប្រព័ន្ធច្បាប់គ្រប់គ្រងដោយបក្សកាន់អំណាចនោះ គឺជាការធ្វើទុក្ខបុកម្នេញ និងរំលោភលើសិទ្ធិសេរីភាពផ្នែកនយោបាយរបស់ពលរដ្ឋ ផ្ទុយពីរដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។