សកម្មជន​បក្ស​ប្រឆាំង​ដែល​កំពុង​ភៀសខ្លួន​នៅ​ថៃ​សុខចិត្ត​រស់នៅ​លំបាក​ដើម្បី​ទាមទារ​ឲ្យ​មាន​ប្រជាធិបតេយ្យ​នៅ​កម្ពុជា

ដោយ សុជីវី
2022.09.27
Share on WhatsApp
Share on WhatsApp
សកម្មជន​បក្ស​ប្រឆាំង​ដែល​កំពុង​ភៀសខ្លួន​នៅ​ថៃ​សុខចិត្ត​រស់នៅ​លំបាក​ដើម្បី​ទាមទារ​ឲ្យ​មាន​ប្រជាធិបតេយ្យ​នៅ​កម្ពុជា សកម្មជន​គណបក្ស​សង្គ្រោះ​ជាតិ នៅ​ប្រទេស​ថៃ លើក​បដា​ទាមទារ​រដ្ឋាភិបាលកម្ពុជា ឱ្យ​ដោះលែង​លោក រ៉ុង ឈុន វិញ នៅ​ថ្ងៃ​ទី​២ខែ​សីហា ឆ្នាំ២០២០។
រូប៖ សកម្មជន​សង្គ្រោះ​ជាតិ

សកម្មជន​គណបក្ស​ប្រឆាំង​ដែល​កំពុង​ភៀសខ្លួន​នៅ​ប្រទេស​ថៃ ពួកគេ​សុខចិត្ត​រស់នៅ​លំបាក ដើម្បី​ទាមទារ​ឲ្យ​មាន​លទ្ធិ​ប្រជាធិបតេយ្យ​នៅ​កម្ពុជា​។ ពួកគេ​អះអាង​ថា បើទោះ​បី​ជា​ពួកគាត់​មាន​បញ្ហា​ផ្នែក​ជីវភាព នឹង​ប្រឈម​អាជ្ញាធរ​ថៃ​ចាប់ខ្លួន​បញ្ជូន​ឱ្យ​អាជ្ញាធរ​កម្ពុជា​ក្ដី​ក៏​ពួកគេ​នៅតែ​បន្តធ្វើ​នយោបាយ​ដដែល​។ មូលហេតុ ដែល​សកម្មជន​បក្ស​ប្រឆាំង​ទាំងនេះ​បន្ត​ក្រាញ​ននៀល​ភៀសខ្លួន​នៅ​ប្រទេស​ថៃ គឺ​ដើម្បី​តស៊ូ​មតិ​តាមច្បាប់​អន្តរជាតិ ឲ្យ​មាន​ការ​ផ្លាស់ប្ដូរ​នៅ​កម្ពុជា។

សកម្មជន​គណបក្ស​សង្គ្រោះជាតិ ដែល​កំពុង​ភៀសខ្លួន​នៅ​ថៃ ប្ដេជ្ញាចិត្ត​តស៊ូ​ធ្វើ​នយោបាយ ដើម្បី​ឲ្យ​កម្ពុជា​មាន​លទ្ធិប្រជាធិបតេយ្យ​ពិតប្រាកដ​។ ពួកគេ​បាន​រត់គេច​ពី​ការ​តាម​ធ្វើ​ទុក្ខបុកម្នេញ​ពី​សំណាក់​អាជ្ញាធរ​របប​លោក ហ៊ុន សែន ដោយ​ចោទប្រកាន់​ពួកគេ​ថា បាន​រួម​គំនិត​ជាមួយ​លោក សម រង្ស៊ី ប៉ុនប៉ង​ផ្ដួលរំលំ​រដ្ឋាភិបាល។

អនុប្រធាន​គណបក្ស​សង្គ្រោះជាតិ​ខេត្ត​កំពង់ឆ្នាំង លោក ដួង ចន្ត្រា ឲ្យ​ដឹង​ថា ពេល​ខ្លះ​លោក​ត្រូវ​លួច​ទៅ​ធ្វើ​ការ ដើម្បី​បាន​កម្រៃ​ខ្លះ មក​ចិញ្ចឹម​ប្រពន្ធ និង​កូន​បួន​នាក់ ព្រោះ​លោក​កំពុង​រស់នៅ​ក្នុង​ឋានៈ​ជា​ជនភៀសខ្លួន មិនអាច​រក​ការងារ​ណា​ធ្វើ​ឲ្យ​បាន​ពេញលេញ​ដូច​ពលករ​ខ្មែរ​ដទៃ​នោះ​ទេ។ លោក​បន្ត​ថា លោក​ជា​ជនភៀសខ្លួន​រស់នៅ​ដោយ​ការ​ផ្ដល់​អាហារ​បន្តិចបន្តួច​ពី​អង្គការសហប្រជាជាតិ មិនអាច​ផ្គត់ផ្គង់​ជីវិត​ប្រចាំថ្ងៃ​បានទេ​។ លោក​បញ្ជាក់​ថា ទោះបី លោក​ស្ថិត​ក្នុង​ស្ថានភាព​លំបាក​បែប​ណា​ក៏ដោយ ក៏​លោក​នៅតែ​មិន​ដកខ្លួន​ចេញពី​ឆាកនយោបាយ​ដែរ ព្រោះ​លោក​ធ្វើ​សកម្មភាព​ទាំងនេះ​ដើម្បី​ទុក​គំរូ​ល្អ​ដល់​អ្នក​ជំនាន់​ក្រោយ ក្នុង​ការ​ចូលរួម​តស៊ូ ដើម្បី​ឱ្យ​កម្ពុជា​មាន​ប្រជាធិបតេយ្យ​ពេញលេញ​៖ «ហើយ​កន្លងទៅ​ដែល​ខ្ញុំ​បាន​ចូល​ទៅ​ធ្វើ​កិច្ចការ​ខ្លះៗ គឺ​ភាព​ទ័លច្រក​បំផុត​ដោយសារ​ខ្ញុំ​អត់​មាន​ថវិកា​អ្វី​ទាំងអស់​សម្រាប់​ចាយវាយ សម្រាប់​បង់ថ្លៃ​បន្ទប់ សម្រាប់​កូន​ចាយ​ហ្នឹង​គឺ​ខ្ញុំ​សុខចិត្ត​សុំ​លន់តួ​សុំ​គេ​ទៅ​ធ្វើ​ការងារ ដើម្បី​លួច​ធ្វើ​ការងារ ដើម្បី​យក​មក​ចិញ្ចឹម​ឲ្យ​បាន​មួយថ្ងៃ​ពីរ​ថ្ងៃ​ហ្នឹងឯង»

កាលពី​ថ្ងៃទី​១៥ ខែ​កញ្ញា​នេះ លោក ដួង ចន្ត្រា និង​សកម្មជន​គណបក្ស​សង្គ្រោះ​ជាតិ ៤​នាក់​ទៀត ត្រូវ​ជន​អនាមិក​គំរាម​សម្លាប់ ដោយ​ផ្ញើ​សារ​ចូលក្នុង​គណនេយ្យ​ហ្វេសប៊ុក​របស់​ពួកគាត់។

លោក ដួង ចន្ត្រា រៀបរាប់​ថា មូលហេតុ​ដែល​មាន​ជនអនាមិក​គំរាម​សម្លាប់​លោក និង​សកម្មជន​ដទៃទៀត ដោយសារ​ពួកគេ​ទាំង​៥​នាក់ បាន​បង្ហោះ​សារ​ក្នុង​បណ្ដាញ​សង្គម​ឲ្យ​យុវជន និង​ពលរដ្ឋ​ងាក​មក​ឈឺឆ្អាល​រឿង​បញ្ហា​ប្រទេសជាតិ​។ លោក​យល់ថា កម្ពុជា​កំពុង​ដើរ​ទៅរក​របប​ផ្ដាច់ការ ព្រោះ​លោក ហ៊ុន សែន បាន​កែប្រែ​រដ្ឋធម្មនុញ្ញ​ត្រួសត្រាយ​ផ្លូវ ដើម្បី​ងាយស្រួល​ផ្ទេរតំណែង​ទៅ​ឲ្យ​កូនប្រុស​ច្បង​របស់​គាត់​។ លោក​ថា លោក​ក៏​មិន​គាំទ្រ​ឲ្យ រដ្ឋាភិបាល​កម្ពុជា​ដាក់​ដេប៉ាតឺម៉ង់​ភាសា​វៀតណាម នៅក្នុង​សាកលវិទ្យាល័យ​ជាតិ​នោះ​ទេ ព្រោះ​លោក​ថា រឿង​នេះ​ធ្លាប់​មាន​ការ​ខ្វែងគំនិត​គ្នា​ម្ដង​ហើយ ក្នុង​សម័យ​សង្គមរាស្ត្រនិយម ដោយ​ក្រសួង​អប់រំ​ក្នុង​សម័យ​នោះ​បាន​ប្រកែក​មិន​ឲ្យ​មាន​កម្មវិធីសិក្សា​ភាសា​វៀតណាម​នៅក្នុង​សាលា​រដ្ឋ​៖ «ខ្ញុំ​នៅតែ​ចិញ្ចឹមចិត្ត​ព្យាយាម​តស៊ូ ដើម្បី​ធ្វើ​យ៉ាងណា​ផ្លាស់ប្ដូរ​របប​នៃ​ការដឹកនាំ​របស់​លោក ហ៊ុន សែន នេះ​ឲ្យ​បាន ហើយ​ទាមទារ​ឲ្យ​កម្ពុជា​អនុវត្ត​តាម​កិច្ចព្រមព្រៀង​ទីក្រុង​ប៉ារីស ២៣ តុលា ១៩៩១ ដោយ​អនុវត្ត​តាម​លទ្ធិប្រជាធិបតេយ្យ សេរី ពហុបក្ស មានការ​បោះឆ្នោត​ដោយ​ត្រឹមត្រូវ សេរី យុត្តិធម៌ ដោយ​ពិតប្រាកដ​នៅ​កម្ពុជា​ពេល​ខាងមុខ»

ស្រដៀង​គ្នា​នេះ​ដែរ សកម្មជន​គណបក្ស​សង្គ្រោះជាតិ​ម្នាក់​ទៀត ដែល​ភៀសខ្លួន​នៅ​ថៃ មកពី​ខេត្ត​ត្បូងឃ្មុំ លោក តាំង សុផុន ប្រាប់​ថា លោក​មិន​បោះបង់​ឆន្ទៈ​ក្នុង​ការ​ធ្វើ​នយោបាយ​នោះ​ទេ ព្រោះ​លោក​ចង់​ឃើញ​ការផ្លាស់ប្ដូរ​របប​ដឹកនាំ​ប្រកបដោយ​តម្លាភាព ហើយ​ប្រជាពលរដ្ឋ​គ្រប់​លំដាប់​ថ្នាក់​រស់នៅ​ដោយ​សន្តិភាព​ពិតប្រាកដ​។ លោក​បន្ត​ថា ការ​រស់នៅ​របស់​លោក​មាន​ការ​លំបាក​ដោយ​ជីវភាព​ខ្វះខាត​ហូប​ចុក​មិន​គ្រប់គ្រាន់ និង​គ្មាន​សុវត្ថិភាព​នោះ​ទេ តែ​លោក​នៅតែ​មានចិត្ត​ចង់​ចូល​ប្រឡូក​ក្នុង​ឆាកនយោបាយ​ដដែល ដើម្បី​ប្រទេស​មាន​ប្រជាធិបតេយ្យ ពលរដ្ឋ​មាន​សេចក្ដីសុខ និង​ការ​រីកចម្រើន​របស់​ប្រទេសជាតិ​៖ «ឬថា​រាសី​គាត់​អស់ យីអ៊ុន​គាត់​ដាក់​ទៅ​ក្រែងលោ​គាត់ វា​អស់ពី​អំណាច​ទៅ អាហ្នឹង​យើង​នៅតែ​ប្រឹង​បន្ត​អ៊ីចឹង ទោះបី​យើង​ធ្វើ​បាន​ប៉ុណ្ណា យើង​ធ្វើ​ប៉ុណ្ណឹង សមត្ថភាព​យើង​ជួយ​ជាតិ​បាន​ប៉ុណ្ណា ជួយ​ប៉ុណ្ណឹង ថា​ឲ្យ​បោះបង់​អត់​បោះបង់​ទេ ត្រូវតែ​ព្យាយាម​ទៅ​មុខ​ទៀត ត្រូវតែ​ខំ ត្រូវតែ​ជួយ ដូច​ថា​ជ្រោមជ្រែង​ដឹកនាំ​ក្មេងៗ​ក្រោយ​ហ្នឹង​ឲ្យ​ជួយ​ចូលរួម ដើម្បី​កសាង​ប្រជាធិបតេយ្យ​ឡើងវិញ បន្ត​ទៅ​អនាគត​សម្រាប់​កូនចៅ​ជំនាន់​ក្រោយ»

ឆ្លើយតប​នឹង​ការ​លើកឡើង​របស់​សកម្ម​ជន​គណបក្ស​សង្គ្រោះ​ជាតិ​នេះ អ្នកនាំពាក្យ​គណបក្ស​ប្រជាជន លោក សុខ ឥសាន និយាយ​បែប​ឌឺដង​ថា លោក​គាំទ្រ​នឹង​ការ​តស៊ូ​លំបាក​របស់​ក្រុម​គណបក្ស​សង្គ្រោះ​ជាតិ ដែល​ភៀសខ្លួន​នៅ​ថៃ ហើយ​មិន​ព្រម​បោះបង់​នូវ​ឆន្ទៈ​ធ្វើ​នយោបាយ​។ លោក​បន្ថែម​ថា លោក​គោរព​ទៅតាម​ការ​សម្រេចចិត្ត​របស់​សកម្មជន​បក្ស​ប្រឆាំង ដែល​នៅតែ​ស្មោះស្ម័គ្រ​ជាមួយ​គណបក្ស​សង្គ្រោះ​ជាតិ ប៉ុន្តែ​ការដែល​សកម្មជន​ទាំងនោះ​ចោទ​ថា កម្ពុជា​មិនទាន់​មាន​សន្តិភាព និង​កំពុង​ឋិត​នៅ​ក្រោម​របប​ផ្ដាច់ការ​នោះ លោក​ថា ជា​រឿង​មិន​ពិត​ឡើយ ព្រោះ​លោក សុខ ឥសាន អះអាង​ថា ប្រជាពលរដ្ឋ​កំពុង​រស់នៅ​ដោយ​សុខ​សប្បាយ​ជាមួយ​រដ្ឋាភិបាល​៖ «ការដែល​គាត់​ទទួលរង​ការ​លំបាក​នៅ​បរទេស ប្រទេសជិតខាង​ហ្នឹង​ដោយសារ​គាត់ ចូល​ដៃ​ជាមួយ​ក្រុម​ឧទ្ទាម​ក្រៅច្បាប់ ដែល​កំពុង​មេ​របស់​ខ្លួន កំពុង​រត់គេច​ខ្លួន​នៅ​ប្រទេស​បារាំង​ហ្នឹងឯង​បាទ​។ មិនមែន​ដោយសារ​រាជរដ្ឋាភិបាល​ធ្វើការ​គាបសង្កត់​គាត់​ទេ ហើយ​ចុះ​គេ​នៅ​រាប់ ១៧-១៦​លាន​នាក់ ដែល​រស់នៅ​ក្នុង​កម្ពុជា​មាន​នរណា​ទៅ​គាប​សង្កត់ ដោយសារ​គេ​អត់​មាន​ចូល​ដៃ​ជាមួយ​ក្រុម​ឧទ្ទាម​ក្រៅច្បាប់​ហ្នឹង អ៊ីចឹង​ទេ​គាត់​ត្រូវ​ទទួល​ស្គាល់​ការពិត ថា មកពី​គាត់​ចូល​ដៃ​ចូល​ជើង​ជាមួយ​ក្រុម​ឧទ្ទាម​ក្រៅច្បាប់»

ជុំវិញ​រឿង​នេះ​ដែរ អ្នកវិភាគ​នយោបាយ លោក គឹម សុខ លើកឡើង​ថា លោក​ស្ងើច​សរសើរ​ការ​លះបង់​របស់​សកម្មជន​បក្ស​សង្គ្រោះ​ជាតិ រង​ទុក្ខ​លំបាក​យ៉ាងណាក្ដី ក៏​នៅតែ​ប្រកាន់​គោល​ជំហរ​របស់​ខ្លួន​ដោយ​មិន​ក្បត់​ឆន្ទៈ​របស់​ពលរដ្ឋ។ លោក​បញ្ជាក់​ថា ការដឹកនាំ​របស់​រដ្ឋាភិបាល លោក ហ៊ុន សែន មិន​មាន​ប្រជាធិបតេយ្យ​ពេញ​លេញ​ទេ ព្រោះ​អាជ្ញាធរ​រដ្ឋាភិបាល​ឯក​បក្ស​នៅតែ​ធ្វើទុក្ខបុកម្នេញ​លើ​សកម្មជន​នយោបាយ និង​អ្នកមាន​មតិផ្ទុយ​ពី​រដ្ឋាភិបាល រហូត​មាន​អ្នកខ្លះ​ទ្រាំ​មិនបាន​ភៀសខ្លួន​ទៅ​រស់នៅ​ក្រៅប្រទេស​៖ «រដ្ឋាភិបាល​ផ្ដាច់ការ​របស់​លោក ហ៊ុន សែន មិនមែន​ត្រឹមតែ​បំបិទ​សិទ្ធិ​ទេ គឺ​បំពាន​សិទ្ធិ​របស់​ពួកគាត់ ដែល​ជា​អ្នកតស៊ូ​ដើម្បី​លទ្ធិប្រជាធិបតេយ្យ​ទៅទៀត​។ បំពាន​សិទ្ធិ​ហ្នឹង​មានន័យថា គ្រាន់តែ​សិទ្ធិ​មូលដ្ឋាន​របស់​ពួកគាត់​ក្នុង​ការ​បញ្ចេញមតិ ហើយ​ធ្វើ​សកម្មភាព​នៅ​សមរភូមិ​នយោបាយ​កម្ពុ​ជា​ក៏​ត្រូវ​គេ​ធ្វើទុក្ខបុកម្នេញ រារាំង​គ្រប់​កាលៈទេសៈ​ទាំងអស់​ម្ល៉ោះហើយ ទើប​ពួកគាត់​ចាក​ចេញពី​ប្រទេស​គេចខ្លួន​ឲ្យ​រស់​ជីវិត​! រស់​ជីវិត​ទាំង​វេទនា»

បច្ចុប្បន្ន​មាន​សកម្មជន​គណបក្ស​នយោបាយ និង​សកម្មជន​តស៊ូ​មតិ ប្រមាណ​៦០​នាក់ កំពុង​ភៀសខ្លួន​នៅ​ប្រទេស​ថៃ ហើយ​ភាគច្រើន​ពួកគាត់​ជួប​ការ​លំបាក​ផ្នែក​សេដ្ឋកិច្ច និង​ព្រួយបារម្ភ​ពី​សុវត្ថិភាព​ផ្ទាល់ខ្លួន​។ ពួកគេ​អះអាង​ថា រដ្ឋាភិបាល​លោក ហ៊ុន សែន នៅតែ​តាម​យាយី​ពួកគេ​មកដល់​ប្រទេស​ថៃ​ព្រោះ​កន្លងមក​ពួកគាត់​តែង​ឃើញ​មនុស្ស​ប្លែក​មុខ​តាម​ឃ្លាំមើល​សកម្មភាព​របស់​ពួកគាត់​ជាប្រចាំ​នៅ​ប្រទេស​ថៃ។ សកម្មជន​ទាំងនោះ មួយ​ចំនួន​បាន​ភៀសខ្លួន​ទាំង​គ្រួសារ និង​មួយចំនួន​ទៀត​តែម្នាក់ឯង​រស់នៅ​បែក​ពី​ប្រពន្ធ​កូន​នៅ​កម្ពុជា ដោយសារ​អាជ្ញាធរ​រដ្ឋាភិបាល​ក្រុងភ្នំពេញ​តាម​ធ្វើ​ទុក្ខបុកម្នេញ​លើ​ពួកគាត់ ធ្វើ​ឱ្យ​មិនអាច​រស់នៅ​ក្នុង​ស្រុក​បាន​។ សកម្មជន​ទាំងនោះ​អះអាង​ថា ពួកគេ​នៅតែ​ធ្វើ​សកម្មភាព​នយោបាយ​ដឹកនាំ​ក្រុម​ពលករ​ខ្មែរ​នៅ​ប្រទេស​ថៃ​ហ៊ាន​បញ្ចេញមតិ​កែ​លម្អ​រដ្ឋាភិបាល ដើម្បី​ឲ្យ​កម្ពុជា​មាន​លទ្ធិប្រជាធិបតេយ្យ និង​ការ​អភិវឌ្ឍ​ជាតិ​ប្រកប​ដោយ​ចិរភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
បក្សភ្លើងទៀន​រំឭក​ខួប​២៧​ឆ្នាំ និង​កំណត់​ទិសដៅ​ប្រកួតប្រជែង​ការ​បោះឆ្នោត​ឆ្នាំ២០២៣
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។