សកម្មភាពដឹកនាំ និងការធ្វើនយោបាយប្រជាភិថុតិរបស់លោក ហ៊ុន ម៉ាណែត មិនខុសពីឱពុករបស់លោក គឺលោក ហ៊ុន សែន ឡើយ។ នៅរៀងរាល់ពេលអតីតនាយករដ្ឋមន្ត្រី លោក ហ៊ុន សែន ចេញទៅប្រជុំនៅក្រៅប្រទេស លោក តែងតែរៀបចំក្រុមមនុស្សឲ្យរង់ចាំទទួលស្វាគមន៍លោក។
រីឯលោក ហ៊ុន ម៉ាណែត វិញ ក៏មិនខុសពីឪពុករបស់លោកដែរ។ នៅទន្ទឹមនឹងលោក ហ៊ុន ម៉ាណែត ចូលរួមមហាសន្និបាតអង្គការសហប្រជាជាតិនេះ លោកក៏រៀបចំក្រុមមនុស្សឲ្យរង់ចាំទទួលស្វាគមន៍លោកដែរ។
នាយករដ្ឋមន្ត្រីថ្មី ដែលដឹកនាំកម្ពុជាបន្តពីឪពុក គឺលោក ហ៊ុន ម៉ាណែត កំពុងតែដើរនៅលើគន្លងដឹកនាំដូចលោក ហ៊ុន សែន ដែរ។
នៅរៀងរាល់មុនពេលអតីតនាយករដ្ឋមន្ត្រី លោក ហ៊ុន សែន មានបេសកកម្មនៅក្រៅប្រទេស លោក ហ៊ុន សែន ចំណាយលុយ និងរៀបចំក្រុមមនុស្សឲ្យរង់ចាំគាំទ្រ និងស្វាគមន៍លោក។ ក្រៅពីនេះ លោក ហ៊ុន សែន ក៏រៀបចំក្រុមមនុស្សឲ្យរង់ចាំថតរូប អ្នកដែលធ្វើបាតុកម្មប្រឆាំងលោកដែរ។
រីឯលោក ហ៊ុន ម៉ាណែត វិញ ទោះជាលោក ជាមេដឹកនាំថ្មីក៏ដោយ ក៏ប៉ុន្តែសកម្មភាព ដឹកនាំរបស់លោកហាក់គ្មានអ្វីថ្មីឡើយ។ ជាក់ស្ដែង នៅស្របពេលលោក ហ៊ុន ម៉ាណែត មកចូលរួមមហាសន្និបាតអង្គការសហប្រជាជាតិនេះ ក្រុមការងារគណបក្ស ប្រជាជនកម្ពុជារបស់លោក នៅសហរដ្ឋអាមេរិក បានរៀបចំក្រុមពលរដ្ឋអាម៉េរិកាំង ដើមកំណើតខ្មែរមួយចំនួន ដោយពួកគេអះអាងថា នឹងរង់ចាំទទួលស្វាគមន៍លោក ហ៊ុន ម៉ាណែត។ ពួកគេទាំងនោះ បានថតជាវីឌីអូផ្ញើឲ្យលោក ហ៊ុន សែន យកទៅបង្ហោះនៅលើបណ្ដាញសង្គមតេឡេក្រាមរបស់លោក ហ៊ុន សែន និង នៅសារព័ត៌មានដែលស្និទ្ធនឹងលោក ហ៊ុន សែន។
ពលរដ្ឋខ្មែរអាម៉េរិកកាំង ទីក្រុងឡូវែល (Lowell) លោក ប៉ែន សុផល រដ្ឋម៉ាសាជូសិត (Massachusetts) មានប្រសាសន៍ថា ពួកលោកកំពុងធ្វើយុទ្ធនាការមួយ ដើម្បីពាក្យប្ដឹង ទៅរដ្ឋាភិបាលអាម៉េរិក ចំពោះអ្នកណា ដែលគាំទ្រក្រុមមេដឹកនាំផ្ដាច់ការ ឬរដ្ឋាភិបាល លោក ហ៊ុន ម៉ាណែត។ លោកបញ្ជាក់ថា គ្រប់ពលរដ្ឋអាម៉េរិកាំង ដើមកំណើតខ្មែរ ទាំងអស់ នៅពេលចូលសញ្ជាតិ ពួកគាត់បានស្បថស្បែថា មិនជាប់ពាក់ព័ន្ធនឹងបក្សកុម្មុយនិស្ត និងរបបផ្ដាច់ការណាមួយឡើយ។
លោកនាយករដ្ឋមន្ត្រី ហ៊ុន ម៉ាណែត នឹងមកជាន់ទឹកដីសហរដ្ឋអាមេរិក ក្នុងបុរីញូវ យ៉ក ជាលើកដំបូង ក្រោយពីលោកត្រូវបានឪពុកលើកបន្តុបធ្វើជានាយករដ្ឋមន្ត្រី។
លោក ហ៊ុន ម៉ាណែត នឹងមកចូលរួមមហាសន្និបាតអង្គការសហប្រជាជាតិលើកទី៧៨ ដែលចាប់ផ្ដើមពីថ្ងៃទី២១ ដល់ថ្ងៃទី២៥ កញ្ញា។
លោក ហ៊ុន ម៉ាណែត នឹងថ្លែងសន្ទរកថា នៅក្នុងមហាសន្និបាតនេះ ដោយផ្ដោតលើប្រធានបទសំខាន់ៗ ចំនួនបី រួមមាន បរិបទពិភពលោក វឌ្ឍនភាពសង្គម សេដ្ឋកិច្ច កម្ពុជា នឹងការប្ដេជ្ញាចិត្តរបស់កម្ពុជា ចំពោះសកម្មភាពបដិវត្តកម្មនៃគោលដៅអភិវឌ្ឍន៍ ដោយចិរភាព (SDGs)។
ក្រៅពីពលរដ្ឋអាម៉េរិកាំងដើម កំណើតខ្មែរមួយចំនួន រង់ចាំទទួលស្វាគមន៍ លោក ហ៊ុន ម៉ាណែត នេះ ក៏មានមន្ត្រី និងសមាជិកគណបក្សប្រជាជនកម្ពុជា មកពីប្រទេសកម្ពុជារាប់សិបនាក់ទៀត បានមកដល់សហរដ្ឋអាមេរិក ដើម្បីរៀបចំផែនការទទួល ស្វាគមន៍លោក ហ៊ុន ម៉ាណែតនេះដែរ។
ប្រភពសុំមិនបញ្ចេញឈ្មោះ ឲ្យវិទ្យុអាស៊ីសេរីដឹងថា ពលរដ្ឋអាម៉េរិកាំង ដើមកំណើត ខ្មែរ ដែលទៅទទួលស្វាគមន៍លោក ហ៊ុន ម៉ាណែត នោះ គឺមិនត្រូវចំណាយលុយផ្ទាល់ខ្លួនឡើយ។ ពួកគេត្រូវបានមន្រ្តីរដ្ឋាភិបាល ឬមនុស្សជំនិតរបស់លោក ហ៊ុន ម៉ាណែត ជាអ្នករៀបចំទិញសំបុត្រយន្តហោះ ការស្នាក់នៅ និងចេញថ្លៃម្ហូបអាហារ សម្រាប់អ្នកទៅរង់ចាំទទួលស្វាគមន៍លោក ហ៊ុន ម៉ាណែត នៅបុរីញូវយ៉ក។
រីឯអ្នកគំាទ្រគណបក្សប្រឆាំងវិញ ក៏គ្រោងនាំគ្នាទៅទៅបុរីញូវយ៉កដែរ នៅថ្ងៃទី២២ កញ្ញានេះ។ ពួកគេមិនមែនទៅរង់ចាំស្វាគមន៍លោក ហ៊ុន ម៉ាណែត ឡើយ។ ពួកគេទៅធ្វើបាតុកម្មប្រឆាំង និងមិនទទួលស្គាល់លោក ម៉ាណែត ធ្វើជានាយករដ្ឋមន្ត្រីតពូជនោះទេ។
ពលរដ្ឋអាម៉េរិកាំង ដើមកំណើតខ្មែរ នៅរដ្ឋតិចសាស់ (Texas) លោក អ៊ុយ ដាឡី ឲ្យដឹងថា លោកនឹងពលរដ្ឋមួយចំនួនទៀត ត្រៀមទៅធ្វើបាតុកម្មប្រឆាំងលោក ហ៊ុន ម៉ាណែត នៅទីក្រុងញូវយ៉ក។ លោកបញ្ជាក់ថា លោកសុខចិត្តរត់តាក់ស៊ី (Uber) ដើម្បី រកលុយចំណាយលើថ្លៃយន្តហោះ សណ្ឋាគារ និងថ្លៃម្ហូបអាហារ។ លោករត់តាក់ស៊ី ក្រៅម៉ោងធ្វើការ។
លោកលើកអំពីមូលហេតុ ដែលលះបង់កម្លាំងពលកម្ម ថវិកា និងពេលវេលានេះ ដោយសារតែឃើញកម្ពុជាក្រោមការដឹកនាំរបស់ត្រកូល ហ៊ុន ធ្វើឲ្យប្រទេសជាតិហិនហោច។
ក្រុមអ្នកប្រជាធិបតេយ្យ គណបក្សប្រឆាំង រួមទាំងអង្គការសង្គមស៊ីវិលផង នឹងជួបជុំគ្នា នៅបរិវេណអគារអង្គការសហប្រជាជាតិនៅបុរីញូវយ៉ក នៅវេលាម៉ោង ១០ព្រឹក ថ្ងៃទី២២ កញ្ញា។
ប្រធានក្រុមចលនាស្រ្តីគណបក្សសង្គ្រោះជាតិ អ្នកស្រី ធិត គីមហ៊ុន មានប្រសាសន៍ថា ពលរដ្ឋអាម៉េរិកាំង ដើមកំណើតខ្មែរ និងពលរដ្ឋខ្មែរមកពីប្រទេសផ្សេងៗ ទៀត ដូចជាអូស្ត្រាលី និងកាណាដា ចម្លោះពី៣០០ ទៅ៤០០នាក់ នឹងប្រមូលផ្ដុំគ្នាធ្វើបាតុកម្មប្រឆាំងលោក ហ៊ុន ម៉ាណែត។ អ្នកស្រីបញ្ជាក់ថា ប្រទេសកម្ពុជា ត្រូវបានរបបលោក ហ៊ុន សែន និងលោក ហ៊ុន ម៉ាណែត យកធ្វើជាកម្មសិទ្ធិផ្ដាច់មុខ និងប្រើប្រាស់ច្បាប់ ដើម្បីគាបសង្កត់អ្នកប្រឆាំង។ អ្នកស្រីថា ពលរដ្ឋខ្មែរត្រូវរួមគ្នាសង្គ្រោះប្រទេសកម្ពុជាវិញ។
របាយការណ៍គម្រោងយុត្តិធម៌ពិភពលោក (WJP) បានរកឃើញថា កម្ពុជាពូកែខាងរំលោភច្បាប់។ ប្រទេសកម្ពុជាជាប់ចំណាត់ថ្នាក់ផ្នែកនីតិរដ្ឋ ឬគោរពច្បាប់ស្ទើរតែនៅបាតតារាង គឺនៅលេខ ១៣៩ ក្នុងចំណោម ១៤០ប្រទេស ក្នុងឆ្នាំ២០២២។
របាយការណ៍នេះបានបង្ហាញកត្តាចម្បងៗ ចំនួន៨ សម្រាប់ដំណើរការដាក់សន្ទស្សន៍ នីតិរដ្ឋ ក្នុងនោះមានដូចជា ដែនកំណត់អំណាចរដ្ឋាភិបាល ការលុបបំបាត់អំពើពុករលួយ រដ្ឋាភិបាល បើកទូលាយ សិទ្ធិជាមូលដ្ឋាន សណ្ដាប់ធ្នាប់ និងសន្តិសុខសង្គម ការពង្រឹងការអនុវត្តច្បាប់ យុត្តិធម៌ផ្នែករដ្ឋប្បវេណី និងយុត្តិធម៌ផ្នែកព្រហ្មទណ្ឌ ដែលកម្ពុជាសុទ្ធតែទទួលបានពិន្ទុទាបទាំងអស់។
ក្រុមអ្នកប្រជាធិបតេយ្យ និងគណបក្សប្រឆាំង លើកឡើងថា ក្រៅពីពួកគេធ្វើបាតុកម្ម ប្រឆាំង និងលោក ហ៊ុន ម៉ាណែត នេះ ពួកយុទ្ធនាការរួមគ្នាស្វែងរកពលរដ្ឋអាម៉េរិកាំង ដើមកំណើតខ្មែរណា ដែលគាំទ្ររបបផ្ដាច់ការរបស់លោក ហ៊ុន ម៉ាណែត នោះ និងផ្ញើបញ្ជីឈ្មោះទៅរដ្ឋាភិបាលអាមេរិក ដើម្បីឲ្យត្រួតពិនិត្យអំពីសញ្ជាតិអាម៉េរិកាំងរបស់ ពួកគេវិញ នៅពេលដែលពួកគេបានធ្វើផ្ទុយពីច្បាប់សហរដ្ឋអាមេរិកនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។