ខ្មែររស់នៅរដ្ឋណស្សខែរ៉ូឡាញណា (North Carolina) សហរដ្ឋអាមេរិកនាំគ្នាធ្វើបាតុកម្មរារាំងមិនឱ្យមានការជួបជុំ មួយដែលរៀបចំដោយបណ្ដាញគណបក្សប្រជាជនកម្ពុជាជាលើកដំបូង នៅក្នុងរដ្ឋនេះ កាលពីថ្ងៃទី១០ ខែកក្កដា។
បាតុករអះអាងថា មូលហេតុ ដែលពួកគេទៅរារាំងនេះ គឺដើម្បីទប់ស្កាត់មិនឱ្យកើតមានករណីគណបក្សប្រជាជនកម្ពុជារបស់លោក ហ៊ុន សែន ចូលទៅពង្រីកឥទ្ធិពល ដែលនឹងនាំឱ្យមានការបែកបាក់សហគមន៍ខ្មែរនៅក្នុងរដ្ឋនេះ។
ក្រុមបាតុករបញ្ជាក់ថា ការជ្រៀតជ្រែកចូលក្នុងសហគមន៍ខ្មែរនៅរដ្ឋណស្សខែរ៉ូឡាញណា (North Carolina) សហរដ្ឋអាមេរិកពីសំណាក់មន្ត្រីគណបក្សប្រជាជនកម្ពុជា គឺជាក្ដីបារម្ភធំមួយ ដែលមិនអាចឱ្យពួកគេសម្ងំស្ងៀមបាន ព្រោះពួកគេមិនចង់ឱ្យមានការបែកបាក់ណាមួយកើតឡើងនៅសហគមន៍របស់ពួកគេ។
ការលើកឡើងរបស់បាតុករនេះ គឺនៅពេលពួកគេនាំគ្នាទៅរារាំងគម្រោងការជួបជុំទទួលទានអាហាររួមមួយរបស់មន្រ្តីតំណាងឯកអគ្គរាជទូតខ្មែរប្រចាំនៅសហរដ្ឋអាមេរិក ដែលគេស្គាល់ថា ជាមន្រ្តីគណបក្សប្រជាជនកម្ពុជាផង ជាមួយខែ្មរមួយចំនួននៅក្រុង ហ្រ្គីនស៍បូរ៉ូ (Greensboro) រដ្ឋណស្សខែរ៉ូឡាញណា។
«គេប្រើល្បិចកល ដើម្បីបោកបញ្ឆោត បាយហ្រ្វី ហើយនិងនិយាយថា ធ្វើប៉ាស្ព័រហ្រ្វីឱ្យពួកគេ ដូច្នេះពួកគេក៏ចាញ់កលចាញ់ល្បិច រួចហើយក៏ពួកគេនាំគ្នាមកញ៉ាំបាយ ដោយមិនបានគិតពិចារណា។ ចំណុចត្រង់នេះហើយ យើងចង់ប្រាប់ពួកគេថា យើងមិនអនុញ្ញាតឱ្យកុម្មុយនិស្តចូលក្នុងសហរដ្ឋអាមេរិក ឬក៏ចូលក្នុងទឹកដីសហគមន៍ខ្មែរប្រចាំនៅរដ្ឋយើងនេះទេ ហើយយើងនឹងប្រឆាំងដាច់ខាតគ្រប់ពេលវេលាជាមួយជនផ្ដាច់ការ។ ខ្ញុំវាហួសចិត្ត ដែលខ្មែរមកដល់ដីបិតាប្រជាធិបតេយ្យ ស្រេកឃ្លានបាយមួយពេល គេឱ្យលុយ៣រយ ដើម្បីសម្លាប់ពូជអម្បូរសាសន៍យើង ទឹកដីដែលត្រូវបាត់ ខ្ញុំអត់អាចនៅស្ងៀមបានទេ បងប្អូនជនរួមជាតិ។ បានមកដល់ទឹកដីអាមេរិកហើយ ទៅគាំទ្រជនផ្ដាច់ការ ទៅគាំទ្រកុម្មុយនិស្តឱ្យបានដឹងថា ថ្ងៃណាមួយ លោកឯងនឹងទទួលកម្មពៀរនេះ ព្រោះបងប្អូនខ្មែរ ដែលនៅស្រុកខ្មែរ ត្រូវគេរឹបអូសយកដី ត្រូវគេសម្លាប់ ត្រូវគេបង្អត់បាយ ត្រូវគេធ្វើបាបគ្រប់បែបយ៉ាង អស់លោក ដែលនៅឯណេះ ទៅគាំទ្រពួកអាអស់នោះ»។
គម្រោងការរបស់តំណាងមន្រ្តីទូតខ្មែរជួបជាមួយខ្មែរអ្នករស់នៅរដ្ឋណស្សខែរ៉ូឡាញណានេះ បានខកខានទៅវិញ នៅពេលកើតមានបាតុកម្មប្រឆាំងបែបនេះ។
វិទ្យុអាសេរីនៅមិនទាន់អាចសុំការឆ្លើយតប ឬបញ្ជាក់ព័ត៌មាននេះពីមន្រ្តីនៅស្ថានទូតខ្មែរប្រចាំនៅរដ្ឋធានីវ៉ាស៊ីងតោន សហរដ្ឋអាមេរិកបាននៅឡើយទេ កាលពីថ្ងៃទី១១ ខែកក្កដា។ មន្ត្រីផ្នែករដ្ឋបាលនៅស្ថានទូតនេះបញ្ជាក់ប្រាប់វិទ្យុអាស៊ីសេរីយ៉ាងខ្លីថា ត្រូវរង់ចាំមន្រ្តីទទួលបន្ទុក ដែលអាចនឹងឆ្លើយតបនៅពេលក្រោយ។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏មិនអាចទាក់ទងបានដែរ នៅយប់ថ្ងៃទី១១ ខែកក្កដា ដោយសារទូរស័ព្ទហៅមិនចូល។
បើទោះជាយ៉ាងណាកន្លងទៅមន្រ្តីគណបក្សប្រជាជនកម្ពុជាអះអាងថា គណបក្សនេះក៏មានសិទ្ធិបង្កើនអ្នកគាំទ្រនៅក្រៅប្រទេសដែរ។
ទាក់ទងនឹងរឿងនេះ ប្រធានកិច្ចការស្រ្តីគណបក្សសង្គ្រោះជាតិប្រចាំសហរដ្ឋអាមេរិក អ្នកស្រី ទិត្យ គឹមហ៊ុន ថ្លែងថា បាតុកម្មនេះជាតឹកតាងបញ្ជាក់ថា សហគមន៍ខ្មែរនៅរដ្ឋណស្សខែរ៉ូឡាញណានេះ មិនពេញចិត្ត មិនស្វាគមន៍ការប៉ុនប៉ងចូលមកលុកលុយបំបែកបំបាក់សហគមន៍ ដែលជាចេតនាអាក្រក់របស់បក្សកាន់អំណាច ដែលកំពុងដឹកនាំប្រទេសតាមបែបផ្ដាច់ការនេះទេ។ អ្នកស្រីអះអាងថាបណ្ដាញរបស់គណបក្សប្រជាជនបានយកលេសនៃគម្រោងជួបជុំជាមួយខ្មែរមួយចំនួននោះថា ជាការជួបសួរសុខទុក្ខ ស្វែងយល់ពីពលរដ្ឋ និងជួយសម្រួលដល់ការផ្ដល់សេវាកម្មផ្នែកទូតដល់ពលរដ្ឋជាដើម ប៉ុន្តែអ្នកស្រីថាហេតុអ្វីក៏មន្រ្តីបក្សកាន់អំណាចមិនធ្វើល្អដាក់ពលរដ្ឋក្នុងប្រទេសទៅចាំបាច់អីមករកពលរដ្ឋនៅក្រៅប្រទេស ស្របពេលពលរដ្ឋក្នុងប្រទេសតែងរកការធ្វើទុក្ខបុកម្នេញពីអាជ្ញាធរមិនស្រាកស្រាន្ត។
«យើងចង់បង្ហាញថា យើងជាអ្នកប្រជាធិបតេយ្យ យើងមិនពេញចិត្តនូវជនផ្ដាច់ការមកពង្រីក ឆ្លៀតឱកាសនិយម ដើម្បីលួងលោមប្រជាពលរដ្ឋនៅក្រៅប្រទេសទេ។ យើងធ្វើអ៊ីចឹង ដោយសារបើគាត់មានជាការជួយដល់ពលរដ្ឋ គាត់ត្រូវតែនឹងឃើញជួយដល់ពលរដ្ឋនៅក្នុងស្រុក ដូចឧទាហរណ៍ស្រាប់សកម្មជនខ្លះគ្រាន់តែនិយាយ ឬក៏ប្រជាពលរដ្ឋខ្លះគ្រាន់តែលើកប៉ាយ ឬគ្រាន់តែនិយាយថា បើបោះឆ្នោតហ្នឹងសូមឱ្យគាត់ដេញជនបរទេស ដូចជាយួនឱ្យចេញពីស្រុកខ្មែរអីបានទេ គេក៏ចាប់គាត់បាត់ទៅហើយ។ អ៊ីចឹងសួរថា ប្រសិនបើគាត់គិតពលរដ្ឋ ហេតុអ្វីបានជាមិនគិតដល់ក្នុងស្រុក?»។
អ្នកស្រី ទិត្យ គឹមហ៊ុន បន្តថាសហគមន៍ខ្មែរ និងគណបក្សសង្រ្គោះជាតិនឹងបន្តការងារជាច្រើនទៀត ដើម្បីជំរុញបន្ថែមទៀតទៅសភាអាមេរិកឱ្យពន្លឿនអនុម័តសេចក្ដីស្នើច្បាប់ S-831 (TransNational Repression Policy Act) ដែលសំដៅដល់ការដាក់គំនាបជនផ្ដាច់ការ ដែលឆ្លងដែនទៅដាក់ការគាបសង្កត់ គំរាមកំហែងប្រជាពលរដ្ឋនៅក្រៅប្រទេស ដូចជានៅទឹកដីសហរដ្ឋអាមេរិកនេះ។
បន្ថែមពីនេះអ្នកស្រី ទិត្យ គឹមហ៊ុន ឱ្យដឹងទៀតថា ខ្មែរនៅរដ្ឋណស្សខែរ៉ូឡាញណាគ្រោងនឹងជួបជុំធ្វើបាតុកម្មជាថ្មីទៀតនៅថ្ងៃទី២២ ខែកក្កដា ដើម្បីប្រឆាំងនឹងការបោះឆ្នោតក្លែងក្លាយនៅកម្ពុជានៅថ្ងៃទី២៣ ខែកក្កដាខាងមុខ និងបង្ហាញទៅអាជ្ញាធរសហរដ្ឋអាមេរិកនៅក្នុងរដ្ឋនេះ និងសហគមន៍អន្តរជាតិពីការរីកធំធាត់នៃរបបផ្ដាច់ការ ព្រមទាំងការសម្លាប់សិទ្ធិមនុស្ស និងប្រជាធិបតេយ្យនៅក្រោមការដឹកនាំរបស់លោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។