សាលាដំបូង​រាជធានី​ភ្នំពេញ​គ្រោង​ជំនុំ​ជម្រះក្ដី​ស្ថាបនិក​គណបក្ស​បេះដូង​ជាតិ

ដោយ យ៉ង ចាន់តារា
2022.09.20
Share on WhatsApp
Share on WhatsApp
សាលាដំបូង​រាជធានី​ភ្នំពេញ​គ្រោង​ជំនុំ​ជម្រះក្ដី​ស្ថាបនិក​គណបក្ស​បេះដូង​ជាតិ
រូប៖ ហ្វេសប៊ុកលោក សៀម ភ្លុក និង RFA

សាលាដំបូង​រាជធានី​ភ្នំពេញ គ្រោង​បើក​សវនាការ​ជំនុំជម្រះ​ក្ដី ស្ថាបនិក​គណបក្ស​បេះដូង​ជាតិ​លោក សៀម ភ្លុក នា​ពេល​ខាង​មុខ​ឆាប់ៗ នេះ។ មន្ត្រី​សង្គម​ស៊ីវិល​នៅតែ​ជំរុញ​ទៅ​តុលាការ គួរ​ទម្លាក់​ចោល​ការ​ចោទ​ប្រកាន់​លើ​លោក សៀម ភ្លុក។

តុលាការ​គ្រោង​បញ្ជូន​សំណុំរឿង​ស្ថាបនិក​គណបក្ស​បេះដូង​ជាតិ លោក សៀម ភ្លុក ទៅ​ជំនុំជម្រះ​ក្ដី នា​ពេល​ខាង​មុខ​នេះ ក្រោយ​ពេល​ចៅក្រម​បាន​បិទ​បញ្ចប់​ការ​ស៊ើបសួរ​លើ​សំណុំរឿង​នេះ កាល​ពី​ខែសីហា។

មេធាវី​ការពារ​ក្ដី លោក សៀម ភ្លុក គឺ​លោក ជូង ជូងី ឲ្យ​ដឹង​ថា លោក​ត្រៀម​ខ្លួន​រួច​ហើយ ដើម្បី​ការពារ​កូន​ក្ដី​របស់​លោក​នៅ​បន្ទប់​តុលាការ។ លោក​មេធាវី​នៅតែ​អះអាង​ថា កូនក្ដី​របស់​លោក មិន​បាន​ប្រព្រឹត្តិ​ល្មើស​ដូច​ការ​ចោទ​ប្រកាន់​របស់​ក្រសួង​មហាផ្ទៃ​ឡើយ។ លោក​មេធាវី​រិះគន់​ថា ក្រសួង​មហាផ្ទៃ ហាក់​មាន​ចេតនា ចាប់​ទោស​អូស​ដំណើរ ហើយ​ចង់​ឲ្យ​លោក សៀម ភ្លុក ជាប់​ពន្ធនាគារ៖ «អត់​មាន​ការ​ចូលរួម​អត់​មាន​អី​ធានា​ថា ឯកសារ ដែល​ក្រសួង​មហាផ្ទៃ​យក​ទៅ​ធ្វើ​កោសល្យវិច័យ​នោះ​ពិត​ជា​ឯកសារ​យក​ពី​លោក សៀម ភ្លុក ចុះ​យក​ឯកសារ​អី​មក​ទៀត​មក យ៉ាង​ម៉េច​ទៅ​វិញ នេះ​អត់​បង្ហាញ តម្លាភាព ភាព​ជាក់លាក់ ភាព​ប្រាកដប្រជា គួរ​ឲ្យ​ទុក​ចិត្ត​បាន»

លោក​មេធាវី លោក ជូង ជូងី ថា លោក​មិន​ទាន់​បាន​ដឹង​ពី​ថ្ងៃ​ជាក់លាក់ ដែល​តុលាការ​គ្រោង​ជំនុំជម្រះ​ក្ដី​នេះ​នៅ​ឡើយ​ទេ។

ក្រសួងមហាផ្ទៃ បាន​ប្ដឹង​លោក សៀម ភ្លុក ពី​ករណី​ក្លែងបន្លំ និង​ប្រើប្រាស់​លិខិត​ក្លែង ក្នុង​ការ​បង្កើត​គណបក្ស​បេះដូង​ជាតិ បទ​ចោទ​នេះ លោក សៀម ភ្លុក ប្រឈម​នឹង​ការ​ជាប់​ពន្ធនាគារ​រហូត​ដល់ ៣ឆ្នាំ។ លោក សៀម ភ្លុក ត្រូវ​បាន​សមត្ថកិច្ច​ចាប់​ខ្លួន​កាល​ពី​ខែមេសា ក្រោយ​ពី​តុលាការ បាន​ចេញ​ដីកា​បង្គាប់​ឲ្យ​សមត្ថកិច្ច​នាំ​ខ្លួន​លោក។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​លីកាដូ លោក អំ សំអាត ចង់​ឃើញ​តុលាការ​កាត់ក្ដី​ដោយ​ឈរ​ភាព​យុត្តិធម៌ មិន​លំអៀង។ លោក​បន្ត​ថា ដើម្បី​គ្រប់​ភាគី​អាច​ទទួល​យក​ការ​សម្រេច​ក្ដី​របស់​តុលាការ តុលាការ​ត្រូវ​ឈរ​លើ​ជំហរ​ច្បាប់ ភស្តុតាង សាក្សី ដើម្បី​បើក​ឲ្យ​មាន​ការ​តតាំង​ក្ដី​ដោយ​ស្មើភាព​គ្នា៖ «ការ​ពិត​ទៅ​ចៅក្រម ព្រះរាជអាជ្ញា លោក​សុទ្ធតែ​ដឹង​ហើយ ព្រោះ​ក្នុង​តុលាការ​ចៅក្រម​ក៏​មាន​ការ​តាំង​សម្បថ​មុន​នឹង​ចូល​ធ្វើការ​ជា​ចៅក្រម ហើយ​ខាង​ក្រោយ​ក៏​មាន​ដាក់​ទាក់ទង​អគតិ​ទាំង៤ ធ្វើ​ការ​យ៉ាង​ណា បើក​ឱកាស​ក្នុង​ការ​តតាំង​គ្នា​ឲ្យ​មាន​ភាព​ស្មើគ្នា​ចំពោះ​មុខ​ច្បាប់ ដើម្បី​ស្វែងរក​យុត្តិធម៌»

ទាក់ទង​រឿង​នេះ​វិទ្យុ​អាស៊ី​សេរី​មិន​អាច​សុំ​ការ​អត្ថាធិប្បាយ​ណា​មួយ​ពី​ប្រធាន​សាលាដំបូង​រាជធានី​ភ្នំពេញ លោក តាំង ស៊ុនឡាយ បាន​ទេ នៅ​ថ្ងៃ​ទី២០ ខែកញ្ញា។

ចំណែក អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន យល់​ថា ការ​ដែល​តុលាការ​ដំណើរ​រឿង​ក្ដី​នេះ​ជា​ការ​បញ្ជាក់​ថា បណ្ដឹង របស់​ក្រសួង​មហាផ្ទៃ​មាន​មូលដ្ឋាន​ច្បាប់​គ្រប់គ្រាន់។ លោក​បន្ត​ថា គ្រប់​ភាគី​គួរ​រង់ចាំ​មើល​ការ​សម្រេច​របស់​តុលាការ​ជា​មុន​សិន មុន​នឹង​ធ្វើការ​សន្និដ្ឋាន​ថា រឿង​នេះ​ថា ជា​រឿង​នយោបាយ៖ «ត្រង់​អ្នក​ណា​មាន​យោបល់​ជា​រឿង​ការ​យល់​ឃើញ​របស់​គេ ប៉ុន្តែ​តុលាការ​ទទួល​ពាក្យ​ហ្នឹង​ហើយ អ៊ីចឹង​ទៅ​ជា​សំណុំរឿង​ទៅ​ជា​ផ្លូវការ​ហើយ ដែល​តុលាការ​កំពុង​ដំណើរ​ការ»

លោក សៀម ភ្លុក ធ្លាប់​បាន​ប្រាប់​តុលាការ​ថា លោក​មិន​បាន​ក្លែង​បន្លំ​ឯកសារ​ក្នុងការ​បង្កើត​គណបក្ស​បេះដូង​ជាតិ​ឡើយ។ លោក​មិនមែន​ជា​អ្នក​ចុះ​ផ្ទាល់​ទៅ​ប្រមូល​ស្នាម​មេដៃ​អ្នក​គាំទ្រនោះ​ដែរ គឺ​តំណាង​គណបក្ស​នៅ​តាម​ខេត្ត​ជា​អ្នក​រៀបចំ។

កាល​ពី​ខែកក្កដា ស្ថាបនិក​គណបក្ស​បេះដូង​ជាតិ រូប​នេះ បាន​សរសេរ​សំបុត្រ ចេញ​ពី​ពន្ធនាគារ ស្នើ​ទៅ​រដ្ឋមន្ត្រី​ក្រសួង​មហាផ្ទៃ​លោក ស ខេង ឱ្យ​ដក​ពាក្យ​បណ្តឹង​ពី​រូប​លោក លើ​ការ​ចោទ​ប្រកាន់ ករណី​ក្លែង​បន្លំ​ឯកសារ​ចុះ​បញ្ជី​គណបក្ស​បេះដូង​ជាតិ។ ទោះ​យ៉ាង​ណា​ជាង​ពីរ​ខែមក​ហើយ​ក្រសួង​មហាផ្ទៃ មិន​ទាន់​បាន​ឆ្លើយ​តប​នឹង​លោក សៀម ភ្លុក វិញ​នោះ​ទេ ចំណែក តុលាការ​ក៏​បាន​ដំណើរ​ការ​រឿង​នេះ​ទៅ​មុខ​ជា​បន្ត​បន្ទាប់៕

រឿង​ដែល​គេ​អាន​​ច្រើន​បំផុត
នយោបាយ
បក្សភ្លើងទៀន​រំឭក​ខួប​២៧​ឆ្នាំ និង​កំណត់​ទិសដៅ​ប្រកួតប្រជែង​ការ​បោះឆ្នោត​ឆ្នាំ២០២៣
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។