សាលាដំបូងរាជធានីភ្នំពេញនឹងសាកសួរអនុប្រធានគណបក្សភ្លើងទៀន លោក ថាច់ សេដ្ឋា ជាលើកទី២ នៅព្រឹកថ្ងៃទី១០ ខែឧសភានេះ ពាក់ព័ន្ធបទចោទថ្មី សំណុំរឿងញុះញង់។ មន្ត្រីសង្គមស៊ីវិលថា តុលាការបន្តចោទប្រកាន់លោក ថាច់ សេដ្ឋា ពីមួយទៅករណីទៅមួយករណីដូច្នេះនឹងធ្វើឱ្យមានការរិះគន់ថា ការចោទប្រកាន់នេះមានចរិតនយោបាយច្រើនជាងការអនុវត្តច្បាប់។
សាលាដំបូងរាជធានីភ្នំពេញបង្គាប់ឱ្យសមត្ថកិច្ចដឹកអនុប្រធានគណបក្សភ្លើងទៀន ពីពន្ធនាគារព្រៃស មកតុលាការជាថ្មីទៀតដើម្បីសាកសួរទាក់ទងបទចោទថ្មី គឺសំណុំរឿងញុះញង់ ដែលប្រព្រឹត្តិនៅប្រទេសជប៉ុនកាលពីចុងឆ្នាំ២០២២។
មេធាវីការពារក្ដីឱ្យលោក ថាច់ សេដ្ឋា ម្នាក់ គឺលោកមេធាវី សំ សុគង់ ឱ្យទ្យុអាស៊ីសេរីដឹងថ្ងៃទី៩ ខែឧសភាថា តុលាការនឹងសាកសួរ លោក ថាច់ សេដ្ឋា ទាក់ទងអង្គហេតុនៅក្រៅប្រទេស។ លោកថា ក្រុមមេធាវីបានត្រៀមឯកសារមួយ និងភស្តុតាង ដើម្បីជួយដោះបន្ទុកលោក ថាច់ សេដ្ឋា។ លោកឱ្យដឹងទៀតថា ក្រុមមេធាវី ក៏នឹងនៅអមលោក ថាច់ សេដ្ឋា ក្នុងពេលតុលាការសាកសួរនោះដែរ ដើម្បីឱ្យលោកថាច់ សេដ្ឋា អាចប្រើប្រាស់សិទ្ធិរបស់ខ្លួនបានពេញលេញ។
មេធាវី សំ សុគង់៖«គឺយើងអមគាត់(លោក រ៉ុង ឈុន)កុំឱ្យមានការសួរសំណួរណា ដែលដាក់បន្ទុកលើខ្លួនឯងណា ហើយហ្នឹងប្រើប្រាស់សិទ្ធិ ដែលក្នុងនាមជាជនត្រូវចោទគឺអាចថា សំណួរខ្លះមិនច្បាស់ គឺមិនឆ្លើយ ហើយសំណួរខ្លះ ដែលថា ដាក់បន្ទុកខ្លួនឯង គាត់អាចបដិសេធនៅស្ងៀម ជាសិទ្ធិនៅស្ងៀម ជាពិសេស មេធាវីត្រូវអមកូនក្ដី ជៀសវាងកុំឱ្យមានការគាបសង្កត់ ឬក៏ប្រើហិង្សាណាមួយនៅពេលសាកសួរ»។
កាលពីថ្ងៃទី២៨ ខែមេសា សាលាដំបូងរាជធានីភ្នំពេញបាន កោះហៅលោក ថាច់ សេដ្ឋា មកសាកសួរម្ដងរួចហើយ ពាក់ព័ន្ធការចោទប្រកាន់ពីបទញុះញង់ ជាមួយគ្នានេះ សាលាដំបូងរាជធានីភ្នំពេញ ក៏បានសម្រេចឃុំខ្លួនលោក ថាច់ ស៊ីថា បន្ថែមលើពីបទចោទចាស់ គឺសំណុំរឿងមិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកអត់លុយចំនួនប្រាំសន្លឹក។ សំណុំរឿងចាស់នេះ កំពុងស្ថិតដំណាក់កាលស៊ើបអង្កេត ហើយតុលាការគ្រប់ជាន់ថ្នាក់មិនអនុញ្ញាតឱ្យលោក លោក ថាច់ សេដ្ឋា បាននៅក្រៅឃុំបណ្ដោះអាសន្នទេ បើទោះជាលោកមានលក្ខខណ្ឌគ្រប់គ្រាន់អាចនៅក្រៅឃុំ និងប្រាក់តម្កល់ជាង ៣ម៉ឺនដុល្លារក្ដី។
ជុំវិញការចោទប្រកាន់បទល្មើសថ្មីមួយទៀតលើលោក ថាច់ សេដ្ឋា ពេលនេះ វិទ្យុអាស៊ីសេរីមិនអាចសុំការបកស្រាយបន្ថែមពី អ្នកនាំពាក្យអយ្យការ អមសាលាដំបូងរាជធានី ភ្នំពេញ លោក ប្លង់ សុផល បានទេ នៅថ្ងៃទី៩ ខែឧសភា។ ទោះយ៉ាងណា មន្ត្រីសិទ្ធិមនុស្សដែលតាមដានករណីលោក ថាច់ សេដ្ឋា រិះគន់ការចោទប្រកាន់នេះថា ជាការធ្វើទុក្ខបុកម្នេញផ្នែកនយោបាយច្រើនជាងការអនុវត្តច្បាប់។
មន្ត្រីជាន់ខ្ពស់នៃសមាគមការពារសិទ្ធិមនុស្ស អាដហុក (ADHOC) លោក យី សុខសាន្ត សង្កេតឃើញថា ចាប់តាំងពីឆ្នាំ២០១៩ មកដល់ពេលនេះ តុលាការតែងតែយកករណីនានាមកចោទប្រកាន់លើលោក ថាច់ សេដ្ឋា ជាបន្តបន្ទាប់ បើទោះជាពុំមានអង្គហេតុគ្រប់គ្រាន់ក្ដី។ លោកបន្តទៀតថា ការចោទប្រកាន់ទាំងនោះ ទាក់ទងការបញ្ចេញមតិ និងសកម្មភាពនៃជីវិតឯកជនរបស់លោក ថាច់ សេដ្ឋា។ មន្ត្រីសិទ្ធិមនុស្សរូបនេះ យល់ថា បើត្រឹមជាវោហារសាស្ត្ររបស់អ្នកនយោបាយ គួរកុំយក ប្រព័ន្ធតុលាការមកចោទប្រកាន់អី ព្រោះការចោទប្រកាន់ដែលគ្មានមូលដ្ឋានគ្រប់គ្រាន់បែបនេះ នឹងធ្វើឱ្យមតិជាតិ និងអន្តរជាតិ រិះគន់ថា ប្រព័ន្ធតុលាការកម្ពុជាមិនឯករាជ្យ។
លោក យី សុខសាន្ត៖«ប្រធានគណបក្ស ឬក៏អនុប្រធានគណបក្សនយោបាយ ដែលគេធ្វើនយោបាយគេតែងតែរកកំហុស ចំណុចអវិជ្ជមាននៃគ្នាទៅវិញទៅមក ដើម្បីគេកែលំអគ្នា ប៉ុន្តែនៅស្រុកយើងរឿងវោហាស័ព្ទរបស់អ្នកនយោបាយហ្នឹង សូម្បីតែអ្នកនយោបាយមានអភ័យឯកសិទ្ធិ ក៏ចាត់វិធានការដែរ»។
ទាក់ទងការចោទប្រកាន់លើលោក ថាច់ សេដ្ឋា នេះដែរ កាលពីឆ្នាំ២០២០ តុលាការក្រុងភ្នំពេញក៏ធ្លាប់ចោទប្រកាន់លោក ថាច់ សេដ្ឋា និងសកម្មជនគណបក្សសង្គ្រោះជាតិ ជាង ១២០នាក់ទៀតពីបទរួមគំនិតក្បត់ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងផែនការវិលចូលស្រុករបស់លោក សម រង្ស៊ី កាលពីឆ្នាំ២០១៩ ប៉ុន្តែ ក្រោយមកតុលាការទម្លាក់បទចោទនេះវិញ។
លោក ថាច់ សេដ្ឋា ជាអ្នកនយោបាយមានដើមកំណើតខ្មែរក្រោមដ៏លេចធ្លោម្នាក់ និងជាអ្នកជាប់ឃុំម្នាក់ ក្នុងចំណោមក្បាលម៉ាស៊ីនគណបក្សភ្លើងទៀន ៤រូប ដែលកំពុងជាប់ឃុំ។ ក្រៅពីនេះសកម្មជនមួយចំនួនរបស់គណបក្សនេះអ្នកខ្លះជាប់ឃុំ និងខ្លះទៀតត្រូវបានជនមិនស្គាល់មុខវាយធ្វើបាបឱ្យរងរបួសធ្ងន់ធ្ងរ ខណៈសមត្ថកិច្ចនៃរដ្ឋាភិបាលលោក ហ៊ុន សែន មិនដែលរកមុខជនប្រព្រឹត្តិម្ដងណាឡើយ៕