មន្ត្រីជាន់ខ្ពស់ប៉ូលិសជាតិអះអាងថា ក្នុងឆ្នាំ២០២០ នេះ សមត្ថកិច្ចកិច្ចនឹងបន្តទប់ស្កាត់សកម្មភាពទាំងឡាយណាដែលសមត្ថកិច្ចចាត់ទុកថា ជាផែនការបដិវត្តន៍ពណ៌ចង់ផ្តួលរំលំរដ្ឋាភិបាល ដូចអ្វីដែលសមត្ថកិច្ចបានធ្វើកាលពីឆ្នាំ២០១៩ យ៉ាងដូច្នេះដែរ។ មន្ត្រីគណបក្សសង្គ្រោះជាតិ និងអ្នកការពារសិទ្ធិមនុស្សបារម្ភថា វិធានការនេះនឹងនាំទៅរកការរំលោភសិទ្ធិមនុស្សធ្ងន់ធ្ងរជាច្រើនករណីទៀតនៅពេលខាងមុខ ជាពិសេសទៅលើសកម្មជនបក្សប្រឆាំងនៅក្នុងស្រុក។
អគ្គស្នងការនគរបាលជាតិ និងត្រូវជាក្មួយប្រសារបស់លោក ហ៊ុន សែន គឺលោក នេត សាវឿន ថ្លែងនៅថ្ងៃទី២៩ មករាថា សមត្ថកិច្ចកម្ពុជាមានផែនការធានាស្ថិរភាព សន្តិសុខ សុវត្ថិភាព និងសណ្ដាប់ធ្នាប់សាធារណៈឱ្យបានជាដាច់ខាតនៅក្នុងឆ្នាំ២០២០នេះ ពីព្រោះកម្ពុជាត្រូវធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុបលើកទី១៣ នៅខែវិច្ឆិកាខាងមុខ។ លោកបញ្ជាក់ថា កងនគរបាលនឹងទប់ស្កាត់មិនឱ្យមានអង្គការចាត់តាំង និងសកម្មភាពបដិវត្តន៍ពណ៌កើតមាននៅកម្ពុជាឡើយ ក្នុងនោះក៏រួមទាំងការតវ៉ាដីធ្លីរបស់ប្រជាពលរដ្ឋ ការតវ៉ារឿងសិទ្ធិមនុស្ស និងប្រជាធិបតេយ្យ ព្រមទាំងការតវ៉ាទាំងឡាយណាពាក់ព័ន្ធនឹងរឿងប្រព័ន្ធអនុគ្រោះពន្ធ EBA និង GSP ផងដែរ។ លោកបានស្នើសុំឱ្យក្រសួងមហាផ្ទៃគាំទ្រទាំងផ្នែកសម្ភារៈ និងបច្ចេកទេសដល់កងកម្លាំងនគរបាលជាតិ ដើម្បីសម្រេចផែនការនេះ៖ «សម្រាប់ព្រះរាជាណាចក្រកម្ពុជា សភាពការណ៍សន្តិសុខផ្ទៃក្នុងអាចប្រឈមទៅនឹងការវាយប្រហារ ( ពី ) ក្រុមអមិត្តទាំងក្នុង និងក្រៅប្រទេស ជាពិសេសញុះញង់ប្រជាពលរដ្ឋនៅតាមមូលដ្ឋានឱ្យតវ៉ាពាក់ព័ន្ធទំនាស់ដីធ្លី សិទ្ធិសេរីភាព លទ្ធិប្រជាធិបតេយ្យ និងលើកយកបញ្ហា EBA និង GSP ដើម្បីញុះញង់កម្មករឱ្យធ្វើបាតុកម្មបង្កចលាចល ប៉ះពាល់ដល់សន្តិសុខ សណ្ដាប់ធ្នាប់សង្គម»។
លោក ស ខេង រដ្ឋមន្ត្រីក្រសួងមហាផ្ទៃ បានឆ្លើយតបភ្លាមៗទៅនឹងសំណើនេះថា លោកគាំទ្រទិសដៅ និងការប្តេជ្ញាចិត្តរបស់លោក នេត សាវឿន ហើយលោកត្រៀមខ្លួនជានិច្ចក្នុងការជួយជ្រោមជ្រែងផែនការសកម្មភាពទាំងនេះតាមលទ្ធភាពដែលអាចធ្វើទៅបាន។ បើទោះជាអាជ្ញាធរកម្ពុជាជាប់ឈ្មោះថាអ្នកបំផ្លាញប្រជាធិបតេយ្យយ៉ាងណាក្តី ក៏លោក ស ខេង បានចោទប្រកាន់ថា គឺថ្នាក់ដឹកនាំគណបក្សសង្គ្រោះជាតិទៅវិញទេ ដែលមានបំណងបំផ្លាញសន្តិភាពនៅកម្ពុជា និងការអនុគ្រោះពន្ធ EBA ពីទីផ្សារសហភាពអឺរ៉ុប៖ «ខ្ញុំត្រៀមខ្លួនជានិច្ចដើម្បីជួយជ្រោមជ្រែងគ្រប់លទ្ធភាពដែលអាចធ្វើទៅបាន ដើម្បីអគ្គស្នងការដ្ឋាននគរបាល ស្នងការដ្ឋាននគរបាល គណៈបញ្ជាការឯកភាពរាជធានី - ខេត្ត ក្រុង ស្រុក ខណ្ឌនៅទូទាំងព្រះរាជាណាចក្រកម្ពុជាអាចរួមគ្នាដើម្បីធ្វើសកម្មភាព ហើយទទួលបានលទ្ធផលល្អប្រសើរតាមការរំពឹងទុក»។
ទោះជាយ៉ាងណា ការលើកឡើងរបស់ថ្នាក់ដឹកនាំក្រសួងមហាផ្ទៃ និងនគរបាលជាតិនេះ មិនទទួលបានការសាទរពីមន្ត្រីគណបក្សសង្គ្រោះជាតិ និងអ្នកការពារសិទ្ធិមនុស្សឡើយ។
ប្រធានប្រតិបត្តិគណបក្សសង្គ្រោះជាតិរាជធានីភ្នំពេញ លោក ម៉ន ផល្លា ចាត់ទុកវិធានការរបស់អាជ្ញាធរនេះ ថា ជាការយកប្រជាពលរដ្ឋដែលមិនគាំទ្រការដឹកនាំរបស់ខ្លួន គឺជាខ្មាំងសត្រូវ។ លោកបន្តថា រដ្ឋាភិបាល លោក ហ៊ុន សែន គឺជាអ្នកបង្កើតបញ្ហាដោយខ្លួនឯង រួមមាន ការរំលោភយកដីធ្លីពលរដ្ឋ និងការរំលាយប្រជាធិបតេយ្យដែលធ្វើឱ្យជាតិប្រឈមការបាត់បង់ឋានៈអនុគ្រោះពន្ធ EBA ដូច្នេះលោកថា អាជ្ញាធរត្រូវដោះស្រាយបញ្ហាទាំងនេះ មិនមែនទម្លាក់កំហុសឱ្យគណបក្សសង្គ្រោះជាតិ ហើយត្រៀមវិធានការបង្ក្រាបសំឡេងប្រឆាំងបែបនេះឡើយ។ មន្ត្រីជាន់ខ្ពស់គណបក្សសង្គ្រោះជាតិរូបនេះ យល់ថា វិធានការរបស់អាជ្ញាធរនេះ នឹងធ្វើឱ្យជាតិបែកបាក់ និងបង្កើតភាពវឹកវរនៅក្នុងប្រទេស មិនមែនជាវិធានការថែរក្សាសន្តិសុខ និងសុវត្ថិភាពជូនប្រជាពលរដ្ឋគ្រប់រូបនោះទេ៖ «គាត់អត់មានវិធានការ អត់មានដំណោះស្រាយដើម្បីស្ដារប្រជាធិបតេយ្យ ដើម្បីសង្គ្រោះប្រព័ន្ធអនុគ្រោះពន្ធដែលជាផលប្រយោជន៍ប្រជាពលរដ្ឋពិតប្រាកដទេ។ គាត់បែរទៅជាដាក់បន្ទុក ហើយមានបំណងចាត់វិធានការទៅលើប្រជាពលរដ្ឋដោយយកលេសថា ពួកអមិត្ត ឬក៏ពួកដែលធ្វើឱ្យមានបដិវត្តន៍ពណ៌នៅក្នុងសង្គមទៅវិញ។ អ៊ីចឹងខ្ញុំយល់ឃើញថា ទស្សនៈលើកឡើងរបស់អាជ្ញាធរនៃរបបក្រុងភ្នំពេញនៅពេលនេះ គឺជាលេសមួយឥតមានការទទួលខុសត្រូវ ហើយឆ្លើយយកតែរួចខ្លួន ដោយអាងទៅលើឥទ្ធិពលនៃអំណាចតែប៉ុណ្ណោះ»។
ចំណែក នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត វិញ ថ្លែងថា លោកគាំទ្រចំពោះវិធានការរបស់សមត្ថកិច្ចក្នុងការបង្ក្រាបបទល្មើសផ្សេងៗ ប៉ុន្តែមិនគាំទ្រឡើយចំពោះវិធានការរឹតត្បិតសិទ្ធិសេរីភាព ឬរំលោភសិទ្ធិមនុស្ស។ លោកបារម្ភថា វិធានការរបស់សមត្ថកិច្ចនៅពេលនេះ អាចនឹងធ្វើឱ្យសកម្មជនបក្សប្រឆាំងមួយចំនួន រងការធ្វើទុក្ខបុកម្នេញ ឬការចោទប្រកាន់តាមផ្លូវតុលាការជាបន្តទៀត ជាពិសេសនៅក្នុងបរិបទនៃគម្រោងវិលត្រឡប់មកកម្ពុជាវិញពីសំណាក់ថ្នាក់ដឹកនាំបក្សសង្គ្រោះជាតិនៅក្រៅប្រទេស៖ «រឿងការផ្តួលរំលំរដ្ឋាភិបាល កន្លងមកយើង ហាក់បីដូចជាមើលអត់ទាន់ឃើញសញ្ញាណ ផ្ទុយទៅវិញ យើងឃើញថាដូចជាថ្ងៃទី៩ ( វិច្ឆិកា ) ឬក៏ការចាប់សកម្មជនអតីតគណបក្សប្រឆាំងកន្លងមកជាដើមនោះ វាមានការរិះគន់បន្ថែមទៀតទាក់ទងនឹងការរំលោភទៅលើសិទ្ធចូលរួមនយោបាយរបស់ប្រជាពលរដ្ឋ សិទ្ធិសេរីភាពក្នុងការដើរហើរជាដើម»។
ស្ថានភាពសិទ្ធិមនុស្សនៅកម្ពុជា ជាពិសេសសិទ្ធិនយោបាយ ត្រូវបានសហគមន៍ជាតិ និងអន្តរជាតិ វាយតម្លៃថា ធ្លាក់ចុះដុនដាបខ្លាំង ដោយសាររដ្ឋអំណាចលោក ហ៊ុន សែន បានចាប់មេបក្សប្រឆាំងលោក កឹម សុខា ដាក់ពន្ធនាគារ ដោយចោទប្រកាន់ខ្វះមូលដ្ឋានពីបទក្បត់ជាតិ ការរំលាយគណបក្សសង្គ្រោះជាតិ ហើយយកអាសនៈសភា និងក្រុមប្រឹក្សាឃុំសង្កាត់របស់បក្សនេះ ទៅចែកគ្នាកាន់កាប់ និងការហាមប្រាមអ្នកនយោបាយបក្សនេះជាង ១១៨ នាក់ មិនឱ្យធ្វើសកម្មភាពនយោបាយរយៈពេល ៥ឆ្នាំ។
ក្រោយមក នៅពេលប្រធានស្តីទីគណបក្សសង្គ្រោះជាតិ លោក សម រង្ស៊ី ប្រកាសពីការវិលត្រឡប់ចូលកម្ពុជានៅថ្ងៃទី៩ វិច្ឆិកា ឆ្នាំ២០១៩ អាជ្ញាធរបានចោទប្រកាន់ និងចាប់ខ្លួនសកម្មជនមូលដ្ឋានបក្សប្រឆាំងជាច្រើននាក់ ដោយចោទពួកគេពីបទរួមគំនិតក្បត់ជាតិ។ ដោយសារតែមានបញ្ជាពីលោក ហ៊ុន សែន ទេ ទើបពួកគេមួយចំនួនត្រូវបានដោះលែងឱ្យនៅក្រៅឃុំបណ្ដោះអាសន្ន ប៉ុន្តែគ្មានសិទ្ធិធ្វើសកម្មភាពនយោបាយគាំទ្រគណបក្សសង្គ្រោះជាតិឡើយ។
ក្រៅពីការធ្វើទុក្ខបុកម្នេញមន្ត្រីបក្សប្រឆាំង រដ្ឋាភិបាល លោក ហ៊ុន សែន ក៏បានវាយបង្ក្រាបឥតស្រាកស្រាន្តទៅលើក្រុមអង្គការសង្គមស៊ីវិល សហជីព និងស្ថាប័នព័ត៌មានឯករាជ្យផងដែរ ជាពិសេសអាជ្ញាធរបានរឹតត្បិតកាន់តែខ្លាំងលើសិទ្ធិសេរីភាពជាមូលដ្ឋានរបស់ពលរដ្ឋក្នុងរយៈពេលប៉ុន្មានឆ្នាំចុងក្រោយនេះ។ ដោយសារតែបញ្ហាទាំងនេះហើយ ទើបធ្វើឱ្យសហភាពអឺរ៉ុបដាក់ចេញនូវនីតិវិធីព្យួរការអនុគ្រោះពន្ធ EBA ពីកម្ពុជា ដោយការសម្រេចចិត្តជាចុងក្រោយនឹងត្រូវធ្វើឡើងក្នុងពេល ២សប្ដាហ៍ខាងមុខទៀតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។