លោក សម រង្ស៊ី អះអាងថា តុលាការរបបលោក ហ៊ុន សែន ផ្ដន្ទាទោសលោក អស់មួយជីវិត និងដកសិទ្ធិនយោបាយជាស្ថាពរ គឺជារឿងសងសឹក។ ចំណែកអ្នកវិភាគថា លោក ហ៊ុន សែន នៅតែតាមព្យាបាទលោក សម រង្ស៊ី ម្ដងហើយម្ដងទៀតនេះ ក៏ដោយសារតែលោកបារម្ភពីឥទ្ធិពលនយោបាយរបស់មេបក្សប្រឆាំងរូបនេះដែរ។
លោក សម រង្ស៊ី ប្រធានស្ដីទីគណបក្សសង្គ្រោះជាតិ អះអាងថា លោកគ្មានកាត់ទឹកដីខ្មែរឲ្យបរទេសណាមួយ ដូចតុលាការលោក ហ៊ុន សែន ចោទប្រកាន់ឡើយ។
លោក សម រង្ស៊ី បញ្ជាក់ថា តុលាការរបបលោក ហ៊ុន សែន បានផ្ដន្ទាទោសលោកឲ្យជាប់ពន្ធនាគារអស់មួយជីវិត និងដកសិទ្ធិនយោបាយលោកជាស្ថាពរនោះ មកពីចង់សងសឹកលោកវិញតែប៉ុណ្ណោះ ក្រោយពីលោក ហ៊ុន សែន ចាញ់ក្ដីនៅប្រទេសបារាំង។ លោក សម រង្ស៊ី បន្ថែមថា លោកបានជួបមេដឹកនាំជនជាតិដើមភាគតិច លោក កុក ស នៅសហរដ្ឋអាមេរិក កាលពីឆ្នាំ២០១៣ នោះ គ្រាន់តែទទួលស្គាល់សិទ្ធិជនជាតិដើមភាគតិចទេ៖ « តុលាការចោទប្រកាន់ខ្ញុំនេះ គឺទទឹងទិស លើគោក ព្រោះខ្ញុំមិនបានកាត់ទឹកដីឲ្យប្រទេសណាមួយទេ។ ខ្ញុំគ្រាន់តែទទួលស្គាល់សិទ្ធិជនដើមភាគតិច ដែលយើងហៅថា ខ្មែរលើនៅភូមិភាគឦសានកម្ពុជា។ ខ្ញុំគ្រាន់តែយកសេចក្ដីថ្លែងការណ៍អង្គការសហប្រជាជាតិឆ្នាំ២០០៧ ស្ដីពីសិទ្ធិជនជាតិដើមភាគតិចហ្នឹង។ ខ្ញុំថា ថ្ងៃក្រោយប្រទេសជាតិមានលទ្ធិប្រជាធិបតេយ្យពិតប្រាកដ យើងនឹងគោរពសិទ្ធិជនជាតិដើមភាគតិចនេះ»។
ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន នៅថ្ងៃទី១៩ តុលា បានប្រកាសសាលក្រមផ្ដន្ទាទោសឱ្យលោក សម រង្ស៊ី ជាប់ពន្ធនាគារអស់មួយជីវិត និងដកសិទ្ធិធ្វើនយោបាយជាស្ថាពរ ពីបទ «ប្រគល់ឱ្យរដ្ឋបរទេស» ពាក់ព័ន្ធនឹងការចោទប្រកាន់ថា លោក សម រង្ស៊ី បានចុះហត្ថលេខាលើកិច្ចព្រមព្រៀងកាត់ទឹកដីកម្ពុជាចំនួន ៤ខេត្ត ឱ្យជនជាតិដើមភាគតិចម៉ុងតាញ៉ា ដើម្បីរស់នៅ។ ក្រៅពីដកសិទ្ធិធ្វើនយោបាយហើយ លោក ស៊ិន សុវណ្ណរ័ត្ន ក៏បានចេញដីកាបង្គាប់ឱ្យចាប់ខ្លួនលោក សម រង្ស៊ី ហើយចាត់ទុកការប្រកាសសាលក្រមនេះ នៅចំពោះមុខជនជាប់ចោទ។
ទោះជាបែបនេះក្ដី ការសម្រេចក្ដីផ្ដន្ទាទោសមេបក្សប្រឆាំងនេះ នៅបន្ទាប់ពីសាលាដំបូងរាជធានីភ្នំពេញ បានបើកសវនាការជំនុំជម្រះក្ដីលោក សម រង្ស៊ី ក្នុងសំណុំរឿង «ប្រគល់ឱ្យរដ្ឋបរទេស» កាលពីថ្ងៃទី១១ ខែសីហា ឆ្នាំ២០២២ ដែលគ្មានវត្តមានលោក សម រង្ស៊ី នៅក្នុងសវនាការឡើយ។
មេធាវីការពារក្ដីឱ្យលោក សម រង្ស៊ី គឺលោក យុង ផានិត ប្រាប់សារព័ត៌មានក្នុងស្រុកថា ការសម្រេចក្ដីរបស់ប្រធានក្រុមប្រឹក្សាជំនុំជម្រះ លោក ស៊ិន សុវណ្ណារ័ត្ន ផ្ដន្ទាទោសកូនក្ដីរបស់លោកដាក់ពន្ធនាគារអស់មួយជីវិតនេះ ធ្វើឡើងដោយពុំមានភស្តុតាងគ្រប់គ្រាន់ឡើយ។
វិទ្យុអាស៊ីសេរីមិនអាចទាក់ទងប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន ដើម្បីសុំសួរអំពីរឿងនេះបន្ថែមបានទេ នៅថ្ងៃទី១៩ តុលានេះ។
នៅមុនពេលតុលាការប្រកាសសាលក្រមផ្ដន្ទាទោសលោក សម រង្ស៊ី នេះ លោក ហ៊ុន សែន កាលពីថ្ងៃទី១៧ តុលា បានប្រកាសដាក់ផែនការកម្ចាត់លោក សម រង្ស៊ី និងអ្នកជាប់ពាក់ព័ន្ធនឹងមេបក្សប្រឆាំងរូបនេះ ដល់ទីបញ្ចប់។ បន្ទាប់លោកពីឃើញសារលោក សម រង្ស៊ី សសរនៅលើបណ្ដាញសង្គមហ្វេសប៊ុកអំពាវនាវឲ្យពលរដ្ឋ និងកម្លាំងប្រដាប់អាវុធរួមគ្នា ដើម្បីឲ្យមានការផ្លាស់ប្ដូរនៅឆ្នាំ២០២៣ នោះ។ ក្រោយពីលោក ហ៊ុន សែន ប្រកាសភ្លាម ក៏មានក្រសួង ស្ថាប័នមន្ត្រីរាជការ និងមន្ត្រីអែបអបមួយចំនួនទៀត នាំគ្នាធ្វើញត្តិបន្ទរតាមលោក ហ៊ុន សែន ពីការតាមកម្ចាត់លោក សម រង្ស៊ីនេះ ជាបន្តបន្ទាប់។
ទាក់ទងនឹងបញ្ហានេះ អ្នកឃ្លាំមើលផ្នែកអភិវឌ្ឍន៍សង្គម លោក បណ្ឌិត សេង សារី មានប្រសាសន៍ថា លោកនាយករដ្ឋមន្ត្រី ហ៊ុន សែន ហាក់ដូចជាព្រួយបារម្ភហួសពីអ្វី ដែលកើតឡើង។ លោកបញ្ជាក់ថា មូលហេតុចម្បងដែលធ្វើឲ្យលោក ហ៊ុន សែន មិនទុកចិត្តខ្លួនឯងនេះ មកនៅតែព្រួយបារម្ភអំពីឥទ្ធិពលនយោបាយលោក សម រង្ស៊ី៖ «មុនតុលាការកាត់ទោស គឺមានច្បាប់រួចទៅហើយ ការកែរដ្ឋធម្មនុញ្ញអ្នកមានសញ្ជាតិពីរ មិនអាចដឹកនាំប្រទេសបាន។ អ៊ីចឹងជានីតិវិធីបន្តបន្ទាប់មក ដើម្បីឲ្យលោក សម រង្ស៊ី ចេញពីសង្វៀននយោបាយ។ ហើយចាប់តាំងពីឆ្នាំ២០១៧ មក តុលាការបានបិទសិទ្ធិលោក សម រង្ស៊ី និងមន្រ្តីបក្សប្រឆាំងផ្សេងទៀត។ ដូច្នេះ ព្រឹត្តិការណ៍តុលាការនៅប្រទេសបារាំងនេះ ដូចជា យកសាំងទៅចាក់លើភ្លើង ឬសុភាសិតខ្មែរថា ឆ្នាំងមិនក្ដៅ តែក្ដៅគម្រប»។
រីឯលោក សម រង្ស៊ី វិញ លើកឡើងប្រហាក់ប្រហែលដូចលោក បណ្ឌិត សេង សារី ដែរថា លោក ហ៊ុន សែន នៅតែតាមចងពៀរលោកនេះ ដោយសារតែលោកភ័យខ្លាចឥទ្ធិពលរបស់លោក ដែលមានអ្នកគាំទ្រច្រើន៖ «លោក ហ៊ុន សែន ខឹងខ្ញុំផង គាត់ភ័យពីសកម្មភាពរបស់ខ្ញុំផង ព្រោះខ្ញុំជាតំណាងប្រជាពលរដ្ឋខ្មែរ ដែលទាមទារឲ្យមានការផ្លាស់ប្ដូរ ចង់ឲ្យមានការផ្លាស់ប្ដូរពិតប្រាកដនៅកម្ពុជា។ ហើយបើខ្ញុំនាំមុខទាមទារនៅកម្ពុជា គឺគ្រោះថ្នាក់សម្រាប់លោក ហ៊ុន សែន អ៊ីចឹងបានជាគាត់កម្ចាត់ខ្ញុំ»។
ដោយឡែក អ្នកវិភាគនយោបាយចាស់វស្សា គឺបណ្ឌិត ឡៅ ម៉ុងហៃ វិញ មានប្រសាសន៍ថា គ្មានអ្វីចម្លែកទេ ដែលតុលាការកម្ពុជាកាត់ទោសឲ្យលោក សម រង្ស៊ី ជាប់ទោសធ្ងន់ធ្ងរបែបនេះ។ លោកបញ្ជាក់ថា មូលហេតុចម្បងមកពីតុលាការបារាំងបានកាត់ក្ដី ឲ្យលោក ហ៊ុន សែន ចាញ់ក្ដីលោក សម រង្ស៊ី។ លោក បណ្ឌិត ឡៅ ម៉ុងហៃ បន្ថែមថា តុលាការខ្មែរត្រូវបានអ្នកកាន់អំណាចប្រើប្រាស់ជាឧបករណ៍របស់ពួកគេ។
មកទល់ពេលនេះ តុលាការ បានចោទប្រកាន់ និងផ្ដន្ទាទោសលោក សម រង្ស៊ី ជាច្រើនសំណុំរឿង ដែលលោក សម រង្ស៊ី ខ្លួនឯងអះអាងថា លោកស្ទើរតែមិនចាំសំណុំរឿងទាំងនោះឡើយ។ ហើយទោសរបស់លោកក្រៅពីតុលាការផ្ដន្ទាទោសចុងក្រោយអស់មួយជីវិតនេះ លោក សម រង្ស៊ី ក៏ត្រូវបានតុលាការលោក ហ៊ុន សែន ផ្ដន្ទាទោសក្នុងសំណុំរឿងផ្សេងៗ ទៀត ដែលសរុបទាំងអស់ជិត ១០០ឆ្នាំរួចទៅហើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។