លោក ហ៊ុន សែន បានរំលឹកអនុស្សាវរីយ៍បង្កើតវប្បធម៌សន្ទនាជាមួយលោក សម រង្ស៊ី នាឱកាសលបចូលប្រជុំជាមួយមន្រ្តីជាន់ខ្ពស់បក្សប្រឆាំង
2021.09.14
សារសម្លេងលោកនាយករដ្ឋមន្រ្តី ហ៊ុន សែន លបចូលរួមប្រជុំជាមួយមន្រ្តីជាន់ខ្ពស់គណបក្សប្រឆាំង ត្រូវបានហ្វេសប៊ុកឈ្មោះ ផែង វណ្ណៈ បញ្ចេញផ្សព្វផ្សាយជាសាធារណៈ។ ការបញ្ចេញសម្លេងនេះ ធ្វើឡើងនៅក្រោយពីលោក សម រង្ស៊ី បានប្រកាសប្រាប់អ្នកគាំទ្ររបស់ខ្លួនកាលពីថ្ងៃទី១១ ខែកញ្ញា នៅរដ្ឋវ៉ាស៊ីនតោន (Washington State)។ កិច្ចប្រជុំនោះលោក ហ៊ុន សែន បានរំលឹកអំពីអនុស្សាវរីយ៍ជាមួយលោក សម រង្ស៊ី ដែលបានបង្កើតវប្បធម៌សន្ទនាឡើង និងការជួបជុំបរិភោគអាហារជាលក្ខណៈគ្រួសារទាំងពីរទៀតផង។
អ្នកវិភាគលើកឡើងថា មេដឹកនាំគណបក្សប្រឆាំងលោក សម រង្ស៊ី និង មេដឹកនាំគណបក្សកាន់អំណាចលោក ហ៊ុន សែន គួរតែងាកមកតុចរចាវិញ ដើម្បីតម្កល់ជាតិជាធំ។
លោក បណ្ឌិត សេង សារី មានប្រសាសន៍ថា ជារឿងមិនធម្មតាទេ ដែលប្រមុខរដ្ឋាភិបាលលបចូលក្នុងកិច្ចប្រជុំរបស់សកម្មជនគណបក្សសង្រ្គោះជាតិ ដែលពេលនោះកំពុងដឹកនាំប្រជុំដោយលោក ឡុង រី។ លោកបណ្ឌិត សេង សារី បន្ថែមថា លោក ហ៊ុន សែន លបចូលកិច្ចប្រជុំនេះអាចថា ជាការគំរាមកំហែងផង ឬក៏អាចជាការបន្ទន់ឥរិយាបទចង់ចរចាជាមួយគណបក្សប្រឆាំងផង។ លោកបន្ថែមថា របបឯកបក្សសព្វថ្ងៃនេះ ហាក់បីដូចជាស្ថិតនៅក្នុងភាពទ័លច្រក ដោយសារតែវិបត្តិសេដ្ឋកិច្ចសាកល និងការហុំព័ន្ធសេដ្ឋកិច្ចពីសហគមន៍អឺរ៉ុបជាដើម៖«...................»។
លោក ហ៊ុន សែន បានថ្លែងក្នុងកិច្ចប្រជុំនោះ ពីរឿងផ្ទាល់ខ្លួនលោក និងលោក សម រង្ស៊ី។ ក្រៅពីនិយាយរឿងផ្ទាល់ខ្លួននេះ លោក ហ៊ុន សែន បានរំលឹកពីវប្បធម៌សន្ទនាកាលពីឆ្នាំ២០១៤ ដែលលោក និង លោក សម រង្ស៊ីបានបង្កើតឡើង។ ក៏ប៉ុន្តែលោក ហ៊ុន សែន បានចោទ លោក សម រង្ស៊ី ជាអ្នកបំផ្លាញវប្បធម៌សន្ទនានេះទៅវិញ៖«...................................»។
សារសំឡេងរបស់លោក ហ៊ុន សែន ដែលគេយកមកផ្សព្វផ្សាយតាមបណ្ដាញសង្គមនេះ នៅបន្ទាប់ពីលោក សម រង្ស៊ី បានថ្លែងប្រាប់អ្នកគាំទ្ររបស់លោកថា លោក ហ៊ុន សែន បានលបចូលកិច្ចប្រជុំ ដែលដឹកនាំដោយលោក ឡុង រី តំណាងរាស្រ្តរបស់គណបក្សសង្រ្គោះជាតិ ដែលកំពុងតែភៀសខ្លួននៅសហរដ្ឋអាមេរិក។ លោក សម រង្ស៊ី បានបង្ហើបប្រាប់អ្នកគាំទ្រថា លោក ហ៊ុន សែន ជាមនុស្សមានកលល្បិចច្រើន។ លោកបន្ថែមថា ការប្រើវប្បធម៌សន្ទនាជាមូយលោក ហ៊ុន សែន បានលុះត្រាតែធ្វើតាមលោក ហ៊ុន សែន ទើបអាចរក្សាវប្បធម៌សន្ទនាបាន៖«...................»។
នៅក្រោយពីគណបក្សជាប់ឆ្នោតទាំងពីរ គឺគណបក្សសង្រ្គោះជាតិ និង គណបក្សប្រជាជនកម្ពុជា បានដោះស្រាយវិបត្តិនយោបាយកាលពីឆ្នាំ២០១៤នោះ គឺមេដឹកនាំគណបក្សទាំងពីរបានស្រុះស្រួលគ្នាបង្កើតវប្បធម៌សន្ទនាឡើង ដើម្បីដោះស្រាយបញ្ហាប្រទេសជាតិ។ តាមរយៈវប្បធម៌សន្ទនានេះ លោក សម រង្ស៊ី ត្រូវបានតែងតាំងជាប្រធានក្រុមភាគតិចនៅក្នុងរដ្ឋសភា មានឋានៈស្មើនាយករដ្ឋមន្រ្តី។ នៅក្នុងកិច្ចប្រជុំសភាជាលើកដំបូងក្នុងឆ្នាំ២០១៤ ទាំងលោក ហ៊ុន សែន និងលោក សម រង្ស៊ី បានប្រកាសនៅក្នុងសភាទាំងដោយ មោទនភាពថា ពួកលោកទាំងពីរបានបង្កើតវប្បធម៌សន្ទនានេះ ហើយជាប្រវត្តិសាស្រ្តសំរាប់កម្ពុជាដែរ។ ភាពល្អូកល្អើនរវាងលោក ហ៊ុន សែន និង លោក សម រង្ស៊ី មិនបានយូរអង្វែងឡើយ។ មន្រ្តី និងតំណាងរាស្ត្របក្សសង្គោះជាតិត្រូវបានលោក ហ៊ុន សែន បញ្ជាឱ្យចាប់ដាក់ពន្ធនាគារជាបន្តបន្ទាប់ រហូតដល់រំលាយគណបក្សសង្រ្គោះជាតិនៅក្នុងឆ្នាំ២០១៧ និងចាប់ប្រធានគណបក្សនេះ គឺលោក កឹម សុខា ដាក់ពន្ធនាគារទៀតផង។
ទោះបីជាយ៉ាងណាក្ដី អ្នកវិភាគអះអាងថា ឥលូវនេះ លោក ហ៊ុន សែន និងលោក សម រង្ស៊ី មិនទាន់ហួសពេលទេ ក្នុងការងាកមកប្រើយន្តការសន្ទនា ដើម្បីបញ្ចប់វិបត្តិនយោបាយនាពេលបច្ចុប្បន្ន និងតម្កល់ប្រយោជន៍ជាតិជាធំ។ ហើយមេដឹកនាំទាំងពីរគួរតែបញ្ចប់រឿងគំនុំបុគ្គលនៅក្នុងពេលប្រជាពលរដ្ឋកំពុងជួបប្រទះស្ថានភាពលំបាក ដោយសារតែជំងឺកូវីដ-១៩ផង ដោយងាកមកផ្សះផ្សាព្រោះទាំងអស់សុទ្ធតែមានឈាមជ័រជាខ្មែរដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។