លោក សួង សុភ័ណ្ឌ នឹង​ប្ដឹង​ឧទ្ធរណ៍​នៅ​ចុង​ខែ​កុម្ភៈ ប្រឆាំង​សាល​ក្រម​កាត់ក្ដី​ឲ្យ​មាន​ទោស

ដោយ ហេង រស្មី
2021-02-22
Share
លោក សួង សុភ័ណ្ឌ នឹង​ប្ដឹង​ឧទ្ធរណ៍​នៅ​ចុង​ខែ​កុម្ភៈ ប្រឆាំង​សាល​ក្រម​កាត់ក្ដី​ឲ្យ​មាន​ទោស លោក សួង សុភ័ណ្ឌ ប្រធាន​គណបក្ស​ខ្មែរ​ឈ្នះ ពេល​ចូលរួម​ការ​តវ៉ា​ជាមួយពលរដ្ឋ​ ទាមទារ​អាជ្ញាធរ​ឱ្យ​ដោះលែង​លោក រ៉ុង ឈុន ​ប្រធាន​សហភាព​សហជីព​កម្ពុជា។
រូប​គេផ្ដល់​ឱ្យ និង​គណបក្សខ្មែរឈ្នះ

ប្រធាន​គណបក្ស​ខ្មែរ​ឈ្នះ លោក សួង សុភ័ណ្ឌ កំពុង​ជាប់​ពន្ធនាគារ​ព្រៃ​ស ឬ ម១ នឹង​ប្ដឹង​ឧទ្ធរណ៍​ប្រឆាំង​សាល​ក្រម​តុលាការ​ជាន់​ទាប ដែល​បាន​កាត់ក្ដី​ឲ្យ​លោក​មាន​ទោស និង​បាន​បង្គាប់​ឲ្យ​សង​លុយ និង​បង់​លុយ​ចូល​រដ្ឋ ច្រើន​​សែន​ដុល្លារ។ នេះ​បើ​តាម​ការ​បញ្ជាក់​ពីប្រពន្ធ​របស់លោក សួង សុភ័ណ្ឌ នៅ​ថ្ងៃ​ទី២២ កុម្ភៈ។ អ្នក​សិទ្ធិ​មនុស្ស​ថា ការ​ផ្ដន្ទា​ទោស និង​ពិន័យ​ប្រាក់​នេះ​​ ជា​រឿង​ធ្ងន់ធ្ងរ​​សម្រាប់​ លោក សួង សុភ័ណ្ឌ។

ក្រុម​គ្រួសាររបស់​លោក សួង សុភ័ណ្ឌ​ នៅ​តែ​សោកស្ដាយ ចំពោះ​ការ​សម្រេច​ក្ដី​ដោយ​អយុត្តិធម៌ នៅ​ដំណាក់កាល​សាលា​ដំបូង​រាជធានី​ភ្នំពេញ។ ប្រពន្ធ​របស់​លោក សួង សុភ័ណ្ឌ គឺ​លោកស្រី ហង្ស ផារី កំពុង​ត្រៀម​ពិភាក្សា​ជាមួយ​ប្ដី​ក្នុង​ពន្ធនាគារ​ ដើម្បី​រក​មេធាវី​​ជួយ​ការពារ​ក្ដី នៅ​ដំណាក់កាល​ឧទ្ធរណ៍​ខាង​មុខ​។

លោកស្រី​ឲ្យ​ដឹង​ថា លោកស្រី​នឹង​ដាក់​ពាក្យបណ្តឹង​ទៅ​សាលា​ឧទ្ធរណ៍ នៅ​ចុង​ខែ​កុម្ភៈ​ខាង​មុខ​នេះ ដោយសារ​លោកស្រីចាត់​ទុក​ការ​ដាក់​ទោស​ប្ដី​ថា ជា​រឿង​អយុត្តិធម៌។ លោកស្រីបន្ត​ថា គ្រួសារ​លោកស្រីគ្មាន​លទ្ធភាព​សង​លុយ​ទៅ​គណៈកម្មាធិការ​ចម្រុះ​កិច្ចការ​ព្រំដែន និង​បង់​លុយ​ពិន័យ​ចូល​រដ្ឋ ចំនួន ៥សែន​ដុល្លារ តាម​ការ​បង្គាប់​របស់​តុលាការ​ទេ។

លោកស្រី ហង្ស ផារី មិន​ទាន់​ដឹង​ពី​ស្ថានភាព​សុខទុក្ខ​របស់លោក សួង សុភ័ណ្ឌ ក្នុង​ពន្ធនាគារ​ទេ ព្រោះ​តាំង​ពី​ពេល​ប្រកាស​សាលក្រម នៅ​ថ្ងៃ​ទី១០ កុម្ភៈមក លោកស្រីមិន​ទាន់​មាន​ពេល​ទៅ​ជួប​ប្ដី​នៅ​ឡើយ​ទេ។ តែ​​ទោះ​ជា​យ៉ាង​ណា​ក្ដី លោកស្រី​នៅ​តែ​រក្សា​ជំហរ​ថា ប្ដី​របស់​លោកស្រីជាប់​ពន្ធនាគារដោយ​អយុត្តិធម៌ ដោយសារលោក​មិន​ប្រព្រឹត្តិ​កំហុស​ញុះញង់​ ដូច​ការ​ចោទ​ប្រកាន់​ទេ។ លោកស្រីថា សំណុំ​រឿង​នេះ ជា​ចេតនា​នយោបាយ​ធ្វើ​បាបលោក សួង សុភ័ណ្ឌ ហើយ​លោកស្រី​ទទូច​ដល់​រដ្ឋាភិបាល​​ឱ្យ​ដោះ​លែង​ប្ដី​លោកស្រី​វិញ «នៅ​តែ​សំណូមពរ​ដដែល ឲ្យ​ទម្លាក់​ចោល​ការ​ចោទ​ប្រកាន់។ ឲ្យ​រដ្ឋាភិបាល ក៏​ដូច​ជា លោក វ៉ា គឹមហុង ហ្នឹង គាត់​ទម្លាក់​ចោល​ការ​ចោទ​ប្រកាន់ ទម្លាក់​ចោល​ការ​សង​ជំងឺ​ចិត្ត​នេះ ព្រោះ​ខ្ញុំ​អត់​មាន​លទ្ធភាព​ទេ​ ហើយ​សុំ​ឲ្យ​គាត់​ដោះលែង​ប្ដី​ខ្ញុំ ឲ្យ​គាត់​មាន​សេរីភាព​ឡើងវិញ​ទៅ។ គាត់​អត់​មាន​ខុស​អ្វី​ទេ»

ចៅក្រម​សាលា​ដំបូង​រាជធានី​ភ្នំពេញ លោក លិ សុខា បាន​បើក​សវនាការ កាល​ពី​ថ្ងៃ​ទី១០ កុម្ភៈ កាត់​ទោស​លោក សួង សុភ័ណ្ឌ ឱ្យ​ជាប់​ពន្ធនាគារ​រយៈ​ពេល ១ឆ្នាំ​កន្លះ (២០ខែ) និង​បង្គាប់​ឱ្យ​សង​លុយ​ជំងឺ​ចិត្ត​ទៅ​គណៈកម្មាធិការ​ចម្រុះ​កិច្ចការ​ព្រំដែន​ជា​ដើម​បណ្ដឹង​ និង​បង់​ពិន័យ​ចូល​រដ្ឋ សរុប​ចំនួន ២ពាន់​លាន​រៀល ឬ​ស្មើ​នឹង ៥សែន​ដុល្លារ ក្រោម​បទ ញុះញង់ បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម ពាក់ព័ន្ធ​នឹង​បញ្ហា​ព្រំដែន នៅ​ចំណុច​ឃុំ​ត្រពាំង​ផ្លុង ខេត្ត​ត្បូងឃ្មុំ។

អាស៊ី​សេរី មិន​អាច​សុំ​ការ​បកស្រាយ​ពី​អាជ្ញាធរ​គណៈកម្មាធិការ​ចម្រុះ​កិច្ចការ​ព្រំដែន​កម្ពុជា លោក វ៉ា គឹម​ហុង និង​អ្នកស្រី កុយ ពិសី បាន​ទេ នៅ​ថ្ងៃ​ទី២២ កុម្ភៈ។ តែ​យ៉ាង​នេះ​ក្ដី អ្នកស្រី កុយ ពិសី បាន​ប្រាប់​កាសែត​ក្នុង​ស្រុក​ថា អ្នកស្រី​មិន​ធ្វើ​អត្ថាធិប្បាយ​ជុំវិញ​សេចក្ដី​សម្រេច​របស់​តុលាការ​ទេ។ ទោះ​ជា​យ៉ាង​នេះ​ក្ដី លោក​នាយក​រដ្ឋមន្ត្រី​ហ៊ុន សែន គឺ​ជា​អ្នក​បញ្ជា​ឲ្យ​នគរបាល​ទៅ​ចាប់​ខ្លួន លោក សួង សុភ័ណ្ឌ កាល​ពី​ថ្ងៃ​ទី១៤ សីហា។ លោក ហ៊ុន សែន អះអាង កាល​ពី​ពាក់​កណ្ដាល​ខែ​សីហា ឆ្នាំ២០២០ ថា ការ​ចាប់​នេះ ដោយសារលោក សួង សុភ័ណ្ឌ បាន​និយាយ​ថា ការ​ដោះដូរ​ដី​ជាមួយ​ប្រទេស​ជិត​ខាង គឺ​ជា​ទោស​ក្បត់​ជាតិ «ម្ដេច​បាន​អ្នក​ឯង​ហ៊ាន​និយាយ​ថា នេះ​គឺជា​ទោស​ក្បត់​ជាតិ? ឥឡូវ​ខ្ញុំ​ចាប់​អ្នក​ឯង បញ្ចូល​ទ្រុង អត់​ទុក​យូរ។ ការ​ពិត​ថ្ងៃ​ប្រជុំ​គណៈ​រដ្ឋមន្ត្រី ខ្ញុំ​បាន​ប្រាប់​នៅ​ក្នុង​គណៈ​រដ្ឋមន្ត្រី​ថា រង់ចាំ​មើល​នូវ​សេចក្ដី​ថ្លែងការណ៍​របស់​ប្រធាន​គណបក្ស​នយោបាយ​មួយ ដែល​គេ​នឹង​ចេញ​សេចក្ដី​ថ្លែងការណ៍។ បើ​ចេញ​សេចក្ដី​ថ្លែងការណ៍ ដូច​អ្នក​មុន ក៏​ត្រូវ​ចាប់​ដូច​អ្នក​មុន។ ប៉ុន្តែ​បែរ​ជា​ចេញ​ពី​គណៈ​រដ្ឋមន្ត្រី ខ្ញុំ​បាន​ទទួល​អា Cambodia daily វា live ជាមួយ​អា​ដែង នែ អា​ម្នាក់​ហ្នឹង។ វា​ចាត់​ទុក​ថា ការ​ដោះដូរ​ដី គឺ​ជា​ទោស​ក្បត់​ជាតិ»

ជុំវិញ​ករណី​នេះ អ្នក​ឃ្លាំមើល​សិទ្ធិ​មនុស្សរំពឹង​ថា សាលា​ឧទ្ធរណ៍នឹង​ពិចារណារឿង​ក្ដី​នេះ​ឡើងវិញ ព្រោះ​ការ​សម្រេច​ក្ដីរបស់​តុលាការ​ជាន់​ទាប គឺ​ជា​បន្ទុក​ធ្ងន់ធ្ងរ​សម្រាប់​​លោក សួង សុភ័ណ្ឌ។ នាយករង​អង្គការ​លីកាដូ ទទួល​បន្ទុក​ផ្នែក​សិទ្ធិ​មនុស្ស លោក អំ សំអាត សោកស្ដាយ ដែល​តុលាការ​​សម្រេច​ក្ដី​ធ្ងន់ធ្ងរ​លើ​ពលរដ្ឋ ដោយ​គ្រាន់​តែ​ចូល​រួម​ឈឺ​ឆ្អាលក្នុង​រឿង​សង្គម។ អ្នក​ឃ្លាំមើល​សិទ្ធិ​មនុស្ស​រូប​នេះ សង្កេត​ឃើញ​ថា ករណី​លោក សួង សុភ័ណ្ឌ គឺ​ជា​ការ​ប្រើប្រាស់​សិទ្ធិ​បញ្ចេញ​មតិ រឿង​សង្គម និង​ព្រំដែន «គ្រាន់តែ​ខ្ញុំ​បាន​លើក​ឡើង​ហើយ​ថា ករណី​នេះ វា​គ្រាន់​តែ​ជា​សិទ្ធិ​ នៅ​ក្នុង​ការ​បញ្ចេញ​មតិ និង​សិទ្ធិ​ នៅ​ក្នុង​ការ​ឈឺ​ឆ្អាល​បញ្ហា​ព្រំដែន និង​សង្គម អ៊ីចឹង​ណា។ អ៊ីចឹង​យើង​មើល​ មើល​ទិដ្ឋភាព​ទាំង​អស់​ហ្នឹង ការ​ផ្ដន្ទាទោស និង​សំណង​ហ្នឹង វា​ធ្ងន់ធ្ងរ​សម្រាប់​គាត់»

លោក សួង សុភ័ណ្ឌ ត្រូវ​បាន​សមត្ថកិច្ច​ចាប់​ខ្លួន បន្ទាប់​ពី​លោក​ចុះ​ទៅ​ពិនិត្យ​បង្គោល​ព្រំដែន នៅ​ភូមិ​ត្រពាំង​ផ្លុង ក្នុង​ខេត្ត​ត្បូងឃ្មុំ ហើយ​បាន​រក​ឃើញ​ភាព​មិនប្រក្រតី​ដូច​ការ​រក​ឃើញ​របស់​លោក រ៉ុង ឈុន ដែរ។ លើស​ពី​នេះ លោក សួង សុភ័ណ្ឌ តែងតែ​ចូលរួម​ធ្វើបាតុកម្ម​ជាមួយ​ក្រុម​យុវជន​ទាមទារ​ឱ្យ​ដោះលែង​លោក រ៉ុង ឈុន ហើយ​នៅមុន​ការ​ចាប់​ខ្លួន លោក​ថែមទាំង​មាន​គម្រោង​ដឹកនាំ​ពលរដ្ឋ​តវ៉ា​នៅ​ទីលាន​ប្រជាធិបតេយ្យ​ទៀត​ផង។

ក្រៅពី​នេះ នគរបាលក៏​​បាន​ចាប់​ខ្លួន​សកម្មជន​នយោបាយ សង្គម បរិស្ថាន អ្នក​ចម្រៀង​រិះគន់​សង្គម​ យុវជន និង​ព្រះសង្ឃ​នៃ​ក្រុម​ខ្មែរ​ថាវរៈ សរុប​ជិត ៧០នាក់ ដាក់​ពន្ធនាគារ ក្រោម​បទ​ញុះញង់​បទ​ចូល​រួម​គំនិត​ក្បត់ និង​បទ​ជេរ​ប្រមាថ​ថ្នាក់​ដឹក​នាំ​រដ្ឋាភិបាល​ជា​ដើម។ អង្គការ​ជាតិ និង​អន្តរជាតិ​រួម​ទាំង​ស្ថានទូត​ប្រទេស​ប្រជាធិបតេយ្យ​ធំៗ ព្រួយ​បារម្ភ​យ៉ាង​ខ្លាំង​អំពី​ករណី​អាជ្ញាធរ​រដ្ឋាភិបាល បន្ត​ចាប់​ខ្លួន​ពលរដ្ឋ​ឥត​ល្ហែ និង​ចោទប្រកាន់​ដោយ​គ្មាន​មូលដ្ឋាន និង​ការ​បក​ស្រាយ​ច្បាប់​តាម​ទំនើង​ចិត្ត ដើម្បី​បំបិទ​សិទិ្ធ​សេរីភាព​ជា​មូលដ្ឋាន​របស់​ពលរដ្ឋ​ក្នុង​ការ​បញ្ចេញ​មតិ និង​ចូល​រួម​ក្នុង​ការ​ដោះស្រាយ​បញ្ហា​សង្គម


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល