ស្ដាប់សេចក្ដីរាយការណ៍របស់លោក សួន សុផលមុន្នី៖
នៅខេត្តបាត់ដំបង ក្រុមអ្នកតវ៉ាបានផ្ដុំគ្នានៅក្នុងបរិវេណវត្តពោធិ៍ក្នុង ពុំបានដង្ហែក្បួននោះទេ ប៉ុន្តែបានអានសេចក្ដីថ្លែងការណ៍ថ្កោលទោស លោក កឹម សុខា លាយឡំនឹងការលើកបដាជាច្រើនផ្ទាំងមានខ្លឹមសារប្រឆាំងនឹងលោក កឹម សុខា ដែលបាននិយាយប្រមាថគុកទួលស្លែង ធ្វើឲ្យអោយប៉ះពាល់ផ្លូវចិត្ត និងអារម្មណ៍របស់ជនរងគ្រោះ៖ «សំដីដែលលោក កឹម សុខា និយាយថា គុកទួលស្លែង ជាកន្លែងសិប្បនិម្មិត ហើយថា របបកម្ពុជាប្រជាធិបតេយ្យ ជាឆាកល្ខោនដែលយួនកុម្មុយនិស្តបានរៀបចំទុកនោះ ជាពាក្យសម្ដីបង្កប់ន័យចាក់ដោត និងមានចរិតនយោបាយយង់ឃ្នងគួរឲ្យព្រឺព្រួចសាហាវជាទីបំផុតដែលសម័យនេះទៅហើយ សម័យសេរីពហុបក្ស នៅមានអ្នកនយោបាយដូចលោក កឹម សុខា បន្តយកខួរក្បាលឃាតក ប៉ុល ពត មកសាបព្រោះនៅបរិបទនយោបាយបច្ចុប្បន្នយ៉ាងដូច្នេះ»។
មេក្រុមដឹកនាំក្រុមបាតុករ លោក សាត់ សុកខុំ បញ្ជាក់ថា យើងមិនអាចបំភ្លេចបានទេអំពីទិដ្ឋភាពពិតនៃជីវិត ជាក់ស្ដែងរបស់យើងជាជនរងគ្រោះក្នុងរបបប្រល័យពូជសាសន៍ ប៉ុល ពត ទោះបីជាយើងទាំងអស់គ្នាបានខិតខំហាត់ស្ងប់ចិត្តជាយូរឆ្នាំក៏ដោយ។ មតិជាតិនិងអន្តរជាតិ ជាពិសេសអង្គជំនុំជម្រះវិសាមញ្ញក្នុងតុលាការកម្ពុជា បានទទួលស្គាល់ថា គុកទួលស្លែង ជាគុកដ៏ធំនៃរបបប្រល័យពូជសាសន៍សម្រាប់ធ្វើទារុណកម្មយ៉ាងសាហាវព្រៃផ្សៃបំផុត ប៉ុន្តែត្រូវបានលោក កឹម សុខា ចាត់ទុកថា ជាកន្លែងសិប្បនិម្មិត។
សម្ដីបែបនេះមានន័យស្មើនឹងការមាក់ងាយមិនអាចប្រកែកបានទៅលើវិញ្ញាណក្ខន្ធអ្នកស្លាប់ក្នុងរបបកម្ពុជាប្រជាធិបតេយ្យ និងពិសេសនៅគុកទួលស្លែងតែម្ដង៖ «គាត់មើលងាយដល់វិញ្ញាណក្ខន្ធជនរងគ្រោះនិងអ្នកស្លាប់ដោយត្រូវបានគេសម្លាប់នៅក្នុងគុកទួលស្លែង ក៏ដូចជនរងគ្រោះដទៃទៀតដែលបានស្លាប់នៅក្នុងរបបប្រល័យពូជសាសន៍ ប៉ុល ពត និងជនរងគ្រោះដែលមានជីវិតរស់នៅបច្ចុប្បន្ននេះផងដែរ»។
លោកស្រី សេង គឹម យ៉ុង អាយុ ៦៣ឆ្នាំ មកពីសង្កាត់អូរចារ ក្រុងបាត់ដំបង ខេត្តបាត់ដំបង ថ្លែងថា ក្រុមអ្នកតវ៉ាទាំងអស់សុទ្ធបានទាមទារឲ្យលោក កឹម សុខា ចេញមុខសុំទោសជាសាធារណៈ៖ «កើតទុក្ខមិនសុខចិត្តសុំឲ្យ កឹម សុខា ចេញមុខមកសុំទោសដល់វិញ្ញាណក្ខន្ធអ្នកដែលស្លាប់ទូទាំងប្រទេស ហើយបងប្អូនគេដែលរស់នៅសុំឲ្យកំហុសដែលគាត់បាននិយាយ អត់មានការពិតទទួលយកមិនបានទេថា គុកទួលស្លែងជាកន្លែងសិប្បនិម្មិត គុកទួលស្លែងជាកន្លែងរៀបចំឆាក មិនមែនទេ កុំអ្នកមកកុហកខ្ញុំ ខ្ញុំមិនទាន់ស្លាប់ទេ បងប្អូនមកនេះ សុទ្ធតែកើតទាន់ទាំងអស់គ្នា គ្រួសារណាមួយដែលមិនមានអ្នកស្លាប់»។
ទោះយ៉ាងគេសង្កេតឃើញថា បាតុកម្មអហិង្សានេះមានចំនួនអ្នកចូលរួមប្រហែលជាង ២០០នាក់ ខុសពីការគ្រោងទុក ដែលថា អ្នកចូលរួមនឹងមានរហូតទៅដល់ជាង ១ពាន់។ អ្នកចូលរួមតវ៉ានេះត្រូវគេដឹងថា មកពីស្រុក ក្រុងចំនួន ៥ របស់ខេត្តបាត់ដំបង។ ក្នុងនោះមានស្រុកថ្មគោល ស្រុកបាណន់ ស្រុកសង្កែ ស្រុកឯកភ្នំ និងក្រុងបាត់ដំបង។
អ្នកសម្របសម្រួលអង្គការលីកាដូ ប្រចាំខេត្តបាត់ដំបង លោក ស៊ុន តឹក ដែលបានអង្កេតតាមដានការធ្វើបាតុកម្មនេះថ្លែងថា អ្នកចូលរួមមួយចំនួនធំពុំមានកើតចេញពីចិត្តបរិសុទ្ធរបស់ខ្លួននោះទេ។
លោកសង្កត់ធ្ងន់ថា ចំនួនអ្នកចូលរួមមានថមថយ អាចបញ្ជាក់ពីការពិតបាន៖ «ការជួបជុំគ្នានៅវត្តពោធិ៍ក្នុង នេះគ្រាន់ជាការបង្គ្រប់កិច្ចរបស់មន្ត្រីចូលនិវត្តន៍មួយចំនួន គេឲ្យគាត់ធ្វើបងប្អូនមួយចំនួននៅតាមឃុំ ខ្ញុំបានចុះយកព័ត៌មានបងប្អូនដែលមកហ្នឹង គាត់ឆ្លើយថា មេភូមិ មេឃុំ ហៅឲ្យមក ហើយបើគាត់មិនមកគាត់ខ្លាចគេដែរ គាត់និយាយអ៊ីចឹង»។
នៅជុំវិញកន្លែងធ្វើបាតុកម្មគេសង្កេតឃើញកម្លាំងមានសមត្ថកិច្ចបានត្រៀមកម្លាំងប៉ូលិសដើម្បីការសន្តិសុខ យ៉ាងប្រុងប្រយ័ត្ន ព្រោះខ្លាចកើតមានអំពើហិង្សា។ ក្បួនបាតុកម្មនេះបានបញ្ចប់ទៅវិញ ក្រោយពីតំណាងក្រុមរបស់ពួកអានសេចក្ដីថ្លែងការណ៍ថ្កោលទោសលោក កឹម សុខា រួចមក។ ទោះយ៉ាងគេសង្កេតឃើញមានភ្នាក់ងាររបស់មន្ត្រីគណបក្សសង្គ្រោះជាតិ បានចូលទៅឃ្លាំងមើលបាតុកម្មនេះដែរ ប៉ុន្តែមិនបានចេញមុខចេញឲ្យគេឃើញនោះទេ។
នៅឯខេត្តប៉ៃលិន ដែលជាតំបន់សមរភូមិក្ដៅរបស់កងទ័ពខ្មែរក្រហម ក៏មានរៀបចំធ្វើបាតុកម្មប្រឆាំងទៅនឹង លោក កឹម សុខា ដូចគ្នា។
អ្នកសម្របសម្រួលសមាគមអាដហុក ប្រចាំខេត្តប៉ៃលិន អ្នកនាង ប្រាក់ សុភិម៉ា ឲ្យដឹងថា បាតុកម្មនៅខេត្តប៉ៃលិន បានធ្វើឡើងនៅក្នុងបរិវេណសាលាខេត្តតែម្ដង ហើយមានមនុស្សច្រើនពាន់នាក់ចូលរួម។ ក្នុងនោះភាគច្រើនជាសិស្សសាលា៖ «គ្រប់ភូមិស្រុកអីគេមកជួបជុំគ្នានៅសាលាខេត្ត អត់មានដង្ហែក្បួនទេ គ្រាន់តែមកជួបជុំគ្នាថ្លែងសន្ទរកថាអីអ៊ីចឹង»។
នៅខេត្តបន្ទាយមានជ័យ មិនខុសពីខេត្តប៉ៃលិន និងខេត្តបាត់ដំបងនោះទេ គឺមានបាតុកម្មដូចគ្នា។ ប៉ុន្តែចម្លែកត្រង់ថា ក្រុមបាតុករបានដើរដង្ហែក្បួនធ្វើបាតុកម្មសំដៅទៅផ្ទះសកម្មជនគណបក្សសង្គ្រោះជាតិ និងទីស្នាក់ការគណបក្សសង្គ្រោះជាតិ។
អ្នកសម្របសម្រួលសមាគមអាដហុក ប្រចាំខេត្តបន្ទាយមានជ័យ លោក ស៊ុំ ច័ន្ទគារ ថ្លែងថា រូបភាពការធ្វើបាតុកម្មនៅខេត្តបន្ទាយមានជ័យ របស់ក្រុមបាតុករ ពុំមែនសំដៅប្រឆាំងតែលោក កឹម សុខា ប៉ុណ្ណោះទេ ប៉ុន្តែបានគំរាមកំហែងដល់សកម្មជនគណបក្សសង្គ្រោះជាតិ តាមមូលដ្ឋាននានាថែមទៀត៖ «ហ្វូងបាតុករយើងឃើញថា កន្លែងខ្លះដូចជាស្រុកមង្គលបុរី គាត់បានទៅដល់ផ្ទះរបស់សកម្មជនរបស់គណបក្សសង្គ្រោះជាតិ។ ប្រជាពលរដ្ឋមួយចំនួនដែលគាត់នាំគ្នាហែទៅហ្នឹង ទៅផ្ទះតែម្ដង គាត់មានការភ័យខ្លាច គាត់មានការព្រួយបារម្ភណាស់ ព្រោះថា បុគ្គលម្នាក់គាត់អ្នកនិយាយ ហើយគាត់ជាសមាជិករបស់គណបក្សសង្គ្រោះជាតិ ព្រោះថា មនុស្សនៅក្នុងបក្សមួយ ដូចសមាជិកតូចតាចនៅស្រុកមង្គលបុរី គាត់មិនមែនជាអ្នករៀបចំឲ្យលោក កឹម សុខា និយាយទេ»។
ទាក់ទិនករណីនេះដែរ មន្ត្រីគណបក្សសង្គ្រោះជាតិ ប្រចាំខេត្តបន្ទាយមានជ័យ លោក មាន សារិទ្ធិ បានចោទថា បាតុកម្មដែលធ្វើឡើងនៅថ្ងៃទី៩ ខែមិថុនា នេះ រៀបចំឡើងដោយគណបក្សប្រជាជនកម្ពុជា៖ «នៅប៉ោយប៉ែត គេហែបាតុកម្មហ្នឹង គេបានមកដល់ទីស្នាក់ការគណបក្សសង្គ្រោះជាតិ សង្កាត់ផ្សារកណ្ដាល ហើយក្រុមបាតុកម្មគេហ្នឹង គេចូលមកគេថតដល់ក្នុងទីស្នាក់ការតែម្ដង។ ខ្ញុំយល់ឃើញថា នេះជារឿងរំលោភសិទ្ធិធ្ងន់ធ្ងរណាស់មកស្រែកជេរគណបក្សសង្គ្រោះជាតិ ហើយមកថតដល់ទីស្នាក់ការគណបក្ស។ កម្លាំងបាតុកម្មភាគច្រើនជាកម្លាំងបាតុកម្មរបស់គណបក្សប្រជាជនមកនៅពីក្រោយខ្នង»។
កន្លងទៅថ្មីៗនេះ លោកនាយករដ្ឋមន្ត្រី ហ៊ុន សែន បានព្រមាន ប្រឆាំងនឹងការថ្លែងរបស់លោក កឹម សុខា ដែលនិយាយថា គុកទួលស្លែង ជាកន្លែងសិប្បនិម្មិតរៀបចំឡើងដោយវៀតណាម។ ប៉ុន្តែលោក កឹម សុខា និងមន្ត្រីគណបក្សសង្គ្រោះជាតិ អះអាងថា រឿងនេះជាការប្រឌិត ដើម្បីកេងចំណេញខាងផ្នែកនយោបាយ ហើយការបាតុកម្មនេះត្រូវគេសង្ស័យថា គណបក្សប្រជាជនកម្ពុជា ជាអ្នករៀបចំឡើង។ យ៉ាងណាក៏លោក កឹម សុខា ធ្លាប់បានប្រកាសហើយថា លោកនឹងមិនមានអ្វីក្នុងការសុំទោស ទោះបីមានបាតុកម្មប្រឆាំងនឹងរូប លោកក្នុងទ្រង់ទ្រាយណាក៏ដោយ។ ម្យ៉ាងវិញទៀត លោក កឹម សុខា បញ្ជាក់ជំហរលោកថា នៅតែបន្តស្នាក់នៅក្នុងប្រទេសកម្ពុជា។
ចំណែកនៅឯខេត្តភាគឧត្តរ ឯណោះវិញ ប្រជាពលរដ្ឋប្រហែលជាង ១ពាន់នាក់ នាំគ្នាធ្វើបាតុកម្ម ប្រឆាំងនឹងលោក កឹម សុខា ដូចគ្នាដែរ។
ក្រុមប្រជាពលរដ្ឋមកពី ៥សង្កាត់ក្នុងទីក្រុងសៀមរាប បាននាំគ្នាដើរដង្ហែក្បួនបាតុកម្មតាមដងផ្លូវទៅជួបជុំគ្នានៅមុខទីស្នាក់ការគណបក្សសង្គ្រោះជាតិ កាលពីវេលាម៉ោងប្រមាណជាង ៨ព្រឹក ថ្ងៃអាទិត្យ ទី៩ ខែមិថុនា។
សូមស្ដាប់សេចក្ដីរាយការណ៍របស់លោក ហង្ស សាវយុត ពីខេត្តសៀមរាប៖
នៅឯខេត្តកំពង់ឆ្នាំង និងខេត្តពោធិ៍សាត់ មានការធ្វើបាតុកម្មទាមទារឲ្យលោក កឹម សុខា សុំទោសជាសាធារណៈដូចគ្នា។ តែមន្ត្រីគណបក្សជំទាស់ប្រចាំខេត្តទាំង២ បានលើកឡើងថា ការធ្វើបាតុកម្មនេះ គឺជាការរៀបចំឡើងដើម្បីកេងចំណេញខាងផ្នែកនយោបាយរបស់គណបក្សប្រជាជនកម្ពុជា។
សូមស្ដាប់សេចក្ដីរាយការណ៍របស់លោក មណ្ឌល កែវ ពីខេត្តពោធិ៍សាត់៖
រីឯនៅខេត្តក្រចេះ បាតុករប្រមាណជិត ៣០០នាក់ នៅព្រឹកថ្ងៃអាទិត្យ ទី៩ ខែមិថុនា បាននាំគ្នាហែក្បួនបាតុកម្មនាំញត្តិទៅប្រគល់ឲ្យគណបក្សសង្គ្រោះជាតិ ប្រចាំខេត្តនេះ ដើម្បីប្រឆាំងលោក កឹម សុខា ដូចគ្នា។
មន្ត្រីក្រុមការងារគណបក្សសង្គ្រោះជាតិ លោក កែវ ភីរម្យ និងជាបេក្ខជនតំណាងរាស្ត្រលំដាប់លេខរៀងទី១ សម្រាប់ការបោះឆ្នោតអាណត្តិទី៥ ប្រចាំខេត្តក្រចេះ ផ្ដល់បទសម្ភាសន៍ពីទិដ្ឋភាពបាតុកម្មនេះជាមួយអ្នកយកព័ត៌មានវិទ្យុអាស៊ីសេរី លោក រដ្ឋា វិសាល មានខ្លឹមសារដូចតទៅ៖
១-ក្រុមបាតុករឈរលើកបដាស្រែកទាមទារឲ្យលោក កឹម សុខា សុំទោសអតីតអ្នកទោសនៅគុកទួលស្លែង នៅទីលានប្រជាធិបតេយ្យ។ RFA/Van Vichar
២-ក្រុមបាតុករជួបជុំគ្នានៅទីលានប្រជាធិបតេយ្យ។ RFA/Van Vichar
៣-អតីតអ្នកទោសគុកទួលស្លែង លោក ជុំ ម៉ី ធ្វើសេចក្ដីថ្លែងការណ៍ថ្កោលទោសលោក កឹម សុខា។RFA/Van Vichar
៤-អ្នកកាសែតចូលរួមយកព័ត៌មាននៅទីលានប្រជាធិបតេយ្យ។ RFA/Van Vichar
៥-ក្រុមអ្នកចែកទឹកសុទ្ធដល់បាតុករដោយមិនគិតថ្លៃ។ RFA/Van Vichar
៦-ឡានដឹកលោក ជុំ ម៉ី ដើម្បីនាំក្បួនបាតុករទៅកាន់ទីស្នាក់ការគណបក្សសង្គ្រោះជាតិ។ RFA/Van Vichar
៧-ក្បួនដង្ហែរបស់បាតុករឆ្ពោះទៅកាន់គណបក្សសង្គ្រោះជាតិ។ RFA/Van Vichar
៨-ផ្លូវទំនប់ទួលគោក ត្រូវបានប៉ូលិសបិទចរាចរណ៍ដើម្បីសម្រួលឲ្យក្បួនបាតុករធ្វើដំណើរ។ RFA/Van Vichar
៩-ម៉ូតូរបស់ក្រុមបាតុករ ត្រូវប៉ូលិសឃាត់នៅក្បែរទីស្នាក់ការគណបក្សសង្គ្រោះជាតិ។ RFA/Van Vichar
១០-បាតុករប្រឆាំងលោក កឹម សុខា ជួបជុំគ្នានៅសួនមាត់ទន្លេ ក្រុងតាខ្មៅ។ RFA/Leng Maly
១១-បាតុករកាន់បដាថ្កោលទោស លោក កឹម សុខា នាក្រុងតាខ្មៅ។ RFA/Leng Maly
១២-ក្រុមបាតុករបន្ទាប់ពីបាតុកម្មរួច ត្រូវគេចែកអាវនិងមួកគណបក្សប្រជាជនកម្ពុជា។ RFA/Leng Maly
១៣-បាតុករកាន់បដាថ្កោលទោសលោក កឹម សុខា ឈរខាងមុខវត្តចាក់អង្រែក្រោម។ RFA/Leng Maly
១៤-ពលរដ្ឋអង្គុយកាន់បដា នៅក្នុងបរិវេណវត្តពោធិ៍ក្នុង ក្រុងបាត់ដំបង ដើម្បីធ្វើបាតុកម្មអហិង្សាតវ៉ាប្រឆាំងលោក កឹម សុខា។ RFA/Soun Sophalmony
១៥-ពលរដ្ឋអង្គុយកាន់បដា នៅក្នុងបរិវេណវត្តពោធិ៍ក្នុង ក្រុងបាត់ដំបង ដើម្បីធ្វើបាតុកម្មអហិង្សាតវ៉ាប្រឆាំងលោក កឹម សុខា។ RFA/Soun Sophalmony
១៦-តំណាងបុគ្គលិកសិក្សានៃមន្ទីរអប់រំខេត្តរតនគិរី អានញត្តិថ្កោលទោសលោក កឹម សុខា នាទីលានបាល់ទាត់ក្នុងក្រុងបានលុង។ RFA/Ratha Visal
១៧-បាតុករជួបជុំគ្នានៅទីលានបាល់ទាត់ខេត្តរតនគិរី ធ្វើបាតុកម្មប្រឆាំងលោក កឹម សុខា។ RFA/Ratha Visal
១៨-បាតុករជួបជុំគ្នានៅទីលានបាល់ទាត់ខេត្តរតនគិរី ធ្វើបាតុកម្មប្រឆាំងលោក កឹម សុខា។ RFA/Ratha Visal
១៩-កម្មករចម្ការកៅស៊ូ ពលរដ្ឋ និងមន្ត្រីអាជ្ញាធរមូលដ្ឋានសង្កាត់កាចាញ ហែក្បួនបាតុកម្មទៅជួបជុំគ្នានៅទីលានបាល់ទាត់ខេត្ត ដើម្បីប្រឆាំងលោក កឹម សុខា។ Ratha Visal
២០-ក្រុមបាតុករប្រមូលផ្ដុំគ្នានៅមុខទីស្នាក់ការគណបក្សសង្គ្រោះជាតិ នាក្រុងសៀមរាប។ RFA/Hang Savyouth
២១-ក្រុមបាតុករដែលមានអ្នកដឹកនាំដើរដង្ហែក្បួនចេញពីតាមសង្កាត់ នៅក្នុងក្រុងសៀមរាប ស្រែកប្រឆាំងលោក កឹម សុខា។ RFA/Hang Savyouth
២២-កម្លាំងកងរាជអាវុធហត្ថ ត្រូវបានដាក់ការពារនៅមុខទីស្នាក់ការគណបក្សសង្គ្រោះជាតិ ខេត្តសៀមរាប នៅពេលដែលក្រុមបាតុករនាំគ្នាដង្ហែក្បួនទៅស្រែកនៅមុខទីស្នាក់ការនោះ។ RFA/Hang Savyouth
២៣-ក្រុមបាតុករដែលមកពីសង្កាត់សៀមរាប មួយក្រុម នាំគ្នាត្រឡប់ទៅវិញ បន្ទាប់ស្រែកប្រឆាំងនៅមុខទីស្នាក់ការគណបក្សសង្គ្រោះជាតិ ប្រហែល ១ម៉ោង។ RFA/Hang Savyouth
២៤-ក្រុមបាតុករប្រមូលផ្ដុំនៅមាត់ស្ទឹងពោធិ៍សាត់ មុនដង្ហែទៅទីស្នាក់ការគណបក្សសង្គ្រោះជាតិ។ RFA/Mondul Keo
២៥-បាតុករនៅពោធិ៍សាត់ កំពុងស្រែកទាមទារឲ្យលោក កឹម សុខា សុំទោស។ RFA/Mondul Keo
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។