ទស្សនៈ​ពលរដ្ឋ និង​អ្នក​ឃ្លាំ​មើល ជុំវិញ​ខួប ៤ឆ្នាំ​នៃ​ការ​ចាប់​ឃុំ​ខ្លួន​លោក កឹម សុខា

ដោយ សុជីវី
2021-09-02
Share
ទស្សនៈ​ពលរដ្ឋ និង​អ្នក​ឃ្លាំ​មើល ជុំវិញ​ខួប ៤ឆ្នាំ​នៃ​ការ​ចាប់​ឃុំ​ខ្លួន​លោក កឹម សុខា (ឆ្វេង) លោក កឹម សុខា ប្រធានគណបក្ស​សង្គ្រោះ​ជាតិ ពេល​អាជ្ញាធរ​ចាប់ខ្លួន​ទាំង​កណ្ដាល​អាធ្រាត្រ​ ​ថ្ងៃ​ទី៣ ខែ​កញ្ញា ឆ្នាំ២០១៧។
រូប៖ ហ្វេសប៊ុកលោក កឹម សុខា

ប្រជាពលរដ្ឋ និង​អ្នក​ឃ្លាំមើល​សង្គម នៅតែ​ចាត់​ទុក​ថា ករណី​ឃុំខ្លួន និង​ដកហូត​សិទ្ធិ​នយោបាយ​របស់​លោក កឹម សុខា រយៈពេល ៤ឆ្នាំ​មកនេះ គឺ​ជា​រឿង​នយោបាយ ទោះបីជា​របប​ក្រុង​ភ្នំពេញ ​ព្យាយាម​ការពារ​ចំណាត់​ការ​នេះ​ថា ​ការ​ជា​ការ​អនុវត្ត​ច្បាប់​ក្ដី។ ពួក​គាត់​យល់ថា ​ការដែល​របប​លោក ​ហ៊ុន សែន ​បង្កើត​លេស​ធ្វើបាប​លោក កឹម សុខា ដើម្បី​រក្សា​អំណាច​នេះ នឹង​កាន់តែ​ធ្វើឲ្យ​កម្ពុជា​ជួប​គ្រោះ​ធំ​ដូច​ជា​ការ​ទទួល​រង​ទណ្ឌកម្ម​សេដ្ឋកិច្ច​បន្ថែម​ទៀត និង​ការ​បែក​បាក់​ជាតិ​ធ្ងន់ធ្ងរ។

ប្រជាពលរដ្ឋ​ដែល​គាំទ្រ​គណបក្ស​សង្គ្រោះ​ជាតិ នៅ​តែ​បន្ត​ទាមទារ​ឲ្យ​របប​លោក ហ៊ុន សែន ផ្តល់​សិទ្ធិ​សេរីភាព​ពេញលេញ​ជូន​លោក កឹម សុខា និង​ឲ្យ​គណបក្ស​សង្គ្រោះ​ជាតិ​ដំណើរ​ការ​ឡើងវិញ​ ដើម្បី​ផល​ប្រយោជន៍ជាតិ និង​ប្រជាពលរដ្ឋ។ ការ​ទាមទារ​នេះ ​ធ្វើ​ឡើង​ចំ​ខួប ៤ឆ្នាំ​នៃ​ការ​ចាប់​ឃុំ​ខ្លួន​ និង​ការ​ដកហូត​សិទ្ធិ​សេរីភាព​របស់​មេ​បក្ស​ប្រឆាំង​ដ៏​មាន​ថ្វី​មាត់​រូប​នេះ។

អ្នកគាំទ្រ​គណបក្ស​សង្គ្រោះ​ជាតិ​ម្នាក់​រស់​នៅ​ខេត្ត​កំពត ​លោក ស៊ុម ចំណាន ​ថ្លែង​ថា ​ចំណាត់​ការ​លើ​លោក ​កឹម សុខា ៤ឆ្នាំ​មក​នេះ គឺ​ជា​រឿង​អយុត្តិធម៌​បំផុត​សម្រាប់​គាត់ ​ព្រោះ​ការ​ចោទ​ប្រកាន់​នេះ ​គ្មាន​មូលដ្ឋាន​ និង​អូស​បន្លាយ​ពេល​ក្នុង​ការ​រក​ដំណោះ​ស្រាយ​ជា​បន្តបន្ទាប់។ លោកយល់​ថា​ ប្រសិន​បើ​​រដ្ឋាភិបាល នៅ​តែ​ដកហូត​សិទ្ធិ​នយោបាយ​របស់​លោក កឹម សុខា មិន​ឲ្យ​ចូល​រួមការ​បោះឆ្នោត​ឆ្នាំ​​២០​២២ និង​ឆ្នាំ២០២៣ ខាងមុខ​នេះ​ សហគមន៍​ជាតិ និង​អន្តរជាតិ នឹង​មិន​ទទួល​ស្គាល់​លទ្ធផល​បោះ​ឆ្នោត​ដូច​កាល​ពី​ឆ្នាំ២០១៨ ហើយ​នឹង​ដាក់ទណ្ឌកម្ម​សេដ្ឋកិច្ច​លើ​កម្ពុជា​បន្ថែម​ទៀត៖ «ជុំវិញ​រឿង​ដែល​ឲ្យ​តុលាការ​ចោទប្រកាន់​ហើយ​ឲ្យ​កង​កម្លាំង​ទៅ​ចាប់​លោក​ប្រធាន កឹម សុខា រយៈ​ពេល ៤ឆ្នាំ​មក​នេះ ខ្ញុំ​គិត​ថា វា​ជា​រឿង​អយុត្តិធម៌ ព្រោះ​រយៈ​ពេល ៤ឆ្នាំ​ហើយ តុលាការ​មិនទាន់​រក​ភស្តុតាង និង​អង្គហេតុ​ណា​មួយ បញ្ជាក់​ថា គាត់​ក្បត់​ជាតិ​នៅ​ឡើយ។ ខ្ញុំ​សុំ​ឲ្យ​តុលាការ​ពន្លឿន​នីតិវិធី​នៃ​ការ​ដោះ​ស្រាយ»

ជាមួយ​គ្នា​នេះ សកម្មជន​គណបក្ស​សង្គ្រោះ​ជាតិ​នៅ​ខេត្ត​កំពង់ចាម លោក​ស្រី គិន ស្រីអូន នៅ​តែ​ចាត់​ទុក ចំណាត់​ការ​លើ​លោក កឹម សុខា ៤ឆ្នាំមកនេះ គឺ​ជា​ល្បិច​កល​នយោបាយ​របស់​គណបក្ស​កាន់​អំណាច ដើម្បី​រារាំង​មេ​បក្ស​ប្រឆាំង​រូប​នេះ​មិន​ឲ្យ​ធ្វើ​នយោបាយ ព្រោះ​ខ្លាច​ចាញ់​ឆ្នោត។ លោក​ស្រីយល់​ថា លោក ​កឹម សុខា ​គួរតែ​រើ​បម្រះ​ដើម្បី​ដាក់​សម្ពាធ​ឲ្យ​របប​លោក ហ៊ុន សែន ប្រគល់​សេរីភាព​ពេញ​លេញ​​ជូន​លោក​វិញ ព្រោះ​លោកស្រី​ថា​វិធី​រក្សា​ភាព​ស្ងៀម​ស្ងាត់​របស់​លោក​សព្វថ្ងៃ​ ដើម្បី​រង់ចាំ​ក្ដី​សណ្ឋិត​ពី​ជន​ផ្ដាច់ការ​នោះ ទំនង​ជា​មិន​បាន​ផល​ឡើយ៖ «ទស្សនៈ​ខ្ញុំ បើ​ខ្ញុំ​ជា​គាត់​វិញ​ ខ្ញុំ​មិន​អាច​នៅ​ស្ងៀម​ទេ ត្រូវ​រើ​បម្រះ​ដើម្បី​រក​វិធី​អី​ឲ្យ​មាន​ដំណោះ​ស្រាយ​ ដើម្បី​កុំឲ្យ​ប្រជាពលរដ្ឋ​បាក់ទឹកចិត្ត។ បើ​និយាយ​ពី​រឿង​ច្បាប់​នៅ​ស្រុក​ខ្មែរ​វិញ ​យើង​នៅ​ស្ងៀម​ក៏​ងាប់ រើ​បម្រះ​ក៏​ងាប់ ដូច្នេះ​សុខ ចិត្ត​រើ​បម្រះ​វិញ។ បើ​យើង​មិន​ធ្វើ​សកម្មភាព​អី​មួយ​ផង ​ម៉េច​គេ​ដាក់​ពាន​យក​មក​ឲ្យ​យើង»

អាជ្ញាធរ​របប​លោក ហ៊ុន សែន សម្រុក​ចូល​ចាប់​ខ្លួន​លោក កឹម សុខា ទាំង​កណ្ដាល​អាធ្រាត្រ​ ឈាន​ចូល​ថ្ងៃ​ទី៣ កញ្ញា ឆ្នាំ២០១៧ ក្នុង​ពេល​លោក​កំពុង​មាន​អភ័យ​ឯក​សិទ្ធិ​សភា។ តុលា​ការបាន​ចោទប្រកាន់​លោក​ពី​បទ​ ត្រូវរ៉ូវ​គ្នា​ជាមួយ​បរទេស​ ដើម្បី​ផ្ដួល​រំលំ​រដ្ឋាភិបាល​ និង​បាន​ឃុំខ្លួន​លោក​ក្នុង​ពន្ធនាគារ​ត្រពាំង​ផ្លុង​ជិត​ព្រំដែន​វៀតណាម​ ជាង​១ឆ្នាំ ​និង​បន្ត​ឃុំ​ខ្លួន​ក្នុង​ផ្ទះ​របស់​លោក​មួយ​ឆ្នាំ​ទៀត។ ក្រោយ​ពី​មាន​សម្ពាធ និង​ការ​រិះគន់​ពី​សហគមន៍​ជាតិ និង​អន្តរជាតិ​ជា​បន្ត​បន្ទាប់​នោះ​ តុលាការ​ក្រុង​ភ្នំពេញ​ បាន​អនុញ្ញាត​ឱ្យ​លោក អាច​ធ្វើដំណើរ​ក្នុង​ប្រទេស ប៉ុន្តែ​មិន​ឱ្យ​ចាក​ចេញ​ពី​កម្ពុជា​ឡើយ ហើយ​ក៏​មិន​ឲ្យ​លោក​ធ្វើសកម្មភាព​នយោបាយ​ដែរ។

សហ​មេធាវី​ការពារ​ក្ដី​ឱ្យ​លោក កឹម សុខា គឺ​លោក ផែង ហេង ថ្លែង​ថា មូលហេតុ​ដែល​លោក កឹម សុខា ​មិន​ធ្វើ​សកម្មភាព​នយោបាយ និង​មិន​បញ្ចេញ​យោបល់ ចំពោះ​ការ​បង្កើត​បក្ស​ថ្មី​ដោយ​ក្រុម​អតីត​មន្ត្រី​បក្ស​សង្គ្រោះ​ជាតិ​នោះ ព្រោះ​មាន​បម្រាម​ពី​តុលាការ ព្រម​ទាំង​ចង់​បង្ហាញ​ថា លោក​ជា​មនុស្ស​ស្អាតស្អំ ​មិនមែន​ជា​អ្នក​បំពាន​ច្បាប់​ដូច​ការ​ចោទប្រកាន់​នោះ​ទេ។ ជុំវិញ​រឿង​ថា តើ​លោក កឹម សុខា អាច​ចូលរួម​បាន ឬ​មិន​បាន​ក្នុង​ការ​បោះឆ្នោត​នា​ពេល​ខាងមុខ​នោះ​វិញ មេធាវី ផែង ហេង បញ្ជាក់​ថា រឿង​នេះ គឺ​អាស្រ័យ​លើ​គណបក្ស​កាន់​អំណាច ព្រោះ​សំណុំ​រឿង​កូន​ក្តី​លោក​នេះ ជា​ប្រភេទ​សំណុំ​រឿង​នយោបាយ៖ «បោះឆ្នោត​២០២២ ​និង​២០២៣ នេះ ធម្មតា គាត់​ចង់​ចូល រួម​ហើយ​ជីវភាព​នយោបាយ​តទៅទៀត ព្រោះ​គាត់​អ្នក​នយោបាយ។ ប៉ុន្តែ​ការ​ចូលរួម បាន​ឬ​មិនបាន​ គឺ​មកទល់​ពេលនេះ ​យើង​មើល​ឃើញ​គ្រប់​គ្នា​ថា បាល់​វា​នៅ​លើ​ជើង របស់​គណបក្ស​កាន់​អំណាច​ថា ​គណបក្ស​កាន់​អំណាច​ចង់​ប្រកួត​តាម​បែប​ប្រជាធិបតេយ្យ សេរី ពហុបក្ស ក្នុង​កម្រិត​ណា។ បើ​សិន​ចង់​ប្រកួត​ឲ្យ​ពេញលេញ​ មាន​ការ​ទទួល​ស្គាល់​ជា​អន្តរជាតិ ហើយ​ដើម្បី​ជា​ពេញ​មុខ​ពេញមាត់​ជា​កីឡាករ​អាជីព ដូច្នេះ​គាត់​ត្រូវ​ពិចារណា ដើម្បី​បើក​លំហ​ប្រជាធិបតេយ្យ​ឡើងវិញ»

ឆ្លើយតប​ចំពោះ​រឿង​នេះ អ្នក​នាំ​ពាក្យ​គណបក្ស​ប្រជាជន​កម្ពុជា ​លោក​ សុខ ឥសាន នៅតែ​លើក​ឡើង​ថា ករណី​លោក កឹម សុខា គឺ​ជា​ការ​អនុវត្ត​ច្បាប់ ហើយ​ការ​អូស​បន្លាយ​ពេល​នៃ​សំណុំ​រឿង​នេះ​យូរ ឬ​ឆាប់ គឺ​អាស្រ័យ​លើ​នីតិវិធី​របស់​តុលាការ។ ទន្ទឹម​គ្នា​នេះ លោក​បញ្ជាក់​ថា គណបក្ស​កាន់​អំណាច នៅ​តែ​រក្សា​ជំហរ​មិន​ចរចា​ជា​មួយ​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​រួច​ហើយ​នោះ​ទេ៖ «ចំពោះ​មតិ​ថា រឿង កឹម សុខា ជា​រឿង​នយោបាយ មិន​មែន​ទើប​តែ​ថា​ទេ គឺ​ថា រាប់​ឆ្នាំ​មក​ហើយ។ ដូច្នេះ​ខ្ញុំ​ថា នេះ​ជា​មតិ​របស់​ឯកជន​ម្នាក់ៗ ប៉ុណ្ណោះ មិន​អាច​យក​ជា​បាន​ការ​ទេ ទោះបី​ចេញ​ពី​អ្នកវិភាគ​ក៏ដោយ ​ចេញ​ពី​ប្រព័ន្ធ​ផ្សព្វ​ផ្សាយ​ណា​ក៏​ដោយ ក៏​មិន​អាច​យក​ជា​បាន​ការ​ដែរ។ ទី២ ករណី កឹម សុខា នេះ វា​ជា​រឿង​ផ្លូវ​ច្បាប់ តែ​វា​ផ្សារ​ភ្ជាប់​សកម្មភាព​រំលោភ​គោល​ការណ៍​លទ្ធិ​ប្រជាធិបតេយ្យ និង​នីតិរដ្ឋ​របស់​អ្នក​នយោបាយ​ ដូច្នេះ​ហើយ​បាន​ជា​ជាប់​ពិរុទ្ធភាព»

ផ្ទុយ​ពី​ការ​លើកឡើង​នេះ សហគមន៍​ជាតិ និង​អន្តរជាតិ ចាត់​ទុក​ថា សំណុំ​រឿង​មេ​បក្ស​ប្រឆាំង​រូប​នេះ គឺ​ជា​សំណុំ​រឿង​នយោបាយ​ដែល​កាត់​ក្ដី​ដោយ​តុលាការ​ដែល​ស្ថិត​ក្រោម​ឥទ្ធិពល​របស់​​គណបក្ស​កាន់​អំណាច និង​ការ​បង្គាប់​បញ្ជា​របស់​លោក ហ៊ុន សែន។

តុលាការ​ក្រុង​ភ្នំពេញ​បាន​ពន្យារពេល​សវនាការ​រឿង​ក្ដី​លោក កឹម សុខា តាំង​ខែមីនា ឆ្នាំ២០២០ រហូត​មក ទោះ​ជា​ក្រុម​មេធាវី​មេ​បក្ស​ប្រឆាំង​រូប​នេះ ដាក់​សំណើ​សុំ​ពន្លឿន​ជា​ច្រើន​លើក​យ៉ាង​ណា​ក្តី។ប្រធាន​តុលាការ​ក្រុង​ភ្នំពេញ​លោក តាំង ស៊ុនឡាយ ធ្លាប់​បាន​លើក​ឡើង​ថា សំណុំ​រឿង​នេះ​មិន​មែន​ជា​អាទិភាព​សម្រាប់​តុលាការ​ឡើយ​ពី​ព្រោះ​លោក កឹម សុខា ស្ថិត​នៅ​ក្រៅ​ឃុំ។ ជំហរ​បែប​នេះ​របស់​តុលាការ គឺ​ស្រប​ទៅ​នឹង​ការ​ចង់​បាន​របស់​លោក​នាយក​រដ្ឋមន្ត្រី ហ៊ុន សែន ដែល​ចង់​ឱ្យ​សំណុំ​រឿង​នេះ​ដំណើរ​ការ​នៅ​ក្រោយ​ការ​បោះ​ឆ្នោត​ឆ្នាំ២០២២ និង​២០២៣ ខាង​មុខ។ ម្យ៉ាងវិញទៀត មេ​ដឹក​នាំ​របប​ក្រុងភ្នំពេញ និង​តុលាការ​ បាន​ចោទ​ប្រកាន់​លោក កឹម សុខា ពេញៗ មាត់​ថា ប្រព្រឹត្ត​អំពើ​ក្បត់​ជាតិ ឬ​ត្រូវរ៉ូវ​គ្នា​ជាមួយ​បរទេស» ដើម្បី​ផ្ដួល​រំលំ​រដ្ឋាភិបាល​របស់​លោក​នាយក​រដ្ឋ​មន្ត្រី ហ៊ុន សែន ដោយ​មាន​អាមេរិក​ជា​អ្នក​នៅ​ពី​ក្រោយ​ខ្នង​ផង​ដែរ។ប៉ុន្តែ​រយៈ​ពេល ៤ឆ្នាំ​មក​នេះ ទាំង​លោក ហ៊ុន សែន និង​តុលាការ​របស់​លោក មិន​បាន​បង្ហាញ​ភស្តុតាង​រឹងមាំ ដែល​គាំទ្រ​ដល់​ការ​ចោទ​ប្រកាន់​លោក កឹម សុខា នោះ​ឡើយ។ អាជ្ញាធរ​ប្រើ​តែ​វីដេអូ​ឃ្លីប​មួយ​ដែល​លោក កឹម សុខា បាន​ថ្លែង​​អំពី​ការ​តស៊ូ​របស់​លោក​ដើម្បី​លទ្ធិ​ប្រជាធិបតេយ្យ​នៅ​កម្ពុជា ដើម្បី​ដាក់​បន្ទុក​លោក​តែ​ប៉ុណ្ណោះ។

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត សេង សារី មាន​ប្រសាសន៍​ថា​ ការ​ចោទ​ប្រកាន់ ​និង​ការ​ពន្យារ​ពេល​កាត់​ក្ដី​សំណុំ​រឿង​លោក កឹម សុខា កន្លងមក​នេះ តុលាការ​គ្មាន​មូលដ្ឋាន​ច្បាប់​ច្បាស់​លាស់​នោះ​ទេ។ លោក​ទទួល​ស្គាល់​ថា សំណុំ​រឿង​របស់​លោក កឹម សុខា ជា​សំណុំ​រឿង​នយោបាយ​ ដូច្នេះ​ប្រសិន​បើ​អ្នក​នយោបាយ ពិត​ជា​ធ្វើ​នយោបាយ ដើម្បី​ផល​ប្រយោជន៍​ជាតិ​ពិតមែន​នោះ ល្មម​ដល់​ពេល​ចរចា​គ្នា​បញ្ចប់​ជម្លោះ​នយោបាយ​ឲ្យបាន​មុន​ការ​បោះឆ្នោត​ឆ្នាំ២០២២ និង​ឆ្នាំ២០២៣ ដើម្បី​បញ្ចៀស​ទណ្ឌ​កម្ម​សេដ្ឋកិច្ច​ពី​អន្តរជាតិ៖ «ប្រសិន​បើ​ករណី​របស់​លោក កឹម សុខា បន្ត ខ្ញុំ​គិត​ថា ផល​ប៉ះពាល់​ពី​គំនាប​សង្កត់​របស់​អន្តរជាតិ ក៏​នៅតែ​បន្ត​ដែរ។ យើង (រដ្ឋាភិបាល) កាន់​តែ​រឹប គឺ​អន្តរជាតិ​កាន់​តែ​រឹប​ដែរ។ និយាយ​បែបនេះ ​មិនមែន​ថា យើង​ពឹង​លើ​អន្តរ​ជាតិ​ទេ ប៉ុន្តែ​រាល់​ថ្ងៃ​នេះ យើង​អត់​មាន​យន្តការ​អី ក្រៅពី​យន្តការ​អន្តរជាតិ​ទេ ដោយសារ​រដ្ឋាភិបាល គ្រប់គ្រង​យន្តការ​អស់ហើយ​ទាំង​តុលាការ និង គ..ប អី​ហ្នឹង ហើយ​គណបក្ស​សង្គ្រោះ​ជាតិ ត្រូវ​បាន​រំលាយ​ទៅ​ទៀត អ្នក​នយោបាយ និង​អ្នកគាំទ្រ​នយោបាយ​ជាង​កន្លះ​ប្រទេស​ គឺ​អត់​មាន​សិទ្ធិ​សេរីភាព​ទេ។ ដូច្នេះ​ផល​ប៉ះពាល់​នៃ​បរិយាកាស​នយោបាយ​នេះ អាច​ប៉ះពាល់​សេដ្ឋកិច្ច​កម្ពុជា​ខ្លាំង​ណាស់​ អំឡុង​ពេល​កម្ពុជា ក៏​ប្រឈម​រឿង​កូវីដ និង​បាត់បង់ EBA ផង»

កន្លង​មក បើ​ទោះ​បី​ជា​លោក កឹម សុខា មិន​បាន​ធ្វើ​សកម្មភាព​នយោបាយ​ក្ដី ក៏​លោក​តែង​ចុះ​តាម​បណ្តា​ខេត្ត ដើម្បី​ចែក​អំណោយ​ជូន​ប្រជាពលរដ្ឋ​ក្រីក្រ។ ជាមួយ​គ្នា​នេះ លោក​បាន​ជួប​ពិភាក្សា​អំពី​បញ្ហា​ប្រទេស​ជាតិ​ជាមួយ​អង្គទូត​ប្រទេស​ប្រជាធិបតេយ្យ​ធំៗ ដូច​ជា សហរដ្ឋ​អាមេរិក​បារាំង  អាល្លឺម៉ង់ អង់គ្លេស ​សហ​ភាព​អឺរ៉ុប ​អូស្ត្រាលី និង​ជប៉ុន​ជា​ដើម។ តំណាង​រដ្ឋាភិបាល​នៃ​ប្រទេស​សេរី​ធំៗ ទាំង​នោះ ​តែង​ជំរុញ​ដល់​រដ្ឋាភិបាល​លោក ហ៊ុន សែន ទម្លាក់​បទ​ចោទ​និង​ផ្ដល់​សេរីភាព​ឱ្យ​បាន​ពេញ​លេញ​ជូន​លោ​ក កឹម សុខា វិញ ព្រោះ​ពួកគេ ​ជឿជាក់ លោក​ កឹម សុខា ​ជា​បុគ្គល​ស្អាតស្អំ និង​រង​ការ​ចោទ​ប្រកាន់​ដោយ​អយុត្តិធម៌។ ក្រុម​ប្រទេស​ទាំង​នោះ​ស្នើ​យ៉ាង​ទទូច​ដល់​រដ្ឋាភិបាល​លោក ហ៊ុន សែន ឱ្យ​គោរព​សិទ្ធិមនុស្ស បញ្ឈប់​ការ​បង្ក្រាប​លើ​សំឡេង​ប្រឆាំង និង​សំឡេង​ឯករាជ្យ ព្រម​ទាំង​អនុវត្ត​តាម​គោល​ការណ៍​លទ្ធិប្រជាធិបតេយ្យ​ ដូច​ដែល​មាន​ចែង​ក្នុង​រដ្ឋធម្មនុញ្ញ​កម្ពុជា ពីព្រោះ​មាន​តែ​ការ​ធ្វើ​បែប​នេះ​ទេ ​ទើប​កម្ពុជា​អាច​ទទួល​បាន​ផល​ប្រយោជន៍​ផ្នែក​សេដ្ឋកិច្ច ពាណិជ្ជកម្ម និង​អភិបាលកិច្ច​ពី​ពួក​គេ​បន្ត​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល