ពាក់ព័ន្ធនឹងក្រុមប្រឹក្សាធម្មនុញ្ញ និងគណៈកម្មាធិការជាតិរៀបចំការបោះឆ្នោត (គ.ជ.ប) ដែលបានបដិសេធការចុះឈ្មោះបោះឆ្នោតសកលរបស់គណបក្សភ្លើងទៀននេះ រដ្ឋាភិបាលនៃប្រទេសប្រជាធិបតេយ្យជាច្រើន បានចេញសេចក្តីថ្លែងការណ៍ជាបន្តបន្ទាប់ បង្ហាញពីក្តីបារម្ភ និងខកចិត្ត ចំពោះលទ្ធិប្រជាធិបតេយ្យនៅកម្ពុជា។
រដ្ឋាភិបាលជប៉ុន លើកឡើងថា ជប៉ុនកំពុងពិនិត្យតាមដានដោយយកចិត្តទុកដាក់ពីស្ថានការណ៍នយោបាយនៅកម្ពុជា នៅមុនការបោះឆ្នោតជាតិនៅខែកក្កដាខាងមុខ។ ស្ថានទូតជប៉ុន បញ្ជាក់ថា ក្នុងមាគ៌ានៃការកសាងសង្គមប្រជាធិបតេយ្យល្អ គឺវាជាការចាំបាច់ណាស់ ដែលរដ្ឋាភិបាលត្រូវបង្កើតឲ្យមានបរិយាកាសល្អ ដែលអាចឲ្យពលរដ្ឋគ្រប់រូបបញ្ចេញមតិផ្សេងៗគ្នា។
រដ្ឋាភិបាលជប៉ុន គាំទ្រលទ្ធិប្រជាធិបតេយ្យនៅកម្ពុជា តាមរយៈកិច្ចសន្ទនា ជាមួយរដ្ឋាភិបាលកម្ពុជា គណបក្សកាន់អំណាច និងគណបក្សប្រឆាំង អង្គការសង្គមស៊ីវិល និងគ្រប់ភាគីពាក់ព័ន្ធទាំងអស់ ដោយបានបញ្ចេញទស្សនៈដោយស្មោះត្រង់ និងផ្តល់ជំនួយដល់កម្ពុជាជាបន្តបន្ទាប់។ ការអភិវឌ្ឍលទ្ធិប្រជាធិបតេយ្យនៅកម្ពុជា មានសារៈសំខាន់ណាស់សំរាប់ប្រទេសមួយនេះ និងសំរាប់បណ្តាប្រទេសក្នុងតំបន់ព្រមទាំងសហគមន៍អន្តរជាតិ។
ចំណែករដ្ឋាភិបាលអង់គ្លេស (British) វិញ ក៏បានបង្ហាញជំហរខកចិត្តជាខ្លាំង ដែលគណបក្សភ្លើងទៀន មិនអាចចូលរួមប្រកួតប្រជែងការបោះឆ្នោតជាតិ នៅខែកក្កដាខាងមុខ។
អ្នកនាំពាក្យស្ថានទូតអង់គ្លេសប្រចាំកម្ពុជា លោកគ្រិស្ត វីលៀមសុន (Chris Williamson) ប្រាប់វិទ្យុអាស៊ីសេរី តាមអ៊ីមែលនៅថ្ងៃទី ២៦ ខែឧសភាថា រដ្ឋាភិបាលអង់គ្លេស មិនគាំទ្របុគ្គលនយោបាយណាមួយនោះឡើយ ប៉ុន្តែយើងគាំទ្រដល់ពលរដ្ឋកម្ពុជា និងនៅតែមានក្តីសង្ឃឹមមុតមាំថា ប្រជាពលរដ្ឋមានសិទ្ធិជ្រើសរើសគណបក្សនយោបាយដែលខ្លួនពេញចិត្ត។ ការសម្រេចចិត្តរបស់ក្រុមប្រឹក្សាធម្មនុញ្ញនិងគណៈកម្មាធិការជាតិរៀបចំការបោះឆ្នោត ដែលបដិសេធការចុះឈ្មោះបោះឆ្នោតរបស់គណបក្សភ្លើងទៀន គឺជាការបិទសិទ្ធិសេរីភាពនិងជម្រើសរបស់ពលរដ្ឋម្ចាស់ឆ្នោត។
ស្ថានទូតអង់គ្លេស និងបន្តធ្វើការជាមួយរដ្ឋាភិបាលកម្ពុជា គណបក្សប្រឆាំង និងអង្គការសង្គមស៊ីវិល ដើម្បីលើកស្ទួយលទ្ធិប្រជាធិបតេយ្យ នៅកម្ពុជា។
នៅទន្ទឹមនេះដែរ រដ្ឋាភិបាលអូស្ត្រាលី ក៏បានបង្ហាញជំហរព្រួយបារម្ភជាខ្លាំង ដែលគណបក្សភ្លើងទៀន ជាគណបក្សប្រឆាំងមួយនេះ មិនអាចចុះបញ្ជីឈរឈ្មោះសម្រាប់ការបោះឆ្នោតជ្រើសរើសតំណាងរាស្ត្រនាពេលខាងមុខ។
អូស្ត្រាលីនៅតែជាអ្នកគាំទ្រលទ្ធិប្រជាធិបតេយ្យ និងការអភិវឌ្ឍនៅកម្ពុជា។ លទ្ធិប្រជាធិបតេយ្យសេរីពហុបក្ស តម្រូវឲ្យមានលំហនយោបាយ ការគោរពច្បាប់ និងស្ថាប័នរដ្ឋនានា ត្រូវអនុញ្ញាតឲ្យគណបក្សគ្រប់នយោបាយ ចូលរួម និងប្រកួតប្រជែងដោយយុត្តិធម៌នៅថ្ងៃបោះឆ្នោតជាតិនៅខែកក្កដាខាងមុខ។ ប្រការដែលគណបក្សណាមួយ មិនអាចចុះបញ្ជីឈរឈ្មោះសម្រាប់ការបោះឆ្នោត មិនមែនជាលទ្ធិប្រជាធិបតេយ្យនៅកម្ពុជានោះទេ៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។