សាច់ញាតិរបស់លោកស្រី សំ សុខា អំពាវនាវឲ្យតុលាការខេត្តំពង់ស្ពឺ ដោះលែងលោកស្រី ឲ្យមានសេរីភាពវិញ ដោយសារគាត់មានសុខភាពទន់ខ្សោយ និងបារម្ភខ្លាចឆ្លងជំងឺកូវីដ-១៩ ខណៈដែលលោកស្រី ក៏បានអនុវត្តទោសនៅក្នុងពន្ធនាគារជិតគ្រប់ចំនួននៃទោសសរុប ៤ ឆ្នាំទៅហើយ។
ប្អូនស្រីរបស់លោកស្រី សំ សុខា គឺលោកស្រី សំ រចនា ប្រាប់វិទ្យុអាស៊ីសេរីនៅថ្ងៃទី២៤ ខែសីហាថា ការដាក់ទោសបងស្រីរបស់ខ្លួនឲ្យជាប់ពន្ធនាគាររហូតដល់៤ឆ្នាំ ដោយសារការរិះគន់រដ្ឋាភិបាលលើបណ្តញសង្គម និងការគប់ស្បែងជើងលើស្លាកគណបក្សប្រជាជនកម្ពុជានោះ គឺវាធ្ងន់ធ្ងរហួសប្រមាណ មិនអាចទទួលយកបានទេ។ ប្អូនស្រីជនជាប់ឃុំរូបនេះ ទាមទារឲ្យតុលាការដោះលែងលោកស្រី សំ សុខា ឲ្យមានសេរីភាពឡើងវិញ ព្រោះគាត់បានជាប់ឃុំក្នុងពន្ធនាគារខេត្តកំពង់ស្ពឺជាង៣ឆ្នាំ ៧ខែ ហើយក្នុងចំណោមទោសសរុប៤ឆ្នាំ៖ «សម្រាប់ក្នុងចិត្តក្រុមគ្រួសារទាំងមូល មិនមែនតែខ្ញុំទេយល់ថា វាអយុត្តិធម៌ខ្លាំងណាស់ កំហុសប៉ុណ្ណឹង ឃុំឃាំងបងស្រីខ្ញុំ រយៈពេល៤ឆ្នាំ ដែលធ្វើឲ្យកូនព្រាត់ពីម្តាយ បងព្រាត់ពីបងប្អូន និងម្តាយព្រាត់ពីកូន។ សម្រាប់ខ្ញុំ យល់ថា សល់រយៈពេលខ្លី គួរតែដោះលែងបងខ្ញុំឲ្យគាត់មានសេរីភាព ព្រោះគាត់ មិនធ្លាប់មានកំហុសពីមុនមកសោះ បែរជាមានកំហុសតែបន្តិច ជាប់ឃុំឃាំងដល់៤ឆ្នាំ»។
លោកស្រី សំ សុខា គឺជាកម្មករិនីរោងចក្រកាត់ដេរ និងជាស្ត្រីមេម៉ាយមានកូនពីរនាក់នៅក្នុងបន្ទុក ក្នុងនោះកូនស្រីអាយុ ១២ឆ្នាំ និងកូនប្រុសអាយុ ១៧ឆ្នាំ ដែលកំពុងសិក្សានៅឡើយ។ គ្រួសាររបស់លោកស្រី រស់នៅក្នុងភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
ដំបូងឡើយលោកស្រី សំ សុខា ត្រូវបានតុលាការខេត្តកំពង់ស្ពឺ កាត់ទោសកំបាំងមុខឱ្យជាប់ពន្ធនាគាររយៈពេល២ឆ្នាំ និងពិន័យជាប្រាក់ ៥លានរៀលពីបទ ''ជេរប្រមាថ'' និង ''ញុះញង់ឱ្យមានការរើសអើង'' ពាក់ព័ន្ធនឹងរូបភាពវីដេអូមួយដែលបង្ហោះនៅលើបណ្តាញសង្គមហ្វេសប៊ុក(Facebook) កាលពីខែមេសា ឆ្នាំ២០១៧ ដែលបង្ហាញថា លោកស្រីបានយកស្បែកជើងគប់ទៅលើស្លាកគណបក្សប្រជាជនកម្ពុជាដែលមានរូបលោកនាយករដ្ឋមន្ត្រី ហ៊ុន សែន និងលោក ហេង សំរិន។លោកស្រី បានភៀសខ្លួនទៅប្រទេសថៃ តាំងពីពេលនោះ និងទទួលបានសិទ្ធិជាជនភៀសខ្លួនពីឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ប្រចាំនៅទីក្រុងបាងកក។ ក្រោយមក អាជ្ញាធរថៃ បានចាប់ខ្លួនលោកស្រីនិងបញ្ជូនមកឲ្យអាជ្ញាធរកម្ពុជាវិញ កាលពីថ្ងៃទី៨ ខែកុម្ភៈ ឆ្នាំ២០១៨ ហើយបានបញ្ចូនទៅឃុំខ្លួននៅពន្ធនាគារខេត្តកំពង់ស្ពឺនៅថ្ងៃទី៩ ខែកុម្ភៈ។ បន្ទាប់មក តុលាការខេត្តកំពុងស្ពឺ បានកាត់ទោសលោកស្រីឲ្យជាប់ពន្ធនាគារ២ឆ្នាំបន្ថែមទៀតក្នុងបទចោទដដែលពាក់ព័ន្ធនឹងការរិះគន់រដ្ឋាភិបាលលើបណ្តាញសង្គមក្នុងពេលភៀសខ្លួននៅឯប្រទេសថៃ។ សំណុំរឿងទាំងពីរនេះ លោកស្រី សំ សុខា ត្រូវជាប់ពន្ធនាគារចំនួន ៤ឆ្នាំ។
អាស៊ីសេរី មិនអាចសុំការឆ្លើយតបពីអ្នកនាំពាក្យសាលាដំបូងខេត្តកំពង់ស្ពឺលោក អ៊ូ ផាត និងអ្នកនាំពាក្យក្រសួងយុត្តិធម៌លោក ជិន ម៉ាលីន បានទេ នៅថ្ងៃទី២៤ ខែសីហា ដោយទូរស័ព្ទចូល តែពុំមានអ្នកទទួល។
ជុំវិញរឿងនេះ នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា ការដាក់ទោសទណ្ឌលើលោកស្រី សំ សុខា នេះ មានលក្ខណៈធ្ងន់ធ្ងរ ដូចសំណុំរឿងនយោបាយផ្សេងទៀតដែរ។ លោកយល់ថា រដ្ឋាភិបាល និងតុលាការ គួរតែពិចារណាដោះលែងទណ្ឌិតរូបនេះ ឲ្យមានសេរីភាពឡើងវិញ ព្រោះគាត់ បានអនុវត្តទោសលើសពី ២ភាគ៣ នៃទៅទោសសរុប ៤ ឆ្នាំហើយ៖ «យើងជាអង្គការសង្គមស៊ីវិល យើងឃើញថា ទី១ ដោយសារតែគាត់ជាស្ត្រី ដែលមានកូនដែលត្រូវការម្តាយ។ ទី២ យើងឃើញថា ថ្មីៗនេះ ក្រសួងយុត្តិធម៌ បានចេញសេចក្តីសម្រេចទាក់ទងនឹងការដោះលែងជនជាប់ឃុំដែលជិតផុតទោសឲ្យ នៅក្រៅឃុំដោយភ្ជាប់នឹងលក្ខខណ្ឌ ហើយវាល្មមដល់ពេលអនុវត្តហើយលើសេចក្តីសម្រេចនេះ ហើយនឹងពិនិត្យទៅលើលទ្ធភាពផ្សេងៗទៀត ដោះលែងអ្នកជាប់ឃុំ ដើម្បីបន្ថយភាពចង្អៀតណែនតាមពន្ធនាគារ ដើម្បីកាត់បន្ថយហានីភ័យនៃការឆ្លង រីករាលដាលជំងឺកូវីដ- ១៩»។
កាលពីពាក់កណ្តាល ខែមិថុនា កន្លងទៅ មេធាវីការពារក្តីឲ្យលោកស្រី សំ សុខា ពីររូប គឺលោក សំ សុគង់ និងលោក ឡោ ជុនធី ក៏បានដាក់លិខិតស្នើសុំឲ្យតុលាការខេត្តពង់ស្ពឺ ដោះលែងកូនក្តីរបស់ខ្លួនដែរ ដោយសារកូនក្តី មានជំងឺក្រពះធ្ងន់ធ្ងរសម្រាកមិនបាន ស្គមស្គាំង និងភ័យខ្លាចឆ្លងជំងឺកូវីដនៅក្នុងពន្ធនាគារ។ ម្យ៉ាងវិញទៀត មេធាវីការពារក្តីទាំងពីររូបយល់ថា កូនក្តីរបស់ខ្លួន បានអនុវត្តទោសទោសលើសពី២ភាគ៣ នៃទោសសរុប៤ឆ្នាំហើយ ព្រមទាំងបានគោរពបទបញ្ជានិងវិន័យទាំងអស់ក្នុងពន្ធនាគារបានយ៉ាងល្អ។ ទោះជាយ៉ាងណា មកទល់ពេលនេះ ក្រុមមេធាវី មិនទាន់ទទួលបានការឆ្លើយតបពីខាងតុលាការខេត្តកំពង់ស្ពឺនៅឡើយទេ។
ប្អូនស្រីរបស់លោកស្រី សំ សុខា រំពឹងថា តុលាការខេត្តកំពង់ស្ពឺ នឹងប្រគល់សេរីភាពជូនបងស្រីរបស់ខ្លួនឡើងវិញក្នុងពេលឆាប់ៗនេះ ដើម្បីឲ្យគាត់មានឱកាសថែទាំសុខភាព និងមើលថែ ចិញ្ចឹមកូនរបស់គាត់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។