១ . មេធាវី លោក ខៀវ សំផន ថាការផ្ដន្ទាទោសកូនក្ដីលោកមានចរិតនយោបាយច្រើនជាងទិដ្ឋភាពច្បាប់
សហមេធាវីជាតិការពារក្តីឱ្យអតីតប្រមុខរដ្ឋនៃរបបកម្ពុជាប្រជាធិបតេយ្យ ឬរបបខ្មែរក្រហម ចាត់ទុកសេចក្ដីសម្រេចផ្ដន្ទាទោសលោក ខៀវ សំផន អស់មួយជីវិតរបស់សាលាដំបូង និងតុលាការកំពូលនៃសាលាក្ដីខ្មែរក្រហមកន្លងមក ថាជារឿងអយុត្តិធម៌។ ការលើកឡើងនេះ ធ្វើឡើងស្របពេលតុលាការកំពូលនៃសាលាក្ដីខ្មែរក្រហម ត្រៀមនឹងចេញសាលដីកាលើបណ្ដឹងជំទាស់របស់លោកខៀវ សំផន ក្នុងសំណុំរឿង០០២ វគ្គ២ ស្ដីពីឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម និងអំពើប្រប្រល័យពូជសាសន៍ នៅថ្ងៃព្រហស្បតិ៍ខាងមុខនេះ។ មេធាវីលោក ខៀវ សំផន គឺលោក គង់ សំអុន ចោទថា ការផ្ដន្ទាទោសកូនក្ដីរបស់លោកមានចរិតនយោបាយច្រើនជាងទិដ្ឋភាពច្បាប់ ដោយសារតុលាការចង់រូតរះបញ្ចប់ក្ដីនេះមុនពេលលោក ខៀវ សំផន ដែលមានវ័យជរា ស្លាប់បាត់បង់ជីវិត។
[ ស្តាប់បទសម្ភាសន៍របស់លោក ជី វិតា ជាមួយមេធាវីលោក ខៀវ សំផន គឺលោក គង់ សំអុន... Opens in new window ]
២ . អាជ្ញាធរថ្នាក់ក្រោមចាប់ផ្តើមបង្ក្រាបល្បែងស៊ីសងខុសច្បាប់ក្រោយមានបញ្ជាពីលោក ហ៊ុន សែន
អាជ្ញាធរថ្នាក់ក្រោមជាតិតាមបណ្តារាជធានី-ខេត្តចាប់ ផ្តើមបើកយុទ្ធនាការបង្ក្រាបល្បែងស៊ីសងខុសច្បាប់បន្ទាប់ពីមានបទបញ្ជារពីលោកនាយករដ្ឋមន្ត្រី ហ៊ុន សែន។ មន្ត្រីសង្គមស៊ីវិលយល់ថាអាជ្ញាធរថ្នាក់ក្រោមគួរតែអនុវត្តតួនាទីនិងច្បាប់ឲ្យបានត្រឹមត្រូវដោយមិនត្រូវរងចាំស្តាប់តែបញ្ជារពីថ្នាក់លើនោះទេបើពុំនោះទេមិនអាចដោះស្រាយបញ្ហានេះឱ្យមានប្រសិទ្ធភាពឡើយ។
អានព័ត៌មានបន្ថែម....
៣ . ក្រុមគ្រួសារទៅសួរសុខទុក្ខសកម្មជនបក្សប្រឆាំង១០នាក់ នៅពន្ធនាគារត្រពាំងផ្លុងក្នុងឱកាសភ្ជុំបិណ្ឌ
ក្រុមគ្រួសារទៅសួរសុខទុក្ខសកម្មជនបក្សប្រឆាំង១០នាក់នៅពន្ធនាគារត្រពាំងផ្លុង ខេត្តត្បូងឃុំ ដោយសាររដ្ឋាភិបាលមិនដោះលែងប្តីនិងឪពុកពួកគេឱ្យជួបជុំគ្រួសារនិងធ្វើបុណ្យក្នុងឱកាសភ្ជុំបិណ្ឌឆ្នាំនេះ។ ក្នុងឱកាសនេះដែរពួកគាត់បានរៀបរាប់ពីការឈឺចាប់ ទុក្ខសោក និងការព្រាត់ប្រាសគ្នារាប់ឆ្នាំដោយសារការធ្វើទុក្ខបុកម្នេញផ្នែកនយោបាយ។ មន្រ្តីសង្គមស៊ីវិលយល់ថា រដ្ឋាភិបាលគួរតែដោះស្រាយវិបត្តិនយោបាយនិងដោះលែងសកម្មជនទាំងនោះដើម្បីឱ្យពួកគេបានជួបក្រុមគ្រួសារឡើងវិញ។
៤ . សកម្មជនចលនាមាតាធម្មជាតិថាការឆ្លើយរបស់រដ្ឋបាលព្រៃឈើដែលថាព្រៃឈើភ្នំតាម៉ៅមិនបានលក់ដូរគឺមិនតម្លាភាព
ក្រោយពីមានការបង្ហោះវិដេអូនៅលើបណ្ដាញសង្គមហ្វេសប៊ុកពីក្រុមយុវជនចលនាមាតាធម្មជាតិកាលពីថ្ងៃទី១៥ ខែកញ្ញា រដ្ឋបាលព្រៃឈើនៃក្រសួងកសិកម្មកាលពីថ្ងៃទី១៦ ខែកញ្ញា បានចេញសេចក្ដីប្រកាសព័ត៌មានមួយដោយបានចោទក្រុមយុវជនដែលបានទាមទារឱ្យរដ្ឋាភិបាលបង្ហាញពីចំណូលបានពីការកាប់ព្រៃឈើតំបន់ភ្នំតាម៉ៅថាជាក្រុមអគតិ។ ឆ្លើយតបនឹងការចោទដូចនេះសកម្មជនចលនាមាតាធម្មជាតិកញ្ញា ឡុង គន្ធា ប្រាប់វិទ្យុអាស៊ីសេរីថាសេចក្ដីប្រកាសព័ត៌មានរបស់រដ្ឋបាលព្រៃឈើ កាលពីថ្ងៃទី១៦ ខែកញ្ញា ដែលថា ព្រៃឈើដែលត្រូវបានដឹកចេញពីតំបន់ភ្នំតាម៉ៅមិនបានលក់ដូរនោះគឺបង្ហាញភាពមិនប្រក្រតីនិងគ្មានតម្លាភាព។
៥ . កូដករណាហ្គាវើល បន្តធ្វើកូដកម្មទាមទារអោយថៅកែដោះស្រាយវិវាទការងារ
ក្រុមកូដករណាហ្គាវើលដ៍ជិត ១រយនាក់(១០០នាក់) នៅនៅរសៀលថ្ងៃទី ១៨ ខែកញ្ញា បន្តធ្វើកូដកម្មដោយឈរនៅមុខក្រុមហ៊ុនណាហ្គាវើលដ៏ស្រែកខ្លាំងៗហៅថៅកែណាហ្គាវើលដ៏ចេញមកដោះស្រាយវិវាទការងារជាមួយពួកគេ ។ កូដករកាន់បដាដែលមានខ្លឹមសារដូចជាក្រុមហ៊ុនណាហ្គាវើលដ៏ត្រូវបញ្ឈប់ប្រើកិច្ចសន្យាមិនត្រឹមត្រូវនិងស្នើតុលាការទម្លាក់ចោលរាល់បទចោទទាំងអស់លើថ្នាក់ដឹកនាំសហជីពនិងសមាជិកសហជីពទាំង ១៥ នាក់។ ក្រៅពីនេះកូដករក៏ដាក់ឧបករណ៍បំពងសម្លេងចម្រៀងពីជីវិតកម្មករធ្វើការណាហ្គាវើលដ៏ ជាច្រើនបទ និងចម្រៀងតស៊ូមតិជាដើម។ សង្គមស៊ីវិលនិងក្រុមអ្នកឃ្លាំមើលជំរុញអោយរដ្ឋាភិបាលនិងក្រសួងពាក់ព័ន្ធដំណោះស្រាយវិវាទការងារមួយនេះដើម្បីលើកកម្ពស់មុខមាត់កម្ពុជានៅឆាកអន្តរជាតិ៕
[ អានព័ត៌មានបន្ថែម... Opens in new window ]
៦ . ពលករខ្មែររាប់រយនាក់ប្រារព្ធពិធីបុណ្យកាន់បិណ្ឌនៅប្រទេសថៃដើម្បីឧទ្ទិសកុសលដល់ជីដូនជីតា
ពលករខ្មែរនិងសកម្មជនគណបក្សប្រឆាំងប្រមាណ៣០០នាក់នៅព្រឹកថ្ងៃទី១៨ ខែកញ្ញាបានមកជួបជុំគ្នានៅវត្តមួយកណ្ដាលទីក្រុងបាងកក ប្រទេសថៃ ដើម្បីប្រារព្ធពិធីកាន់បិណ្ឌទី៨ឬហៅថាវេនបិណ្ឌទី៨ដែលជាបុណ្យប្រពៃណីជាតិដើម្បីឧទ្ទិសកុសលផលបុណ្យជូនទៅដល់ជីដូនជីតាដែលបានលាចាកលោកទៅហើយ។ ពិធីបុណ្យដោយពលករខ្លះមានកូនតូចខ្លះទៀតមកធ្វើបុណ្យទាំងប្ដីនិងប្រពន្ធនិងមានយុវជនចូលរួមធ្វើបុណ្យជាមួយព្រះសង្ឃខ្មែរយ៉ាងសប្បាយរីករាយ។
៧ . ព្រះសង្ឃការពារព្រៃឈើនៅព្រៃសង្ឃសហគមន៍រុក្ខាវ័នខេត្តឧត្ដមានជ័យខ្វះខាតចង្ហាន់
ព្រះសង្ឃការពារព្រៃឈើដែលគង់នៅតំបន់ព្រៃសង្ឃសហគមន៍រុក្ខាវ័នខេត្តឧត្តមានជ័យខ្វះខាតចង្ហាន់ដោយសារតែមិនមានពុទ្ធបរិស័ទយកទេយ្យទានមកប្រគេន។ ថ្វីត្បិតតែរដូវកាលកាន់បិណ្ឌនៅគ្រប់វត្តអារាមប្រហែលជាសម្បូរចង្ហាន់ក៏ដោយចុះក៏ព្រះសង្ឃដែលតែងតែខ្វល់ខ្វាយលើការអភិរក្សព្រៃធម្មជាតិគង់នៅព្រៃសង្ឃសហគមន៍រុក្ខាវ័នដោយគ្មានការឧបត្ថម្ភពីសំណាក់ពុទ្ធបរិស័ទដូចវត្តដទៃនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។