គណបក្សប្រជាជនកម្ពុជា បើកយុទ្ធនាការរកសំឡេងឆ្នោតពីប្រជាពលរដ្ឋនៅទូទាំងប្រទេសដោយគ្មានគណបក្សប្រឆាំងចូលរួមក្នុងថ្ងៃដំបូងនៃយុទ្ធនាការឃោសនាបោះឆ្នោត។ យុទ្ធនាការរបស់គណបក្សកាន់អំណាចនេះ ធ្វើឡើងស្របពេលគណបក្សប្រឆាំងកំពុងធ្វើយុទ្ធនាការឱ្យពលរដ្ឋទៅគូសខ្វែងលើសន្លឹកឆ្នោតចោល ដើម្បីប្រឆាំងនឹងការបោះឆ្នោតថ្ងៃទី២៣ ខែកក្កដា ដែលពួកគេចាត់ទុកថា ជាការបោះឆ្នោតក្លែងក្លាយ។
លោក ហ៊ុន សែន ប្រកាសបើកយុទ្ធនាការឃោសនា ក្នុងថ្ងៃនេះដំបូង នៅរាជធានីភ្នំពេញ។ លោក ហ៊ុន សែន ដែលក្តោបក្តាប់យោធា និងតុលាការពេញដៃជំរុញឲ្យប្រជាពលរដ្ឋបោះឆ្នោតឲ្យគណបក្សប្រជាជនកម្ពុជា ដោយលោកអះអាងថា ដើម្បីសុខសន្តិភាព និងការរីកចម្រើន។ លោក ហ៊ុន សែន ក៏យកពេល ឃោសនានេះទៅវាយប្រហារគណបក្សប្រឆាំងដោយ ប្ដេជ្ញាចិត្តកម្ទេចក្រុមបក្សប្រឆាំងណាដែលលោកចោទថា បានបំផ្លាញសន្តិភាព និងញុះញង់ឱ្យវឹកវរសង្គមជាដើម។
លោក ហ៊ុន សែន៖ «គណបក្សប្រជាជនកម្ពុជាសូមប្រកាស និងសុំការគាំទ្រពីបងប្អូនពីជនរួមជាតិនូវកម្មវិធីនយោបាយសម្រាប់កសាង និងការពារមាតុភូមិនៅឆ្នាំ២០២៣ ដល់ឆ្នាំ២០២៨ដើម្បីធានាការពារសន្តិភាព និងនិរន្តរភាពលើមាគ៌ានៃការអភិវឌ្ឍ ការលើកស្ទួយជីវភាពរបស់ប្រជាជនឆ្ពោះទៅរកចក្ខុវិស័យ កម្ពុជាឆ្នាំ២០៣០ ប្រទេសមានចំណូលមធ្យមកម្រិតខ្ពស់ និងឈានទៅជាប្រទេសមានចំណូលខ្ពស់នៅឆ្នាំ២០៥០»។
គណបក្សកាន់អំណាចក្រៅអំពីឃោសនាទ្រង់ទ្រាយធំ នៅរាជធានីភ្នំពេញហើយ នៅតាមខេត្តទូទាំងប្រទេសក៏មានការជួបនិងហែក្បូនតាមដងផ្លូវ ដូចជានៅខេត្តកំពង់ចាម ស្វាយរៀង បាត់ដំបង បន្ទាយមានជ័យ សៀមរាប និងកំពង់ធំជាដើម។
ចំណែកគណបក្សផ្សេងៗវិញដូចជាគណបក្សខ្មែររួមជាតិ គណបក្សហ៊្វុនស៊ិនប៉ិច គណបក្សឯកភាពជាតិខ្មែរ និងគណបក្សខ្មែរឈប់ក្រជាដើម ក៏បើកយុទ្ធនាការឃោសនារកសំឡេងឆ្នោតនៅភូមិសាស្ត្ររាជធានីភ្នំពេញ និងខេត្តមួយចំនួនទៀតដែរ។
អ្នកនាំពាក្យគណបក្សហ៊្វុនស៊ិនប៉ិចលោក ញឿន រ៉ាដែន ប្រាប់វិទ្យុអាស៊ីសេរីថា នៅថ្ងៃទី១នៃការឃោសនាបោះឆ្នោតនេះ សមាជិកគណបក្សរបស់លោកចាក់មេក្រូ និងដើរចែកខិត្តប័ណ្ណដើម្បីបញ្ជូនសារនយោបាយជូនពលរដ្ឋនៅតាមភូមិឃុំទូទាំងប្រទេស។ លោកឱ្យដឹងថា នៅថ្ងៃទី២ នៃយុទ្ធនាការឃោសនា គឺប្រធានគណបក្ស ព្រះអង្គម្ចាស់ នរោត្ដម ចក្រាវុធ នឹងដឹកនាំសមាជិក និងអ្នកគាំទ្រប្រមាណ ៥ពាក់នាក់ចេញហែក្បូនឃោសនាទ្រង់ទ្រាយធំនៅតាមផ្លូវសំខាន់ៗនៅក្នុងរាជធានីភ្នំពេញ។
លោក ញឿន រ៉ាដែន៖ «សូមគាំទ្រគណបក្សរាជានិយមហ៊្វុនស៊ិនប៉ិចដើម្បីបន្តឱ្យព្រះអង្គម្ចាស់ នរោត្ដម ចក្រាវុធ មានឱកាសដឹកនាំប្រទេសជាតិ ដើម្បីឱ្យរបបរាជានិយមនៅកម្ពុជាមានភាពរឹងមាំ ជាពិសេសព្រះអង្គម្ចាស់ នរោត្ដម ចក្រាវុធ ទ្រង់ធានាថា នឹងដោះស្រាយបញ្ហាជាតិសំខាន់ៗដែលប្រជារាស្ត្រកំពុងជួបទុក្ខលំបាក»។
ដោយឡែកគណបក្សប្រឆាំងនៅក្រៅប្រទេសកំពុងប្រកាសធ្វើយុទ្ធនាការគូសសន្លឹកឆ្នោតចោលនៅពេលទៅបោះឆ្នោត រួមទាំងប្រមូលផ្តុំធ្វើបាតុកម្មនៅតាមប្រទេសប្រជាធិបតេយ្យធំៗជាបន្តបន្ទាប់ ដើម្បីប្រឆាំងនឹងការបោះឆ្នោត ដែលគណបក្សនេះចាត់ទុកជាការបោះឆ្នោតក្លែងក្លាយ។
យុទ្ធនាការរបស់គណបក្សប្រឆាំងនេះធ្វើឡើងបន្ទាប់ពីរបបដឹកនាំរបស់លោក ហ៊ុន សែន បានផាត់គណបក្សប្រឆាំងចេញពីការប្រកួត ហើយលោក ហ៊ុន សែន កែច្បាប់បោះឆ្នោតយ៉ាងតក់ក្រហល់ដើម្បីដាក់បំបិទលើសិទ្ធិពលរដ្ឋថែមទៀត។ ចំណែកសកម្មជនបក្សភ្លើងទៀនក្នុងស្រុកខ្លះ បានដាក់រូបភាពឃោសនាបោះឆ្នោតឃុំសង្កាត់ តាមហ្វេសប៊ុកដើម្បីឌឺដងនឹងគណបក្សប្រជាជនកម្ពុជា ដែលមិនហ៊ានប្រកួតការបោះឆ្នោតដោយយុត្តិធម៌។
មន្ត្រីជាន់ខ្ពស់គណបក្សសង្គ្រោះជាតិលោក ម៉ែន សុថាវរិន្ទ្រ ចាត់ទុកដំណើរការបោះឆ្នោតនេះថា ជាឆាកល្ខោនសម្ដែងបំភ័ន្តភ្នែកពលរដ្ឋ និងអន្តរជាតិដែលរៀបចំដឹកនាំដោយលោក ហ៊ុន សែន នេះដើម្បីការពារអំណាចបែបផ្ដាច់ការតពូជរបស់លោក។ លោកអំពាវនាវដល់ប្រជាពលរដ្ឋទាំងអស់ប្រើប្រាស់សិទ្ធិសេរីភាពក្នុងការបោះឆ្នោត ប៉ុន្តែករណីពលរដ្ឋរងការបង្ខិតបង្ខំឱ្យទៅបោះឆ្នោតនោះលោកស្នើដល់ពលរដ្ឋទៅគូសសន្លឹកឆ្នោតចោល។
លោក ម៉ែន សុថាវរិន្ទ្រ៖ «អ្នកនៅក្រៅប្រទេសគឺធ្វើយុទ្ធនាការគ្រប់តំបន់ទូទាំងសកលលោក គឺគេធ្វើតាមប្រព័ន្ធហ្វេសប៊ុកអនឡាញ។ ចាំមើលទៅសន្លឹកឆ្នោតមានតែពីរទេ ទីមួយបោះឆ្នោតឱ្យគណបក្សប្រជាជនកម្ពុជា ទីពីរបោះឆ្នោតឱ្យអ្នកប្រជាធិបតេយ្យ គឺគូសខ្វែងនៅលើសន្លឹកឆ្នោត។ យុទ្ធនាការគូសខ្វែងជាការមិនទទួលស្គាល់ការបោះឆ្នោតក្លែងក្លាយរបស់គណបក្សប្រជាជនកម្ពុជា និយាយជារួមទៅ ចាប់ពីថ្ងៃនេះទៅលោក ហ៊ុន សែន ធ្វើអ្វីស្រេចតែចិត្ត គឺជាជនផ្ដាច់ការពិតប្រាកដហើយ»។
អ្នកនាំពាក្យគណៈកម្មការជាតិរៀបចំការបោះឆ្នោត គ.ជ.ប លោក ហង្ស ពុទ្ធា ប្រាប់វិទ្យុអាស៊ីសេរីថាគិតត្រឹមរសៀលថ្ងៃទី១ ខែកក្កដានេះ យុទ្ធនាការឃោសនាថ្ងៃដំបូងបានប្រព្រឹត្តទៅដោយរលូនដែលមានសុវត្ថិភាព និងសណ្ដាប់ធ្នាប់ល្អ។ លោក ហង្ស ពុទ្ធា បញ្ជាក់ថា នៅពេលពលរដ្ឋចូលទៅបោះឆ្នោតជាការបោះឆ្នោតសម្ងាត់។
លោក ហង្ស ពុទ្ធា៖ «គឺប្រព្រឹត្តជាប្រក្រតី ប្រកបដោយសុវត្ថិភាព មានសណ្ដាប់ធ្នាប់ជាទូទៅល្អ ហើយការដង្ហែក្បួននេះទៀតត្រូវបានមហាជនអមតាមសងខាងផ្លូវតាមសម្លឹងមើលហាក់ដូចជាយកចិត្តទុកដាក់ទទួលស្គាល់ថា ព្រឹត្តិការណ៍ខាងមុខថ្ងៃទី២៣ ខែកក្កដា ជាថ្ងៃបោះឆ្នោតដែលទាំងអស់គ្នាត្រៀមខ្លួនសម្រេចចិត្តជ្រើសរើសយកគណបក្សនយោបាយណាមួយដែលខ្លួនស្រឡាញ់ពេញចិត្ត»។
យុទ្ធនាការឃោសនាបោះឆ្នោតមានរយៈពេល២១ថ្ងៃ គឺចាប់ផ្ដើមនៅថ្ងៃទី១ ដល់ថ្ងៃទី២១ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។