ក្រុមមន្ត្រីចាស់ៗ ក្នុងគណបក្សហ្វ៊ុនស៊ិនប៉ិច សម្រេចស្នើសុំយាងអតីតប្រធានបក្ស គឺព្រះអនុជ នរោត្តម អរុណរស្មី មកធ្វើជាបេក្ខភាពប្រធានបក្សបន្តពីសម្ដេចក្រុមព្រះ នរោត្តម រណឫទ្ធិ។ ប៉ុន្តែអ្នកនាំពាក្យគណបក្សហ្វ៊ុនស៊ិនប៉ិចអះអាងថា គណបក្សរក្សាជំហរធ្វើសមាជនៅដើមខែក្រោយនេះ ដើម្បីជ្រើសតាំងបុត្រាច្បងរបស់សម្ដេចក្រុមព្រះ គឺព្រះអង្គម្ចាស់ នរោត្តម ចក្រាវុឌ្ឍ ជាប្រធានដដែល។
ក្រុមមន្ត្រីចាស់ៗក្នុងគណបក្សហ្វ៊ុនស៊ិនប៉ិច សម្រេចស្នើសុំយាងអតីតប្រធានបក្ស គឺព្រះអនុជ នរោត្តម អរុណរស្មី មកធ្វើជាបេក្ខភាពប្រធានបក្សបន្តពីសម្ដេចក្រុមព្រះនរោត្តម រណឫទ្ធិ។ គណៈកម្មការនាយកបានបើកកិច្ចប្រជុំវិសាមញ្ញកាលពីថ្ងៃទី១៣ ខែធ្នូ សម្រេចបានលទ្ធផល ៩ចំណុច ក្នុងនោះ គណបក្សនឹងរៀបចំបេក្ខភាពថ្នាក់ដឹកនាំមួយរូបដែលមានលេខរៀងបន្ទាប់ពីសម្ដេចក្រុមព្រះឬព្រះញាតិវង្សរបស់ព្រះអង្គដើម្បីជ្រើសតាំងជាប្រធានគណបក្សហ្វ៊ុនស៊ិនប៉ិច។
អ្នកនាំពាក្យគណៈកម្មការនាយកនៃគណបក្សហ្វ៊ុនស៊ិនប៉ិចលោក ផាន់ សិទ្ធី ប្រាប់វិទ្យុអាស៊ីសេរីនៅថ្ងៃទី១៤ ខែធ្នូថា ក្នុងឋានានុក្រមបក្ស សម្ដេចក្រុមព្រះ នៅលេខរៀងលើគេ បន្ទាប់មក គឺសពអ្នកម្នាង អ៊ុក ផល្លា សមាជិកក្រុមប្រឹក្សាធម្មនុញ្ញ លោក កែវ ពុទ្ធិរស្មី និងសម្ដេចព្រះអនុជ នរោត្តម អរុណរស្មី។ ដោយសារ លោក កែវ ពុទ្ធិរស្មី ជាប់តួនាទីក្នុងក្រុមប្រឹក្សាធម្មនុញ្ញ ដូច្នេះក្រុមមន្ត្រីចាស់ៗ សម្រេចថា នឹងយាងព្រះអនុជ អរុណរស្មី ពីសហរដ្ឋអាមេរិក មកឈរជាបេក្ខភាព និងបោះឆ្នោតគាំទ្រជាប្រធានគណបក្សបន្តពីសម្ដេចក្រុមព្រះ។
ប៉ុន្តែប្រធានស្ដីទីគណបក្សហ្វ៊ុនស៊ិនប៉ិច ប្រកាសជំទាស់ដាច់ខាត។ អ្នកនាំពាក្យគណបក្សហ្វ៊ុនស៊ិនប៉ិចលោក ញឿន រ៉ាដែន អះអាងថា គណបក្សរក្សាជំហរធ្វើសមាជនៅដើមខែក្រោយនេះ ដើម្បីជ្រើសតាំងបុត្រាច្បងរបស់សម្ដេចក្រុមព្រះ គឺព្រះអង្គម្ចាស់ នរោត្តម ចក្រាវុឌ្ឍ ជាប្រធានដដែល គឺតាមបណ្ដាំរបស់សម្ដេចក្រុមព្រះ។ លោកបន្តថា សម្ដេចព្រះអនុជ អរុណរស្មី ក៏ធ្លាប់បញ្ជាក់ជំហរថា ទ្រង់លែងចូលរួមជីវភាពនយោបាយហើយដែរ ដោយទ្រង់សព្វព្រះទ័យចំពោះសកម្មភាពមនុស្សធម៌វិញ។
លោក ញឿន រ៉ាដែន បញ្ជាក់ថា ក្រុមមន្ត្រីចាស់ៗ មួយចំនួនត្រូវបានគណបក្សបញ្ចប់សមាជិកភាពតាំងពីខែកញ្ញាមកម្ល៉េះ ដូច្នេះពួកគាត់គ្មានសិទ្ធិក្នុងការសម្រេចកិច្ចការផ្ទៃក្នុងរបស់បក្សឡើយ។ តែយ៉ាងណា លោកបញ្ជាក់ថា ព្រះអង្គម្ចាស់ ចក្រាវុឌ្ឍ មានព្រះទ័យទូលាយ យល់ព្រមទទួលយកមន្ត្រីចាស់ៗ ទាំងនោះមកបម្រើការងារវិញ ឲ្យតែពួកគាត់សុខចិត្តត្រឡប់មកជ្រោមជ្រែងព្រះអង្គម្ចាស់វិញ។
ជម្លោះផ្ទៃក្នុងរបស់គណបក្សហ្វ៊ុនស៊ិនប៉ិច បានកើតឡើងជាថ្មីទៀត ក្រោយពេលប្រធានស្ដីទី គឺព្រះអង្គម្ចាស់នរោត្តម ចក្រាវុឌ្ឍ បានបណ្ដេញក្រុមមន្ត្រីចាស់ៗចេញពីបក្សជាបន្តបន្ទាប់។ ប៉ុន្តែក្រុមមន្ត្រីបក្សទាំងនោះ ហៅការបណ្ដេញចេញនេះថា ខុសលក្ខន្តិកផ្ទៃក្នុងរបស់បក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។