អនុប្រធានបក្សប្រឆាំងថា ពលរដ្ឋនឹងថ្កោលទោសមន្រ្តីគណបក្សប្រឆាំងណា ដែលសុំសិទ្ធិធ្វើនយោបាយឡើងវិញ

យន់ សាមៀន
2021-04-17
Share
អនុប្រធានបក្សប្រឆាំងថា ពលរដ្ឋនឹងថ្កោលទោសមន្រ្តីគណបក្សប្រឆាំងណា ដែលសុំសិទ្ធិធ្វើនយោបាយឡើងវិញ (ពីឆ្វេងទៅស្ដាំ) លោក យ៉ែម បុញ្ញឬទ្ធិ លោក មុត ចន្ថា លោក ជុំ ច័ន្ទដារិន លោក ឡាត់ លិតេយ្យ លោក ឡុង គឹមឃន លោក ទូត ឃឿត និងអ្នកស្រី យង់ ផាន់ណេត។
Photo: RFA

លោក​ អេង ឆៃអ៊ាង អនុប្រធានគណបក្សសង្រ្គោះជាតិ អះអាងថា ការចាកចេញ របស់បុគ្គលមួយចំនួន នឹងមិនប៉ះពាល់ដល់ប្រជាប្រិយភាពគណបក្ស សង្រ្គោះជាតិនោះទេ ត្បិតអីពលរដ្ឋអ្នកគាំទ្រនៅតែផ្ដល់តម្លៃលើក្បាលម៉ាស៊ីន គណបក្សនេះគឺលោក សម រង្ស៊ី និងលោក កឹម សុខា។ អនុប្រធានបក្សប្រឆាំងរូបនេះ ស្នើទៅបុគ្គលដែលទទួលបានសិទ្ធិធ្វើនយោបាយឡើងវិញថា  ពួកគេត្រូវមានចិត្តក្លាហានធ្វើសកម្មភាពជួយជនរងគ្រោះដែលត្រូវរបបលោក ហ៊ុន សែន ធ្វើទុក្ខបុកម្នេញនិងអ្នកកំពុងជាប់ឃុំដោយអយុត្តិធម៌ក្នុងពន្ធនាគារ។

«គណបក្សសង្គ្រោះជាតិគឺប្រជាពលរដ្ឋខ្មែរគាត់វិនិច្ឆ័យច្បាស់លាស់លោកជឿជាក់លើមេដឹកនាំកំពូល​ ​អ្នកក្រោមធាតុផ្សំប៉ុណ្ណោះទេ​ ​ប៉ុន្តែធាតុសំខាន់គណបក្សង្រ្គោះជាតិ​ ​សម​ ​ង្ស៊ី ​និង​ កឹ​ ​សុខា»

លោក អេង ឆៃអ៊ាង លើកឡើងបែបនេះ​ក្រោយមនុស្សជំនិតរបស់លោក កឹម សុខា ​គឺលោក យ៉ែម បុញ្ញាឬទ្ធិ និងលោក មុត ចន្ថា រួមមន្រ្តីជាន់ខ្ពស់គណបក្សសង្គ្រោះជាតិ៥នាក់ផ្សេងទៀត បានដាក់លិខិតសុំសិទ្ធិធ្វើនយោបាយឡើងវិញ។ មហាក្សត្រ សម្ដេច នរោត្តម សីហមុនី ចេញព្រះរាជក្រឹត្យផ្ដល់នីតិសម្បទាធ្វើនយោបាយឲ្យពួកគេឡើងវិញនៅថ្ងៃទី១៧ ​ខែមេសា។

អាស៊ីសេររីបានព្យាយាមសុំការពន្យល់បន្ថែមពីការសុំសិទ្ធិធ្វើនយោបាយឡើងវិញនេះពី លោក យ៉ែម បុញ្ញឬទ្ធិ និងលោក មុត ចន្ថា ប៉ុន្តែមិនអាចទាក់ទងពួកគេបាន។ អ្នកនាំពាក្យរដ្ឋាភិបាល ​លោក ផៃ ស៊ីផាន ស្វាគមន៍ការសុំសិទ្ធិធ្វើនយោបាយរបស់មន្រ្តីបក្សប្រឆាំងទាំងនេះ។ លោកបន្តថា រដ្ឋាភិបាលឬបក្សកាន់អំណាចមិនបានប្រើលុយទិញទឹកចិត្តអ្នកនយោបាយទាំងនោះ ឱ្យសុំសិទ្ធិធ្វើនយោបាយឡើងវិញនោះទេ។  

«មិនត្រូវម៉ាកងាយគេនោះទេពីព្រោះគេ​(​អ្នកសុំសិទ្ធិ​) ​បើសិនមានគំនិតម៉ាកងាយអ្នកនោះមិនមែនជាអ្នកប្រជាធិបតេយ្យត្រឹមស្ថិតក្នុងភាពថា​ ​មានឯងអត់ញ់មានញ់អត់ឯងប៉ុណ្ណោះ»

ពាក់ព័ន្ធនឹងការសុំសិទ្ធិធ្វើនយោបាយឡើងវិញនេះដែរ អ្នកជំនាញ​វិទ្យាសាស្ត្រ​នយោបាយ​ លោក​ ឯម​ សុវណ្ណារ៉ា​ យល់ថា មន្ត្រីជាន់ខ្ពស់គណបក្សសង្រ្គោះជាតិអាចរងសម្ពាធអ្វីមួយទើបសុំសិទ្ធិធ្វើនយោបាយឡើងវិញ។ លោកសង្កេតឃើញថា ក្នុងចំណោមអ្នកនយោបាយដែលសុំសិទ្ធិធ្វើនយោបាយកន្លងមកមានតិចតួចណាស់ដែលបានធ្វើសកម្មភាពនយោបាយ ​ឬបើកបក្សថ្មី ប៉ុន្តែភាគច្រើនពួកគេរក្សាភាពស្ងៀមស្ងាតដដែល។ ទោះយ៉ាងណាលោកយល់ថា ការសុំសិទ្ធិនេះនឹងជះផលមិនល្អដល់គណបក្សសង្គ្រោះជាតិ និងបុគ្គលដែលសុំសិទ្ធិនោះផង។ 

«គាត់​(​អ្នកសុំសិទ្ធិ​) ​រងសម្ពាធអញ្ចឹងទៅគាត់សុំសិទ្ធិធ្វើនយោបាយវិញដើម្បីរួចពីការគៀសង្កត់ឬក៏សម្ពាធផ្សេងៗ​ ​គាត់អត់មានសុឆន្ទៈក្នុងការសុំសិទ្ធិធ្វើនយោបាយទេ​ ​បើគាត់មានចង់សុំសិទ្ធិគាត់សុំតាំងឆ្នាំមក។»

គិតត្រឹមថ្ងៃទី១៧ ខែមេសា អ្នកនយោបាយបក្សប្រឆាំងចំនួន២២នាក់បានសុំសិទ្ធិធ្វើនយោបាយឡើងវិញក្នុងចំណោមមន្រ្តីជាន់ខ្ពស់គណបក្សសង្គ្រោះជាតិចំនួន១១៨នាក់(ស្លាប់ម្នាក់)ដែលជាប់បម្រាមមិនឲ្យធ្វើនយោបាយរយៈពេល៥ឆ្នាំ។

អ្នកជំនាញ​វិទ្យាសាស្ត្រ​នយោបាយលោក ឯម​ សុវណ្ណារ៉ា ​យល់ថា បើស្ថានភាពនយោបាយបក្សប្រឆាំងគ្មានការវិវឌ្ឍថ្មីទេ នឹងមានមន្រ្តីបក្សនេះបន្ថែមទៀតសុំសិទ្ធិធ្វើនយោបាយ ឬទៅរួមជីវភាពនយោបាយជាមួយបក្សកាន់អំណាច។ អ្នកឃ្លាំមើលរូបនេះយល់ថា មេដឹកនាំបក្សទាំងពីរគឺលោក សម រង្ស៊ី និងលោក កឹម សុខា គួរបង្ហាញជំហរដល់សាធារណជនថា អ្នកទាំងពីរនៅតែឈរលើគោលការណ៍រួមដដែល  ជាពិសេសលោក កឹម សុខា គួរបញ្ជាក់ពីជំហរនៃការរួបរួមគ្នាតាមរយៈ ការផ្ញើលិខិតសួរសុខទុក្ខលោក សម រង្ស៊ី ដោយកុំនិយាយរឿង​នយោបាយ​ដើម្បីកុំឲ្យបំពានបំរាមតុលាការ​៕ 

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល