នគរបាលខេត្តព្រះសីហនុបានឃាត់មនុស្ស៦នាក់នៅថ្ងៃទី៤ ខែវិច្ឆិកានេះក្នុងនោះមានជនជាតិចិនម្នាក់ បន្ទាប់ពីសង្ស័យថាអ្នកទាំងនេះបានលាក់ទុកគ្រឿងញៀនជាង ២០គីឡូក្រាមនៅផ្ទះជួលមួយកន្លែង ក្រុងព្រះសីហនុ។ សង្គមស៊ីវិលចោទថាជនជាតិចិនភាគច្រើនរកស៊ីចែកចាយ និងជួញដូរគ្រឿងញៀននៅតាមការ៉ាអូខេ និងហាងម៉ាស្សា ក្រៅពីការចាប់ជំរិត។
ស្នងការនគរបាលខេត្តព្រះសីហនុលោក ជួន ណារិន បានប្រាប់អាស៊ីសេរីនៅថ្ងៃច័ន្ទទី៤ ខែវិច្ឆិកាថា សមត្ថកិច្ចបានឃាត់ខ្លួនជនសង្ស័យទាំង៦នាក់នេះ បន្ទាប់ពីបានរកឃើញគ្រឿងញាណជាង២០គីឡូក្រាមនៅផ្ទះជួលមួយកន្លែងស្ថិតនៅភូមិ៣ សង្កាត់លេខ២ ក្រុងព្រះសីហនុ។
លោកថានគរបាលមួយក្រុមបានចូលទៅពន្លត់អគ្គីភ័យដែលបានឆាបឆេះផ្ទះរបស់ប្រជាពលរដ្ឋមួយខ្នងកាលពីថ្ងៃទី៣ ខែវិច្ឆិកា ហើយក៍បានប្រទះឃើញគ្រឿងញៀនជាច្រើនកញ្ចប់នៅក្នុងផ្ទះដែលបានជួលឲ្យជនជាតិចិនមួយក្រុមស្នាក់នៅ ប៉ុន្តែជនសង្ស័យទាំងនោះបានរត់គេច៖ «យើងអញ្ជើញអ្នកនៅជិតៗហ្នឹងចំនួន៦នាក់ដើម្បីមកធ្វើការសាកសួរ មានខ្មែរ មានចិនម្នាក់ នៅក្នុងហ្នឹងបាទ ដើម្បីសាកសួររកសាវតា និងឬសគុលបន្ទប់ហ្នឹង អ្នកណាជួល»។
លោកបន្តថាក្រុមសមត្ថកិច្ចកំពុងសាកសួរជនសង្ស័យទាំង៦នាក់នេះ ដើម្បីស្វែងរកអ្នកដែលគ្រប់គ្រងបន្ទប់ ព្រមទាំងរកប្រភពម្ចាស់ទំនិញ។
អ្នកសម្របសម្រួលសមាគមអាដហុកនៅខេត្តព្រះសីហនុ អ្នកស្រី ជាប សុធារី បញ្ជាក់ថា តាមរយះការបង្ហាញលទ្ធផលនៃការបង្រ្កាបរបស់សមត្ថកិច្ចកន្លងមកឲ្យដឹងថា ជនជាតិចិនមួយចំនួនដែលមកស្នាក់នៅក្នុងខេត្តនេះក៍រកស៊ីចែកចាយ និងជួញដូរគ្រឿងញៀននៅតាមក្លឹបការ៉ាអូខេ និងហាងម៉ាស្សាផងដែរ។
អ្នកស្រីថា ពីមុនមានតែខ្មែរទេដែលរកស៊ីចែកចាយគ្រឿងញៀននៅក្នុងខេត្តជាប់សមុទ្រមួយនេះ ប៉ុន្តែឥឡូវនេះក៍មានជនជាតិចិនច្រើនពាក់ព័ន្ធទៅនឹងការរកស៊ីគ្រឿងញៀននេះដែរ ព្រោះមួយរយះចុងក្រោយនេះសមត្ថកិច្ច បានបង្ហាញលទ្ធផលនៃការបង្ក្រាប ជនជាតិចិនមួយចំនួនដែលមានការពាក់ព័ន្ធទៅនឹងបទល្មើសគ្រឿងញៀននេះ៖ «យើងឃើញមានការចាប់បានជនជាតិចិនហ្នឹងជាមួយនឹងគ្រឿងញៀន គ្រឿងអីចឹង ក្រៅពីបទល្មើសចាប់ជំរិត ក៍ឃើញមានការពាក់ព័ន្ធជាមួយនឹងគ្រឿងញៀនដែរ ប៉ុន្តែខ្ញុំមិនបានកត់ត្រានិងបូកសរុបថាមានប៉ុន្មានដងក្នុង១ខែ មិនបានបូកទេ តែគ្រាន់តែថាជនជាតិចិនហ្នឹងក៍មានពាក់ព័ន្ធនឹងបញ្ហាគ្រឿងញៀនក្នុងការជួញដូរ និងចែកចាយឬក៍ប្រើប្រាស់ដែរ»។
របាយការណ៍ក្រសួងមហាផ្ទៃដែលបានចេញផ្សាយកាលពីដើមឆ្នាំ ២០១៩ បង្ហាញថា មានជនអន្តោប្រវេសន៍ចិនចំនួនជាង ១១ ម៉ឺននាក់ នៅខេត្តព្រះសីហនុ ហើយភាគច្រើន នៃជនជាតិចិនទាំងនោះតែងតែប្រកបរបរ លេងល្បែងស៊ីសងតាមកាស៊ីណូ និង ល្បែងតាមប្រព័ន្ធអ៊ីនធឺណិតខុសច្បាប់ ព្រមទាំងចាប់ជំរិតនៅពេលពួកគេចាញ់ល្បែង។
អតីតអភិបាលខេត្តព្រះសីហនុ លោក យន់ មីន ធ្លាប់បានផ្ញើររបាយការណ៍មួយទៅរដ្ឋមន្ត្រីក្រសួងមហាផ្ទៃលោក ស ខេង សំដែងការព្រួយបារម្ភ អំពីទិដ្ឋភាពអវិជ្ជមាននៃការកើនឡើង នូវវត្តមានរបស់ជនជាតិចិននៅក្នុងខេត្តនេះ។
លោក យន់ មីន ថា ជនជាតិចិនមួយចំនួន បានប្រព្រឹត្តបទឧក្រិដ្ឋ ហើយបានចាប់ជំរិតទាររប្រាក់ពីវិនិយោគិនដទៃទៀត ហើយថាពលករបរទេសដែលភាគច្រើនជាជនជាតិចិន កំពុងបង្កជម្លោះជាមួយអ្នកស្រុក។
ថ្មីៗនេះរដ្ឋាភិបាលកម្ពុជា និងចិន បានចុះកិច្ចព្រមព្រៀងមួយដើម្បីបញ្ជូនប៉ូលីសរបស់ចិន ឲ្យមកជួយបង្រ្កាបឧក្រិដ្ឋកម្មនានាដែលប្រព្រឹត្តដោយជនជាតិចិន បន្ទាប់ពីកំណើនជនជាតិចិនបានចូលមកកម្ពុជាច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណ។