មន្ត្រីជាន់ខ្ពស់គណបក្សកាន់អំណាច បានថ្លែងការពារមេដឹកនាំរបបក្រុងភ្នំពេញថា មេដឹកនាំរបស់ខ្លួនមិនមែនមានចិត្តជាទេវទត្ត មាត់ជាទេវតា ចំពោះករណីវិទ្យុអាស៊ីសេរី។ ក៏ប៉ុន្តែអ្នកវិភាគបានចាត់ទុកថា របបក្រុងភ្នំពេញមិនបានគោរពសេរីភាពសារព័ត៌មាននៅឡើយទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា ករណីលោក ហ៊ុន សែនបដិសេធមិនឆ្លើយតបនឹងសំនួររបស់អាស៊ីសេរី ដោយសារលោកចោទថា មកពីចរិតអ្នកសារព័ត៌មានខ្លះមិនគួរអោយនិយាយចូលទេ។
នៅក្នុងបទសម្ភាសន៍អាស៊ីសេរីតាមទូរស័ព្ទជាមួយលោក ហ៊ុន សែន កាលពីសប្ដាហ៍មុន លោក ហ៊ុន សែន បានចោទប្រកាន់ថា វិទ្យុអាស៊ីសេរី អាក្រក់ពេករហូតដល់លោកមិននិយាយរក៖ «ថាខ្ញុំមិនចង់និយាយទេ កុំសួរសំនួរទាក់ទងនឹងនេះពីព្រោះវាអាក្រក់ពេកវិទ្យុលោក។ ប្រាប់ហើយបើថា លោកចង់យកទៅផ្សាយ យកសំឡេងខ្ញុំទៅផ្សាយទៅ ថាវិទ្យុហ្នឹងអាក្រក់ពេកដែលខ្ញុំ មិនអាចនិយាយជាមួយ។ គេនិយាយពីលិច ឯងនិយាយពីកើត គេនិយាយពីស ឯងនិយាយពីខ្មៅគិតនិយាយតែពីរឿងនេះ។ មិនចាំបាច់សួរទេ ខ្ញុំមិនឆ្លើយព័ត៌មានឲ្យអស់លោកទេ ចាំស្ដាប់ពីអ្នកដ៏ទៃទៅ»។
អាស៊ីសេរីបានព្យាយាមសុំការពន្យល់ពីលោក ហ៊ុន សែន តាមទូរស័ព្ទទាក់ទិននឹងការអនុញ្ញាតអោយវិទ្យុនេះបើកការិយាល័យរបស់ខ្លួនឡើងវិញ ក៏ប៉ុន្តែលោកបែរជាស្ដីបន្ទោសដល់អ្នកយកព័ត៌មានអាស៊ីសេរីដោយប្រើពាក្យធ្ងន់ៗទៅវិញ៖ «ឆ្កួតទេ បើគេថាមិនឆ្លើយហើយចាំនិយាយអ្វីទៀតឥឡូវយកទៅផ្សាយទៅអាសំឡេងហ្នឹង បើលោកឯងពូកែ យកទៅផ្សាយទៅ។ ដោយសារតែវាភ្លើអញ្ចឹងហើយ បានវាភ្លើចុះ»។
លោក សុខ ឥសាន បានបញ្ជាក់នៅក្នុងបណ្ដាញសង្គមតេឡេក្រាម ថាការដែលលោកហ៊ុន សែន មិនឆ្លើយសំនួរវែងឆ្ងាយរបស់អ្នកសារព័ត៌មានវិទ្យុអាស៊ីសេរី មិនមែនមានន័យថា មិនឲ្យវិទ្យុអាស៊ីសេរីបើកឡើងវិញទេ បើចង់បើកឡើងវិញអោយគោរពច្បាប់កម្ពុជាឲ្យបានត្រឹមត្រូវ។
កាលពីថ្ងៃទី១២ ខែកញ្ញា ឆ្នាំ២០១៧ វិទ្យុអាស៊ីសេរី បានបង្ខំចិត្តបិទការិយាល័យរបស់ខ្លួនក្នុងទីក្រុង ភ្នំពេញ ដោយសារតែការធ្វើទុក្ខបុកម្នេញពីរបបក្រុងភ្នំពេញ។
អ្នកវិភាគឯករាជ្យ លោក គឹម សុខ បានលើកឡើងថា ការបដិសេធមិនឆ្លើយនឹងសំនួរពីថ្នាក់ដឹកនាំរបបក្រុងភ្នំពេញ ដោយសារតែរបបនេះមិនគោរពសិទ្ធិទូលំទូលាយរបស់អ្នកសារព័ត៌មានទេ។
លោកបានបញ្ជាក់ថា អ្នកសារព័ត៌មានឯករាជ្យគឺជាសត្រូវដ៏ធំបំផុតនៃអ្នកដឹកនាំផ្ដាច់ការ៖ «ពីព្រោះមេដឹកនាំផ្ដាច់ការគេកាន់អំណាចដោយការបិទព័ត៌មាន ការបំភ័ន្តរាស្ត្របន្លំប្រជាជាតិឯង។ អ្វីដែលគេរក្សាបានគឺអំណាចនឹងប្រយោជន៍នៃបុគ្គល របស់គេ រឿងជាតិទៅបែបណា ពលរដ្ឋវេទនាទៅបែបណាគេអត់អារម្មណ៍ទេ»។
កាលពីថ្ងៃទី៣ ខែធ្នូ ក្រសួងការបរទេសកម្ពុជា នៅក្នុងសេចក្ដីថ្លែងការណ៍មួយស្ដីពីវិធានការនានាដើម្បីពង្រឹងលទ្ធិប្រជាធិបតេយ្យ និងលំហនយោបាយបានអោយដឹងថា វិទ្យុអាស៊ីសេរី បានផ្ដួចផ្ដើមបិទការិយាល័យតំណាងដោយខ្លួនឯង។ ដូច្នេះស្ថានីយទាំងពីរក៏មានសេរីភាពបើកការិយាល័យរបស់ខ្លួនឡើងវិញនៅកម្ពុជា។
បើទោះបីជាមានសញ្ញាវិជ្ជមានពីរដ្ឋាភិបាលក៏ដោយចុះក៏វិទ្យុអាស៊ីសេរី រួមទាំងអតីតបុគ្គលិកអាស៊ីសេរីនៅមិនទាន់មានស្ថានភាពល្អ ប្រសើរនៅឡើយទេ។
អតីតអ្នកយកព័តមានវិទ្យុអាស៊ីសេរីពីរនាក់គឺលោក អ៊ួន ឈិន និងលោក យាង សុធារិន្ទ ត្រូវបានរបបក្រុងភ្នំពេញចាប់ឃុំអស់រយៈពេល ២៨០ថ្ងៃ។ ក្រោយមកអ្នកទាំងពីរត្រូវបានដោះលែងអោយនៅក្រៅឃុំជាបណ្ដោះអាសន្នតែដាក់អោយស្ថិតនៅក្រោមការត្រួតពិនិត្យរបស់តុលាការ៕