ពលរដ្ឋ​មួយ​ចំនួន​សម្រុក​ធ្វើ​អត្តសញ្ញាណប័ណ្ណ​ដើម្បី​ត្រៀម​ឯកសារ​ទៅ​ចុះឈ្មោះ​បោះឆ្នោត

ដោយ ម៉ៅ សុធានី
2022.08.10
Share on WhatsApp
Share on WhatsApp
ពលរដ្ឋ​មួយ​ចំនួន​សម្រុក​ធ្វើ​អត្តសញ្ញាណប័ណ្ណ​ដើម្បី​ត្រៀម​ឯកសារ​ទៅ​ចុះឈ្មោះ​បោះឆ្នោត ពលរដ្ឋ​​ឈរ​តម្រង់​ជួរ​ទៅ​បោះឆ្នោត​ឃុំសង្កាត់ កាល​ពីថ្ងៃ​ទី៥ ខែ​មិថុនា ឆ្នាំ​២០២២។
រូប៖ ពលរដ្ឋផ្ដល់​ឱ្យ

ប្រជាពលរដ្ឋ​មួយចំនួន​នាំគ្នា​ទៅ​ធ្វើ​អត្តសញ្ញាណប័ណ្ណ​តាម​ឃុំ​សង្កាត់ ដើម្បី​ត្រៀម​ឯកសារ​យក​ទៅ​ចុះឈ្មោះ​បោះឆ្នោត​នៅពេល​ខាងមុខ ។ សង្គម​ស៊ីវិល​យល់ឃើញ​ថា ការ​ធ្វើ​អត្តសញ្ញាណប័ណ្ណ​ត្រៀម​ចុះឈ្មោះ​បោះឆ្នោត ជា​រឿង​ល្អ ព្រោះ​ពលរដ្ឋ​គួរ​ប្រើ​ប្រាស់​សិទ្ធិ​របស់​ពួកគាត់​ក្នុង​ការ​ជ្រើសរើស​តំណាង​តាម​រយះ​បោះឆ្នោត​នា​ពេល​ខាងមុខ ។

ប្រជាពលរដ្ឋ​នៅ​តាម​មូលដ្ឋាន​ភូមិ​ឃុំ សប្បាយចិត្ត​ចំពោះ​មន្ត្រី​នគរបាល​អត្តសញ្ញាណ​កម្ម ដែល​បាន​ចុះ​ធ្វើ​អត្តសញ្ញាណប័ណ្ណ​ពលរដ្ឋ​ដល់​ឃុំ​ដោយ​គ្មាន​ការ​បង់ប្រាក់ ដើម្បី​ពួកគាត់​មាន​ឯកសារ​គ្រប់គ្រាន់​ត្រៀម​ទៅ​បោះឆ្នោត​ជាតិ​នៅ​ឆ្នាំ​២០២៣​ខាងមុខ ។ ពួកគាត់​លើកឡើង​នេះ ក្រោយ​មន្ត្រី​អត្តសញ្ញាណ​កម្ម​បើក​យុទ្ធនា​ការ​ចុះ​ធ្វើ​អត្តសញ្ញាណប័ណ្ណ​ដល់​ប្រជាពលរដ្ឋ​ដល់​ឃុំ​សង្កាត់​នៅ​ទូទាំង​ប្រទេស ។

ប្រជាពលរដ្ឋ​រស់នៅ​ស្រុក​សំឡូត លោក ម៉ៅ រិទ្ធី ប្រាប់​វិទ្យុ​អាស៊ីសេរី​ថ្ងៃ​៩ សីហា ថា លោក​សប្បាយចិត្ត​ដែល​ក្រុម​ការងារ​អត្តសញ្ញាណ​កម្ម​ចុះ​ធ្វើ​អត្តសញ្ញាណប័ណ្ណ​ដល់​ឃុំ គឺ​ផ្តល់​ភាព​ងាយស្រួល​ក្នុង​ការ​មក​ធ្វើ​អត្តសញ្ញាណប័ណ្ណ ។ លោក ម៉ៅ រិទ្ធី បន្ត​ថា លោក​ទើប​គ្រប់​អាយុ ១៨ ឆ្នាំ ហើយ​ទើប​បាន​ធ្វើ​អត្តសញ្ញាណប័ណ្ណ ដើម្បី​យក​ទៅ​ចុះឈ្មោះ បោះឆ្នោត​នៅពេល​ឆាប់ៗ​ខាងមុខ ។ លោក​បញ្ជាក់​ថា អត្តសញ្ញាណប័ណ្ណ​មាន​អត្ថប្រយោជន៍​ច្រើន ព្រោះ​អាច​បញ្ជាក់​ពី​អត្តសញ្ញាណ​ខ្លួន ពេល​ធ្វើ​ដំណើរ​ទៅណា ឬ​ពេល​ជួប​គ្រោះថ្នាក់​ណាមួយ​កើតឡើង៖ «ត្រូវ​ការ​ធ្វើ​អ្វីមួយ ដូច​ប្លង់​ផ្ទះ ប្លង់ដី​អ៊ីចឹង ត្រូវការ​អាហ្នឹង (​អត្តសញ្ញាណប័ណ្ណ​) វា​ស្រូល ដូច​យើង​គ្រោះថ្នាក់​ចរាចរ​អ៊ីចឹង គេ​អាច​សម្គាល់​យើង​ដឹង​ថា នៅ​ណា កន្លែង​ណា​អ៊ីចឹង ។ ជិត​ដល់​បោះឆ្នោត​ហើយ​​អ៊ីចឹង​យើង​ធ្វើ​សម្រាប់​បោះឆ្នោត​អី ។ វា​ធ្វើ​ជិត​ផ្ទះ​អ៊ីចឹង​ស្រួល មិន​បាច់​ហត់​ទៅ​ឆ្ងាយ​អ៊ីចឹង»

ចំណែក​ប្រជាពលរដ្ឋ​ម្នាក់ទៀត​រស់​ស្រុក​សំឡូត លោកស្រី ជៀវ ស្រីមុំ ថ្លែង​ថា ផ្ទះ​លោកស្រី ឆ្ងាយ​ពី​សាលាស្រុក ដូច្នេះ​នៅ​ពេល​ដែល​សមត្ថកិច្ច ចុះ​មក​ធ្វើ​ដល់​ឃុំ គឺ​ងាយស្រួល​សម្រាប់​លោកស្រី ។ លោកស្រី បន្ត​ថា អត្តសញ្ញាណប័ណ្ណ​មាន​សារៈសំខាន់​ណាស់ សម្រាប់​ការ​រស់នៅ​ប្រចាំថ្ងៃ និង​អាច​ដោះស្រាយ​បញ្ហា​ជីវភាព​ប្រចាំថ្ងៃ ។ លោកស្រី​បន្ថែម​ថា អត្តសញ្ញាណប័ណ្ណ​របស់​លោកស្រី អស់​សុពលភាព ទើប​តម្រូវ​ឱ្យ​ធ្វើ​ថ្មី ដើម្បី​ត្រៀម​ឯកសារ​ទៅ​ចូលរួម​បោះឆ្នោត​ជ្រើសរើស​តំណាងរាស្ត្រ​នៅ​ឆ្នាំ​២០២៣៖ «វា​មាន​ផលប្រយោជន៍​ដូច​ថា យើង​ចេញដំណើរ​ដើរទៅ​ណា​អ៊ីចឹង​វា​ស្រួល ។ ហៃ​យើង​ចង់​យក​អ្វី ដូច​ថា​យើង​ខ្វះខាត​ជា​មុខរបរ​ចំការ​ស្រែ​យើង​អ៊ីចឹងៗ យើង​យក​ដាក់​ធនាគារ ។ យើង​ចេញដំណើរ​ទៅណា​អ៊ីចឹង​យើង​ដាក់​តាម​ខ្លួន​វា​ស្រួល ។ យើង​ដាក់​តាម​ហៅ​ប៉ៅ តាម​អីចឹង ទៅ​កន្លែង​ណាមួយ​អ៊ីចឹង​គេ​សុំ​មើល យើង​ហុច​ឱ្យ​គេ​មើល វា​ស្រួល​ជាង​អត្រានុកូលដ្ឋាន​យើង​វា​ធំ»

ពាក់ព័ន្ធ​យុទ្ធនាការ​ចុះ​ធ្វើ​អត្តសញ្ញាណប័ណ្ណ​ដោយ​ផ្ទាល់​ជូន​ដល់​ប្រជាពលរដ្ឋ​នេះ នាយរង​ផ្នែក​ទទួលបន្ទុក​អត្តសញ្ញាណប័ណ្ណ​សញ្ជាតិ​ខ្មែរ ស្រុក​សំឡូត លោក ព្រំ ណុប ប្រាប់​វិទ្យុ​អាស៊ីសេរី​ថា ការ​ផ្តល់​អត្តសញ្ញាណ​នៅ​តាម​ឃុំ​ក្នុងស្រុក​សំឡូត គឺ​មាន​បញ្ហា​ប្រឈម​មួយចំនួន ដោយ​ប្រជាពលរដ្ឋ​នៅ​ឆ្ងាយៗ​ពុំ​សូវ​ទទួល​បាន​ព័ត៌មាន​ទាក់ទង​យុទ្ធនាការ​ចុះ​ធ្វើ​អត្តសញ្ញាណប័ណ្ណ ។ លោក​បន្ត​ថា ពលរដ្ឋ​មួយចំនួន​ពុំ​មាន​ឯកសារ​គ្រប់គ្រាន់​ដើម្បី​អត្តសញ្ញាណប័ណ្ណ​នោះ​ទេ ដូចជា​ខ្វះ សៀវភៅ​គ្រួសារ សៀវភៅ​ស្នាក់នៅ និង​ឯកសារ​បញ្ជាក់​កំណើត​ជាដើម៖ «ប្រជាពលរដ្ឋ​ខ្លួនឯង​ក៏​គាត់ មានការ​យល់ដឹង​ចំពោះ​ការ​ធ្វើ​អត្តសញ្ញាណប័ណ្ណ​ហ្នឹង នៅ​មាន​កម្រិត ទាល់តែ​ចាំបាច់​ប្រើប្រាស់​ទើប​គាត់​មក​ធ្វើ ។ បើ​ថា​មិនទាន់​ចាំបាច់​ទាន់​ប្រើប្រាស់​ទេ ប្រជាពលរដ្ឋ​ក៏​គាត់​អត់​ធ្វើ​ដែរ ។ អ៊ីចឹង​អាហ្នឹង​លំបាក​ដែរ​ទោះ​ក្រុមការងារ​ចុះ​ហ្នឹង​ចុះ​មក​ផ្តល់​ដល់​មូលដ្ឋាន​មុខ​ផ្ទះ​គាត់​ជាដើម ។ បាទ​សម្រាប់​ប្រជាពលរដ្ឋ​ដែល​ត្រូវ​ផ្តល់​អត្តសញ្ញាណប័ណ្ណ​ជួន​ហ្នឹង ពលរដ្ឋ​គាត់​គ្រប់​អាយុ​១៥​ឆ្នាំ មានន័យថា​គាត់​គ្រប់​១៥​ឆ្នាំ​ពេញ អ៊ីចឹង​ចាប់ផ្តើម​ផ្តល់​ជូន​បាន​ហើយ ។ ហើយក៏​ដូចជា​ប្រជាពលរដ្ឋ​គាត់​គ្រប់​យូរហើយ ចាត់ទុកថា​នៅ​សេសសល់ អ៊ីចឹង​ក៏​ត្រូវ​ផ្តល់​ជូន​គាត់​ដែរ ។ មួយវិញទៀត​ផ្តល់​ជូន​អ្នក​ទុតិយតា មានន័យថា គាត់​ធ្លាប់​ប្រើ​អត្តសញ្ញាណប័ណ្ណ​គំរូ​ថ្មី​ហ្នឹងហើយ ប៉ុន្តែ​គាត់​ត្រូវ​ផុត​កំណត់​ក្នុង​ឆ្នាំ ២០២២ ហ្នឹង មុន​អស់​សុពលភាព ៩០​ថ្ងៃ​ក៏​ក្រុមការងារ​ត្រូវ​ផ្តល់​ថ្មី​ជូន​គាត់​ដែរ»

ជុំវិញ​រឿង​នេះ អ្នកសម្របសម្រួល​ផ្នែក​ឃ្លាំមើល​ការរំលោភ​សិទ្ធិមនុស្ស​ប្រចាំ​ខេត្ត​បាត់ដំបង លោក អ៊ិន គង់ជិត លើកឡើង​ថា ឯកសារ​អត្តសញ្ញាណប័ណ្ណ​ខ្មែរ​មាន​សារៈសំខាន់ និង​ពលរដ្ឋ​ត្រូវធ្វើ​ការ​ដាក់​តាម​ខ្លួន ដើម្បី​សំគាល់​ពី​អត្តសញ្ញាណ​ខ្លួន និង​ជា​ឯកសារ​រដ្ឋបាល​ក្នុង​ការ​ចុះឈ្មោះ​បោះឆ្នោត និង​បោះឆ្នោត​របស់​ពលរដ្ឋ​គ្រប់រូប ។ លោក​បន្ត​ថា អាជ្ញាធរ​គួរតែ​ផ្សព្វផ្សាយ និង​បង្ខិត​សេវា​សាធារណៈ​ឱ្យ​ជិត​ប្រជាពលរដ្ឋ និង​ផ្តល់​ភាព​ងាយ​ស្រួល​ដល់​ពលរដ្ឋ ។ លោក អ៊ិន គង់ជិត យល់​ថា នាំគ្នា​ទៅ ធ្វើ​អត្តសញ្ញាណប័ណ្ណ ព្រោះ​កន្លង​មក​ពលរដ្ឋ​ចង់​ប្រើប្រាស់​សិទ្ធិ​ក្នុង​ការ​ជ្រើសរើស​គណបក្ស​នយោបាយ​តាម​រយះ​ការបោះឆ្នោត​មានការ​លំបាក ព្រោះ​ត្រូវ​ទៅ​ធ្វើ​ឯកសារ​ឆ្ងាយ៖ «ការ​បង្ខិត​សេវា​សាធារណៈ ទៅដល់​តំបន់​ជនបទ ដែល​ឆ្លើយតប​នឹង​តម្រូវការ​របស់​ប្រជាពលរដ្ឋ ។ ព្រោះ​អី​ប្រជាពលរដ្ឋ​យើង​ទាំងអស់គ្នា ដែល​អត់​ទាន់​មាន​អត្តសញ្ញាណប័ណ្ណ​ប្រើប្រាស់ ឬក៏​មាន​ហើយ​ផុត​សុពលភាព ឬក៏​បាត់​អត្តសញ្ញាណប័ណ្ណ ត្រូវតែ​រួសរាន់​មក​ធ្វើ​អត្តសញ្ញាណប័ណ្ណ​សញ្ជាតិ​ខ្មែរ​ថ្មី​ហ្នឹង ឱ្យ​បាន​គ្រប់ៗ​គ្នា ព្រោះ​មាន​សារសំខាន់​ក្នុង​ការ​ប្រើប្រាស់ ជា​ឯកសារ​ផ្សេងៗ ដូចជា​ធ្វើ​ប៉ាស្ព័រ​(passport) ឬក៏​បង្ហាញ​អត្តសញ្ញាណ​របស់​ខ្លួន​ទៅ​កាន់​អាជ្ញាធរ​រដ្ឋបាល ឬក៏​សម្រាប់​ជា​ឯកសារ​ក្នុង​ការ​ចូលរួម​បោះឆ្នោត»

ប្រជាពលរដ្ឋ និង​មន្ត្រី​សង្គម​ស៊ីវិល អំពាវនាវ​ដល់​អាជ្ញាធរ និង​ក្រសួង​ស្ថាប័ន​ពាក់ព័ន្ធ ពន្លឿន​ការ​ធ្វើ និង​ចែក​អត្តសញ្ញាណប័ណ្ណ​ដែល​ធ្វើ​រួច​ដល់​ពលរដ្ឋ​ឱ្យ​បាន​ឆាប់ ដើម្បី​ងាយស្រួល​ដល់​ពលរដ្ឋ​ប្រើប្រាស់​ការ​ចុះឈ្មោះ​បោះឆ្នោត ។ គណៈកម្មការ​ជាតិ​រៀបចំ​ការបោះឆ្នោត កំណត់​ការ​ត្រៀម​រៀបចំ​ការពិនិត្យ​បញ្ជី​ឈ្មោះ និង​ការ​ចុះ​ឈ្មោះ​បោះឆ្នោត​ចាប់​ពី​ថ្ងៃទី​១០ សីហា រហូតដល់​ថ្ងៃ ៣ តុលា ឆ្នាំ ២០២២ ហើយ​ការបោះឆ្នោត​តំណាងរាស្ត្រ និង​ប្រព្រឹត្តទៅ​ថ្ងៃទី​២៣ ខែ​កក្កដា ឆ្នាំ​២០២៣ ខាង​មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
ពលរដ្ឋ​ខ្មែរ​នាំ​គ្នា​ធ្វើ​បាតុកម្ម ប្រឆាំង​វត្តមាន​លោក ហ៊ុន សែន នៅ​បុរីញ៉ូវយ៉ក​សហរដ្ឋ​អាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។