គណបក្ស​នយោបាយ និង​សង្គម​ស៊ីវិល​ចាត់​ទុក​សារ​របស់​លោក ស ខេង ថា​នឹង​គ្មាន​ប្រសិទ្ធភាព​ដល់​អាជ្ញាធរ​ថ្នាក់​ក្រោម​ទេ

ដោយ សន ចាន់រដ្ឋា
2022.06.01
Share on WhatsApp
Share on WhatsApp
គណបក្ស​នយោបាយ និង​សង្គម​ស៊ីវិល​ចាត់​ទុក​សារ​របស់​លោក ស ខេង ថា​នឹង​គ្មាន​ប្រសិទ្ធភាព​ដល់​អាជ្ញាធរ​ថ្នាក់​ក្រោម​ទេ ថ្ងៃទី៣១ ខែឧសភា ឆ្នាំ២០២២នេះ លោក ស ខេង អនុប្រធាន​គណបក្ស​ប្រជាជន​កម្ពុជា និង​ជា​ប្រធាន​ក្រុម​ការងារ​គណបក្ស​ប្រជាជន​កម្ពុជា​ចុះ​មូល​ដ្ឋាន​ខេត្តបាត់ដំបង
រូប៖ ហ្វេសប៊ុក លោក ស ខេង

មន្ត្រី​គណបក្ស​នយោបាយ និង​មន្ត្រី​សង្គម​ស៊ីវិល​ចាត់ទុក សារ​ណែនាំ​របស់លោក ស ខេង រដ្ឋមន្ត្រី​ក្រសួង​មហាផ្ទៃ ថា នឹង​គ្មាន​ប្រសិទ្ធ​ភាព​ដល់​អាជ្ញាធរ​ថ្នាក់​ក្រោម​ឡើយ ។ការ​បញ្ចេញ​ប្រតិកម្ម​នេះ​ធ្វើ​ឡើង​ក្រោយ​ពេល លោក ស ខេង បាន​ណែនាំ​ដល់​អាជ្ញាធរ​ឱ្យ​អនុវត្ត​តួនាទី​របស់​ខ្លួន​ទៅ​លើ​បក្ស​នយោបាយ​ទាំង​អស់​ដែល​នឹង​ជាប់​ឆ្នោត​ដឹកនាំ​ឃុំ​សង្កាត់​ដោយ​ស្មើភាព​គ្នា។

គណបក្ស​ប្រជាធិបតេយ្យ​មូលដ្ឋាន និង​មន្ត្រី​គណបក្ស​ភ្លើង​ទៀន លើក​ឡើង​ថា សារ​នយោបាយ​របស់​លោក ស ខេង នេះ​ថា គ្រាន់​តែ​ការ​និយាយ​ឱ្យ​តែ​ល្អ​មើល និង​គ្មាន​ប្រសិទ្ធភាព​ដល់​អាជ្ញាធរ​មូលដ្ឋាន​នោះ​ឡើយ ។ ប្រធាន​គណៈកម្មការ​នាយក​គណបក្ស​ប្រជាធិបតេយ្យ​មូល​ដ្ឋាន លោក​បណ្ឌិត យង់ សាំង​កុមារ យល់​ឃើញ​ថា ការ​ថ្លែង​របស់​លោក ស ខេង មិន​បាន​ឆ្លុះ​បញ្ចាំង នៃ​តួនាទី​គណបក្ស​នយោបាយ​ក្នុង​សង្គម​នោះ​ទេ។ លោក​បន្ត​ថា តួនាទី​គណបក្ស​នយោបាយ​ក្នុង​សង្គម​ គឺ​គណបក្ស​នយោបាយ​ណា​ឈ្នះ​ឆ្នោត​ដឹក​នាំ​ប្រទេស គឺ​ជា​អ្នក​ទទួល​ខុស​ត្រូវ​ក្នុង​ការ​ធ្វើ ​ចំណែក​គណបក្ស​មិន​ទាន់​ឈ្នះ​ឆ្នោត គឺ​មាន​តួនាទី​ជា​អ្នក​ឃ្លាំ​មើល និង​រិះគន់​ការ​អនុវត្ត​របស់​អ្នក​ដឹក​នាំ​នោះ។ លោក​លើក​ឡើង​ថា អ្នក​ដឹក​នាំ​គួរ​លើក​ទឹក​ចិត្ត​អោយ​ការ​បោះឆ្នោត​ខាង​មុខ​នេះ​ប្រព្រឹត្ត​ទៅ​ដោយ​សេរី និង​យុត្តិធម៌ ហើយ​មាន​តម្លា​ភាព ៖ «ជា​អ្នក​ដឹក​នាំ​នយោបាយ​ចាស់​ទុំ​យើង​គួរ​កុំ​ប្រើ​អា​ពាក្យ​ហ្នឹង​ណា៎ គាត់​ក្នុង​នាម​គណបក្ស​ដែល​ដឹក​នាំ ត្រូវ​បំពេញ​តួ​នាទី និង​កាតព្វកិច្ច​ខ្លួន​អោយ​ល្អ​តិច​ទៅ ហើយ​គណបក្ស​ដែល​ជា​គណបក្ស​ប្រឆាំង​ធម្មតា​គេ​តាម​ឃ្លាំ​មើល រិះគន់​ហើយ ព្រោះ​យើង​ធ្វើ​មិន​បាន​ល្អ​ ខ្វះ​ខាត​អី គេ​ត្រូវ​រិះគន់​ចំណុច​ហ្នឹង​ហើយ ដើម្បី​អោយ​ប្រជាពលរដ្ឋ​ហ្នឹង​ មើល​ឃើញ​តើ​គណបក្ស​កាន់​អំណាច​ហ្នឹង​ខ្វះ​ខាត​អី ហើយ​ការ​ប្រកួត​ប្រជែង​របៀប​ហ្នឹង​ហើយ បាន​អោយ​ប្រទេស​ជាតិ​រីក​ចម្រើន បើ​គណបក្ស​កាន់​អំណាច​គាត់​ចង់​កាន់​អំណាច​ទៀត​ខំ​ធ្វើ​ល្អ​ទៅ ​ហើយ​គណបក្ស​ដែល​ប្រឆាំង​បើ​ចង់​អោយ​ប្រជាពលរដ្ឋ​ឃើញ​ថា​ខ្លួន​ឯង​គ្រាន់​បើ​ជាង​អីចឹង​ខំ​រិះ​គុណ​អោយ​ច្រើន​ទៅ ​ហើយ​បង្ហាញ​គោល​នយោបាយ ដែល​ល្អ​ប្រសើរ​ជាង​គណបក្ស​កាន់​អំណាច អីចឹង »

លោក​បណ្ឌិត យង់ សាំង​កុមារ បន្ថែម​ថា សារ​របស់​លោក ស ខេង ដែល​បាន​ណែនាំ​ឱ្យ​អាជ្ញាធរ​នៅ​តាម​មូលដ្ឋាន​អនុវត្ត​តួរ​នាទី​ឱ្យ​ត្រឹមត្រូវ​នោះ​ នឹង​គ្មាន​ប្រសិទ្ធភាព​ដល់​អាជ្ញាធរ​ថ្នាក់​ក្រោម​ឡើយ ប្រតិកម្ម​មន្ត្រី​គណបក្ស​ប្រជាធិបតេយ្យ​មូលដ្ឋាន​នេះ​ ធ្វើ​ឡើង​ក្រោយ​ពេល​រដ្ឋមន្ត្រី​ក្រសួង​មហាផ្ទៃ លោក ស ខេង ក្នុង​ពិធី​ចុះ​ពង្រឹង​សកម្មជន​បក្ស​កាន់​អំណាច​ នៅ​ស្រុក​ស៊ីធរកណ្ដាល ខេត្ត​ព្រៃ​វែង ថ្ងៃទី២៨ឧសភា ដោយ​ណែ​នាំ​ឱ្យ​អាជ្ញាធរ​ពាក់ព័ន្ធ​ទាំង​អស់​ត្រូវ​​អនុវត្ត​តួនាទី​ឱ្យ​បាន​ស្មើភាព​គ្នា​គ្រប់​គណបក្ស​នយោបាយ ដែល​ឈ្នះ​ការ​បោះឆ្នោត​ធ្វើ​ជា​មេឃុំ​ចៅសង្កាត់​នៅ​ពេល​ខាងមុខ។


លោក ស ខេង ថ្លែង​ថា​ប្រជាពលរដ្ឋ​ជា​អ្នក​បញ្ចេញ​មតិ​តាមរយៈ​សន្លឹក​ឆ្នោត​ដូច្នេះ​អ្នកណា​ឈ្នះ​ឆ្នោត ​បើ​ទោះ​មកពី​គណបក្ស​ប្រឆាំង ក៏​ត្រូវ​តែ​គោរព​ពួកគាត់​ដែរ ។ លោក​បន្ត​ថា នេះ​គោល​ការណ៍​ប្រជាធិបតេយ្យ មិន​មែន​ថា ​ខ្ញុំ​មិន​បាន​បោះ​ឆ្នោត​ឱ្យ​អ្នក ដូច្នេះ​ខ្ញុំ​នឹង​​មិន​ស្ដាប់បញ្ជា និង​មិន​គោរព​តួនាទី​របស់​អ្នក​ឡើយ គឺ​ជា​រឿង​មិន​ត្រឹមត្រូវ​នោះ​ទេ ៖«យើង​ជា​អ្នកធ្វើ​ច្រើន ពួក​គាត់​អត់​ធ្វើ​ទេ តែ​គាត់​ចាំ​យក​កំហុស​របស់​យើង​នេះ ដើម្បី​ចាំ​ធ្វើ​ចំនុច​ខ្លាំង​របស់​គាត់ អត់​មាន​អី​ក្រៅ​ពី​ហ្នឹង​ទេ អត់​មាន​ក្រៅ​ពី​ហ្នឹង បើ​គ្រាន់​គោល​នយោបាយ គោល​ការណ៍​អី​នេះ គ្រាន់​តែ​សន្យា​ទេ សន្យាៗ​ទៅ អោយ​តែ​ពីរោះ​ស្តាប់​អីចឹង​ទៅ ប៉ុន្តែ​អត់​ទាន់​បាន​ធ្វើ​អី​ទេ តែ​គណបក្ស​ប្រជាជន​ទេ ដែល​បាន​ធ្វើ​តាំង​ពី​អើយ​មក យើង​និយាយ​តាំង​ពី​៧៩​មក យើង​ថា​ម៉េច​យើង​ធ្វើ​អីចឹង យើង​ធ្វើ​ច្រើន​ហើយ ធម្មតា​អ្នក​ធ្វើ​ច្រើន តែង​តែ​មាន​កំហុស​តិច ឬ​ច្រើន​អាហ្នឹង​បញ្ហា​អីចឹង ​អ្នក​មិន​ធ្វើ​មាន​កំហុស​មួយ​ទេ​ដែល​អត់​ធ្វើ ប៉ុន្តែ​ក្រៅ​ពី​ហ្នឹង គេ​អត់​ទាន់​បាន​ធ្វើ​មាន​អី​កំហុស»

ទោះ​ជា​យ៉ាង​ណា អនុប្រធាន​គណបក្ស​ភ្លើង​ទៀន​លោក ថាច់ ស៊ីថា ប្រាប់​វិទ្យុអាស៊ីសេរី​ថា ​សង្គម​ប្រជាធិបតេយ្យ​ការ​រិះគន់​ភាព​ចន្លោះ​ប្រហោង​របស់​រដ្ឋាភិបាល គឺ​ជា​តួនាទី​របស់​គណបក្ស​ក្រៅ​រដ្ឋាភិបាល ។ លោក​បន្ត​ថា លោក​ហាក់​គ្មាន​ជំនឿ​លើ​កា​ណែ​នាំ​របស់​លោក ស ខេង នេះ​ទេ ព្រោះ​លោក​ធ្លាប់​ណែនាំ​ទៅ​អាជ្ញាធរ​ជា​ច្រើន​លើក​ច្រើន​សារ​មក ប៉ុន្តែ​ការ​អនុវត្ត​ជាក់​ស្តែង​របស់​អាជ្ញាធរ​នៅតែ​ធ្វើ​ទុក្ខបុកម្នេញ​មក​លើ​សកម្មជន​គណបក្ស​ភ្លើង​ទៀន​ដដែល ៖«ក្នុង​សង្គម​ប្រជាធិបតេយ្យ​ធម្មតា​ទេ បើ​សិន​ណា វា​មាន​ភាព​ចាស់​ទុំ​បែប​ដូច​លោក ស ខេង លើក​ឡើង​ ខ្ញុំ​ជឿ​ថា​ក្នុង​សង្គម​ខ្មែរ​យើង​វា​ចាប់​ផ្តើម​មាន​ពន្លក​ប្រជាធិបតេយ្យ​ល្អ​ហើយ ប៉ុន្តែ​ពេល​ខ្លះ​ ប្រើ​បាន​តែ​ទ្រឹស្ដី ប៉ុន្តែ​មើល​ឃើញ​នៅ​ស្រុក​ខ្មែរ អាការ​បន្ត​ចាប់​ចោទ​ចាប់​ចង​វា​នៅ​តែ​វា​មាន​ទៀត​ ដោយ​សារ​តែ​រឿង​នយោបាយ ដូច្នេះ​ទន្ទឹម​និង​វោហារសាស្ត្រ​ហ្នឹង ការ​អនុវត្ត​ជាក់​ស្តែង​អោយ​វា​បាន​អនុវត្ត​ដូច​អ្វី​ដែល​ទ្រឹស្ដី​ដែល​បាន​និយាយ​ផង​ អាហ្នឹង​ទើប​វា​អាច​បង្ហាញ​ពី​អឺការ​អនុវត្ត​ពិត​ចំពោះ​លទ្ធិ​ប្រជាធិបតេយ្យ​បាទ»

ជុំវិញ​រឿង​នេះ អ្នក​សម្រប​សម្រួល​ផ្នែក​អង្កេត និង​តស៊ូ​មតិ នៃ​អង្គការ​ខុមហ្វ្រែល (COMFREL) លោក កន សាវាង្ស យល់​ឃើញ​ថា ប្រទេស​កាន់​គោល​ការ​ប្រជាធិបតេយ្យ​សេរី​ពហុបក្ស​ ហើយ​ការ​ប្រកួត​ប្រជែង ដោយ​ផ្អែក​ទៅ​លើ​គោល​នយោបាយ​ផ្សេងៗ​តាម​ការ​យល់​ឃើញ​រៀងៗខ្លួន ។លោក​បន្ត​ថា ការ​សន្យា​នៅ​ពេល​ឃោសនា​បោះឆ្នោត​ គឺ​ជា​ផ្នែក​មួយ​ដែល​គណបក្ស​នៅ​ក្រៅ​រដ្ឋាភិបាល មើល​ឃើញ​ពី​ចំនុច​ខ្វះ​ខាត​របស់​រដ្ឋាភិបាល ៖ «នៅ​ក្នុង​ដំណើរ​ការ​ នៃ​ការ​ដឹក​នាំ​ប្រទេស គឺ​គេ​បាន​ផ្តល់​អតិ​ភាព​ទៅ​អោយ​ ជា​ការ​ទទួល​ខុស​ត្រូវ​ទៅ​អោយ​គណបក្ស​នយោបាយ​ដែល​គាត់​ជាប់​ឆ្នោត ពី​ព្រោះ​គណបក្ស​នយោបាយ​ដែល​ជាប់​ឆ្នោត​នេះ ​គឺ​មាន​ភារៈ​កិច្ច​ក្នុង​ការ​ដឹក​នាំ នៅ​ក្នុង​ការអនុវត្ត​របស់​ខ្លួន​ដែល​មាន ក្នុង​រយះ​ពេល​៥ឆ្នាំ ហើយ​ទើប​មក​បោះឆ្នោត​ទៀត​ អញ្ចឹង​ការអនុវត្ត ការដឹកនាំ ការ​ធ្វើ​ ការ​ដោះ​ស្រាយ​ពី​បញ្ហា​ផ្សេង​ៗ​មិន​អាច​មាន​គណបក្ស​នយោបាយ​ណា​ទៅ​ធ្វើ​ការងារ​បាន​ទេ ក្រៅ​ពី​គណបក្ស​ដែល​ជាប់​ឆ្នោត​ហ្នឹង​ គណបក្ស​ដែល​កាន់​អំណាច​ហ្នឹង»

លោក កន សាវាង្ស បន្ថែម​ថា ភាព​ចាស់​ទុំ​នយោបាយ​មាន​រឿង​ច្រើន​ណាស់ គឺ​ភាព​ត្រឹមត្រូវ នៃ​ការ​ធ្វើ​នយោបាយ និង​ការ​ចូល​រួម​ឃោសនា នីតិវិធី​ឃោសនា​ ដោយ​ចេះ​គោរព​សិទ្ធិ​គណបក្ស​ដទៃ និង​គ្មាន​កលល្បិច ហើយ​អនុវត្ត​ដោយ​ស្មើ​ភាព​គ្នា ។

គិត​ត្រឹម​ថ្ងៃទី២៨ ខែឧសភា គណៈកម្មាធិការ​ជាតិ​រៀប​ចំការ​បោះឆ្នោត(..) ទទួល​បាន​ពាក្យ​បណ្ដឹង​ជុំវិញ​ដំណើរ​ការឃោសនា​បោះឆ្នោត​ចំនួន​៣៥ ។ អ្នក​នាំ​ពាក្យ គ..ប អះអាង​ថា បណ្ដឹង​ភាគ​ច្រើន គឺ​ជា​បណ្ដឹង​របស់​គណបក្ស​ប្រជាជន​កម្ពុជា(CPP) ប្ដឹង​ទៅ​បក្ស​ភ្លើង​ទៀន ។ បណ្ដឹង​ចំនួន​៣៥នេះ ត្រូវ​បាន​គណៈកម្មការ​ឃុំ-សង្កាត់​រៀប​ចំការ​បោះឆ្នោត បាន​ដោះស្រាយ​ជា​ង ១០បណ្ដឹង​ហើយ ។ ចំណែក​ជាង១០បណ្ដឹង​ទៀត កំពុង​ដោះ​ស្រាយ ហើយ​៥បណ្ដឹង​បាន​បញ្ជូន​ទៅ​ដោះ​ស្រាយ​នៅ​គណៈ​កម្មការ​រៀប​ចំការ​បោះឆ្នោត​ថ្នាក់​ខេត្ត ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដៃ 

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។