កូន​សកម្មជន​បក្ស​ភ្លើង​ទៀន​ខេត្តពោធិ៍សាត់ ដែល​ជាប់​ឃុំ​ជិត ១ឆ្នាំ​ទាមទារ​ឱ្យ​ដោះ​លែង​ឪពុក

ដោយ សន ចាន់រដ្ឋា
2022.12.05
Share on WhatsApp
Share on WhatsApp
កូន​សកម្មជន​បក្ស​ភ្លើង​ទៀន​ខេត្តពោធិ៍សាត់ ដែល​ជាប់​ឃុំ​ជិត ១ឆ្នាំ​ទាមទារ​ឱ្យ​ដោះ​លែង​ឪពុក (ឆ្វេង) លោក អ៊ុក សៅវ៉ារិន បេក្ខជន​ក្រុម​ប្រឹក្សា​ឃុំ​អន្សា​ចំបក់ ស្រុកក្រគរ និង (ស្ដាំ) ​លោក ឈួន ឈឿង បេក្ខជន​មេឃុំ​ស្រែ​ស្តុក ស្រុកកណ្តៀង ដែល​​សាលាដំបូង​ខេត្តពោធិ៍សាត់​​ផ្ដន្ទាទោស កាល​ពី​ខែកក្កដា និង​ខែ​សីហា ​ដាក់​ពន្ធនាគារ​ម្នាក់ ២ឆ្នាំ ដោយ​ចោទ​ពី​បទ «ក្លែង​បន្លំ​ឯកសារ​សាធារណៈ» ពាក់ព័ន្ធ​នឹង​ការ​រៀបចំ​បញ្ជី​ដាក់​ពាក្យ​បេក្ខជន​ឈរ​ឈ្មោះ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ អាណត្តិ​ទី៥ ​កាល​ពីដើម​ខែ​មីនា ឆ្នាំ២០២២។
រូបភាពពីពលរដ្ឋ

កូនៗ សកម្មជន​គណបក្ស​ភ្លើង​ទៀន ដែល​ជាប់ឃុំ​ជិត ១ឆ្នាំ នៅ​ពន្ធនាគារ​ខេត្ត​ពោធិ៍​សាត់ ទាមទារ​តុលាការ​ឱ្យ​ដោះ​លែង​ឪពុក ឱ្យ​មាន​សេរីភាព​ជួបជុំ​គ្រួសារ​ឡើង​វិញ ព្រោះ​ការ​ចោទប្រកាន់​នោះ ក្រោម​ហេតុ​ផល​នយោបាយ។ មន្ត្រី​សិទ្ធិ​មនុស្ស​យល់ថា​ ការ​ឃុំខ្លួន​មនុស្ស​ដែល​គ្មាន​កំហុស គឺ​ជា​រឿង​អយុត្តិធម៌​សម្រាប់​ពួក​គេ ហើយ​អំពាវនាវ​ដល់​រដ្ឋាភិបាល​ត្រូវ​បើក​លំហ​ប្រជាធិបតេយ្យ និង​គោរព​សិទ្ធិ​មនុស្ស​ឡើង​វិញ។

កូនៗ សកម្មជន​គណបក្ស​ភ្លើង​ទៀន​ខេត្តពោធិ៍សាត់​លើក​ឡើង​ថា តុលាការ​មិន​គួរ​បន្ត​ឃុំខ្លួន​ឪពុក​របស់​ពួក​គេ​យូរ​បែប​នេះ​ទេ ពី​ព្រោះ​គាត់​មិន​បាន​ប្រព្រឹត្ត​ខុស​ច្បាប់​ឡើយ។

កូនប្រុស​សកម្មជន​គណបក្ស​ភ្លើង​ទៀន​ខេត្តពោធិ៍សាត់ ដែល​កំពុង​ជាប់​ពន្ធនាគារ​លោក ឈួន ឈឿង គឺ​លោក ឈឿង ឆុងលី ថ្លែង​ថា ចាប់​តាំង​ពី​អាជ្ញាធរ​ឃុំខ្លួន​ឪពុក​របស់​លោក​ក្នុង​គុក ដោយ​គ្មាន​កំហុស​អស់​រយៈ​ពេល​ជិត​មួយ​ឆ្នាំ​មក​នេះ ធ្វើ​ឱ្យ​គ្រួសារ​របស់​លោក​រង​នូវ​ភាព​អយុត្តិធម៌ និង​ជួប​វិបត្តិ​សេដ្ឋកិច្ច​ក្នុង​ជីវភាព​គ្រួសារ។ លោក​ឱ្យ​ដឹង​ថា បច្ចុប្បន្ន​ជំងឺ​តេតាណុស និង​ជំងឺ​របេង​ឪពុក​របស់​លោក​នៅ​តែ​ធ្វើទុក្ខ​ជា​ប្រចាំ​នៅ​ក្នុង​បន្ទប់​ឃុំឃាំង ដែល​បណ្ដាល​ឱ្យ​រាងកាយ​គាត់​ទ្រុឌទ្រោម ហើយ​ស្គម​ស្គាំង​អស់​កម្លាំង​គួរ​ឱ្យ​ព្រួយ​បារម្ភ​ជា​ខ្លាំង។ លោកស្រី​ទទូច​ស្នើ​សុំ​សាលា​ឧទ្ធរណ៍​បាត់ដំបង​ជួយ​ពន្លឿន​នីតិវិធី​លើ​បណ្ដឹង​ជំទាស់​នឹង​សាលក្រម​សាលា​ដំបូង ហើយ​ដោះ​លែង​ឪពុក ព្រម​ទាំង​សកម្មជន ដែល​កំពុង​ជាប់​ឃុំ​ទាំង​អស់​ឱ្យ​មាន​សេរីភាព​ឡើង​វិញ។

លោក ឈឿង ឆុងលី៖ «គាត់​អត់​មាន​ធ្វើអ្វី​ខុស​ផង​មក​ចាប់​គាត់​អ៊ីចឹង ចាប់​អត់​​ដឹង​មូលហេតុ វា​អយុត្តិធម៌​សម្រាប់​ក្រុម​គ្រួសារ​ខ្ញុំ ហើយ​ខ្ញុំ​ស្នើសុំ​ឱ្យ​តុលាការ​ដោះលែង​គាត់​ឱ្យ​បាន​នៅ​ក្រៅ​ឃុំ ណាមួយ​គ្រួសារ​អត់​មាន​លទ្ធភាព​ទៅ​មើល ឬ​អើត​គាត់​អ៊ីចឹង សូម​ឱ្យ​តុលាការ​ដោះ​លែង​គាត់​មក»

ស្រដៀង​គ្នា​នេះ​ដែរ កូនប្រុស​សកម្មជន​គណបក្ស​ភ្លើង​ទៀន​ខេត្ត​ពោធិ៍សាត់ ដែល​កំពុង​ជាប់​ពន្ធនាគារ​ម្នាក់​ទៀត លោក អ៊ុក សៅវ៉ារិន គឺ​លោក អ៊ុក សៅសុភារ៉ា នៅ​តែ​អះអាង​ថា ឪពុក​របស់​លោក គឺ​ជា​មនុស្ស​ស្អាតស្អំ​ទទួល​បាន​ការ​គោរព​ស្រឡាញ់​ពី​ពលរដ្ឋ ដោយ​មិន​បាន​ក្លែងបន្លំ​ឯកសារ​រៀបចំ​បញ្ជី​ឈ្មោះ​បេក្ខជន​ឈរ​ឈ្មោះ​បោះ​ឆ្នោត​ដូច​ការ​ចោទ​ប្រកាន់​របស់​តុលាការ​ឡើយ។ លោក​ចាត់​ទុក​ការ​ចាប់​ឃុំ​ខ្លួន​ឪពុក​ដាក់​ពន្ធនាគារ​ជិត​មួយ​ឆ្នាំ​មក​នេះ​ធ្វើ​ឱ្យ​គ្រួសារ​រង​ការ​ឈឺចាប់​រក​អ្វី​មក​ប្រៀប​ផ្ទឹម​មិន​បាន​នោះ​ទេ។ ទោះជា​យ៉ាង​ណា​ក្ដី កូន​សកម្មជន​បក្ស​ភ្លើង​ទៀន​រូប​នេះ​ជឿជាក់​ថា​តុលាការ​នឹង​មិន​ប្រគល់​សេរីភាព​ជូន​ឪពុក​ឡើង​វិញ​ទេ បើសិន​គ្មាន​ដំណោះស្រាយ​ផ្នែក​នយោបាយ​ណាមួយ​កើត​ឡើង​នោះ។

លោក អ៊ុក សៅសុភារ៉ា៖ «ខ្ញុំ​មិន​អាច​ទទួល​យក​បានទេ ចំពោះ​ការ​ចោទ​ប្រកាន់​របស់​តុលាការ​ថា ឪពុក​ខ្ញុំ​ក្លែង​បន្លំ​ឯកសារ​សាធារណៈ​អី​ហ្នឹង រឿង​អយុត្តិធម៌​ហួស​ពី​អយុត្តិធម៌​ហើយ តែ​ខ្ញុំ​មិន​ដឹង​ពួក​គាត់​យល់​យ៉ាង​ណា​ទើប​យក​មនុស្ស ដែល​គ្មាន​កំហុស​ទៅ​ឃុំ​ឃាំង​ឱ្យ​បែក​ពី​ក្រុម​គ្រួសារ»

លោក អ៊ុក សៅសុភារ៉ា ឱ្យ​ដឹង​ថា បន្ទាប់​ពី​សវនាការ​កាល​ពី​ចុង​ខែ​តុលា សាលា​ឧទ្ធរណ៍​បាត់ដំបង​ធ្លាប់​បញ្ជាក់​ថា សំណុំរឿង​ឪពុក​របស់​លោក​នឹង​ប្រកាស​សាលដីកា​លើ​បណ្ដឹង​ទាស់ នៅ​ថ្ងៃ​ទី១៥ ខែវិច្ឆិកា ប៉ុន្តែ​ជាក់ស្ដែង​រយៈ​ពេល​ជិត​មួយ​ខែ​មក​ហើយ ខាង​តុលាការ​មិនទាន់​ប្រកាស​នៅ​ឡើយ។

បេក្ខជន​មេឃុំ​ស្រែ​ស្តុក ស្រុកកណ្តៀង គឺ​លោក ឈួន ឈឿង និង​បេក្ខជន​ក្រុម​ប្រឹក្សា​ឃុំ​អន្សា​ចំបក់ ស្រុកក្រគរ លោក អ៊ុក សៅវ៉ារិន ត្រូវ​បាន​អាជ្ញាធរ​ខេត្តពោធិ៍សាត់​ចាប់​ឃុំខ្លួន​នៅ​ដើម​ខែ​មីនា ឆ្នាំ២០២២ ពាក់ព័ន្ធ​ការ​រៀបចំ​បញ្ជី​ដាក់​ពាក្យ​បេក្ខជន​ឈរ​ឈ្មោះ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ អាណត្តិ​ទី៥។ កាល​ពី​ខែកក្កដា និង​ខែ​សីហា សាលាដំបូង​ខេត្តពោធិ៍សាត់​បាន​ផ្ដន្ទាទោស​ពួក​គាត់​ដាក់​ជាប់ពន្ធនាគារ​ម្នាក់ ២ឆ្នាំ ពី​បទ «ក្លែង​បន្លំ​ឯកសារ​សាធារណៈ»

វិទ្យុ​អាស៊ី​សេរី​មិន​អាច​ទាក់​ទង ប្រធាន​អង្គភាព​អ្នកនាំ​ពាក្យ​រដ្ឋាភិបាល​លោក ផៃ ស៊ីផាន និង​អ្នកនាំ​ពាក្យ​សាលា​ឧទ្ធរណ៍​បាត់ដំបង​អ្នក​ស្រី ទៀត សំបូរ ដើម្បី​ឆ្លើយ​តប​ជុំវិញ​រឿង​នេះ​បាន​ទេ នៅ​ថ្ងៃ​ទី៥ ខែធ្នូ។

ទោះ​យ៉ាង​ណា​ក្ដី ក្រុម​គ្រួសារ និង​អង្គការ​សង្គម​ស៊ីវិល​បាន​ចាត់​ទុក​រឿង​ក្ដីក្ដាំ​នេះ​ថា ជា​ការ​ធ្វើ​ទុក្ខបុកម្នេញ​ផ្នែក​នយោបាយ និង​ថ្កោលទោស​រដ្ឋាភិបាល​លោក ហ៊ុន សែន ចំពោះ​ការប្រើប្រាស់​ប្រព័ន្ធ​តុលាការ ដើម្បី​បង្ក្រាប​សំឡេង​គណបក្ស​នយោបាយ​ដែល​លេច​ធ្លោ និង​ជា​ដៃគូ​ប្រកួត​ប្រជែង​ជា​មួយ​គណបក្ស​កាន់​អំណាច។

ជុំវិញ​រឿង​នេះ អ្នក​ឃ្លាំ​មើល​ការរំលោភ​សិទ្ធិ​មនុស្ស​នៃ​អង្គការ​លីកាដូ ប្រចាំ​ខេត្តពោធិ៍សាត់​លោក ចឹក ចិត្រ្តា មាន​ប្រសាសន៍​ថា សវនាការ​កន្លង​មក​សាលាដំបូង​ខេត្តពោធិ៍សាត់​ពុំ​មាន​ភស្តុតាង និង​សាក្សី​ដាក់​បន្ទុក​លើ​លោក ឈួន ឈឿង និង​លោក អ៊ុក សៅវ៉ារិន ដូច​ការ​ចោទ​ប្រកាន់​ឡើយ។ លោក​បញ្ជាក់​ថា ការ​បន្ត​ឃុំខ្លួន​សកម្មជន​បក្ស​ភ្លើង​ទៀន​ដែល​គ្មាន​កំហុស​ដូច្នេះ គឺ​ជា​រឿង​អយុត្តិធម៌​សម្រាប់​សកម្មជន​នយោបាយ ដែល​មាន​និន្នាការ​ផ្ទុយ​ពី​គណបក្ស​កាន់​អំណាច។ លោក ចឹក ចិត្រ្តា អំពាវនាវ​ដល់​រដ្ឋាភិបាល​ត្រូវ​បើក​លំហ​ប្រជាធិបតេយ្យ និង​ការ​គោរព​សិទ្ធិ​មនុស្ស ដោយ​ដោះលែង​សកម្មជន​​ទាំងនោះ​ឱ្យ​មាន​សេរីភាព​ឡើង​វិញ ដើម្បី​ឱ្យ​បរិយាកាស​នយោបាយ​ល្អ​មុន​ការ​បោះ​ឆ្នោត​ជាតិ​ខាង​មុខ និង​បញ្ចៀស​ការ​រិះគន់​ពី​សហគមន៍​ជាតិ​និង​អន្តរ​ជាតិ។

លោក ចឹក ចិត្រ្តា៖ «ក្នុង​នាម​សង្គម​ស៊ីវិល​ទទូច​អាជ្ញាធរ​តុលាការ​ទម្លាក់​ចោល​ការ​ចោទ​ប្រកាន់​ពួកគាត់​មុន​ពេល​បោះ​ឆ្នោត​ឆ្នាំ២០២៣​ជិត​មក​ដល់ ដើម្បី​ឱ្យ​ការ​បោះ​ឆ្នោត​ឆ្នាំ​២០២៣​ខាង​មុខ​ទទួល​បាន​ភាព​យុត្តិធម៌ បើ​មិន​ដូច្នេះ​ទេ នឹង​ធ្វើ​ឱ្យ​​ប្រព័ន្ធ​​សេរី លទ្ធិ​ប្រជាធិបតេយ្យ និង​សិទ្ធិមនុស្ស​កាន់​តែ​ធ្លាក់​ចុះ​ធ្ងន់ធ្ងរ​ដោយ​សារ​ការ​ព្យាយាម​រឹតត្បិត​លើ​ប្រជាពលរដ្ឋ​ដែល​មាន​និន្នាការ​ផ្ទុយ​ពី​ខ្លួន»

កាល​ពី​ពេល​ថ្មីៗ នេះ សេចក្ដី​ប្រកាស​ព័ត៌មាន​របស់​សេត​វិមាន​ឱ្យ​ដឹង​ថា ក្នុង​ជំនួប​រវាង​ប្រធានាធិបតី​អាមេរិក​លោក ចូ បៃឌិន ជាមួយ​លោក ហ៊ុន សែន ក្នុង​អំឡុង​កិច្ចប្រជុំ​កំពូល​អាស៊ាន​កន្លង​ទៅ លោក ចូ បៃឌិន ទាមទារ​ឱ្យ​បើក​ចំហ​សិទ្ធិ​ពលរដ្ឋ និង​សិទ្ធិ​នយោបាយ សម្រាប់​ការ​បោះ​ឆ្នោត​ឆ្នាំ២០២៣ និង​ទាមទារ​ទៅ​រដ្ឋាភិបាល​លោក ហ៊ុន សែន ឱ្យ​ដោះ​លែង​អ្នក​ទោស​នយោបាយ រួម​ទាំង​កញ្ញា សេង ធារី ផង​ដែរ។

ប៉ុន្តែ​សង្គម​ស៊ីវិល​មើល សកម្មជន​សង្គម​ឃើញ​ថា​មកដល់​ពេលនេះ​រដ្ឋាភិបាល​លោក ហ៊ុន សែន មិនទាន់​ឆ្លើយ​តប​ជា​វិជ្ជមាន​ណា​មួយ ដើម្បី​ស្ដារ​ប្រជាធិបតេយ្យ និង​ការ​គោរព​សិទ្ធិ​មនុស្ស​នៅ​កម្ពុជា​ឱ្យ​ប្រសើរ​នោះ​ទេ ផ្ទុយ​ទៅ​វិញ​សកម្មជន​នយោបាយ សកម្មជន​សង្គម និង​មេដឹកនាំ​សហជីព​កាន់​តែ​រង​ការ​រឹត​ត្បិត សិទ្ធិ និង​ជាប់​ពន្ធនាគារ​ជា​បន្ត​បន្ទាប់ ដែល​បង្ហាញ​​ឱ្យ​ឃើញ​ច្បាស់​ថា រដ្ឋាភិបាល​លោក ហ៊ុន សែន ខ្វះ​ទំនួល​ខុស​ត្រូវ​ចំពោះ​ការ​អនុវត្ត​កាតព្វកិច្ច​របស់​ខ្លួន ដើម្បី​ឆ្លើយ​តប​នឹង​សំណើ​របស់​សហគមន៍​ជាតិ​និង​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។