ព្រឹទ្ធសភា​សម្រេច​ប្រជុំ​ដក​អភ័យឯកសិទ្ធិ​សមាជិក​គណបក្ស​ប្រឆាំង​នៅ​ថ្ងៃ​ទី​១ កញ្ញា

ដោយ យ៉ង ចាន់តារា
2016-08-31
Share
ម៉ម ប៊ុននាង ២០១៦ ៨៥៥ លោក ម៉ម ប៊ុននាង សមាជិក​ព្រឹទ្ធសភា​គណបក្ស​ប្រជាជន​កម្ពុជា និង​ជា​អ្នកនាំពាក្យ​ព្រឹទ្ធសភា ថ្លែង​ក្រោយ​កិច្ច​ប្រជុំ​គណៈកម្មាធិការ​អចិន្ត្រៃយ៍​ព្រឹទ្ធសភា នា​វិមាន​ព្រឹទ្ធសភា នៅ​ថ្ងៃ​ទី​៣១ ខែសីហា ឆ្នាំ​២០១៦។
RFA

ព្រឹទ្ធសភា​នឹង​បើក​សម័យ​ប្រជុំ​ពេញអង្គ​នីតិកាល​ទី​៣ លើក​ទី​៩ ដើម្បី​ពិភាក្សា​ជុំវិញ​សំណើសុំ​ដក​អភ័យ​ឯក​សិទ្ធិ​សមាជិក​ព្រឹទ្ធសភា​គណបក្ស សម រង្ស៊ី អ្នកស្រី ថាក់ ឡានី ដែល​ស្នើ​ឡើង​ដោយ​អគ្គ​ព្រះរាជអាជ្ញា​អម​សាលាឧទ្ធរណ៍។ គណបក្ស​ប្រឆាំង និង​សង្គម​ស៊ីវិល ចាត់​ទុក​ថា នេះ​ជា​ការ​ដាក់​សម្ពាធ​ផ្នែក​នយោបាយ ហើយ​ថា វា​នឹង​ធ្វើ​ឱ្យ​ស្ថានការណ៍​នយោបាយ​កាន់តែ​តានតឹង។

​សម័យ​ប្រជុំ​ពេញអង្គ​ពេញអង្គ​ព្រឹទ្ធ​សភា​នៅ​ថ្ងៃ​ទី​១ ខែ​កញ្ញា នឹង​មាន​របៀបវារៈ​តែ​មួយ​គត់ គឺ​ការ​ពិភាក្សា​លើ​សំណើសុំ​ដក​អភ័យ​ឯក​សិទ្ធិ អ្នកស្រី ថាក់ ឡានី។

អ្នក​នាំ​ពាក្យ​ព្រឹទ្ធសភា លោក ម៉ម ប៊ុននាង ថ្លែង​ក្រោយ​កិច្ច​ប្រជុំ​គណៈកម្មាធិការ​អចិន្ត្រៃយ៍​នៅ​ថ្ងៃ​ទី​៣១ ខែ​សីហា ថា ព្រឹទ្ធ​សភា​ប្រកាន់​ជំហរ​ប្រជុំ​ដក​អភ័យ​ឯក​សិទ្ធិ​របស់​អ្នកស្រី ថាក់ ឡានី បើ​ទោះ​ជា​សមាជិក​គណៈកម្មាធិការ​អចិន្ត្រៃយ៍​ព្រឹទ្ធ​សភា​ពី​ខាង​គណបក្ស សម រង្ស៊ី ស្នើ​សុំ​លុប​ចោល​ក៏ដោយ។

លោក​ថា អ្នកស្រី ថាក់ ឡានី តែង​បដិសេធ​ការ​ចោទ​ប្រកាន់ ដូច​នេះ​វា​ជា​រឿង​ដែល​ត្រូវ​អនុវត្ត​តាម​នីតិវិធី​តុលាការ ដែល​មិន​អាច​គ្រាន់តែ​សុំទោស​ជា​សាធារណៈ​ដូច​គណបក្ស​ប្រឆាំង​ស្នើ​នោះ​ឡើយ៖ «គណៈកម្មាធិការ​អចិន្ត្រៃយ៍​រក​ឃើញ​ថា គាត់​អត់​បាន​ទទួល​ស្គាល់​ពី​កំហុស​របស់​គាត់ ថា​បាន​មាន​ប្រសាសន៍​ដោយ​ឆ្គាំឆ្គង ឬ​ក៏​ជ្រុល​ហួស​អ្វី​ផង គឺ​ថា​គេ​កាត់​ត​ទេ។ អ៊ីចឹង​បាន​ជា​មេធាវី​របស់​សម្ដេច​ដាក់​ពាក្យ​បណ្ដឹង​ដើម្បី​ឱ្យ​អនុវត្ត​ទៅ​តាម​នីតិវិធី​ច្បាប់»

​ប្រធាន​ស្ដីទី​គណបក្ស សម រង្ស៊ី និង​ជា​សមាជិក​គណៈកម្មាធិការ​អចិន្ត្រៃយ៍​ព្រឹទ្ធសភា លោក ទាវ វណ្ណុល ថ្លែង​ថា លោក​បាន​ស្នើ​ឱ្យ​ព្រឹទ្ធសភា​លុប​ចោល​កិច្ច​ប្រជុំ​នោះ ដោយ​លើក​ហេតុផល​ថា វា​ជា​រឿង​បញ្ចេញ​មតិ​ដែល​គួរ​ដោះស្រាយ​ដោយ​ការ​សុំទោស​ជា​សាធារណៈ​វិញ ជា​ជាង​បើក​កិច្ចប្រជុំ​ដក​អភ័យ​ឯកសិទ្ធិ។ លោក​ហៅ​ករណី​នេះ​ថា ជា​ការ​គាបសង្កត់​ផ្នែក​នយោបាយ​មក​លើ​គណបក្ស​ប្រឆាំង​ដែល​នឹង​ធ្វើ​ឱ្យ​ស្ថានការណ៍​នយោបាយ​កាន់​តែ​តានតឹង៖ «នេះ​ជា​រឿង​កំប៉ិកកំប៉ុក​បំផុត​ក្នុង​ការ​បញ្ចេញ​មតិ។ វា​មិនមែន​ដូចជា​តុលាការ​ចោទ​ថា ជា​បទ​បរិហារកេរ្តិ៍ និង​ញុះញង់​ឱ្យ​មាន​អសន្តិសុខ​ក្នុង​សង្គម​នោះ​ទេ»

​កាល​ពី​ដើម​ខែ​សីហា លោក​នាយករដ្ឋមន្ត្រី ហ៊ុន សែន បាន​ប្តឹង​សមាជិក​ព្រឹទ្ធសភា​គណបក្ស សម រង្ស៊ី អ្នកស្រី ថាក់ ឡានី និង​ប្រធាន​គណបក្ស​សង្គ្រោះ​ជាតិ លោក សម រង្ស៊ី ទាក់ទង​នឹង​ការ​ចោទ​ថា រូប​លោក​និង​រដ្ឋាភិបាល​ជា​អ្នក​នៅ​ពីក្រោយ​ខ្នង​នៃ​ឃាតកម្ម​លើ​បណ្ឌិត កែម ឡី កាលពី​ថ្ងៃ​ទី​១០ ខែ​កក្កដា។ លោក​ប្ដឹង​សុំ​ឱ្យ​តុលាការ​ផ្ដន្ទាទោស​លោក សម រង្ស៊ី និង​អ្នកស្រី ថាក់ ឡានី តាម​ផ្លូវ​ច្បាប់ និង​ទាមទារ​សំណង​ជំងឺ​ចិត្ត​ក្នុង​ម្នាក់​ចំនួន ១០០​រៀល (មួយ​រយ​រៀល)។

​មេធាវី​តំណាង​របស់​អ្នកស្រី ថាក់ ឡានី លោក សំ សុគង់ បញ្ជាក់​ថា លោក​កំពុង​តាមដាន​នីតិវិធី​របស់​ព្រឹទ្ធសភា។ លោក​ថា បើ​ទោះជា​មិន​សូវ​មាន​សង្ឃឹម​ក្តី លោក​នឹង​ប្រឹងប្រែង​ឱ្យ​អស់​លទ្ធភាព​ដើម្បី​តស៊ូ​មតិ​ផ្នែក​ច្បាប់​ចំពោះ​ករណី​នេះ។

រដ្ឋធម្មនុញ្ញ​មាត្រា ១០៤ ថ្មី ចែង​ថា សមាជិក​ព្រឹទ្ធសភា​មាន​អភ័យ​ឯកសិទ្ធិ​សភា។ ព្រឹទ្ធសភា​រូប​ណា​ក៏ដោយ​មិន​អាច​ត្រូវ​បាន​ចោទ​ប្រកាន់ ចាប់​ខ្លួន ឃាត់​ខ្លួន ឬ​ឃុំ​ខ្លួន​ដោយ​ហេតុ​ពី​បាន​សម្ដែង​យោបល់ ឬ​បញ្ចេញមតិ​ក្នុង​ការ​បំពេញ​មុខងារ​របស់​ខ្លួន​សោះ​ឡើយ។ ការ​ចោទ​ប្រកាន់ ការ​ចាប់​ខ្លួន ការ​ឃាត់​ខ្លួន ឬ​ការ​ឃុំ​ខ្លួន​សមាជិក​ណា​មួយ​នៃ​ព្រឹទ្ធសភា នឹង​អាច​ធ្វើ​ទៅ​កើត លុះត្រាតែ​មាន​ការ​យល់​ព្រម​ពី​ព្រឹទ្ធ​សភា ឬ​ពី​គណៈកម្មាធិការ​អចិន្ត្រៃយ៍​របស់​ព្រឹទ្ធសភា​ក្នុង​ចន្លោះ​សម័យ​ប្រជុំ​នៃ​ព្រឹទ្ធសភា វៀរលែងតែ​ក្នុង​ករណី​បទល្មើស​ព្រហ្មទណ្ឌ​ជាក់ស្ដែង។

ករណី​នេះ ក្រសួង​មាន​សមត្ថកិច្ច​ត្រូវ​ធ្វើ​សេចក្ដី​រាយការណ៍​ជូន​ព្រឹទ្ធសភា ឬ​ជូន​គណៈកម្មាធិការ​អចិន្ត្រៃយ៍​ព្រឹទ្ធ​សភា​ជា​បន្ទាន់​ដើម្បី​សម្រេច។ សេចក្ដី​សម្រេច​របស់​គណៈកម្មាធិការ​អចិន្ត្រៃយ៍​ត្រូវ​ដាក់​ជូន​សម័យប្រជុំ​ព្រឹទ្ធសភា​ខាង​មុខ ដើម្បី​អនុម័ត​តាម​មតិ​ភាគ​ច្រើន​ពីរ​ភាគ​បី​នៃ​សមាជិក​ព្រឹទ្ធ​សភា​ទាំង​មូល។

​ព្រឹទ្ធ​សភា​មាន​សមាជិក​ទាំង​អស់ ៦១​រូប។ នៅ​អាណត្តិ​ទី​៣ នេះ សមាជិក​ព្រឹទ្ធ​សភា​គណបក្ស​ប្រជាជន​កម្ពុជា មាន​ចំនួន ៤៦​រូប គណបក្ស សម រង្ស៊ី មាន ១១​រូប ២​រូប តែងតាំង​ដោយ​ព្រះមហាក្សត្រ និង ២​រូប​ផ្សេង​ទៀត ជ្រើសតាំង​ដោយ​រដ្ឋ​សភា។ នេះ​មាន​ន័យ​ថា ការ​ដក​អភ័យឯកសិទ្ធិ​អ្នកស្រី ថាក់ ឡានី អាច​ធ្វើ​បាន​ដោយ​ងាយ ព្រោះ​សមាជិក​ព្រឹទ្ធ​សភា​គណបក្ស​ប្រជាជន​កម្ពុជា មាន​សំឡេង​លើស​ពី​ពីរ​ភាគ​បី​ទៅ​ទៀត។

អ្នក​គ្រប់គ្រង​បច្ចេកទេស​ការិយាល័យ​ស៊ើប​អង្កេត​នៃ​អង្គការ​សិទ្ធិមនុស្ស​លីកាដូ (LICADHO) លោក អំ សំអាត យល់​ឃើញ​ថា ការ​ដក​អភ័យឯកសិទ្ធិ​អ្នកស្រី ថាក់ ឡានី មិន​មែន​ជា​រឿង​ល្អ​នោះ​ទេ ពីព្រោះ​វា​នឹង​បង្ហាញ​ពី​ការ​អនុវត្ត​នីតិវិធី​របស់​ស្ថាប័ន​ជាតិ ស្ថិត​នៅ​ក្រោម​សម្ពាធ​នយោបាយ។

លោក​ថា ករណី​នេះ​ផ្ដើម​ចេញ​ពី​ការ​ចោទ​ប្រកាន់​គ្នា ទាក់ទង​នឹង​ឃាតកម្ម​លើ​បណ្ឌិត កែម ឡី ដូច​នេះ​ជម្រើស​ល្អ​បំផុត គឺ​ការ​វែក​មុខ​ចាប់​ជន​ដៃដល់ និង​អ្នក​ពាក់ព័ន្ធ​ដែល​នៅ​ពី​ក្រោយ​ខ្នង​មក​ផ្ដន្ទាទោស​តាម​ច្បាប់៖ «មក​ទល់​ឥឡូវ ដូច​ជា​អត់​មាន​អី​ចលាចល​ក្នុង​សង្គម​ទេ ដោយសារ​រឿង​គាត់​និយាយ​ហ្នឹង​ទេ។ បើ​សិន​ជា​មាន​ហានិភ័យ ឬ​មាន​ចលាចល​ដោយសារ​ពាក្យ​សម្ដី​របស់​គាត់ អា​ហ្នឹង​ទើប​ជា​បទល្មើស​មួយ​ដែល​គួរ​តែ​ចាត់​វិធានការ​តាម​ផ្លូវ​ច្បាប់។ មួយ​ទៀត​យើង​ដឹង​ហើយ​ថា ការ​និយាយ​អ៊ីចឹង​វា​អាច​ប៉ះពាល់​ទៅ​ដល់​កិត្តិយស តែ​ខ្ញុំ​គិត​ថា អ្នក​នយោបាយ​គួរ​តែ​ជជែក​គ្នា​តាម​បែប​នយោបាយ ឬក៏​អាច​ជា​ការ​សុំទោស​ជា​សាធារណៈ​ដូច​ការ​លើក​ឡើង​អ៊ីចឹង»

​គិត​មក​ដល់​ពេល​នេះ សមាជិក​រដ្ឋសភា និង​ព្រឹទ្ធសភា​គណបក្ស​ប្រឆាំង ៧​រូប​ហើយ ដែល​ត្រូវ​បាន​តុលាការ​កាត់ទោស និង​ឃុំ​ខ្លួន​នៅ​ពន្ធនាគារ ព្រម​ទាំង​ជាប់​បណ្ដឹង​នៅ​តុលាការ។ អ្នក​ជាប់ឃុំ​រួម​មាន លោក ហុង សុខហួរ និង​លោក អ៊ុំ សំអាន។ ចំណែក​អ្នក​កំពុង​ជាប់​បណ្ដឹង​រួម​មាន លោក សម រង្ស៊ី លោក កឹម សុខា លោក តុ វ៉ាន់ចាន់ និង​លោក ពិន រតនា និង​អ្នកស្រី ថាក់ ឡានី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល