ថ្ងៃទី១នៃកិច្ចប្រជុំកំពូលអាស៊ាន (ASEAN) សមាគមប្រជាតិអាស៊ីអាគ្នេយ៍មួយនេះសម្រេចទទួលប្រទេសអ៊ុយក្រែន (Ukraine) ជាសមាជិកទី៥០នៃមិត្តភាពនិងសហប្រតិបត្តិការតំបន់អាស៊ីអាគ្នេយ៍ហៅកាត់ (TAC)។ ទោះយ៉ាងណាអ្នកជំនាញនយោបាយការបរទេសថានេះគ្រាន់តែជាសមិទ្ធផលតិចតួចទេព្រោះអាស៊ានដែលដឹកនាំដោយលោក ហ៊ុន សែន ជាប្រធានប្ដូរវេនមិនបានដោះស្រាយជម្លោះក្នុងតំបន់របស់ខ្លួននៅប្រទេសភូមាឬមីយ៉ាន់ម៉ា (Myanmar) បានជោគជ័យឡើយ។
ការទទួលយកប្រទេសអ៊ុយក្រែនកំពុងមានសង្គ្រាមរ៉ាំរ៉ៃជាមួយរុស្ស៊ីមកធ្វើជាសមាជិកភាពនៃសន្ធិសញ្ញាមិត្តភាពនិងសហប្រតិបត្តិការតំបន់អាស៊ីអាគ្នេយ៍ ពេលនេះ ភាគីទាំងពីរបានចុះហត្ថលេខាមានការចូលរួមពីបណ្តាមេដឹកនាំអាស៊ានតំណាងដោយរដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន ជាមួយរដ្ឋមន្ត្រីការបរទេសអ៊ុយក្រែនលោក ដឹមីត្រូ គូលេបា (Dmytro Kuleba)។
រដ្ឋលេខាធិការ និងជាអ្នកនាំពាក្យក្រសួងការបរទេសស្ដីពីកិច្ចប្រជុំអាស៊ានលោក គង់ ភោគ ថ្លែងក្នុងសន្និសីទសារព័ត៌មាន ព្រឹកថ្ងៃទី១០ ខែវិច្ឆិកា ថា អ៊ុយក្រែនក្លាយជាសមាជិកទី៥០នៃសន្ធិសញ្ញានេះ។ លោកបន្តទៀតថាអាស៊ានបើកចំហទទួលស្វាគមន៍ការកសាងមិត្តភាពជាមួយប្រទេសដៃគូនានា។ លោកលើកឡើងថាចំពោះបញ្ហាជម្លោះនៅអ៊ុយក្រែនដែលបង្កដោយរុស្ស៊ីកម្ពុជាក្នុងនាមជាប្រធានអាស៊ានទាមទារបញ្ចប់ជម្លោះនេះដោយការចរចារ៖
«សន្ធិសញ្ញាមួយមិនមែនជារឿងកើតឡើងញឹកញាប់ទេហើយនេះជាមោទនភាពមួយសម្រាប់យើងទាំងអស់គ្នាដែរថាយើងអាចបង្កើនភាពជាដៃគូក៏ដូចជាទាក់ទាញចំណាប់អារម្មណ៍និងការគាំទ្រប្រទេសមកពីក្រៅតំបន់ពីព្រោះដៃគូទាំងអស់នេះគឺមិនមែនក្នុងតំបន់អាស៊ីផង»។
មុនពេលមានកិច្ចព្រមព្រៀងនេះមានការជជែកគ្នាតាមទូរស័ព្ទរវាងលោកនាយករដ្ឋមន្ត្រី ហ៊ុន សែន ជាមួយប្រធានាធិបតីអ៊ុយក្រែន (Ukraine) លោក វ៉ូឡូឌីមៀ ហ៊្សែលឡិនស្គី (Volodymyr Zelensky)។
អ្នកជំនាញផ្នែកវិទ្យាសាស្ត្រនយោបាយនិងកិច្ចការអន្តរជាតិលោក ឯម សុវណ្ណារ៉ា យល់ថាការបញ្ចូលអ៊ុយក្រែនជាសមាជិក TAC មិនទាន់អាចរាប់បញ្ចូលជាសមត្ថផលធំនោះទេព្រោះជម្លោះនយោបាយនៅភូមាគឺអាស៊ានដែលកម្ពុជាជាប្រធានប្ដូរវេនហាក់គ្មានពេលអាចដោះស្រាយបានទៀតទេ។ អ្នកជំនាញរូបនេះឱ្យដឹងទៀតថានៅពេលអ៊ុយក្រែនក្លាយជាសមាជិកភាពនៃសន្ធិសញ្ញាមិត្តភាពនិងសហប្រតិបត្តិការតំបន់អាស៊ីអាគ្នេយ៍នៅពេលបន្ទាប់ គឺអាស៊ាននិងអ៊ុយក្រែនអាចក្លាយជាដៃគូយុទ្ធសាស្ត្រលើវិស័យសេដ្ឋកិច្ច នយោបាយ សន្តិសុខ និងសង្គមវប្បធម៌៖
«បើសិនបើអ៊ុយក្រែនឧទាហរណ៍ថាមានសកម្មភាពខ្លាំងថ្ងៃក្រោយក្លាយជាដៃគូយុទ្ធសាស្ត្រអ៊ីអ៊ីចឹងដែរបន្ទាប់ពីដៃគូជជែកពិភាក្សាគ្នាដៃគូយុទ្ធសាស្ត្របើសិនមានពង្រីកកិច្ចសហប្រតិបត្តិការខ្លាំងក្លារីកចម្រើនគ្រប់វិស័យទៅទទួលបានអត្ថប្រយោជន៍ឬក៏ឈានដល់កិច្ចសហប្រតិបត្តិការដូចគ្នាបណ្ដារដ្ឋឬមហាអំណាចធំៗចិនសហរដ្ឋអាមេរិក ឬរុស្ស៊ីអ៊ីចឹងដែរបាទ»។
លោក ឯម សុវណ្ណារ៉ា ក៏ចង់ឃើញកម្ពុជាដែលប្រធានអាស៊ានសម្របសម្រួលយ៉ាងណាជំរុញឱ្យសហរដ្ឋអាមេរិកក្លាយជាដៃសហការគ្រប់ជ្រុងជ្រោយជាមួយអាស៊ានខណៈចិនបានក្លាយជាដៃគូរសហការគ្រប់ជ្រុងជ្រោយជាមួយអាស៊ានរួចហើយ។
មេដឹកនាំប្រទេសអាស៊ានបានមកដល់កម្ពុជាដើម្បីចូលរួមកិច្ចប្រជុំកំពូលអាស៊ានដោយឡែកមេដឹកនាំប្រទេសភូមាឬមីយ៉ាន់ម៉ាមិនត្រូវបានអនុញ្ញាតឱ្យចូលរួមក្នុងកិច្ចប្រជុំនេះទេ។ចំណែកមេដឹកនាំប្រទេសពាក់ព័ន្ធនានាក៏បានមកដល់ប្រទេសកម្ពុជាជាបន្តបន្ទាប់ដែរ។
ថ្ងៃទី១នៃកិច្ចប្រជុំកំពូលអាស៊ាននេះមេដឹកនាំប្រទេសអាស៊ានចំនួន០៩ប្រទេសបានចូលគាល់ព្រះមហាក្សត្រ សម្ដេចនរោត្តម សីហមុនី។ លោកនាយករដ្ឋមន្ត្រី ហ៊ុន សែន ដែលប្រធានអាស៊ានប្ដូរវេនលើកឡើងតាមទំព័រហ្វេសប៊ុកថាការមិនអនុញ្ញាតឱ្យមេដឹកនាំភូមាចូលរួមកិច្ចប្រជុំពេលនេះដោយសារមេដឹកនាំភូមាអនុវត្តន៍មិនបានពេញលេញនូវគោលការណ៍កុងសង់ស៊ីស៥ចំណុចរបស់អាស៊ាន។
ថ្ងៃដដែលនេះដែរ លោកនាយករដ្ឋមន្ត្រី ហ៊ុន សែន បានចូលរួមបើកកិច្ចប្រជុំកំពូលធុរកិច្ចនិងវិនិយោគអាស៊ាន។ លោក ហ៊ុន សែន លើកឡើងថានេះជាវេទិកាសំខាន់សម្រាប់សហគមន៍ធុរកិច្ចជួបពិភាក្សាដោយផ្ទាល់ជាមួយថ្នាក់ដឹកនាំប្រទេសនិងប្រធានក្រុមហ៊ុនដើម្បីដោះស្រាយបញ្ហាប្រឈមក្នុងតំបន់អាស៊ីអាគ្នេយ៍។ លោក ហ៊ុន សែន ក៏ជំរុញទៅបណ្ដាប្រទេសអាស៊ានអនុវត្តន៍គោលនយោបាយបៃតងអាស៊ានដើម្បីទប់ទល់នឹងការប្រែប្រួលអាកាសធាតុផងដែរ៖
«ដើម្បីរួមចំណែកក្នុងការឆ្លើយតបហ្នឹងផលប៉ះពាល់នៃការប្រែប្រួលអាកាសធាតុគ្រោះធម្មជាតិនិងការបំផ្លាញដើមកម្ពុជាបានលើកសំណើឱ្យមានរៀបចំនូវកិច្ចព្រមព្រៀងបៃតងអាស៊ានសំដៅរួមចំណែកក្នុងការជួយតម្រង់ទិសអាស៊ានឆ្ពោះទៅអនាគតបៃតងប្រកបដោយចីរភាពនិងភាពប្រកួតប្រជែងខ្ពស់»។
ទោះជាលោក ហ៊ុន សែន ប្រាប់សហគមន៍អន្តរជាតិឱ្យរួមគ្នាលើកស្ទួយបរិស្ថានបៃតងក្ដី ប៉ុន្តែ រដ្ឋាភិបាល ហ៊ុន សែន រងការរិះគន់ថាបានបណ្ដែតបណ្ដោយឱ្យមានការបំផ្លាញព្រៃឈើនៅកម្ពុជា។
នៅថ្ងៃដដែលនេះដែរក៏មានកិច្ចប្រជុំអន្តរសភាអាស៊ាន (អាយប៉ា-AIPA)។ កិច្ចប្រជុំនេះដឹកនាំដោយប្រធានរដ្ឋសភាលោក ហេង សំរិន។ ចំណែកលោកនាយករដ្ឋមន្ត្រីក្នុងនាមជាប្រធានអាស៊ានក៏ចូលរួមនេះដែរ។កិច្ចប្រជុំនេះដើម្បីពង្រីកកិច្ចសហប្រតិបត្តិការក្នុងសមាគមអាស៊ានក្នុងគោលបំណងរួមរបស់អាស៊ានគឺសន្តិភាព ស្ថិរភាព និងអភិវឌ្ឍន៍។
កិច្ចប្រជុំកំពូលអាស៊ានចាប់ផ្តើមពីថ្ងៃទី១០ ដល់ទី១៣ ខែវិច្ឆិកា មានកិច្ចប្រជុំរួមមាន៖ កិច្ចប្រជុំកំពូលអាស៊ានលើកទី៤០និងលើកទី៤១។ កិច្ចប្រជុំកំពូលអាស៊ាន-ចិន លើកទី២៥។ កិច្ចប្រជុំកំពូលអាស៊ាន-ជប៉ុន លើកទី២៥ កិច្ចប្រជុំកំពូលអាស៊ាន-សាធារណរដ្ឋកូរ៉េខាងត្បូងលើកទី២៣។កិច្ចប្រជុំកំពូលអាស៊ានបូកបីលើកទី២៥កិច្ចប្រជុំកំពូលរំលឹកខួប៣០ឆ្នាំនៃទំនាក់ទំនងដៃគូសន្ទនាអាស៊ាន-ឥណ្ឌា។ កិច្ចប្រជុំកំពូលអាស៊ាន-សហរដ្ឋអាមេរិក លើកទី១០។ កិច្ចប្រជុំកំពូលអាស៊ាន-អូស្ត្រាលី លើកទី២។ កិច្ចប្រជុំកំពូលរំព្ញកខួបនៃទំនាក់ទំនងអាស៊ាន-កាណាដាកិច្ចប្រជុំកំពូលអាស៊ាន-អង្គការសហប្រជាជាតិនិងកិច្ចប្រជុំកំពូលអាស៊ីបូព៌ាលើកទី១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។