អង្គការសហប្រជាជាតិផ្នែកសិទ្ធិមនុស្សជំរុញឱ្យរដ្ឋាភិបាលកម្ពុជាធានាឱ្យបាននូវបរិយាកាសនយោបាយល្អនៅមុនការបោះឆ្នោត ខណៈអង្គការសិទ្ធិមនុស្សអន្តរជាតិថ្កោលទោសចំពោះការធ្វើទុក្ខបុកម្នេញលើបេក្ខជនគណបក្សប្រឆាំង។ សេចក្ដីថ្លែងការណ៍ទាំងនេះ ធ្វើឡើងស្របពេលការបោះឆ្នោតក្រុមប្រឹក្សាឃុំសង្កាត់នឹងឈានចូលមកដល់នៅថ្ងៃទី៥ មិថុនា ស្អែកនេះ។
ការិយាល័យឧត្ដមស្នងការសិទ្ធិមនុស្សអង្គការសហប្រជាជាតិ ដែលមានទីស្នាក់ការនៅទីក្រុងហ្ស៊ឺណែវ (Geneva) ប្រទេសស្វីស (Switzerland) អំពាវនាវដល់រដ្ឋាភិបាលលោក ហ៊ុន សែន ឱ្យធានាថា ការបោះឆ្នោតក្រុមប្រឹក្សាឃុំសង្កាត់ប្រព្រឹត្តទៅក្នុងបរិយាកាសសន្តិភាព និងសុវត្ថិភាព ដែលលើកស្ទួយដល់ភាពចម្រុះផ្នែកនយោបាយ និងការគោរពសេរីភាពជាមូលដ្ឋាន។
ការិយាល័យឧត្ដមស្នងការសិទ្ធិមនុស្សអង្គការសហប្រជាជាតិគូសបញ្ជាក់ក្នុងសេចក្ដីថ្លែងការណ៍កាលពីថ្ងៃទី២ មិថុនា ការិយាល័យមួយនេះមានការព្រួយបារម្ភ ដោយសារតែឃើញមានលំនាំនៃការគំរាមកំហែង ការបំភិតបំភ័យ និងការរារាំង សំដៅលើបេក្ខជនគណបក្សប្រឆាំង នៅមុនការបោះឆ្នោតក្រុមប្រឹក្សាឃុំសង្កាត់។ បក្ខជនមួយចំនួនបានប្រឈមមុខនឹងការរឹតត្បិត និងការសងសឹក ដែលរារាំងដល់សកម្មភាពរបស់ពួកគេ ក្នុងនោះមានការចាប់ខ្លួនបេក្ខជនមួយចំនួនដាក់ពន្ធនាគារ ដែលទំនងជាត្រូវបានគេរៀបចំឡើង ដើម្បីទប់ស្កាត់ការធ្វើយុទ្ធនាការនយោបាយរបស់ពួកគេ។
ស្រដៀងគ្នានេះ អង្គការសមាជិកសភាអាស៊ាន (APHR) ក៏បានចេញសេចក្ដីថ្លែងការណ៍ កាលពីថ្ងៃទី៣ មិថុនា ថ្កោលទោសយុទ្ធនាការយាយី និងបំភិតបំភ័យលើសមាជិកគណបក្សប្រឆាំងអំឡុងពេលឃោសនាបោះឆ្នោតនេះដែរ ជាពិសេស ការធ្វើទុក្ខបុកម្នេញលើបេក្ខជនគណបក្សភ្លើងទៀន។
សមាជិកសភាម៉ាឡេស៊ី និងជាសមាជិកនៃអង្គការសមាជិកសភាអាស៊ាន អ្នកស្រី ម៉ារៀ ជិន អាប់ឌុលឡា (Maria Chin Abdullah) លើកឡើងថា វាជារឿងដែលមិនអាចទៅរួចនោះទេ ដើម្បីរៀបចំការបោះឆ្នោតដោយសេរី និងយុត្តិធម៌ក្នុងបរិយាកាសមួយ ដែលពោរពេញទៅដោយការធ្វើទុក្ខបុកម្នេញលើអ្នកនយោបាយប្រឆាំង។ អ្នកស្រីបន្តថា ថ្វីបើគណបក្សចំនួន១៧ ត្រូវបានគេអនុញ្ញាតឱ្យឈរឈ្មោះបោះឆ្នោតក្ដី ដំណើរការទាំងមូលមិនអាចចាត់ទុកថា ជាការអនុវត្តលទ្ធិប្រជាធិបតេយ្យ និងពហុនិយមបានឡើយ នៅពេលដែលគណបក្សប្រជាជនកម្ពុជារបស់លោក ហ៊ុន សែន មិនព្រមឱ្យអ្នកដែលអាចតតាំងយកអំណាចពីពួកគេ ធ្វើយុទ្ធនាការឃោសនាបានដោយសេរី និងមានសុវត្ថិភាពនោះ។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យគណៈកម្មាធិការសិទ្ធិមនុស្សកម្ពុជា លោក កត្តា អ៊ន ដើម្បីសុំការឆ្លើយតបរឿងនេះបានទេ កាលពីយប់ថ្ងៃទី៣ មិថុនា។
ចំណែកអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា វិញ លោកថ្លែងថា សេចក្ដីថ្លែងការណ៍របស់អង្គការសហប្រជាជាតិផ្នែកសិទ្ធិមនុស្សនេះ មិនសំដៅមកស្ថាប័ន គ.ជ.ប នោះទេ។ លោកអះអាងថា គ.ជ.ប ព្យាយាមបំពេញការងារទៅតាមសមត្ថកិច្ចដែលមានចែងក្នុងច្បាប់៖« សម្រាប់ គ.ជ.ប គឺបានទទួលខុសត្រូវស្របទៅតាមច្បាប់ ដែលមានជាធរមាន ហើយលើកទឹកចិត្តឱ្យប្រជាពលរដ្ឋចេញទៅបោះឆ្នោត » ។
ជុំវិញរឿងនេះ អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្រ្វែល (COMFREL) លោក កន សាវាង្ស ថ្លែងថា ការព្រួយបារម្ភរបស់ស្ថាប័នសិទ្ធិមនុស្សអង្គការប្រជាជាតិនេះ ក៏ជាកង្វល់របស់ក្រុមអង្គការសង្គមស៊ីវិលក្នុងស្រុកដែរ។ លោកបន្តថា បរិយាកាសនយោបាយមុនការបោះឆ្នោតមិនមានភាពល្អប្រសើរនោះទេ ហើយសកម្មជននយោបាយមួយចំនួនថែមទាំងរងការចាប់ខ្លួន និងចោទប្រកាន់ទៀតផង៖ « រឿងមួយដែលសំខាន់ គឺពាក់ព័ន្ធរឿងច្បាប់។ ក្រោយពីវិសោធនកម្មច្បាប់ [ គណបក្សនយោបាយ ] ឆ្នាំ២០១៧ មក យើងឃើញថា ច្បាប់ដែលយើងនៅតែមានការព្រួយបារម្ភទាក់ទងរឿងសិទ្ធិនយោបាយ និងការរក្សាឆន្ទៈប្រជាពលរដ្ឋ ជាដើម ដែលមិនទាន់បានធានាឱ្យបានពេញលេញទៅតាមស្តង់ដារទេ » ។
បើតាមការិយាល័យឧត្ដមស្នងការសិទ្ធិមនុស្សអង្គការសហប្រជាជាតិ គិតត្រឹមរយៈពេល ៤ថ្ងៃមុនការបោះឆ្នោត បេក្ខជន និងសកម្មជនគណបក្សប្រឆាំងយ៉ាងតិចបំផុត ៦នាក់ កំពុងជាប់ឃុំក្នុងពន្ធនាគាររង់ចាំសវនាការ ខណៈមនុស្សជាច្រើននាក់ផ្សេងទៀតត្រូវបានគេកោះហៅឱ្យទៅបំភ្លឺក្នុងសំណុំរឿងដែលមានចរិតនយោបាយ។ ករណីចុងក្រោយនៃការរារាំងផ្នែកនយោបាយនេះ កើតឡើងបន្ទាប់ពីការរួមតូចជាប្រព័ន្ធនៃលំហប្រជាធិបតេយ្យនារយៈពេលប៉ុន្មានឆ្នាំចុងក្រោយនេះ ដែលធ្វើឱ្យអន្តរាយដល់សេរីភាពជាមូលដ្ឋាន និងសិទ្ធិចូលរួមក្នុងកិច្ចការសាធារណៈនៅកម្ពុជា។
ការិយាល័យឧត្ដមស្នងការសិទ្ធិមនុស្សអង្គការសហប្រជាជាតិដាស់តឿនរដ្ឋាភិបាលលោក ហ៊ុន សែន ឱ្យអនុវត្តកាតព្វកិច្ចរបស់ខ្លួនចំពោះការគោរពសិទ្ធិមនុស្ស ដែលមានចែងទាំងនៅក្នុងរដ្ឋធម្មនុញ្ញ និងសន្ធិសញ្ញាអន្តរជាតិទាំងឡាយ ដែលកម្ពុជាបានផ្ដល់សច្ចាប័ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។