លោក សុន ឆ័យ ​វិល​ទៅ​កម្ពុជា​វិញ ​ដើម្បី​តតាំងក្តី​ក្នុង​តុលាការ

ដោយ ថា ថៃ
2022.07.03
Share on WhatsApp
Share on WhatsApp
លោក សុន ឆ័យ ​វិល​ទៅ​កម្ពុជា​វិញ ​ដើម្បី​តតាំងក្តី​ក្នុង​តុលាការ លោក សុន ឆ័យ អនុប្រធាន​គណបក្ស​ភ្លើងទៀន​ នៅពេលជួបប្រជុំ​ជាមួយ​មន្ត្រី​គណៈកម្មាធិការជាតិរៀបចំការ​បោះឆ្នោត (គ.ជ.ប) កាលពីថ្ងៃទី១១ ខែមេសា ឆ្នាំ២០២២។
រូប៖ អ្នកនាំពាក្យ NEC

មន្ត្រីជាន់ខ្ពស់​​គណបក្ស​ភ្លើងទៀន ​សម្រេច​វិល​ទៅ​កម្ពុជា​វិញ​ហើយ​ នៅថ្ងៃទី​៣​ ខែកក្កដា​ ដើម្បី​តតាំង​ក្តី​នៅក្នុង​តុលាការ​ដែល​ដាក់​បណ្តឹង​ដោយ​គណបក្ស​ប្រជាជន​កម្ពុជា​ និង​គណៈ​កម្មាធិការ​ជាតិ​រៀបចំ​ការបោះឆ្នោត​​​​(គ.ជ.ប)។ មេធាវីការពារក្តី​ និង​មន្ត្រី​សង្គមស៊ីវិល​ផ្នែកឃ្លាំមើល​ការបោះឆ្នោត​យល់ថា​ អាជ្ញាធរ ​គួរតែ​ទម្លាក់​ចោល​ការ​ចោទប្រកាន់​លោក សុន ឆ័យ ​​ដើម្បី​ឲ្យ​លោកចូលរួម​ប្រកួតប្រជែង​នយោបាយ​​ដោយ​ពេញលេញ​។​​

មន្ត្រីជាន់ខ្ពស់​គណបក្សភ្លើងទៀនលោក សុន ឆ័យ ​បាន​ធ្វើ​ដំណើរ​តាម​យន្តហោះចេញ​ពី​ប្រទេសអូស្ត្រាលី​(Austrlia)​ ត្រឡប់​ទៅ​ប្រទេស​កម្ពុជាវិញហើយ​​ តាម​ការ​សន្យា​របស់​លោក​ ​នៅថ្ងៃទី៣ ​ខែកក្កដា ​ដោយ​មិន​បារម្ភ​ចំពោះ​បណ្តឹង​របស់​គណ​បក្សកាន់​អំណាច ​និង​គ..ប​នោះទេ​។នេះបើ​តាម​ប្រភពផ្លូវការ​ដែល​បាន​ប្រាប់​វិទ្យុអាស៊ីសេរី។

មេធាវី​ការពារក្តី​ឲ្យ​លោក សុន ឆ័យ ​គឺលោក ជូង ជូងី ​ឲ្យដឹងថា ​លោកបាន​ទទួល​ដំណឹង​ពី​កូនក្តី​ថា ​គាត់​នឹង​វិលចូល​កម្ពុជា​នៅថ្ងៃទី៣ ខែ​កក្កដា។ មេធាវីការពារក្តីរូបនេះ ​មិន​បង្ហាញ​ពីការ​ព្រួយ​បារម្ភ​រឿង​អាជ្ញាធរ​អាច​ចាប់ខ្លួន​លោក សុន ឆ័យ ​នោះទេ​ ។ ប៉ុន្តែ​លោក​បញ្ជាក់ថា​ លោក​បាន​ត្រៀម​ខ្លួន​រួចហើយ ​ដើម្បីជួប​ ​និង​ផ្តល់ការ​ប្រឹក្សា​ផ្នែកច្បាប់​ដល់​កូនក្តី​ ព្រមទាំង​ត្រៀម​ខ្លួនចូល​ទៅឆ្លើយ​បំភ្លឺនៅ​តុលាការ​ ដើម្បី​តតាំង​ការពារ​សិទ្ធិ​របស់​គាត់​ទៅ​តាម​ផ្លូវច្បាប់៖ «អ្វីដែល​ឯកឧត្តម សុន ឆ័យ​ ផ្តល់​ការសម្ភាសន៍​ដល់ខេមបូឌាដេលី ​(Cambodia daily)​ពាក់ព័ន្ធ​នឹង​ការបោះឆ្នោត​ វាជាការ​ជជែក​ពាក់ព័ន្ធ រឿង​នយោបាយ​ ​ហើយការ​ធ្វើនយោបាយ​ក្នុងការ​ជជែក ​គឺ​អ្នកនយោបាយ ​តែងតែ​លែង​វោហាស័ព្ទ​ ដូច្នេះ​ជៀស​មិនផុត​ពីការ​ប៉ះគ្នា​ទៅវិញ​ទៅមក​ផ្នែក​នយោបាយទេ។ ដូច្នេះ​ រឿង​នយោបាយ​ត្រូវ​ដោះស្រាយ​តាម​បែប​នយោបាយ​ ហើយ​តុលាការ​វិនិច្ឆ័យ​រឿង​នយោបាយ​គឺ​តុលាការ​ប្រជាជនកម្ពុជា​១៧​លាននាក់​ទូទាំង​ប្រទេស​តាមរយៈ​ សន្លឹក​ឆ្នោត​។អីចឹង​ទុកឲ្យ​តុលាការ​ប្រជាជន​១៧​លាននាក់ ​​​វិនិច្ឆ័យ​តាម​សន្លឹកឆ្នោត ​ទើបជា​ការត្រឹមត្រូវ។ការ​​យក​តុលាការ​ព្រហ្មទណ្ឌ ​យកមក​ដោះស្រាយ​ យក​មក​ ចោទប្រកាន់​ចំពោះ​ភាគីម្ខាង​ដែល​អត់​មានអំណាច​ គឺ​អាហ្នឹង​មិនមែន​ជា​ជម្រើស​ដែល ថ្លៃថ្នូរ ​ឬក៏​យុត្តិធម៌​ត្រឹមត្រូវ​ដែល​មាន​តម្លៃ​ថ្នាក់អន្តរជាតិ​នោះទេ»។​​

លោក សុន ឆ័យ ​ដែល​កំពុង​រងបណ្តឹង​ចំនួនពីរ​ពី​គណបក្សកាន់អំណាច ​និង​ស្ថាប័ន​រៀបចំការ​បោះឆ្នោត​ដោយសារ​រិះគន់​រឿង​ភាពមិន​ប្រក្រតី​នៃការ​បោះឆ្នោត​ឃុំ-សង្កាត់​នោះ ​ធ្លាប់​បាន​ប្រកាសថា​ លោក ​នឹង​វិលចូល​កម្ពុជាវិញ ​នៅ​ដើមខែ​កក្កដា ​ដើម្បី​ទៅ​ប្រឈមមុខ​នឹង​តុលាការ។

គណបក្ស​ប្រជាជន​កម្ពុ​ជា កាលពី​ថ្ងៃទី​១៤ ខែ​មិថុនា ​បាន​ប្ដឹងលោក សុន ឆ័យ ទៅកាន់​តុលាការក្រុង​​​ភ្នំពេញ​ថា ​ការ​រិះគន់​របស់​លោក​រឿងបោះឆ្នោត​ ធ្វើ​ឲ្យ​ប៉ះពាល់​កិត្តិយស​របស់​គណបក្ស​ប្រជាជន​កម្ពុជា​ និង​ទាម​ទារជំងឺចិត្ត​ចំនួន​ ១​លាន​ដុល្លា ហើយ​តម្រូវ​ឲ្យ​លោក​សុំទោស​ជា​សាធារណៈ​​។ប៉ុន្មានថ្ងៃ​ក្រោយមក ​គ​.​ជ​.​ប​ ក៏បាន​ប្ដឹង​លោក សុន ឆ័យ ពី​បទ​បរិហារ​កេរ្តិ៍​ជា​សាធារណៈដែរ​។មន្ត្រី​ជាន់ខ្ពស់​គ..ប ពី​រ​​រូបគឺ​លោក ឌឹ​ម សុវណ្ណារុំ និង​លោក សោម សូរីដា ដែល​ជា​មន្ត្រី​ស្និទ្ធ​នឹងបក្សកាន់អំ​ណាច ​លើកឡើង​ក្នុង​ពាក្យបណ្ដឹង​របស់​ខ្លួន ​ចុះ​កាលពី​ថ្ងៃទី​១៧ ខែ​មិថុនា​ថា ការ​ថ្លែង​របស់​លោក សុន ឆ័យ ធ្វើ​ឱ្យ​ប៉ះពាល់​ធ្ងន់ធ្ងរ​ដល់​ស្ថាប័ន​ជាតិ​មួយ​នេះ។

វិទ្យុអាស៊ីសេរី ​មិនទាន់​អាច​សុំការ​ឆ្លើយតប​ផ្ទាល់​ពី​លោក សុន ឆ័យ ​បាន​នៅឡើយទេ​ នៅល្ងាច​ថ្ងៃទី៣ ​ខែកក្កដា។

ទាក់ទងករណីនេះ​ អ្នកនាំ​ពាក្យ​គណបក្សប្រជាជនកម្ពុជា​លោក សុខ ឥសាន ​ស្វាគមន៍​ការវិលត្រឡប់​របស់​លោក សុន ឆ័យ។ ទោះជាយ៉ាងណា ​លោកបញ្ជាក់ថា គ្មាន​ការចរចា​នយោបាយ​នោះទេ​ ព្រោះ​សំណុំ​រឿង​ស្ថិតក្នុង​ដៃ​តុលាការ​រួច​ហើយ៖ «ទេ..អាហ្នឹងតែ​រឿង​ធ្លាក់​ដល់ដៃ​តុលាការ​ហើយ​ មានតែ​សាមី​ខ្លួន​ចូលខ្លួន​ ដើម្បី​ដោះស្រាយ​ជាមួយ​តុលាការ។ ​គេ​ទៅ​ដល់​ភ្លាម​ គេមែន​ចាប់ទេ គេសួរ។ ​គេ (តុលាការ​) ​សួរ​ទៅ​ហើយ​យើង​បង្ហាញ​ហេតុផល​ទៅ»

ភាព​មិន​ប្រក្រតី​នៃការ​បោះ​ឆ្នោត​ឃុំ​-សង្កាត់អាណត្តិទី៥កន្លងទៅនេះ​ មិនមែន​តែ​លោក សុន ឆ័យ ​នោះ​ទេ​ ដែល​ចេញមុខ​រិះគន់​នោះ​។ ក្រុម​អង្គការ​សង្គមស៊ីវិល​ឯករាជ្យ​និង​គណបក្ស​នយោ​បាយ​មួយចំនួន​ទៀត​​​ក៏​រិះគន់​ថា ​ដំណើរការ​រៀបចំ​ការបោះ​ឆ្នោត​ឃុំ​-សង្កាត់​​លើកនេះ ​មាន​ស្ថានភាព​អាក្រក់​ជាង​អាណត្តិ​មុនៗ​ ព្រោះ​គ្មាន​​បរិយា​កាស​ប្រកួតប្រជែង​ស្មើ​ភាព ​មាន​ការ​រឹតត្បិត​​សិទ្ធិសេរីភាព​របស់​ពលលរដ្ឋ​មិន​ឲ្យ​​ចូលរួម​កិច្ចការ​នយោ​បា​យ​ និង​ការ​បញ្ចេញ​មតិ​ ខណៈ​ស្ថាប័ន​បោះឆ្នោត​មិន​ទាន់​ឯករាជ្យ។

ប្រធាន​គណៈកម្មាធិការ​អព្យាក្រិត្យនិង​យុត្តិធម៌​ដើម្បី​ការបោះឆ្នោត​ដោយ​សេរី​ និង​ត្រឹម​ត្រូវ​នៅកម្ពុជា​ហៅកាត់ថា​ និចហ្វិច ​លោក សំ គន្ធាមី ​មាន​ប្រសាសន៍ថា ​ការ​ប្រកាន់​ជំហរ​របស់​លោក សុន ឆ័យ ​ក្នុងការ​ចូល​បំភ្លឺក្នុង​​តុលាការ​ ​គឺជា​រឿងល្អ​ដើម្បី​បកស្រាយ​ឲ្យ​បាន​ច្បាស់លាស់​។ លោក​យល់ថា ​បណ្តឹងប្រឆាំង​លោក សុន ឆ័យ​នេះ ​បក្សកាន់​អំណាច ​ទំនង​ជា​គ្រាន់តែ​ចង់គំរាម​បំបាក់​ស្មារតី​អ្នកនយោបាយ​ប្រឆាំង​​ដែល​មាន​ប្រជា​ប្រិយភាព​រូបនេះ​ ដោយ​មិនអាច​ឈាន​ដល់​ការចាប់ខ្លួន​នោះទេ។ លោក​សង្ឃឹម​ថា ​ក្នុង​សំណុំរឿង​នយោបាយ​បែបនេះ ​អ្នកនយោបាយ​គ្រប់​ភាគី​ និង​ គ..ប ​នឹង​ជជែកគ្នា​ដោះ​ស្រាយ​ក្រៅ​ប្រព័ន្ធ​តុលាការ៖ «រឿង​បោះឆ្នោត​រឿងអីនេះ​ គ..ប​ ក៏ដោយ ​គណបក្សណា​ក៏ដោយ ​យើង​ហៅ​ទៅ​ជួបផ្ទាល់​មាត់ទៅ​ ជួប​ទល់មុខគ្នា​ដោះស្រាយ​គ្នាទៅ។ និយាយឲ្យដឹង​លក្ខណៈ​ជាក់ស្តែង​យ៉ាងម៉េច​ៗ យើង​ដោះស្រាយ​ទល់មុខវិញ​ ដោយ​មិន​ចាំបាច់​ ឆ្លង​កាត់​ប្រព័ន្ធ​តុលាការ​ទេ»

គណបក្សប្រឆាំង​ និង​អ្នកឃ្លាំមើល​ចាត់ទុក​ថា ​ការ​ដែល​រដ្ឋាភិបាល​បន្ត​បង្ក្រាប​កាន់តែ​ខ្លាំង​មកលើ​គណបក្សភ្លើងទៀន​ជាបន្តបន្ទាប់នេះ​​ ដោយសារ​តែ​លោក ហ៊ុន សែន ​ព្រួយ​បារម្ភ​អំពី​ប្រជាប្រិយ​ភាព​របស់​គណបក្សភ្លើងទៀន ដែល​ជា​ឆ្អឹងទទឹងក​របស់​គណបក្សកាន់អំណាច។ ទោះជាយ៉ាងណា ​ពួកគាត់​យល់ថា​ ប្រសិន​បើ​រដ្ឋាភិបាល នៅតែ​បន្ត​បង្ក្រាបបែបនេះ​ កម្ពុជានឹង​ទទួល​រង​ទណ្ឌកម្ម​ ឬ​សម្ពាធ​បន្ថែម​ពី​សហគមន៍​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
លោក ហ៊ុន សែន ទទួល​ស្គាល់​ថា ការ​ដោះ​ស្រាយ​បញ្ហា​ភូមា ដែល​លោក​ធ្វើ​ជា​ប្រធាន​អាស៊ាន​គ្មាន​ភាព​ជឿនលឿន​ទេ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល