ស្ត្រី​ម្នាក់​​ចូល​បំភ្លឺ​តុលាការ​ភ្នំពេញ​​​រឿង​ប្ដឹង​​​​​អាជ្ញាធរ​ប្រើ​ហិង្សា​​ពេល​ចូលរួម​តវ៉ា​ទាមទារ​ឱ្យ​ដោះលែង​​សកម្មជន​បក្ស​ប្រឆាំង

ដោយ មួង ណារ៉េត
2020-09-22
អ៊ីម៉ែល
មតិ
Share
បោះពុម្ព
លោក​ស្រី សាត ផា អ្នក​គាំទ្រ​គណបក្ស​សង្គ្រោះ​ជាតិ តវ៉ា​ទាមទារ​ឱ្យ​ដោះលែង​​សកម្មជន​បក្ស​ប្រឆាំង នៅ​ព្រឹក​ថ្ងៃ​ទី២១ ខែកញ្ញា ឆ្នាំ២០២០។
លោក​ស្រី សាត ផា អ្នក​គាំទ្រ​គណបក្ស​សង្គ្រោះ​ជាតិ តវ៉ា​ទាមទារ​ឱ្យ​ដោះលែង​​សកម្មជន​បក្ស​ប្រឆាំង នៅ​ព្រឹក​ថ្ងៃ​ទី២១ ខែកញ្ញា ឆ្នាំ២០២០។
រូប៖ សកម្មជន

ស្ត្រី​អ្នក​គាំទ្រ​គណបក្ស​សង្គ្រោះ​ជាតិ​ម្នាក់​​​ចូល​បំភ្លឺ​នៅ​​​​​​សាលាដំបូង​រាជធានី​ភ្នំពេញ​តាម​ការ​កោះ​ហៅ​​​នៅ​ព្រឹក​ថ្ងៃ​ទី២១ កញ្ញា​ពាក់ព័ន្ធ​នឹង​​រឿង​ដែល​លោក​ស្រី​បាន​ប្ដឹង​​​កង​សន្តិសុខ​ខណ្ឌ ៧មករា ​​​ប្រើ​ហិង្សា​បណ្ដាល​ឱ្យ​របួស​ធ្ងន់​​ក្នុង​ពេល​​លោក​ស្រី​ចូល​រួម​តវ៉ា​ជាមួយ​ក្រុម​ប្រពន្ធ​កូន​របស់​សមាជិក​បក្ស​ប្រឆាំង ដើម្បី​ទាមទារ​ឲ្យ​ដោះលែង​អ្នក​ទោស​នយោបាយ​ទាំងនោះ​ឡើវិញ​​​កាល​ពី​​ថ្មីៗ នេះ។

​​ការ​ចូល​រួម​បំភ្លឺ​នេះ​មាន​​ក្រុម​ស្ត្រី​​​​អ្នក​គាំទ្រ​​គណបក្ស​សង្គ្រោះ​ជាតិ​ចំនួន​៨នាក់​បាន​ចូល​រួម​ផ្ដល់​កម្លាំង​ចិត្ត​នៅ​មុខ​សាលាដំបូង​រាជធានី​ភ្នំពេញ ។​​​​

ជនរងគ្រោះ​​ដែល​កង​សន្តិសុខ​ខណ្ឌ ៧ មករា​ បង្ក្រាប​ដោយ​ហិង្សា​​លោក​ស្រី​សាត ផា ប្រាប់​អាស៊ី​សេរី​នៅ​រសៀល​ថ្ងៃ​ទី២១ កញ្ញា​ថា លោក​ស្រី​ហាក់​គ្មាន​ជំនឿ​លើ​ស្ថាប័ន​តុលាការ​​អាច​ជួយ​រក​យុត្តិធម៌​ជូន​លោក​ស្រី​បាន​​ទេ ក៏ប៉ុន្តែ​ដើម្បី​ឱ្យ​អស់​ចិត្ត​​លោក​ស្រី​សម្រេច​ចិត្ត​ប្ដឹង​​ឱ្យ​តុលាការ​​ចាត់​វិធាន​ការ​លើ​ជន​ប្រព្រឹត្ត​តាម​ច្បាប់។ លោក​ស្រី​​បន្ត​ថា ​លោក​ស្រី​ឈឺ​ចាប់​យ៉ាង​ខ្លាំង​ ដែល​​កង​សន្តិសុខ​ខណ្ឌ ៧មករា បាន​ប្រើ​ហិង្សា​​លើ​លោក​ស្រី​បណ្ដាល​ឱ្យ​លោក​ស្រី​របួស​ធ្ងន់ កាល​ពី​​ថ្ងៃ​ទី​៣១​កក្កដា​កន្លង​ទៅ ខណៈ​លោកស្រី គ្រាន់តែ​ចូលរួម​តវ៉ា​ដោយ​អហិង្សា​ទាមទារ​ឲ្យ ដោះលែង​​សកម្មជន​បក្ស​ប្រឆាំង ១៦នាក់ ឲ្យ​មាន​សេរីភាព​ឡើង​វិញ៖ «ហើយ​គាត់​ក៏​បាន​សួរ​ខ្ញុំ​ថា នៅ​ពេល​គេ​ចាប់​ហ្នឹង​គេ​បាន​ហាមឃាត់​ខ្ញុំ​មិន​ឱ្យ​ស្រែក​ហេតុ​អី​ក៏​នាំ​គ្នា​ស្រែក​។​ខ្ញុំ​ថា​​ខ្ញុំ​តវ៉ា​ទាមទារ​ឱ្យ​ដោះលែង​អ្នក​ទោស​មនសិការ​ព្រោះ​ពួកគាត់​អត់​មាន​កំហុស​អី​ទេ​។​ហើយ​គាត់​សួរ​ខ្ញុំ​មួយ​ទៀត​គាត់​ថា ​ពួក​ខ្ញុំ​ធ្វើ​ហ្នឹង​មាន​អ្នក​ណា​ដឹក​នាំ​ធ្វើ​ខ្ញុំ​ថា​ពួក​ខ្ញុំ​អត់​មាន​អ្នក​ដឹក​នាំ​ធ្វើ​ទេ​ប្រជាពលរដ្ឋ​​ធ្វើ​រៀងៗខ្លួន​គាត់​ចង់​ចោទ​ខ្ញុំ​ថា​ពួក​ខ្ញុំ​ហ្នឹង​​បង្កើត​ជា​សហគមន៍​មួយ​ទាមទារ​​ឱ្យ​ដោះលែង​អ្នក​ទោស​អីចឹង​ពួក​ខ្ញុំ​សូម​បដិសេធ»

លោក​ស្រី​សាត ផា​ឱ្យ​ដឹង​​ថា តុលាការ​​​ហាក់​មិន​បាន​យក​ចិត្ត​ទុក​ដាក់​រឿង​ដែល​​លោក​ស្រី​​ប្ដឹង​​​ឱ្យ​ចាត់​វិធាន​ការ​​លើ​កង​សន្តិសុខ ដែល​បាន​ប្រើ​ហិង្សា​មក​លើ​លោក​ស្រី​​នោះ​ទេ​ពីព្រោះ​​ព្រះរាជអាជ្ញា​រង​​អម​សាលាដំបូង​​ភ្នំពេញ​លោក​ ស៊ុត វណ្ណៈ​ បាន​​ព្យាយាម​សួរ​លោក​ស្រី​ម្ដង​ហើយ​ម្ដង​ទៀត​ថា​តើ​អ្នក​ណា​​ជា​មេ​ក្លោង​ដឹក​នាំ​​​ក្រុម​ស្ត្រី​តវ៉ា និង​ការ​​ធ្វើ​បាតុកម្ម​​​​​​កន្លង​មក​មាន​សុំ​ច្បាប់​​ពី​អាជ្ញាធរ​ឬ​​អត់​ទៅ​វិញ។

​​ការ​ចូល​បំភ្លឺ​នេះ​បន្ទាប់​ពី​លោក​ស្រី​បាន​​​ប្ដឹង​ទៅ​តុលាការ​ឱ្យ​​​រក​យុត្តិធម៌​​កាល​ពី​ថ្ងៃ​ទី​៥​សីហា​​​ហើយ​ព្រះរាជអាជ្ញា​រង​អម​សាលាដំបូង​រាជធានី​ភ្នំពេញ​លោក ស៊ុត វណ្ណៈ​បាន​កោះ​ហៅ​លោក​ស្រី​សាត ផា ​​សាកសួរ​​​អំពី​ដំណើរ​នេះ​ជា​លើក​ដំបូង​នៅ​ព្រឹក​​ថ្ងៃ​ទី២១ កញ្ញា។

​​​​អាស៊ី​សេរី​មិន​ទាក់ទង​អ្នក​នាំ​ពាក្យ​សាលាដំបូង​រាជធានី​ភ្នំពេញ​លោក អ៊ី រិន្ទ​ ដើម្បី​សុំ​អត្ថាធិប្បាយ​បន្ថែម​ជុំ​វិញ​បញ្ហា​នេះ​បាន​ទេ​​នៅ​ថ្ងៃ​ទី​២១​កញ្ញា​ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

ទោះ​ជា​យ៉ាង​ណា​ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិ​មនុស្ស​អាដហុក (Adhoc) លោក​នី សុខា​មាន​​ប្រសាសន៍​ថា​​អាជ្ញាធរ​ប្រើ​ហិង្សា​លើ​​​ប្រជាពលរដ្ឋ​ដែល​តវ៉ា​​ទាមទារ​រក​យុត្តិធម៌​សង្គម​ជា​ទង្វើ​ខុស​ច្បាប់​។​លោក​បញ្ជាក់​ថា​តុលាការ​គួរតែ​ចាត់​វិធាន​ការ​​​លើ​រឿង​នេះ​ដោយ​ភាព​សុក្រឹត​និង​យុត្តិធម៌​​ទាំង​សង្ខាង​ដើម្បី​កុំ​​ប្រជាពលរដ្ឋ​រិះគន់​តុលាការ​​អនុវត្ត​ច្បាប់​ស្ដង់ដារ ២៖ «យើង​ដឹង​ថា​បើ​សម្រាប់​មហាជន​វិញ​ជា​ទូទៅ​គេ​មើល​ឃើញ​អំពី​រូប​ភាព​ទាំង​អស់​ហ្នឹង​ហើយ​សម្រាប់​មហាជន​នោះ។​អីចឹង​តុលាការ​លោក​គួរ​ពិចារណា​ក្នុង​ការ​ធ្វើ​ម៉េច​ឱ្យ​​មាន​ផ្ដល់​យុត្តិធម៌​ឱ្យ​បាន​ត្រឹមត្រូវ​ដែរ​ជៀសវាង​​ឱ្យ​មហាជន​មាន​ការ​ទិតៀន​មហាជន​មាន​យល់​ច្រឡំ​អំពី​បញ្ហា​ហ្នឹង​​​ដើម្បី​ឱ្យ​មហា​ជន​មាន​ជំនឿ​ទុក​ចិត្ត​​លើ​ប្រពន្ធ​តុលាការ​តុលាការ​លោក​ត្រូវ​តែ​​ពិចារណា​និង​ធ្វើ​យ៉ាង​ណា​ឱ្យ​​បង្ហាញ​ពី​ភាព​ឯករាជ​របស់​ខ្លួន​​នៅ​ក្នុង​ការ​ដោះស្រាយ​នៅ​រឿង​ក្ដី​ហ្នឹង»

កាល​ពី​ថ្ងៃ​ទី​៣១​កក្កដា​​កន្លង​ទៅ​​​​មាន​ប្រពន្ធ និង​កូន​ព្រមទាំង​អ្នក​គាំទ្រ​គណបក្ស​ប្រឆាំង​​ប្រមាណ ៣០នាក់ តវ៉ា​នៅ​មុខ​តុលាការ​ក្រុង​ភ្នំពេញ​ទាមទារ​ឱ្យ​​ដោះលែង​​សកម្មជន​គណបក្ស​ចំនួន​១៦នាក់ ដែល​កំពុង​ជាប់ឃុំ​នៅ​ពន្ធនាគារ​ព្រៃស​ឱ្យ​មាន​សេរីភាព​វិញ។ តុលាការ​បាន​ចោទ​ប្រកាន់​អ្នក​ទាំង ១៦នាក់​​ពី​បទ​រួមគំនិតក្បត់​ញុះញង់​ឲ្យ​យោធិន​មិន​ស្ដាប់​បង្គាប់ ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជាអាទិ៍​ញុះញង់​បង្ក​ឱ្យ​មាន​ភាព​វឹកវរ​នៅ​ក្នុង​សង្គម​និង​ពី​បទ​ប្រមាថ​ថ្នាក់​ដឹក​នាំ​រដ្ឋាភិបាល។

ការ​បង្ក្រាប​ដោយ​ហិង្សា​នេះ​ត្រូវ​បាន​កង​សន្តិសុខ​ខណ្ឌ ៧មករា ចាប់​​ខ្លួន​លោក​ស្រី សាត ផា ​​រុញ​បញ្ចូល​ក្នុង​រថយន្ត​​ទាំង​កម្រោល​​ដឹក​យក​ទៅ​នៅ​សាលា​ខណ្ឌ​ហើយ​បង្ខំ​ឲ្យ​​ធ្វើ​កិច្ចសន្យា​ឈប់​ចូលរួម ហើយ​ដោះលែង​វិញ​នៅ​ព្រឹក​ថ្ងៃ​ដដែល​​បណ្ដាល​ឱ្យ​លោក​ស្រី​​របួស​ជើង​ខាង​ឆ្វេង​ធ្ងន់ធ្ងរ​ហើយ​​​រហូត​មក​​ទល់​ថ្ងៃ​ទី​២១​កញ្ញា​មិន​ទាន់​បាន​ធូរស្រាល​នៅ​ឡើយ​ទេ។​លោក​ស្រី​សាត ផា ឱ្យ​ដឹង​ថា ​បើ​ទោះ​ពី​ជា​លោក​ស្រី​​​របួស​ធ្ងន់​យ៉ាង​នេះ​ក្ដី​ក៏​លោក​ស្រី​​នៅ​តែ​ប្រកាន់​ជំហរ​ចូល​រួម​សម្ដែង​មតិ​ស្វែង​រក​យុត្តិធម៌​​ដល់​​ជន​ជាប់​ឃុំ​ទាំង​នោះ​នៅ​ពេល​​ខាង​មុខ​ដោយ​មិន​មាន​ការ​រាថយ​ឡើយ។

នាយក​រង​ទទួល​បន្ទុក​កិច្ចការ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃស៍ វ៉ច្ឆ លោក ហ្វីល រ៉ូបឺតសុន (Phil Robertson) មានប្រសាសន៍​ក្នុង​សេចក្ដី​ថ្លែង​ការណ៍​កាល​ពី​ថ្ងៃ​ទី៦ ខែ​សីហា​ថា ករណី​ក្រុម​ប៉ូលិស និង​ក្រុម​សន្តិសុខ​សាលា​រាជធានី​ភ្នំពេញ ចាប់​អូស​ស្ត្រី​អ្នក​តវ៉ា​តាម​ដង​ផ្លូវ និង​ចាប់​រុញ​លោកស្រី សាត ផា ចូល​ក្នុង​ឡាន គឺ​កំពុង​បង្កើន​ការ​ព្រួយ​បារម្ភ​ជា​សកល​ចំ​ពោះ​ការ​រំលោភ​បំពាន​របស់​ប៉ូលិស​នៅ​ក្នុង​ប្រទេស​កម្ពុជា។ លោក ហ្វីល រ៉ូបឺ​តសុន ទាមទារ​ឲ្យ​អាជ្ញាធរ​កម្ពុជា បញ្ឈប់​ទង្វើ​ហិង្សា​ប្រឆាំង​ក្រុម​អ្នក​តវ៉ា​ដោយ​សន្តិវិធី​ជាបន្ទាន់ និង​ត្រូវ​គោរព​សិទ្ធិ​សេរីភាព បញ្ចេញមតិ​និង​ការ​ជួបជុំ​របស់​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល