អាមេរិកថា នឹងបន្តជជែកជាមួយកម្ពុជាទៀតរឿងបម្រាមទិដ្ឋាការ
2022.05.18
(ឆ្វេង) លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងលោក អេនតូនី ប្លីងឃែន Antony Blinken រដ្ឋមន្ត្រីក្រសួងការបរទេសអាមេរិក កាលពីថ្ងៃទី១៣ ខែឧសភា ឆ្នាំ២០២២ នៅរដ្ឋធានីវ៉ាស៊ីនតុន (Washington D.C) សហរដ្ឋអាមេរិក។
រូប៖ ក្រសួងការបរទេសកម្ពុជា
សហរដ្ឋអាមេរិកនឹងបន្តជជែកជាមួយរដ្ឋាភិបាលកម្ពុជាថែមទៀតទាក់ទងនឹងរឿងបម្រាមទិដ្ឋាការលើមន្ត្រីកម្ពុជា។
មន្ត្រីនាំពាក្យនៃការិយាល័យកិច្ចការអាស៊ីបូព៌ា និងប៉ាស៊ីហ្វិកនៃក្រសួងការបរទេសសហរដ្ឋអាមេរិក ប្រាប់វិទ្យុអាស៊ីសេរីតាមសារអេឡិចត្រូនិក ឬអ៊ីមែល (E-mail) កាលពីថ្ងៃទី១៧ ខែឧសភាថា សហរដ្ឋអាមេរិកបានទាក់ទងជាប់ជាប្រចាំជាមួយរដ្ឋាភិបាលកម្ពុជា ដើម្បីពិភាក្សាអំពីបញ្ហាទិដ្ឋាការនេះ។ លោកបន្តថា សហរដ្ឋអាមេរិកក៏បានទាក់ទងជិតស្និទ្ធជាមួយរដ្ឋាភិបាលកម្ពុជាដែរ អំពីអ្វីដែលកម្ពុជាត្រូវធ្វើដើម្បីចាប់ផ្ដើមឡើងវិញនូវកិច្ចសហប្រតិបត្តិការដ៏ពេញលេញ និងទទួលយកពលរដ្ឋកម្ពុជារបស់ខ្លួន។ សហរដ្ឋអាមេរិកប្តេជ្ញាចិត្តធ្វើការជាមួយរដ្ឋាភិបាលកម្ពុជាដើម្បីឱ្យមានភាពជឿនលឿនទាក់ទងនឹងបញ្ហាទិដ្ឋាការនេះ។
ការបញ្ជាក់បែបនេះរបស់មន្ត្រីក្រសួងការបរទេសសហរដ្ឋអាមេរិក គឺបន្ទាប់ពីប្រមុខការទូតកម្ពុជា លោក ប្រាក់ សុខុន បានស្នើដល់សហរដ្ឋអាមេរិកឱ្យពិចារណាឡើងវិញចំពោះបម្រាមទិដ្ឋាការលើមន្ត្រីកម្ពុជា ដែលលោកហៅថា ជារឿងអយុត្តិធម៌។ លោកស្នើបែបនេះនៅក្នុងជំនួបជាមួយសមភាគីអាមេរិក លោក អេនតូនី ប្លីងឃែន (Antony Blinken) កាលពីថ្ងៃទី១៣ ខែឧសភា នៅរដ្ឋធានីវ៉ាស៊ីនតុន (Washington D.C) សហរដ្ឋអាមេរិក។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសកម្ពុជាលោក ជុំ សុន្ទរី និងមន្ត្រីស្ថានទូតខ្មែរប្រចាំនៅរដ្ឋធានីវ៉ាស៊ីនតុន ដើម្បីសាកសួររឿងនេះបាននៅឡើយទេ។
កាលពីថ្ងៃទី១៣ ខែកញ្ញា ឆ្នាំ២០១៧ ស្ថានទូតសហរដ្ឋអាមេរិកប្រចាំនៅកម្ពុជាបានផ្អាកផ្ដល់ទិដ្ឋាការប្រភេទ B1 ប្រភេទ B2 និងប្រភេទ B1/B2 ដល់មន្ត្រីក្រសួងការបរទេសកម្ពុជា ដែលមានតួនាទីពីថ្នាក់អគ្គនាយករហូតដល់ថ្នាក់ដឹកនាំនៃក្រសួងនេះ ព្រមទាំងសមាជិកគ្រួសាររបស់ពួកគេ ដោយមានករណីលើកលែងតិចតួចប៉ុណ្ណោះ។ សេចក្ដីសម្រេចនេះ គឺពាក់ព័ន្ធនឹងការដែលរដ្ឋាភិបាលលោក ហ៊ុន សែន បានបដិសេធ ឬប្រើប្រាស់ហេតុផលមិនសមស្របដើម្បីពន្យារពេលទទួលយកពលរដ្ឋខ្មែរដែលត្រូវបញ្ជូនពីសហរដ្ឋអាមេរិកត្រឡប់មកកម្ពុជាវិញ។ ប៉ុន្តែអ្នកតាមដានស្ថានការណ៍នយោបាយជឿជាក់ថា ហេតុផលពិតប្រាកដនៃបម្រាមទិដ្ឋាការលើមន្ត្រីកម្ពុជានេះ គឺដោយសារការរំលោភសិទ្ធិមនុស្សធ្ងន់ធ្ងរជាប្រព័ន្ធ និងការគាស់រំលើងគ្រឹះប្រជាធិបតេយ្យនៅកម្ពុជា ប្រព្រឹត្តដោយរដ្ឋាភិបាលលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន