ប្រពន្ធសកម្មជនគណបក្សសង្គ្រោះជាតិ ដែលកំពុងជាប់ឃុំនៅក្នុងពន្ធនាគារព្រៃស នៅតែទទូចឲ្យរដ្ឋាភិបាលដោះលែងប្តីរបស់អ្នកស្រីឲ្យមានសេរីភាពឡើងវិញ ខណៈសុខភាពប្តីអ្នកស្រីកាន់តែដុនដាប នៅក្នុងពន្ធនាគារ។ អ្នកស្រីថា នេះជាអំពើអយុត្តធមដែលរដ្ឋាភិបាលបន្តឃុំខ្លួនប្តីអ្នកស្រីមកទល់ពេលនេះ ដោយហេតុផលនយោបាយសុទ្ធសាធ។
សកម្មជនគណបក្សសង្គ្រោះជាតិម្នាក់ក្នុងចំណោមជាច្រើននាក់ទៀត ដែលកំពុងជាប់ឃុំនៅពន្ធនាគារព្រៃស គឺ លោក វង សំណាង កំពុងមានបញ្ហាសុខភាពទ្រុឌទ្រោម ជាពិសេសត្រង់ក្បាល ដោយសាររបួសចាស់របស់គាត់ ដែលត្រូវបានកងកម្លាំងឆ័ត្រយោង វាយឲ្យរងរបួសធ្ងន់ធ្ងរកាលពី១០ឆ្នាំមុន នេះបើតាមការរៀបរាប់របស់ប្រពន្ធលោក វឿង សំណាង គឺអ្នកស្រី ទៀង ចិន្តា ដែលបានចូលទៅសួរសុខទុក្ខប្តីនៅក្នុងពន្ធនាគារនៅថ្ងៃទី២២ ខែកញ្ញា។
អ្នកស្រី ទៀង ចិន្តា ថ្លែងថា អ្នកស្រីនៅតែព្រួយបារម្ភអំពីសុខភាពប្តី ដែលមានអាការៈកាន់តែធ្ងន់ធ្ងរក្នុងអំឡុងពេលប្តីលោកស្រីជាប់ពន្ធនាគារជិត២ឆ្នាំមកនេះ។ អ្នកស្រីថា ប្តីអ្នកស្រីមានជំងឺដូចជា ឈឺក្បាលពីរបួសចាស់ដែលអាជ្ញាធរបានវាយដំឲ្យរបួសយ៉ាងដំណំ កាលពីបាតុកម្មនៅផ្លូវវេងស្រេង មានជំងឺលើសឈាម ហើយថ្មីនេះឡើងជាតិអាស៊ីដជាខ្លាំង ដែលបណ្តាលឲ្យប្តីអ្នកស្រី ហើមជើងនិងស្ពឹកជើង។
អ្នកស្រីបន្តថា សព្វថ្ងៃអ្នកស្រីមានបន្ទុក និងសម្ពាធផ្លូវចិត្តជាខ្លាំង ដោយសារត្រូវរ៉ាប់រងចិញ្ចឹមកូនតូចម្នាក់ឯង និងត្រូវចំណាយលុយច្រើនទៅមើលប្តី ហើយបារម្ភអំពីសុខភាពរបស់គាត់នៅក្នុងពន្ធនាគារ។ អ្នកស្រីទទូចឲ្យរដ្ឋាភិបាលថ្មី ដោះលែងប្តីអ្នកស្រី និងសកម្មជនដទៃទៀតមានសេរីភាពឡើងវិញ និងមានឱកាសទៅព្យាបាលនៅមន្ទីរពេទ្យក្រៅឃុំ។
អ្នកស្រី ទៀង ចិន្តា៖ «ខ្ញុំសុំទាមទាររាជរដ្ឋាភិបាលថ្មី ស្នើសុំឲ្យដោះលែងប្តីខ្ញុំ វឿងសំណាង ក៏ដូចជាអ្នកទោសមនសិការផ្សេងៗទៀត ឲ្យគាត់មានសេរីភាព ដោយសារគ្មានទោសកំហុសអីទេ ហើយនឹងដើម្បីឲ្យគាត់បាននៅក្រៅឃុំព្យាបាលជំងឺ ព្រោះអីសុខភាពគាត់កាន់តែទ្រុឌទ្រោមហើយ អ៊ីចឹងណាបងចាស»។
លោក វឿង សំណាង មានអាយុ៤១ឆ្នាំ ជាអតីតចៅសង្កាត់រងទី២ជាប់ឆ្នោត របស់គណបក្សសង្គ្រោះជាតិ នៅរាជធានីភ្នំពេញ។ កាលពីឆ្នាំ២០១៣ លោក វឿង សំណាង ដែលពេលនោះ ជាព្រះសង្ឃ បានចូលរួមធ្វើបាតុកម្មទាមទារដំឡើងប្រាក់ឈ្នួលកម្មកររោងចក្រ ហើយនៅពេលនោះ លោក វឿង សំណាង រួមទាំងកម្មករផ្សេងទៀត ត្រូវកងទ័ពឆ័ត្រយោងវាយបង្ក្រាបស្ទើរស្លាប់បាត់បង់ជីវិត និងបានបញ្ចូនទៅសង្គ្រោះនៅមន្ទីរពេទ្យសិង្ហបុរី (Singapore) ។ នៅពេលនេះ ស្នាមរបួសចាស់របស់លោក បន្តឈឺចាប់រហូតមកដល់សព្វថ្ងៃ ជាពិសេសកាន់តែឈឺចាប់ខ្លាំងឡើង នៅពេលជាប់ពន្ធនាគារដែលគ្មានពេទ្យព្យាបាលត្រឹមត្រូវ។ លោក វឿង សំណាង ធ្លាប់រត់ភៀសខ្លួនទៅប្រទេសថៃ ប៉ុន្តែត្រូវបានអាជ្ញាធររដ្ឋាភិបាលលោក ហ៊ុន សែន សហការជាមួយសមត្ថកិច្ចថៃ ឆ្មក់ចាប់ខ្លួនបញ្ចូនមកឃុំនៅពន្ធនាគារព្រៃស កាលពីថ្ងៃទី៩ តុលា ឆ្នាំ២០២១។ សាលាដំបូងរាជធានីភ្នំពេញកាលពីខែធ្នូ ឆ្នាំ២០២២ បានផ្ដន្ទាទោសលោក វឿង សំណាង ព្រមទាំងសកម្មជន និងថ្នាក់ដឹកនាំគណបក្សប្រឆាំងចំនួន៣៧នាក់ដាក់ពន្ធនាគារក្នុងម្នាក់ៗចន្លោះពី៥ឆ្នាំ ទៅ ៧ឆ្នាំ ពីបទរួមគំនិតក្បត់ពាក់ព័ន្ធនឹងរឿងគម្រោងការវិលចូលស្រុករបស់ថ្នាក់ដឹកនាំគណបក្សសង្គ្រោះជាតិ កាលពីដើមខែមករា ឆ្នាំ២០២១។ សំណុំរឿងនេះសហគមន៍ជាតិ និងអន្តរជាតិបានចាត់ទុកថា ជារឿងនយោបាយ។
នាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត យល់ឃើញថា រដ្ឋាភិបាលអាណត្តិទី៧ គួរដោះស្រាយបញ្ហានយោបាយ ដោយដោះលែងអ្នកជាប់ឃុំដោយសារមូលហេតុនយោបាយឲ្យមានសេរីភាពឡើងវិញ។ លោកថា ក្នុងពេលប្រមុខរដ្ឋាភិបាល ទៅចូលរួមកិច្ចប្រជុំមហាសន្និបាតអង្គការសហប្រជាជាតិនេះ រដ្ឋាភិបាល គួរតែគិតគូរដោះស្រាយបញ្ហានេះ ដើម្បីមុខមាត់ប្រទេសជាតិ និងជាផលប្រយោជន៍ក្នុងការអូសទាញអ្នកវិនិយោគិនពីប្រទេសប្រជាធិបតេយ្យ។
លោក អំ សំអាត៖ «ប្រទេសទាំងហ្នឹងគេបានដឹងហើយ គេបានទទូចស្នើសុំសម្រាប់កម្ពុជារួចទៅហើយអ៊ីចឹងណា អ៊ីចឹងអ្វីដែលសំខាន់តើកម្ពុជាយើងហ្នឹងអាចនឹងកែលម្អទៅលើលំហប្រជាធិបតេយ្យលំហសិទ្ធិមនុស្ស សម្រាប់ប្រទេសយើងឲ្យមានភាពល្អប្រសើរដែរឬទេ អាហ្នឹងវាអាស្រ័យទៅលើឆន្ទៈនិងគោលនយោបាយរបស់រដ្ឋាភិបាលនៅក្នុងដោះស្រាយនូវបញ្ហាចម្រូងចម្រាសទាំងអស់ហ្នឹងបាទ»។
ជុំវិញរឿងនេះ វិទ្យុអាស៊ីសេរីពុំអាចសុំការឆ្លើយតបពីអង្គភាពអ្នកនាំពាក្យរដ្ឋាភិបាលខ្មែរ លោក ប៉ែន បូណា បានទេ នៅថ្ងៃទី២២ កញ្ញា។
សកម្មជនបក្សសង្គ្រោះជាតិ លោក វឿង សំណាង រួមទាំងសកម្មជនផ្សេងទៀតប្រមាណ ៧០ នាក់ ត្រូវបានអាជ្ញាធរកម្ពុជាចាប់ដាក់ពន្ធនាគារ ក្រោមការចោទប្រកាន់ពីតុលាការ ពីបទញុះញុង និងរួមគំនិតក្បត់។ អង្គការសង្គមស៊ីវិលជាតិ និងអន្តជាតិចាត់ទុកការចាប់ខ្លួននេះថា ជាការធ្វើទុក្ខបុកម្នេញផ្នែកនយោបាយ និងស្នើឱ្យរដ្ឋាភិបាលដោះលែងពួកគេឱ្យមានសេរីភាពឡើងវិញដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។