ប្រពន្ធចៅសង្កាត់ប៉ោយប៉ែតជាប់ឆ្នោតគណបក្សសង្គ្រោះជាតិ លោក ចៅ វាសនា ដែលកំពុងជាប់ឃុំនៅពន្ធនាគារត្រពាំងផ្លុង ជាប់ព្រំដែនប្រទេសវៀតណាមត្អូញត្អែរថា លោកស្រីអាណិតស្រណោះប្ដីជាខ្លាំងក្រោយពេលឃើញតុលាការរបបក្រុងភ្នំពេញដោះលែងសកម្មជនសង្គម បរិស្ថាន និងសកម្មជននយោបាយជាបន្តបន្ទាប់។ មន្ត្រីសិទ្ធិមនុស្សនៅតែយល់ថា ការចាប់ខ្លួនលោក ចៅ វាសនា ជាការធ្វើទុក្ខបុកម្នេញនយោបាយ និងស្នើឱ្យតុលាការដោះលែងលោក និងសកម្មជនដទៃទៀតឱ្យមានសេរីភាពវិញ ដើម្បីបន្ធូរបន្ថយស្ថានការណ៍នយោបាយ។
សាច់ញាតិសកម្មជនបក្សប្រឆាំងនៅក្រុងប៉ោយប៉ែត បន្តរិះគន់តុលាការរបបក្រុងភ្នំពេញដែលបន្តឃុំខ្លួនប្ដីលោកស្រីក្នុងពន្ធនាគារដោយអយុត្តិធម៌នេះថា ជាការធ្វើបាបប្រជាពលរដ្ឋស្លូតត្រង់ដែលមាននិន្នាការផ្ទុយពីរដ្ឋាភិបាល។
ប្រពន្ធលោក ចៅ វាសនា គឺ លោកស្រី វង្ស គិមហុង ប្រាប់វិទ្យុអាស៊ីសេរីនៅថ្ងៃទី១៥ វិច្ឆិកាថា ប្ដីរបស់លោកស្រីជាមនុស្សស្អាតស្អំ ដែលតែងតែធ្វើការងារដើម្បីប្រយោជន៍រួមនៅក្នុងសង្គម ដែលតុលាការគួរតែដោះលែងលោកចៅ វាសនា តាំងពីដំបូង ដោយមិនត្រូវដាក់ឃុំលោកមកដល់ពេលនេះឡើយ។ លោកស្រីចាត់ទុកការបន្តឃុំខ្លួនប្ដីលោកស្រីដោយអយុត្តិធម៌បែបនេះថា ជាការបោសសំអាតសំឡេងអ្នកប្រជាធិបតេយ្យ ដែលជាឆ្អឹងទទឹងករបស់រដ្ឋាភិបាល។ លោកបញ្ជាក់ថា ការធ្វើបែបនេះជាការធ្វើឱ្យគ្រួសារគាត់ឈឺចាប់កាន់តែខ្លាំង និងមើលឃើញកាន់តែច្បាស់ពីទង្វើអាក្រក់របស់រដ្ឋាភិបាលរបបឯកបក្ស៖ «ខ្ញុំអាណិតគាត់ណាស់ដេកយប់ៗ អត់ចង់លក់ទេ ព្រោះនឹកឃើញដេក ក៏ពិបាកហូបចុកក៏ពិបាក។ ដូចថាយើងមិនខុសអីធ្វើទៅជាខុស ពេលឡើងតុលាការខ្ញុំនិយាយតាមធម៌ព្រះ យើងធ្វើល្អបានល្អ ប៉ុន្តែអ្នកឯងធ្វើលើគ្រួសារខ្ញុំប៉ុណ្ណឹងអ៊ីចឹង ថ្ងៃមុខថ្ងៃគ្រួសារអ្នកឯងវិញអ្នកឯងឈឺចាប់លើសហ្នឹងទៀត។ ហេតុអីអាខុសធ្វើត្រូវអាត្រូវធ្វើខុសអីពាសពេញ ដូចគ្រួសារខ្ញុំកាត់ទោស៥ឆ្នាំ តាមួយម៉ោងគ្មានចុះអត់ ? ។ ទោសគេ ៥ឆ្នាំលើកទៅលើកមកជាលិចជាកើតនៅសល់ ២ឆ្នាំ ឬ ១ឆ្នាំជាងអី ប៉ុន្តែគ្រួសារខ្ញុំហេតុអីដល់ថ្នាក់ប៉ុណ្ណឹង ខ្ញុំថាមិនអីទេឱ្យតែគាត់ស៊ូបានឈឺជាអីខ្ញុំចេញលុយឱ្យគាត់មើល » ។
ការលើកឡើងនេះ ធ្វើឡើងក្រោយពេលលោកស្រីសង្កេតឃើញថា តុលាការរបបក្រុងភ្នំពេញបានដោះលែងសកម្មជនបរិស្ថាន សកម្មជនសង្គម និងសកម្មជននយោបាយជាច្រើននាក់ចេញពីពន្ធនាគារជាបន្តបន្ទាប់។ ការដោះលែងនេះ ដោយអ្នកខ្លះបានអនុវត្តទោសគ្រប់ចំនួន និងខ្លះទៀតដោះលែងឲ្យនៅក្រៅឃុំបណ្ដោះអាសន្ន ដោយមានភ្ជាប់លក្ខខ័ណ្ឌ តឹងរ៉ឹងជាច្រើន ដូចជា ជូនដំណឹងដល់ព្រះរាជអាជ្ញា ប្រសិនបើចង់ចេញក្រៅប្រទេសផ្លាស់ប្ដូរទីលំនៅ និងត្រូវបង្ហាញមុខសមត្ថកិច្ចជារៀងរាល់ខែ ព្រមទាំងមិនឲ្យទាក់ទងអ្នកដែលមានសំណុំរឿងជាមួយគ្នាជាដើម។ ចំណែកប្ដីរបស់លោកស្រី តុលាការមិនបានដោះលែងឱ្យបានសេរីភាពនោះទេ បើទោះបីជាលោកជាប់ពន្ធនាគារដោយអយុត្តិធម៌រយៈពេលជិត ៥ឆ្នាំហើយក្ដី។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៥ វិច្ឆិកា ដោយសារទូរស័ព្ទចូលពុំមានអ្នកទទួល។
ប៉ុន្តែអ្នកនាំពាក្យគណបក្សកាន់អំណាចលោក សុខ ឥសាន ប្រាប់វិទ្យុអាស៊ីសេរីថា រដ្ឋាភិបាលដែលដឹកនាំដោយគណបក្សប្រជាជនកម្ពុជាមិនអាចលូកដៃលើរឿងនេះបានទេ ពីព្រោះលោកថា ការបន្តឃុំខ្លួនលោក ចៅ វាសនា និងសកម្មជនបក្សប្រឆាំងនេះ ជាសិទ្ធិរបស់តុលាការ។ បន្ថែមពីនេះលោកនៅតែអះអាងដដែលៗ ដូចពេលមុនថា តុលាការបន្តឃុំខ្លួនពួកគេជារឿងត្រឹមត្រូវ ដោយលោកចោទថា សកម្មជនបក្សប្រឆាំងទាំងនោះបានប្រព្រឹត្តបទល្មើសធ្ងន់ធ្ងរ៖ «អាហ្នឹងហើយដែលថាយល់ឃើញផ្ទាល់ខ្លួនទេ អ្នកដែលធ្វើខុសហើយម៉េចទទួលស្គាល់ថាខុស។ តុលាការគេមាន ឯកសារគេមានភស្តុតាង គេមានពិរុទ្ធភាពស្ថាន ទម្ងន់ទោសយ៉ាងម៉េចគេកាត់ទៅតាមគោលការណ៍ច្បាប់ហ្នឹង។ អាហ្នឹងបានវាត្រូវ ចោរលួចចាប់បាននៅមុខហើយនៅតែថាអត់លួចទេ ទាល់តែមានភស្តុតាងមានអីត្រឹមត្រូវបានប្រកែកអត់កើត អាហ្នឹងវារឿងតែប៉ុណ្ណឹង » ។
ទោះជាយ៉ាងណា ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា នៅតែយល់ថា ការចាប់ខ្លួនលោកចៅ វាសនា ជាការធ្វើទុក្ខបុកម្នេញផ្នែកនយោបាយ ពីព្រោះលោកមើលឃើញថា មន្ត្រីបក្សប្រឆាំងរូបនេះមិនបានប្រព្រឹត្តខុសច្បាប់អ្វីឡើយ។ មន្ត្រីសិទ្ធិមនុស្សរូបនេះ ស្នើឱ្យតុលាការដោះលែងលោក ចៅ វាសនា និងសកម្មជនបក្សប្រឆាំងទាំងអស់ ដែលកំពុងជាប់ឃុំនៅពន្ធនាគារឱ្យមានសេរីភាពវិញ ដើម្បីបន្ធូរបន្ថយស្ថានការណ៍នយោបាយនៅកម្ពុជា៖ «ដូចខ្ញុំបានលើកខាងដើមអីចឹងថា រដ្ឋាភិបាល គួរតែរូតរះក្នុងការបង្ហាញឥរិយាបថ ឱ្យមតិជាតិអន្តរជាតិមើលឃើញអំពីឆន្ទរបស់រដ្ឋាភិបាល ក្នុងការសម្របសម្រួលបញ្ហានយោបាយដើម្បី ឈានទៅរៀបចំការបោះឆ្នោតមួយឱ្យមានការចូលរួមត្រឹមត្រូវ នេះជារឿងសំខាន់បាទ !» ។
លោក ចៅ វាសនា គឺជាចៅសង្កាត់ប៉ោយប៉ែតជាប់ឆ្នោតគណបក្សសង្គ្រោះជាតិ ដែលមានដើមកំណើតជាខ្មែរក្រោម។ ក្នុងវ័យ ៥៧ឆ្នាំ លោកគឺមន្ត្រីបក្សប្រឆាំងទី១ ដែលជាប់ពន្ធនាគារយូរជាងគេ ដោយសាលាដំបូងខេត្តបន្ទាយមានជ័យ បានផ្ដន្ទាទោសលោកឱ្យជាប់ពន្ធនាគាររយៈពេល ៥ឆ្នាំ ក្រោមបទចោទប្រកាន់ញុះញង់ឲ្យប្រើអំពើហិង្សា មានស្ថានទម្ងន់ទោសពាក់ព័ន្ធនឹងរឿងចុះឃ្លាំមើលកម្មករអូសរទេះតវ៉ានៅក្រុងប៉ោយប៉ែត។ លោកបានជាប់ឃុំក្នុងពន្ធនាគារខេត្តបន្ទាយមានជ័យតាំងពីដើមឆ្នាំ២០១៧ ប៉ុន្តែនៅចុងខែវិច្ឆិកា ឆ្នាំ២០២០ អាជ្ញាធរបានបញ្ជូនលោក ចៅ វាសនា ទៅឃុំខ្លួននៅពន្ធនាគារត្រពាំងផ្លុងរហូតមកពេលនេះ។ ចៅសង្កាត់ប៉ោយប៉ែតគណបក្សសង្គ្រោះជាតិជាប់ឆ្នោតរូបនេះ បានអនុវត្តទោសជិតគ្រប់ ៥ឆ្នាំហើយ ពោលគឺនឹងគ្រប់កំណត់ទោស នៅថ្ងៃទី១៦ ខែកុម្ភៈ ឆ្នាំ២០២២ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។